Lukə 8
8
Nɛa yiiɠaai kɛi Jesus mąą kpɔnmąą ɓo
1Yili pulu, Jesus ə kɛi li taa kpɛa-kpɛaɠaa da taa pɛlɛɛɠaa hu, yɛ kalan gɛ, ə lɛɛ, yɛ Yálá-taa tɔɔlaa mąą wɛlɛɛ lɛlɛɛ laa həli, nwɔ kalan nɛa pow kɔ́w hveelɛ diɛ ɓo bɔ. 2Ə mą kɛ, da nɛ̨ą taɠaa, yii ə ɲį́nɛ̨n gbɛ daɠaa pulu, ə mą kɛ, ə daɠaa kɔ́lɔi pono. Yɛ bələi Mari Magdala mun gaa la, yai Jesus ə ɲį́nɛ̨n mɛ̨ihveelɛ kpɛ bulu. 3Nɛa tii tɔ̨nɔ̨ ɓaa kɛ a: Ɉanə, yai kɛ a Herodə nwɔ hɛn gɔw mɛ̨i kaa mun gɛnɛ̨ nɛ̨ą, ɉulɔnui tii laa ɓa kɛ a Kuza. Da ɓaa kɛ a Suzanə, da nɛ̨ą takpɛliɠaa, yiiɠaai kɛi di yəi hɛnŋąa tɛɛ Jesus pɔ da nwɔ kalan nɛai, di mąą kpɔnmąą ɓo mɛ̨nį ɓa.
Hihɛn ɉuwu pili mun mąą hanwon
(Matie 13.1-9; Markə 4.1-9)
4Daaɠaa tii hu, nuą di kɛi pa Jesus pɔ, yii kɛa nu kpulu kɛnɛ̨ ə ŋąąkpɔn gwɛlɛ, ə ɉanwon ŋɛ̨i hɔɔ diɛ, yɛ diɛ: 5«Nu ta ə kɛi hihɛn ɉuwu pili ɲəi ɲɛa, ɉihɛn gɔw taɠaa di too bələi. Nuą di tɛɛ mɛ̨i, nwɛ̨niɠaa di gbələ. 6Daɠaa di too hvaɲą ŋą, ɓɛi pɔlɔ hvo kɛ laa kɛnɛ̨, yiliɠaai, di ɓɔn, kɛlaa, di pənə di haa. Mąąhɔlɔɓo, bɔlɔ hu kpalaai kɛ. 7Daɠaa di too yɔw ɲąąlən ɉu, di ɓɔn, kɛlaa, ɲɔw ə kpɔlɔ, ə kpinįn a diɛ, di haa. 8Kɛlaa, daɠaa di too lɔi lɛlɛɛ hu, di ɓɔn, di ɓa. Gbaɠa tɛitɛi kəlee kɔ́w yɛ ɓo: nwun dɛitɛi.»
Yili pulu, Jesus yɛ nwɔ̨nɔ̨ diɛ: «Nui wəli kaa mą, ə mɛ̨n.»
Lə mɛ̨nį ɓa Jesus ə kɛi hvaa lɔ a hanwon?
(Matie 13.10-17; Markə 4.10-12)
9Jesus nwɔ kalan nɛai di mąąni kɛ, diɛ mą: «Ɉanwon ŋɛ̨i ə́ ɉɔɔ mukulaa ɓaa a lə?»
10Jesus ə di woo pulu pənə, yɛ diɛ: «Ká wɛi, Yálá-taa tɔɔlaa hu mɛ̨nį loɔɠaa kəlee, ka gɔlɔn. Nuą yiiɠaa tii di wɛi, ŋą mɛ̨nį ɓo diɛ hanwon ɉu, əgɛ, diɛ kɛɛ kaa, kɛlaa, di hva hɛn nɔpee ta mąąkpɛɛ, diɛ mɛ̨nį mɛ̨n, di hva ŋąą kaa.»
