Lukə 9
9
Jesus ə nwɔ kalan nɛa pow kɔ́w hveelɛ tɔɔ
(Matie 10.5-15; Markə 6.7-13)
1Jesus ə nwɔ kalan nɛa pow kɔ́w hveelɛ ŋąąkpɔn, ə mąą laa tɛɛ di pɔ da huwalawala, diɛ ɲį́nɛ̨nŋąa kpɛ la nuą pulu, diɛ ɲɔ̨n gbɛɛ nuą diɛ. 2Yili pulu, yɛ diɛ: ka li, ka Yálá-taa tɔɔlaa mąą wɛlɛɛ lɛlɛɛ laa həli, ka ɲɔ̨n gɛ nuą kɔ́lɔi pono. 3Yɛ diɛ: «Ka hvo hiɛ kulɔ hɛn nɔpee ta həɠə: ə mą kɛ, hiɛ tunwɔ̨n mə, ə mą kɛ nwɔ̨nɔ̨ a hiɛ kulɔ ɓíi, ka hvo kɔ̨nɔ̨n ɉəɠə. Ka hvo wali həɠə. Nu ta hvo həɠə hveelɛ həɠə. 4Ɓɛi lɔpee da di yee hee laa ka mui, ka lɛɛ mąą kɛɛnąą tii, ə lɛɛ la ɉu ka pulu pənəi lɔwai ə ɉəli. 5Ɓɛi lɔpee da wala di yee hee laa ka mui, ka ka kɔ́wɔ ɓa muluun kpɛŋɛn ka nɛɛ laa, əgɛ, di gɔlɔn diɛ daa mɛ̨nį ɲɔ̨n gɛ.»
6Galan nɛa tii də li, diɛ tɛɛ daaɠaa kəlee hu, diɛ Yálá-taa tɔɔlaa mąą mɛ̨nį wɛlɛɛ lɛlɛɛ laa həli; diɛ ɲɔ̨n gɛ nuą kəlee kɔ́lɔi pono.
Herodə nwɔ liihɛlɛn
(Matie 14.1-12; Markə 6.14-29)
7Nąąlɔwai, Herodə ə kɛ a gbahalanamą Ɉude lɔi hu. Mɛ̨nįɠaa kpɔ tii galan nɛa di kɛi gɛ, Herodə ə gəlee mąą pələ mąn. Gwəi ə pili mą, yii kpɔ kɛ əgɛ, hvo kɛ gɔlɔn. Mąąhɔlɔɓo, nu tamąą di kɛi kɛ diɛ: «Ɉaan-Batistə ka aa muhəɠə aa kulɔ haaɓɛlaa lɔwai.»
8Nuą taɠaa diɛ kɛ diɛ: «Eli ka tii aa pənə aa pa.»
Daɠaa, diɛ kɛ mą: «Yálá kwəi mɛ̨nį hukulɔ nuą pɔlɔɠaa ta ka tii aa muhəɠə a kulɔ haaɓɛlaa lɔwai.»
9Kɛlaa, Herodə yɛ mą: «Akɛti, gbɛɛ ɓaa a nu yili kani? Yaan, ŋą́ą́ li kɛ mo, daa Ɉaan nwun galən dee ŋą!»
Yili pulu, Herodə ə kɛi Jesus kwɛli, əgɛ, ə gaa.
Jesus ə nu waa lɔɔli kɔ̨nɔ̨n gɛ
(Matie 14.13-21; Markə 6.30-44; Ɉaan 6.1-14)
10Jesus nwɔ nu pow kɔ́w hveelɛ tii ə di tɔɔ, di pənə di pa, yiiɠaa kpɔ di gɛ, di gəlee hukulɔ mą. Ə di həɠə, da diɛni də li Bɛtsaida daa kwɛlɛ, di tɔ̨nɔ̨ kɛɛnąą. 11Kɛlaa, nu kpului tii kɛ laa, di gbaɠala kaa, di hvilɛn di pulu. Jesus ə ɲee hee di mu. Ə Yálá-taa tɔɔlaa mąą mɛ̨nį hukulɔ diɛ: ə lɛɛ, nuąi ɲɔ̨n ə kɛ diɛ, ə di kɔ́lɔi pono.
