Lukə 10
10
Jesus ə kalan nɛa pu-mɛ̨ihveelɛ-kɔw-hveelɛ tɔɔ
1Yili pulu, Ną́mu Jesus ə nu pu-mɛ̨ihveelɛ-kɔw-hveelɛ takpɛli yɛɠɛ ɉu, ə di tɔɔ hveelɛ-hveelɛ, diɛ li, taaɠaai kɛ mąąnɛ̨ɛ̨ kɛ Jesus kpinįi ə həli ɉu. 2Jesus yɛ diɛ: «Mɔ̨nun gbala kɛnɛ̨i, kɛlaa, dee mun və mą. Ka nɛ̨ɛ̨mąą hvə mɔ̨nun gbala nąmu ɓa, əgɛ, ə mɔ̨nun dee nuą tamąą tɛɛ ɲəi mɔ̨nun gbala ŋą. 3Ka li, gáá ka tɔɔi yɛ ɓɛlaa lonnii kwɛliɠaa lɔwai. 4Ka hvo pɔlɔtimanin ɉəɠə, ka hvo hiɛ kulɔ ɓíi həɠə, ka hvo kɔ́lɔ hveelɛ həɠə, ka hvo tɔɔ pələi kaa woo pilimąą hu kwɛaa kɛ.
5«Pɛlɛi lɔpee ka lɔ mu, ka ka woo pili nąą nuą diɛ, kaa mą: ‹Yálá ə liilaa tɛɛ bɛlɛ́i ŋɛ̨i mu nuą pɔ.› 6Akɛ nu ta a kɛ yili mąą pɛlɛi mu, yii Yálá nwɔ liilaai wɛli kaa mą, ka wɔ woo pilimąą woo tii a liilaa tɛɛ bɔ. A wala kɛ tii, ka wɔ liilaai a pənə ə lɛɛ ka yəi. 7Ka lɛɛ mąą pɛlɛi tii mu, kɔ̨nɔ̨n nɔpee da tɛɛ ka pɔ, ka mį́į́; kpələ-yai lɔpee da dɛɛ ka pɔ, ka gbələ. Mąąhɔlɔɓo, koló kɛmun mąąnɛ̨ɛ̨ ə gɔ̨nɔ̨n ɉɔlɔɓo. Pɛlɛi ka lɔ mu, ka hvo kulɔ laa, kaa hvo lɔ dakpɛli mu.
8«Ka li taa ta hu, da di yee hee ka mu, yii lɔpee da paa la ka pɔ, ka mį́į́. 9Ka mąą taai tii hu ɲɔ̨n gɛ nuą kəlee kɔ́lɔi pono, ka mo nu kəlee ɓa, kaa diɛ: ‹Yálá-taa tɔɔlaai mąą aa kpuɔ kaa.› 10Kɛlaa, ka li taa ta hu, da wala di yee hee ka mui, ka li gwəli heai kɛnɛ̨ ɓa, kaa diɛ: 11‹Ka wɔ taai ŋɛ̨i hu muluun ti. Kɛlaa, ka ka kili lɛɛ ɉu, kaa diɛ: Yálá nwɔ tɔɔlaai mąą aa kpuɔ kaa.› 12Gáá moi kaa, Yálá nwɔ kitii teei lɔwai, Sodomə taa nwɔ gahoi a hviɛlaɓo ə tɛɛ daa tii hu nuą di wɛi ɓa.»