Jesus ə ɉanwon tii mukulɔ
(Matie 13.18-23; Markə 4.13-20)
11«Ɉanwon tii ŋį́ ɉɔɔ, mukulaa ka: ɉihɛn ɉuwui tii ɓaa: Yálá laawoo. 12Nu taɠaa kɛ pələ kaa yɛ, bələ kwɛlɛ, ɓɛi ɉihɛn ɉuwu taɠaa di too laai. Nuą tii, da di yee hee Yálá laawoo mu, kɛlaa, nąnį ə pa, ə gulɔ di yəi; əgɛ, di hvo pa laa nwoo tii la, di nwun mąą hvo ɓo 13Daɠaa kɛ pələ yɛ ɓo yɛ, vaɲą ŋą lɔi. Yiliɠaai da Yálá laawoo mɛ̨n, di di yee hee mu a kwəinɛ̨ɛ̨. Kɛlaa, di hva nɛɛ laa, hvo ɉamu pili di lii hu, da laa lɔ nwoo tii la a lɔwai logolo tiikpə. Ɓɛlɔwai ɓɛlɛkpɛɛ mąą a həli la diɛ, da həɠə laa na pələ mɛ̨i. 14Ɉihɛn ɉuwu yii ŋɛ̨i too ɲɔw ɲąąlən ɉu, yili kaa yɛ: nuą yiiɠaai da Yálá laawoo mɛ̨n, da kulɔ tɔwɔ pələ, liihɛlɛn damąą ə too diɛ, yɛ pələi: hɛn gɔw kɛnɛ̨ hɔlɔɓo liihɛlɛn, di kpɔɔ liiɓa kɛ liihɛlɛn ə too diɛ kɛnɛ̨, ə tɛɛ mɛ̨nį kəlee ɓa. Mɛ̨nįɠaa tii kəlee a kpinįn a diɛ, di too, di ɓa yɛ ɓo a vəlee. 15Nu taɠaa diɛn, di kaa yɛ: Lɔi lɛlɛɛ, ɓɛi ɉihɛn ɉuwu taɠaa di too laa. Di wɛi, da Yálá laawoo mɛ̨n di di yee hee mu, di di yee kanąn ma, di tɔɔ la kpaan, nwoo tii ə ɉeei kaa di lii hu, ə ɓa a damąą.»
Haŋon yii vilɛn ŋąąi labon ma
(Markə 4.21-25)
16«Nu hva labon dɔɔ hvo nɔ téa mu, a wala kɛ tii, hvo nɔ kanabee mu. Kɛlaa, a ɉee kpəlin gwɛa ŋą, əgɛ, nuą da lɔ bɛlɛ́n, di kɛɛ pono kaa. 17Mɛ̨nįɠaa kpɔ noɔ, gəlee kaa pai kulɔi ponoŋą, nuą di gaa; loo mɛ̨nįɠaa kəlee mąą kaa pai ponoi. 18Ka gɛ a nɛlɛɛ, mɛ̨nįɠaai ka káá mɛ̨n ɉi mąą mɛ̨nį ɓa. Mąąhɔlɔɓo, nui hɛn da kaa ɲəi, Yálá a da pɛlɛ mą. Kɛlaa, nui hɛn da hvo ɲəi, yii woloi gili kaa mą, Yálá a tinąą gulɔ ɲəi.»
Jesus nee da nee lonni
(Matie 12.46-50; Markə 3.31-35)
19Jesus nee, da nee lonnii di kɛi Jesus kwɛli, əgɛ, di mɛ̨nį ta ɓo mą. Di pa ɓɛi Jesus ə kɛ laa, kɛlaa, di hva pɛli kɛ həli gbinį ɓa, nu kpulu mąą mɛ̨nį ɓa. 20Nu ta ə mo Jesus ɓa yɛ mą: «Ə́ lee da ə́ lee lonnii di kaa tɔɔni ɲɛnɛ̨ɛ̨, diɛ di mɛ̨nį ɓo yɛ.»
21Kɛlaa, nu kpului tii kɛ di wəli tɔɔ Jesus woo ɓa, Jesus ə mo diɛ, yɛ diɛ: «Néé lonnii ɓaa a nuą ŋɛ̨i di wəli tɔɔ Yálá laawoo ɓai, ə lɛɛ, diɛ bɔ mɛ̨nį kɛ.»
Jesus ə hvaŋą kɛnɛ̨ kɔ́lɔ haa ma
(Matie 8.23-27; Markə 4.35-41)
22Yələ ta, Jesus da nwɔ kalan nɛai di tɛ kələn da hu, yɛ diɛ: «Ka gwə li gboloyá pulu pələ.»
