1 Thessalonians 5
5
Itqanaitchitchi Atanġum Qaiñiksraŋanun
1Tavra aniqatiit, tuyuqtituŋitchusi iñuŋmik kimigliqaa uqallautisuglusi qakugu Atanġum qaitqigñiaqtilaaŋanik, naagga sut piyumaaqtilaaksraŋiññik Ataniq qaiŋaiñŋaan. 2#Mt 24.43; Lk 12.39; 2 P 3.10.Ilivsivsauq iḷisimalluataġmiusi Atanġum qaiñiksrautaa niġiiḷḷautiniaqtilaaŋanik, tigligayuktitun unnuakuaqtuatun. 3Iñuich uqauraġniaqtillugich inna, piallataitchuq, tupinŋanaitchuġlu, tavraŋŋatchiaq piyaqquutim kasuġai, aasii qanuġlugu naŋaġumiñaitkaat. Aġnatuttauq aulayyautikkaŋatun tavraŋŋatchiaq, tainnaptauq taamna piyaqquun tikitkayuŋmiuq tavraŋŋatchiaq. 4Aglaan ilivsi aniqatiit, niġiuktuagurusi Atanġum qaġġiviksrautaanik, niġiiḷḷaqtauniaŋitchusi tupairaulusi, tigligayuktim tupaimmatun iñuich unnuami. 5Qanuq iluqasi miqłiqtuġigaasi qaummaum uvluvlu, nalaunŋarualiqirauvlusi. Miqłiqtuġiŋitkaatigut taaqtuam unnuavlu, pigiitchuanik savaaqaġluta. 6Tavraasii, ataramik itqanairrutilakput ilaan qaitqigñiksraŋa nalaunŋarualiqiluta, iñuktitun itqumaruatun naluksriñŋaitchuatullu. Irrusiqaŋitcha allatun iñuktitun itqanaiñŋitchuatun, siñiktuatun iłłutiŋ. 7Qanuq unnuaq siñiksaġviksraġuqtuatun, suli iñuŋnun imiŋasiviuvluni, tainnatuttauq tamatkua pigiitchualiqiugaqtuat isumaaluuttaġiŋitkaat itqanaitchuglutiŋ Atanġum qaitqigñiksraŋanun, nalaunŋaruakullu iñuuniaġniġmun. 8#Is 59.17; Eph 6.13-17.Aglaan, uvagut iñuuniqapta iḷisimavlugu Atanġum qaiñiaqtilaaŋa, kiikaa iñuuta nalaunŋaruakun. Itta aŋuyaktitun annuġaaqaqtuatun aŋuyaunnanik pisiktaiḷḷisinik akiḷḷiñiñ, uvagut pigivlugu ukpiġun piviuttaqqullu satqagutigimmatun, suli annagummarvut niaqquaġiitkutigimmatun. 9Qanuq God-im sivunniŋaitkaatigut tatavsaunmun, aglaan piññaktaaġitquvlugu annaun Ataniptigun Jesus Christ-kun, 10tuqqurriŋaruaq uvaptiŋnik, uvaptiŋnun iñuuqatigitquvluni isuitchuamun, iñuugaluaġniġupta naagga tuquŋagaluaġniġupta ilaa qaikpan. 11Tamatkua pisigilugich, qapiŋaisaaġutisitchi avanmun sivunmuktuqatigiigḷusiḷu, tainna pigaluaġmiḷḷavsi.
Aqulliich Iḷisaurrutit Paġlasuiqsaaġutillu
12Aniqatiit iŋiulagivsi, isummatigilluataqsigik umialiŋnat atanniqsimanniktuat aŋaiyyuliqiruani, siġġaqiruat akunnavsiññi, tamatkua qauriññiksuiruat ilivsiññik. 13Isummatigilluatapiaġataqsigik tamatkua umialiŋnat, suli iḷumun piviuttaġiqpaglugich pisigilugu savaaġikkaŋat. Piallatiqaŋaiġḷusi avanmun. 14Aasii siḷġiqsuġivsi, aniqatiit, tiliuqsigik ittuaqtit, qapiŋaisaaqsigik qapiŋasiruat, ikayuqsigik suaŋaitchuat ukpiġunmiŋni qimmaksautairrutilugich iluqaisa. 15Iñuum pimaqłukpasi, suuramikunnii akisaġnasi pigiitchuamiktauq, aglaan ataramik nakuurualiqiniaġlusi avanmun iñupayaanullu. 16Quviasugitchi ataramik, 17aŋaiyyutiqaġitchi ataramik iḷuvsiññi, 18quyyavigisiuŋ God iluqaisigun piruatigun ilivsiññun, qanuq tainna God-im pitqugaasi, ilivsi atausiŋŋuqatauŋaruasii Christ Jesus-mun.
19Nutqaqtinniaqsaanagu Ilitqusiġiksuam savaaġikkaŋa, qamitchiñiaġmatun igniġmik. 20Asiḷiqirualiñagich uqaqtiŋisa God-im uqaluŋich, 21aglaan iłuaqtilaaġlugich uqaluŋich, akuqtuġlugich itqaumalugiḷḷu sut nakuuruat. 22Piiññiaġitchi qanusipayaamiñ pigiitchuamiñ.
23God-iptuq tutqiutiqaqtitchiruam qaunagilisi piḷuksitchaiḷiḷusi suuramikunnii, ilitqutchisiḷu, iñuggutisiḷu, timisiḷu suaŋatuiññaġumiñaqsiḷugich, pasiñaġumiñaiḷḷugiḷḷu qaikpan Ataniqput Jesus Christ. 24God ququaqtiksi miqłiqtuġisukłusi ukpiġnapiaqtuq, suli ilaan taŋŋiqsinniaġai taapkua. 25Aniqatiit, aŋaiyyutisigut.
26Paġlasigik iluqaisa aniqatit paġlatikaaŋannik ukpiqtuaguruat. 27Piraksripiaġivsi Atanikun ukua tuyuutit taiguaqtitquvlugich iluqaiññun aniqatinun. 28Nagliktuutiqpaŋata Atanipta Jesus Christ itqatigilisi.
Currently Selected:
1 Thessalonians 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