12Yii kɛa hvitili ə kɛi pu, galan nɛa pow kɔ́w hveelɛ tii di lɛɠɛ Jesus ɓa, diɛ mą: «Mo nuą ŋɛ̨i diɛ, də li gu kwɛlɛ taa kpɛa-kpɛaɠaa, da daa pɛlɛɛɠaa hu, əgɛ, di di kɔ̨nɔ̨n gwɛli da di yiiɠaa. Mąąhɔlɔɓo, ɓɛ kaa a lɔi pun ɉu, hɛn da hvo ɓɛ.»
13Kɛlaa, Jesus ə mo diɛ, yɛ diɛ: «Kaa mun, ka kɔ̨nɔ̨n dɛɛ di pɔ.»
Di nwoo ŋąąpənə diɛ mą: «Lɛɠɛ lɔɔli lɔ ɓə ku yəi, da hɔ̨nwɔ̨lee hveelɛ. Akɛti, ə́ kaa bɔ, kwə li ku nu kpulu kɛnɛ̨i ŋɛ̨i kəlee kɔ̨nɔ̨n ɲá?»
14(Yaan, nu kpului tii lonon ŋąą a pɛli kɛi a hinąą waa lɔɔli.) Jesus yɛ nwɔ kalan nɛai diɛ: «Ka nuą hee a nu pu-lɔɔli-lɔɔli.»
15Galan nɛa di nwoo hon. Di gɛ yɛ pələi tii ə mo la. 16Jesus ə nɛɠɛ lɔɔli da ɉɔwɔlee hveelɛi tii həɠə, ə ɲɛ̨i hee ɲələi, ə Yálá hɛɠɛɛɓo gɔ̨nɔ̨n tii mąą mɛ̨nį ɓa. Ə ɉəɠə ə dɛɛ nwɔ kalan nɛai pɔ, əgɛ, di ŋąąkwɛlɛ nuą diɛ. 17Nu kəlee di da hɔlɔɓo, di mį́į́ yɛ pələi di kaa la bɔ. Gbəlii lɛɛ, di gbɔn gee ɓa, ə kpɔlɔ pow kɔ́w hveelɛ laahvɛɛ.
Piɛrə ə mo yɛ: Jesus kaa a Nwun mąąɓomun Yálá ə naakwɛlanmo
(Matie 16.13-19; Markə 8.27-29)
18Yələ ta, Jesus yaa tɔ̨nɔ̨ ə kɛi Yálá hvɛli, nwɔ kalan nɛa di laŋąn ma. Ə di mąąni kɛ, yɛ diɛ: «Nuą da kɛ kɛi lə mą́ą́ mɛ̨nį hu?»
19Di nwoo ŋąąpənə diɛ mą: «Nu taɠaa da kɛ kɛi diɛ: ‹Ɉaan-Batistə ɓaa a yɛ́.› Daɠaa diɛ kɛ nwɔ̨nɔ̨ diɛ: ‹Eli ɓaa a yɛ́.› Daɠaa diɛ kɛ nwɔ̨nɔ̨ diɛ: ‹Ə́ kaa a Yálá kwəi mɛ̨nį hukulɔ nuą wɔlɔ kɛ da, yii aa muhəɠə aa kulɔ haaɓɛlaa lɔwai.›»
20Jesus ə di mąąni kɛ, yɛ diɛ: «Kaan, ka kɛ kɛi diɛ gáá aa gbɛɛ?»
Piɛrə ə nwoo pulu pənə yɛ mą: «Ə́ kaa a Nwun mąąɓomun Yálá ə naakwɛlanmo.»
Jesus ə ɉaa mɛ̨nį da muhəɠə mɛ̨nį ɓo
(Matie 16.20-28; Markə 8.30—9.1)
21Yili pulu, Jesus ə mo kpɔ diɛ a nwanąąi, yɛ diɛ: «Ka hvo mɛ̨nį ŋɛ̨i ɓo nui lɔpee ta ɓa.»
22Ə mo nwɔ̨nɔ̨ diɛ yɛ diɛ: «Hvo kɛli, Nu Lon ə pa mɔ̨nɔ̨ mį́į́ kpɔ kɛnɛ̨, nu pɔlɔɠaa, ɉala laa həli nuą kpɛa-kpɛaɠaa da tɔ́n galamɔ̨ɔ̨ɠaa di kaa pai lənəi ma, nuą di baa. Voló haaɓa yələ, a muhəɠə ə kulɔ haa ɓɛlaa lɔwai.»