Di tɛɛ diɛ li. 23Ɓɛlɔwai di kɛ la ɲąŋą diɛ li, Jesus ə laa gələn ɉu yɛ yii. Ɲąąɓa, hvaŋą kɛnɛ̨ kpɔ yɛ kɛa tɛɛ, yɛ ɲá tɛ gələn ɉu. 24Galan nɛa di lɛɠɛ Jesus ɓa, di nwun, diɛ mą: «Kalamɔ̨ɔ̨, kalamɔ̨ɔ̨! Gu nwun na pili hiɛ ka! Ku nwun mąąɓo!»
Jesus ə ɲɛ̨ilaa ɓo, ə haŋą vaŋąi tii ɓa, da ɲá, yɛ di: «Ka ka kɔ́lɔ haa kaa!» Vaŋą da ɲá di di kɔ́lɔ haa diɛ, kɛɛ mąą ə haa kpɔ tin.
25Jesus ə tinɛ̨n, yɛ nwɔ kalan nɛai diɛ: «Ka wɔ laa na laa kaa mį?»
Kɛlaa, galan nɛa di ɲɔw kpɔ kɛnɛ̨, di kwəi ə pili diɛ; diɛ kɛ di kee ni diɛ: «Akɛti, nu huwu lə kɛɛ ɓəi, yaa yii, a haŋą hvaŋą da ya diɛ, diɛ nwoo hon?»
Jesus ə ɲį́nɛ̨nŋąa kpɛ hulɔnu ta pulu
(Matie 8.28-34; Markə 15.1-20)
26Jesus da nwɔ kalan nɛai di ɲá teen, Geraseni lɔi hu, Galile lɔi tənən ma. 27Jesus kɛɛ kulɔi gələn ɉu, yɛ hvilɛn nɔi ɓa; daai tii hu hulɔnu ta, ə kpuluun yɛ pa Jesus pɔ. Ɉulɔnui tii, ɲį́nɛ̨n ɲɔ̨nwɔ̨ɔ̨ tamąą di kɛ bulu. Ə kɛ a kwɛlan damąą ɉulɔnui tii hvo kɛi həɠə too gwąną, hvo kpɛli kɛi yii pɛlɛ́n, ə kɛi yii kámą woloɠaa hu. 28Ɓɛlɔwai ɉulɔnui tii ə Jesus kaa la, ə tómą kpɔ kɛnɛ̨, ə too gɔwɔ mu, ə mo kpɔ a nwoo kɛnɛ̨, yɛ mą: «Lə ɓə yɛ ə́ gɛ a ɲą́ą́, Yálá yii gaa yələkɔlɔn ɉu Non? Gáá nɛ̨ɛ̨mąą hvəə yɛ́, hvo náá nɔ̨nwɔ̨ ɓo!»
29Ɉulɔnui tii, ə kɛi mo tii, mąąhɔlɔɓo, Jesus ə haŋą ɲįnɛ̨n tii ɓa, əgɛ, ə həɠə ɉulɔnui tii pulu. Ɲįnɛ̨n tii, a ɉulɔnui tii kulɔ kɛ, a hvóló taɠaa, nuą da ɉon di ɲee yili, di gɔwɔ yili, kɛlaa, ə mą kɛ tii, a ɲili yɛli tee. Ɲįnɛ̨n tii ə kɛi ɉulɔnui tii həɠə yɛ li la ɲɛa lɔi pun ɉu. 30Jesus ə mąąni kɛ, yɛ mą: «Da kɛ ə́ laa ɓaa gbɛɛ?»
Ə nwoo ŋąąpənə yɛ mą: «Da kɛ náá ɓaa; ‹Kpulu.›»
Ə mo tii mąąhɔlɔɓo, ɲį́nɛ̨n kɛ bulu, gbulu tamąąi kɛ. 31Ɲįnɛ̨nŋaai tii di nɛ̨ɛ̨mąą hvə Jesus ɓa, diɛ mą: «Hvo ku pili nowa kpon ɉu gweaa hu.»
32Ɓoi kpulu ta ə kɛ laa ɲee ɓa, diɛ di kɔ̨nɔ̨n gwɛli; ɲį́nɛ̨nŋąa tii di nɛɛ mąą hvə Jesus ɓa, diɛ mą: «Hvaa mą, kwə li ku lɔ moiɠaa tii hu.»
Jesus ə hvaa mą. 33Nąąlɔwai, ɲį́nɛ̨nŋąai tii di həɠə ɉulɔnui tii pulu, di lɔ moiɠaai tii hu. Moiɠaa tii kəlee, di kpulun, diɛ ɲee yɛɛ a gilɛ, də li di pu bówa hu, gəlee nwun na ə pili.