Taa yiiɠaai di hvo laa na
(Matie 11.20-24)
13«Kpalo ɓɛlaai yɛ́, Korazɛn taa, kpalo ɓɛlaai yɛ́, Bɛtsaida taa, mąąhɔlɔɓo, gbalo mɛ̨nįɠaa ŋɛ̨i kɛ ka hui, a kɛ tii kɛ Tirə daai da Sidɔn taa hu, yɛ mą, daaɠaa tii hu nuą daa wɔlɔ kɛ mąąwɛli həɠə too di kwąną, əgɛ, di nɛ diɛ: daa di túwɔ́ pələ ɲɔ̨nŋąa mąąhvalin. 14Yili ɓə gaa mą, Yálá nwɔ kiti tee lɔwai, Tirə taa da Sidɔn taa, di wɔ gahoi a hviɛlaɓo ə tɛɛ ka wɛi ɓa. 15Kafarnaumə taa, yaa kpɛli, gaa ə́ kwəi di kaa pai ə́ mąątɛ̨nɛ̨i mɔ̨ɔ̨, di ə́ tɛ yələi? Kpaa-o! Di kaa pai ə́ ɲɛ̨i hvalai, ə́ yɛɛ ŋąmua taa.»
16Jesus ə mo nwɔ̨nɔ̨ nwɔ kalan nɛai diɛ, yɛ diɛ: «Akɛ nu ta a nwəli tɔɔ kaa, a kɛ tii, aa nwəli tɔɔ mą́ą́. Nui a lənə kaai, a kɛ tii, aa lənə mą́ą́. Yaan, nui a lənə mą́ą́, a kɛ tii, aa lənə nui dɛ́ɛ́ ma.»
Galan nɛa pu-mɛ̨ihveelɛ-kɔw-hveelɛ di pənə di pa
17Galan nɛa pu-mɛ̨ihveelɛ-kɔw-hveelɛ di pənə di pa a kwəinɛ̨ɛ̨, diɛ Jesus ɓa: «Ną́mu, ku kɛi haŋą ɲį́nɛ̨nŋąa diɛ ə́ laa hu, diɛ ku woo hon.»
18Jesus ə di woo pulu pənə yɛ diɛ: «Ŋą́ kɛi ɓilihi kaa yɛ həɠə yələi yɛ too yɛ yələgbąnąą.»
19Jesus yɛ diɛ: «Ka ka wəli tɔɔ, ŋą huwalawala tɛɛ ka pɔ, kaa hiɛ kaalə mɛ̨i da ɲɔ̨n-gaalə#10.19 ɲɔ̨n-gaalə: Nu taɠaa da kɛ mą: «ɉɛŋɛ»; daɠaa diɛ kɛ mą: «ɲɔn-gaalə»., ə lɛɛ, ka ɓilihi nwɔ huwalawalaɠaa kəlee hu taɠa. Mɛ̨nį ɲɔ̨n nɔpee ta hvo kɛ a kaa. 20Kɛlaa, ka hvo ka kwəinɛ̨ɛ̨ mąąhɔlɔɓo, ɲįnɛ̨nŋąa daa ka woo hon, ka ka kwəinɛ̨ɛ̨, mąąhɔlɔɓo, ka laa kaa Yálá nwɔ nu kpului laa pɔ yələkɔlɔn ɉu.»
Jesus kwəi ə nɛɛ
(Matie 11.25-27; 13.16-17)
21Nąąlɔwai tii hu kpɔlɔ, Kili-Mąąhəɠɛɛ əgɛ, Jesus kwəi ə nɛɛ kpɔ kɛnɛ̨, ə mo yɛ mą: «Oo Nąn Yálá; yələkɔlɔn da lɔi di pɛli mun, gáá ə́ hɛɠɛɛɓoi, mąąhɔlɔɓo, mɛ̨nįi yaa noo kilimąą nuą da mɛ̨nį kɔ́lɔn nuą diɛ, yaa gulɔ ponoŋą, nɛapɛlɛɛ ŋɛ̨i diɛ. Oo Nąn Yálá, ə́ yili kɛ tii, mąąhɔlɔɓo, yili ɓə kɛ a ə́ liiɓa.
22«Nán Yálá aa huwalawala kəlee tɛɛ bɔ́; nu ta hvo Non gɔ́lɔn, hvo kɛ li lɔ Nąn; nu ta hvo Nąn gɔlɔn, hvo kɛ li lɔ Non, da nui Non a kɛ bɔ ə Nąn nɛ mą.»