23Yili pulu, Jesus ə mo nu kpului tii kɛ nąą diɛ, yɛ diɛ: «Akɛ nu ta kaa bɔ ə hvilɛn bului, hvo kɛ li mąą nu ə lənə gbɔwɔ ɓa, ə ɉaa wulu həɠə a hvóló kəlee ə hvilɛn búlú. 24Mąąhɔlɔɓo, nui a nɔ̨ɔ̨ mąąkɔ̨nwɔ̨, a hvɛɠɛ la. Kɛlaa, nui hva ɉaa mɛ̨nį niihɛlɛn ɉee, hva hvɛɠɛ a nɔ̨ɔ̨. 25Nu a yɛnɛ̨ɛ̨ hɛnŋąa kəlee hɔlɔɓo, ə haa, yili dɔ̨nɔ̨ ɓaa a lə? 26Akɛ nu a nwumɛ̨ náá ɓoi, ə nwumɛ̨ nwóó hon ɉii, ɓɛlɔwai Nu Lon kaa pai pai la nwɔ mąąwiɛ hu, da Nąn Yálá nwɔ mąąwiɛ hu, da Yálá nwɔ malakaɠaa, a nwumɛ̨ mąą nui laa ɓoi. 27Gáá tɛ̨ą ɓoi kaa, nu taɠaa kaa ɓɛ ka lɔwai, di hvo pai haai, ə lɛɛ la ɉu di Yálá-taa tɔɔlaa kaa.»
Jesus ɲɛ̨i laa mąą ə hvalin
(Matie 17.1-8; Markə 9.2-8)
28Mɛ̨nįi tii ɓoɔ, lɔwɔ tɔ̨nɔ̨ ə kulɔ ɉu, Jesus ə Piɛrə, Ɉaan da Ɉakə di həɠə da diɛni də li yee ta ɓa Yálá hvɛli mɛ̨nį ɓa. 29Ɓɛlɔwai Jesus ə kɛi Yálá hvɛli la, ɲɛ̨ilaai mąą ə hvalin, nwɔ həɠəi gwələ ɲɛ̨i ə kulɔ kpɔ pə-pə. 30Kpɔlɔ tii ŋąąɓa, nu hveelɛ di kulɔ nąą, da Jesus ni diɛ mɛ̨nį ɓo. Nu hveelɛi tii ɓaa kɛ a: Moisə da Eli. 31Mąąwiɛ kɛnɛ̨ ta ə həɠə yələi ə di mąą kpəlaan. Pələi Jesus kaa pai kɛ nwɔ tiɓoi laahvɛɛi la, a ɉaa mɛ̨nį Ɉerusalɛmə, yili ɓə Moisə da Eli, ə mą kɛ Jesus ni di kɛi mo. 32Piɛrə da mɛlaa di kɛi yii kpɔ kɛnɛ̨. Kɛlaa, ɓɛlɔwai di di ɲɛ̨ilaa ɓo la, di Jesus nwɔ mąąwiɛ kɛnɛ̨i tii kaa, ə lɛɛ da nu hveelɛi tii kɛ tɔɔ ni gwɛlɛ. 33Ɓɛlɔwai nu hveelɛi tii di kɛi həɠə la Jesus kwɛlɛ, Piɛrə ə mo Jesus ɓa, yɛ mą: «Kalamɔ̨ɔ̨, a kɛ gwa lɛɛ ɓɛ, yili ŋąą nɛɛi kpɔ kɛnɛ̨. A kɛ tii, kwa həɠə pɛlɛ haaɓa tɔɔ; dɔ̨nɔ̨ ə kɛ a ə́ wɔ, dɔ̨nɔ̨ ə kɛ a Moisə nwɔ, dɔ̨nɔ̨ ə kɛ a Eli nwɔ.» (Nwoo tii Piɛrə ə kɛi mo, hvo kɛi ŋąą kaa gbɔwɔ yəi.)
34Ɓɛlɔwai ə kɛi mo la tii, tulɔ kpiliɠilin gɛnɛ̨ ta ə yɛɛ, ə di mɛ̨i kpulu a nįnįn. Gaa tii galan nɛa di mo, dulɔ kpiliɠilin tii ə di mąątínɛ̨n, di ɲɔw kpɔ kɛnɛ̨. 35Woo ta ə kulɔ dulɔ kpinį tii hu, yɛ kɛ mą: «Nui ŋɛ̨i kaa a Nííɓa Lon ɉulɔnu, yii ŋą́ą́ ɉəɠə ɉu. Ka ka wəli tɔɔ nwoo ɓa!»