34Nuą tii kɛ moiɠaa tii pulu, yii kɛa di mɛ̨nįɠaai tii kaa, di gilɛ həɠə, də li diɛ ɉukulɔ daa kpɛa-kpɛaɠaa, da daa pɛlɛɛɠaa hu. 35Nuą di pa, əgɛ, mɛ̨nįi tii kɛ laa, di gaa. Di pa di həli Jesus ɓa, ɉulɔnui ŋɛ̨i ɲį́nɛ̨nŋąa di kɛ bului, di gaa hee ni Jesus kɔ́wɔ mu, gɔlɔi ponoɔ̨ kɛa, həɠə yɛ ɓo gwąną, ə lɛɛ, ɲɛ̨i laa tiɛɛ kɛa a nɛlɛɛ. Nuą tii kəlee kwəi ə pili diɛ. 36Ɉulɔnui tii ɲį́nɛ̨nŋąa di kɛ bului, pələi gɔlɔi ə pono la, nuą kpɔ nąą kaa, di kɛi ɉukulɔ kɛɛnąą kəlee. 37Nąąlɔwai, Ɉeraseni lɔi hu nuą kəlee di mo Jesus ɓa, diɛ mą: «Həɠə ɓɛ kuɔ lɔi hu.»
Mąąhɔlɔɓo, nuą tii di ɲɔw kpɔ kɛnɛ̨. Jesus ə pənə ə tɛ gələn ɉu, yɛ li. 38Ɉulɔnui tii Jesus ə ɲį́nɛ̨nŋąa kpɛ bulu, ə nɛ̨ɛ̨mąą hvə Jesus ɓa, yɛ mą: «Gáá bɔ, ŋą hvilɛn ə́ pulu.»
Kɛlaa, Jesus ə kɛ mą: 39«Pənə ə́ li ə́ pɔɔli, mɛ̨nį ŋɛ̨i Yálá aa gɛ yɛ́, ə́ ɉukulɔ ə́ pulu nuą diɛ.»
Ɉulɔnui tii ə pənə ə tɛ taai, mɛ̨nį kpɔ Jesus əgɛ ma, ə gəlee hukulɔ daai nuą diɛ.
Ɉairɔsə lon nɛ̨ɛ̨nu; da nɛ̨ɛ̨nui ŋɛ̨i ɲee hee Jesus nwɔ həɠəi ɓa
(Matie 9.18-26; Markə 5.21-43)
40Ɓɛlɔwai, Jesus ə həɠə la bówa pulu, ə pa ə nu kpulu kɛnɛ̨ kaa, ɲá pulu, diɛ nąąkwiɛn. Mąąhɔlɔɓo, nu kəlee di kɛi mąą kpɔn. 41Hulɔnu ta, yai kɛ a Yálá hvɛli pɛlɛ́ nwun nąmu ta, diɛ kɛ nąą ɓa: Ɉairɔsə, ə pa, ə too Jesus kɔ́wɔ mu, ə nɛ̨ɛ̨mąą hvə mą, yɛ mą: «Pa gwəli ɲə́i bɛlɛ́ laaləi, 42mąąhɔlɔɓo, ɉulɔnui tii, non nɛ̨ɛ̨nu tɔ̨nɔ̨ gbən ə kɛ laa, gaa kwɛlan ə kɛ lɔ pow kɔ́w hveelɛ ɲɔ̨n ə kɛ mą, ɉaa lii yɛ tɛ la.»
Ɓɛlɔwai kɛa Jesus ə kɛi li la ɉulɔnui tii yəi bɛlɛ́ laaləi, nu kpulu kɛnɛ̨ tinɛ̨n ŋąąi kɛ mą, diɛ vana di kee lɔwai. 43Nɛ̨ɛ̨nu ta ə kɛ nu kpului tii lɔwai, ya hulɔ ɲɔ̨n yɛ ɓo mą, aa kwɛlan bow-kɔw-hveelɛ kɛ mą, yɛ mɔ̨nɔ̨ mį́į́ kpɔ la kɛnɛ̨. Nɛ̨ɛ̨nui tii, aa kɛ ɲəi hɛn gɔwɠaa kəlee kwɛlɛ, ɲɔ̨n ɉalə kɛ nuą diɛ, kɛlaa, da lɔpee hvo gɔlɔi pono. 44Nɛ̨ɛ̨nui tii ə tɛɛ Jesus pulu pələ, ə ɲee hee Jesus nwɔ həɠəi wəli la. Ɲąąɓa, nɛ̨ɛ̨nui tii nwɔ ɲɔ̨n ə kpɛɛ mą. 45Jesus ə tinɛ̨n, ə mąąni kɛ kɛ, yɛ mą: «Gbɛɛ ɓə tii ɲee hee mą́ą́?»