23Ɓɛlɔwai di kɛ la di tɔ̨nɔ̨ kɛɛnąą, Jesus ə mo nwɔ kalan nɛai diɛ, yɛ diɛ: «Ka nwun na nɛ̨ɛ̨i, mɛ̨nį ka káá gaai mąą mɛ̨nį ɓa. 24A tɛ̨ą kpɔ-kpɔ gáá moi kaa, Yálá kwəi mɛ̨nį hukulɔ nuą tamąą, da nu haŋąaɠaa tamąą, di kɛ bɔ, mɛ̨nį ka káá gaai, di gaa. Kɛlaa, di hvo ga. Mɛ̨nįi ka káá mɛ̨n ɉi, di mɛ̨n. Kɛlaa, di hvo mɛ̨n.»
Samari mun nwɔ mɛ̨nį lɛlɛɛ mąą hanwon
25 Tɔ́n galamɔ̨ɔ̨ ta ə muhəɠə, əgɛ, ə Jesus hon vaa woo hu, ə mąąni kɛ yɛ mą: «Kalamɔ̨ɔ̨! Lə ɓə ŋą pɛli gɛi, ŋą yɛnɛ̨ɛ̨ hva kpɛɛi hɔlɔɓo Yálá-taa?»
26Jesus ə nwoo pulu pənə yɛ mą: «Lə mɛ̨nį ɓə bɛ̨ɛ̨ guɔ tɔ́n hu? Ya kɛi galan, ya kɛ ŋąą kaai ləi?»
27Ɉulɔnui tii ə nwoo pulu pənə yɛ mą: «‹Ə́ Ną́mu ə́ wɔ Yálá wɛli la kɛ a ə́ lii kəlee, a ə́ nɔw kəlee, ə́ wɔ huwalawala kəlee, ə́ wɔ kiliŋąhiɛ kəlee.› Ə lɛɛ, ‹Da ə́ ə́ hee yɔwɔ wɛli la kɛ yɛ ə́ kpinįi.›»
28Jesus ə mo mą nąąlɔwai yɛ mą: «Yaa tɛ̨ą ɓo, akɛ, ya li ya gɛ, yɛ pələi tii ə́ mo lai, ya yɛnɛ̨ɛ̨ hva kpɛɛi hɔlɔɓo Yálá-taa.»
29Kɛlaa, dɔ́n galamɔ̨ɔ̨ tii ə kɛ bɔ ə gbɔwɔ lɛ yɛ nu haŋąa, ə Jesus mąąni kɛ nwɔ̨nɔ̨ yɛ mą: «Gbɛɛ ɓə gaa a ɉéé yɔwɔ?»