36Nwoo tii ɓoɔ pulu, Jesus yaa tɔ̨nɔ̨ gbən lɔ ɓə kɛa lɛɛ laa tɔɔ ni. Galan nɛa tii di lɛɛ kpɔ a di mɛ̨i haa, mɛ̨nįi tii di gaa di hvo ɉukulɔ nui lɔpee ta ɓa.
Jesus ə ɲį́nɛ̨n gbɛ lokolo ta pulu
(Matie 17.14-18; Markə 9.14-27)
37Mąą yələ laa ɓoɔ, di həɠə ɲee ɓa diɛ yɛɛ, nu kpulu kɛnɛ̨ ə pa, diɛ Jesus laakwiɛn. 38Nu kpului tii lɔwai, hulɔnu ta ə kɛi tómą a nwoo kɛnɛ̨ɛ yɛ kɛ mą: «Kalamɔ̨ɔ̨, gáá nɛ̨ɛ̨mąą hvəə yɛ, ə́ ɲɛ̨i hee nón ɉulɔnu ŋɛ̨i ɓa, yaa tɔ̨nɔ̨ gbən lɔ ɓə gaa ɲə́i. 39Ɲįnɛ̨n tii a kɛ dooi, yɛ tómą, yili pulu, yɛ ɉu kpɛlin gbɔ a nwala-walaa, ɲɛa-ya hvili yɛ tɔɔ, a nąą nɔ̨nwɔ̨ ɓo kpɔ a mɔlɔɔ, hva tee mą lɔ tii ɉa. 40Ŋą́ nɛ̨ɛ̨mąą hvə ə́ wɔ kalan nɛai diɛ, gɛ́ di ɲį́nɛ̨n tii kpɛ nón bulu; kɛlaa, di hvo pɛli mą.»
41Jesus ə haŋą nuą tii kɛ laa diɛ, yɛ diɛ: «Ee ka wɔ laa na laa hvo kɛnɛ̨ li, ka wɔ mɛ̨nį ɲɔ̨nwɔ̨ɔ̨i! Akɛti, gáá pai lɛɛi ka pɔ hvo kɛli mįnɛ̨ lɔwai? Jesus yɛ ɉulɔnui tii ɓa: Pa a ə́ lon tii ɓɛ.»
42Yii kɛa nokoloi tii mąą ə kpuɔ Jesus ɓa, ɲįnɛ̨n ə nokoloi tii hu kpɛlin kpɔ a nwąną lɔɔ pələ. Kɛlaa, Jesus ə haŋą ɲįnɛ̨n tii ɓa a nwala-walaa, ə gbɛ nokoloi tii pulu, gɔlɔi ə pono, ə dɛɛ nąn bɔ. 43Nuą tii kəlee kwəi ə pili diɛ, Yálá nwɔ mąąwiɛ kɛnɛ̨i tii di gaa mąą mɛ̨nį ɓa.
Jesus ə ɉaa mɛ̨nį ɓo nwɔ̨nɔ̨
(Matie 17.22-23; Markə 9.30-32)
Mɛ̨nį tii Jesus əgɛ, gwəi pili mąą ə lɛɛ lɔ nuą tii diɛ, yɛ nwɔ kalan nɛai diɛ: 44«Mɛ̨nį ŋɛ̨i gáá moi kaa, nąą kili ə lɛɛ ka ŋą kpɔ kpaan. Di kaa pai Nu Lon tɛŋɛn gwɛlɛi nuą diɛ.»
45Kɛlaa, di hvo nwoo tii kpaɠala kaa, mąąhɔlɔɓo, nwoo tii mukulaa loɔi kɛ diɛ, ə lɛɛ, di kɛi ɲɔw Jesus mąąni kɛi yili mąą mɛ̨nį ɓa.
Gbɛɛ ɓə a nu kɛnɛ̨?
(Matie 18.1-5; Markə 9.33-37)
46Galan nɛa di kɛi hɛa too di kee lɔwai, diɛ kɛ mą: gbɛɛ ɓə a nu kɛnɛ̨? 47Jesus ə gbaɠala kaa, ə nɛɛ mą ə lokolo ta həɠə ə ɉee gwɛlɛ. 48Yili pulu, ə mo diɛ, yɛ diɛ: «Nui a ɲee hee nokoloi ŋɛ̨i mu ɲą́ą́ mąą mɛ̨nį ɓa, a kɛ tii, ɲą́ą́ ka tii aa ɲee hee mú, nui a ɲee hee múi, a kɛ tii, nui dɛ́ɛ́, yaa ka tii aa ɲee hee mu. Mąąhɔlɔɓo, nui gaa a lokolo ka lɔwai, yaa ɓə gaa a nu kɛnɛ̨.»