Nu kəlee diɛ mą: «Nwɛi ɲą́ą́ hvəi.»
Piɛrə yɛ mą: «Ną́mu, yɛ ɓo nu kpulu lɔwai, diɛ ə́ hvana di kee lɔwai, yɛ kɛ mą: ‹Gbɛɛ ɓə ɲee hee mą́ą́?›»
46Kɛlaa, Jesus ə pənə ə mo yɛ diɛ: «Nu ta a ɲee hee mą́ą́. Mąąhɔlɔɓo, huwalawala ta aa kulɔ ɉú, ŋą́ą́ gili kɔ́lɔn.»
47Nɛ̨ɛ̨nui tii kili ə pu ɉu, yɛ daa gaa. Ə kulɔ kɛa nuą lɔwai, mąą yɛ kpɛlin, ə pa, ə too Jesus kɔ́wɔ mu. Mɛ̨nįi gɛ yɛ ɲee hee Jesus nwɔ həɠəi wəli la, ə lɛɛ, pələi gɔlɔi ə pono la ŋąąɓa, ə yili hukulɔ Jesus ɓa, nu kəlee ɲɛ̨i ɓa. 48Jesus yɛ mą: «Nón nɛ̨ɛ̨nu, ə́ wɔ laa na laa aa ə́ kɔ́lɔi pono. Li, a ə́ lii laa yɛ́.»
49Ɓɛlɔwai, Jesus ə kɛi nwoo tii ɓo la, wɛlɛɛ ɓomun da, ə həɠə Ɉairusə yəi bɛlɛ́n, ə pa, yɛ Ɉairusə ɓa: «Ə́ lon nɛ̨ɛ̨nu aa haa, ə mą kɛ hvo kalamɔ̨ɔ̨ hviikpɛɛ li.»
50Kɛlaa, Jesus ə nwoo tii mɛ̨n, ə mo Ɉairɔsə ɓa yɛ mą: «Hvo ɲį́nɛ̨n-ɲį́nɛ̨n, kɛlaa, laa ná, ə́ lon nɛ̨ɛ̨nu kaa pai pənəi ə kɛ a vulú.»
51Ɓɛlɔwai Jesus ə həli la Ɉairusə yəi bɛlɛ́ laaləi, hvo hvaa mą nui lɔpee ta hvo lɛɛ bɔ di hvo lɔ bɛlɛ́n, hvo kɛli, Piɛrə, Ɉaan, Ɉakə, ə lɛɛ, da nokoloi nąn da nee. 52Nuą tii kɛ laa bɛlɛ́n, di kɛi wɔlɔ diɛ di woolaa nokoloi tii mąą mɛ̨nį ɓa. Jesus ə mo diɛ, yɛ diɛ: «Ka hvo wɔlɔ, hvo haa li, gaa yii.»
53Nuą tii kəlee di kɛi yɛlɛ Jesus ɓa, mąąhɔlɔɓo, di laaikɛ na diɛ nokoloi aa haa. 54Kɛlaa, Jesus ə́ nokoloi hon a ɲee, ə mo kpɔ a nwoo kɛnɛ̨, yɛ mą: «Lokolo, ə́ muhəɠə!»
55Nɛ̨ɛ̨non tii, ə pənə ə kɛ a vulú, ə muhəɠə kpɔlɔ tii ŋąąɓa. Jesus ə mo nuą tii diɛ, yɛ diɛ: «'Ka kɔ̨nɔ̨n dɛɛ bɔ ə mį́į́.»
56Nokoloi tii gaa nuą kwəi ə pili diɛ kpɔ kɛnɛ̨; Jesus ə mo diɛ, yɛ diɛ: «Ka hvo mɛ̨nį ŋɛ̨i hukulɔ nui lɔpee ta ɓa.»
Currently Selected:
Lukə 8: BKPDCG
Highlight
Share
Copy
Want to have your highlights saved across all your devices? Sign up or sign in