30Jesus ə nwoo pulu pənə yɛ mą: «Hulɔnu ta ə həɠə Ɉerusalɛmə, yɛ li Ɉeriko daai. Mɛ̨nį ɲɔ̨n gɛ nuą di wolo ma bələi, di gɛlɛ, di mąą hɛnŋąa kəlee kulɔ ɲəi, di nɛɛ laa too ni a nɛɠɛ, diɛ li. 31Ɉu hvo kpɛli kwɛa, ɉala laa həli mun da yɛ pa tɛɛi a bələi tii. Ɓɛlɔwai ə ɉulɔnui tii kaa la too ni bələi, ə mąąlaa bələ wəli mɛ̨i pələ. 32Ə kɛ kpɔlɔ tii, Levi huwu hu mun da, yɛ pa tɛɛi a bələ tɔ̨nɔ̨ tii. Ə ɉulɔnui tii kaa too ni bələi, ə mąą laa kpɔ a ɉu kwɛaa, bələ wəli yii tii mɛ̨i pələ ə tɛɛ. 33Kɛlaa, Samari mun da ə kɛi li hiɛ ɓa, bələ tɔ̨nɔ̨i tii pɔ pələ. Ə həli nu lɛɠɛi tii ɓa. Ɓɛlɔwai ə gaa la, ɲɛ̨imąąwɛli ə ɉon kpɔ kɛnɛ̨. 34Ə lɛɠɛ mą, ə wulɔ da lɔɔ kpona pu balaɠaa ŋą, əgɛ a ɉalə. Yili pulu, ə dɛ ə ɉee nwɔ hoohvaalən bulu, ə li la taai, ɓɛi nwea da kɛ yii laai, əgɛ, di di ɲɛ̨i kɛ mą a nɛlɛɛ. 35Mąą yələ laa ɓoɔ, ə túwɔ́ yɛa hveelɛ wali həɠə ə dɛɛ nwea laa pɛlɛ nwun nąmu pɔ, yɛ yili ɓa: ‹Nui ŋɛ̨i, ə́ ɲɛ̨i kɛ mą a nɛlɛɛ. Ɓɛlɔwai ŋą həɠə la ɉiɛ ɓa ŋą pai, wali yii ə́ kaa pai gwɛlɛi mąą mɛ̨nį hu, a kɛnɛ̨ a tɛɛ yii ŋɛ̨i ŋį́ dɛɛ ə́ pɔ mai, ŋą bɔi tɛɛ ə́ pɔ.›»
36Jesus ə mo kɛa yɛ mą: «Nu haaɓai tii, nɛlɛ ɓə kɛ a ɉulɔnui ŋɛ̨i nu ɲɔ̨nwɔ̨ɔ̨ɠaa di wolo ma di gɛlɛ, ɉee yɔwɔ?»
37 Dɔ́n galamɔ̨ɔ̨ tii ə mo mą, yɛ mą: «Nui ŋɛ̨i mɛ̨nį lɛlɛɛ kɛ mą ya ɓə.»
Jesus yɛ mą: «Yili ɓa li, ə́ yili ɲɔ̨nwɔ ma gɛ yɛ kpɛli.»
Jesus ə li Martə da Mari di pɔɔli
38Jesus da nwɔ kalan nɛai di kɛɛ bələ ɓa, di tɛ taa ta hu, nɛ̨ɛ̨nu ta ə kɛ laa, diɛ kɛ nąą ɓa: Martə. Ə Jesus nwea laa kɛ ɲəi bɛlɛ́n. 39Martə nəɠə nɛ̨ɛ̨nu ta ə kɛ laa, diɛ kɛ nąą ɓa Mari, ə pa ə hee Ną́mu Jesus kɔ́wɔ mu, nwəli tɔɔ nwɔ kalan gɛ woo ɓa. 40Martə yaa tɔ̨nɔ̨ bɛlɛ́n gólóɠaa kəlee yɛ ɓo mą, da nwea mɛ̨nįɠaa. Martə ə pa yɛ mą: «Ną́mu, nə́ɠə́ a kɛi bɛlɛ́n gólóɠaa kəlee lɛɛ mą́ą́ gɛ́ gɛ ɲą́ą́ dɔ̨nɔ̨i, akɛti, yili hvə ə́ ɲɛ̨i ɓa a mɛ̨nį ta? Mo ma ə pa ə kpɔnmąą tɛɛ bɔ́.»
41Ną́mu Jesus ə nwoo pulu pənə yɛ mą: «Martə, Martə, yaa ə́ liihɛlɛn a mɛ̨nį tamąą; ə lɛɛ, ə́ kpaaŋąa yili hu. 42Kɛlaa mɛ̨nį yii viɛlaɓoɔ, ya ka ŋɛ̨i Mari aa ɉəɠə ɉu, nu ta hva pɛli yili kulɔi ɲəi.»
Currently Selected:
Lukə 10: BKPDCG
Highlight
Share
Copy
Want to have your highlights saved across all your devices? Sign up or sign in