Nui hvo a gu yowo, gaa a gu ta
(Markə 9.38-40)
49Ɉaan ə mo kɛa Jesus ɓa, yɛ mą: «Kalamɔ̨ɔ̨, ku nu ta kaa, yɛ ɲį́nɛ̨n gbɛ ə́ laa hu, ku kɛ bɔ, ku mo mą ə kpəla mą. Mąąhɔlɔɓo, hvo kɛ a ku ta.»
50Jesus ə nwoo pulu pənə yɛ mą: «Ka hvo kɛ mą kpəla mą, mąąhɔlɔɓo, nui hvo muhəɠə li ka laa ɓa, ka diɛni ɓə ka tɔɔ.»
Samari taa ta hu nuą, di hvo di yee hee Jesus mu
51Ɓɛlɔwai Jesus ə kɛi pa həɠəi la lɔi mɛ̨i yɛ tɛ yələi, nąąlɔwai kɛɛ kɛa həli, ə niikpələ kpɔ, ə ɲɛ̨i walawala yɛ li Ɉerusalɛmə. 52Ə wɛlɛɛ ɓo nuą tɔɔ də li tɔwɔ, yii kɛa də li di tɛ Samari taa ta hu, əgɛ, di kɛɛnąą ta pɛli ɓɛi a pa ə lɔ laa. 53Kɛlaa, daai tii hu nuą di hvo di yee hee Jesus mu, mąąhɔlɔɓo, ə kɛi li Ɉerusalɛmə pələ. 54Ɓɛlɔwai galan nɛa hveelɛi tii di yili bələ mɛ̨n na, di mo Jesus ɓa, diɛ mą: «Ną́mu, akɛ ya hvaa mą, ku mo nwɔ̨n ə həɠə yələi ə yɛɛ ə di kələn.»
55Jesus ə tinɛ̨n, ə haŋą diɛ. 56Yili pulu, də li taa takpɛli hu.
Nuąi di kaa bɔ di hvilɛn Jesus pulu, mąąnɛ̨ɛ̨ di Yálá-taa tɔɔlaai laa həli
(Matie 8.19-22)
57Ɓɛlɔwai di kɛ la bələ ɓa diɛ li, nu ta ə mo Jesus ɓa, yɛ mą: «Gáá bɔ ŋą hvilɛn ə́ pulu, ɓɛi lɔpee ya kɛi li laa, ŋą kɛ ə́ pɔ.»
58Jesus yɛ mą: «Kɛlɛnŋąa lɔ wolo kaa di yəi, ə mą kɛ, nwɛ̨niɠaa taa kaa di yəi, kɛlaa, kɛɛnąą ta hvo kpɛli ɲą́ą́ ŋɛ̨i a Nu Lon ɲə́i, ɓɛi ŋą vįitɔɔlaa.»
59Jesus ə mo nu takpɛli ɓa, yɛ mą: «Hvilɛn búlú.»
Kɛlaa, ɉulɔnui tii ə mo mą, yɛ mą: «Ną́mu, hvaa mą, ŋą li ŋį́ ną́n bowa loo, ŋą ɉaa kuu kɛ.»
60Jesus ə nwoo pulu pənə yɛ mą: «Nuąi di hvo mą́ą́ mɛ̨nį kɔ́lɔn, di lɛɛ laa di di kee powa loo; ə́ wɛi, li ə́ Yálá-taa tɔɔlaai mąą mɛ̨nį laa həli.»
61Nu takpɛli ə mo yɛ mą: «Ną́mu gáá pai hvilɛn ɉi ə pulu, kɛlaa, nɛ́ɛ́ laa nii, ŋą li ŋį́ ɲələwala too nwɔ́ nuą diɛ.»
62Jesus yɛ mą: «Akɛ nu ta a kɛɛ hiɛɛ kɔ́wɔ tɔɔ lɔ, yɛ bulu kaa, a kɛ tii, mąą nu hva pɛli tiɓo kɛi Yálá-taa tɔɔlaai hu.»
Currently Selected:
Lukə 9: BKPDCG
Highlight
Share
Copy
Want to have your highlights saved across all your devices? Sign up or sign in
