Psalm 119
119
Atanrem Alerquutii
1Atawaqertut canganarqutailnguut ayuqucimegteggun,
yuulriit aturluki alerquutai Atanrem.
2Atawaqertut picirkiutain aturtait,
niisngaluteng umyuamegteggun tamalkirrluteng.
3Assiilngurmek atuqsaunateng,
tau͡gaam Atanrem tumkiurai maliggluki.
4 Ataneq, cikillruarpekut picirkiutevnek
alerqurluta-llu atuusqelluki kesianek.
5Waniwa-tuq wiinga ayuqucimkun caqtaarpek'nii
aturlaki ayuqucirtuuteten.
6Tuaten niisngakumki alerquuteten tamalkuita
kiaresngiatellerkamnun tekisngailama.
7Wiinga nanrarciqamken tamalkirrlua yuucimkun,
elitellemni piciulrianek picirkiutevnek.
8Alerquuteten aturciqanka;
cakaaryaqunii!
Niisngallerkaq Atanrem Alerquutainek
9Qaillun piluni ayagyualria ayuqucimikun menuicugngaa?
Murilkelluni yuullermikun qaneryaraten cuqekluki.
10Yuucimkun wiinga tamalkirrlua kevgiungnaqamken;
iqlutmun ayagcecaqunii cakaarluki alerquuteten.
11Qaneryaran qemagtellruaqa ircaqumnun,
nallutmun tungevnun assiilngurmek taqutenritnalua.
12Nanraramken wiinga elpet, Ataneq;
elitnaurnga picirkiutevnek!
13Wiinga egmirciiqanka neptulua
tamalkuita alerquutet cikiutekelten.
14Picirkiutvet atullrat nunanikaqa,
tukuuterugarni arcaqanruluteng wangni.
15Umyuangcautekciqanka alerquuteten,
yuvrirluki-llu ayuqucirtuuteten.
16Nunanikanka alerquuteten;
cakaarngaunaku-llu qaneryaran.
Angniutekluki Alerquutai Atanrem
17Assilriakun aulukia pistevni,
yuunaurtua qaneryaran aturluku.
18Uiskek iigka, tangerrnaunka
irr'inaqluteng piciulriit alerquutevni.
19Allanrulriatun ikgetuq maani nunami uitaqallerkaqa;
iiryaqunaki alerquuteten wangnek.
20Yuucimkun piyuumiqapigtua;
pisquteten piksugyaaqanka kesianek.
21Elpet nunularaten pivakellriit;
aniqlaamaut narurcilriit alerquutevnek.
22Qumlikevkanrilnga picingssautekevkarpek'nii-llu ellaitnun,
niisngallruamki alerquuteten.
23Atanerruat quyurrluteng picirkiulartut assiilngurmek wangnun,
tau͡gaam umyuangcautekciqanka picirkiuteten.
24Elpet elitnauruteten nunanikanka;
wiinga ayuqucirturtekngamki.
Picirkiulleq Urenkutmek Niisnganaluki Alerquutai Atanrem
25Urr'armi taklaunga tuquqatarlua;
ataam pinirivkarnga elpet akqellrucirpetun.
26Ayuqucimnek apervikuallemni elpet kiullruarpenga;
elicungcarnga pisqutevnek.
27Ikayurlua taringevkarki wangnun alerquuteten,
umyuangcauteknianka irr'inarqellriit elitnauruteten.
28Angniipakallma tuquyarpiarcetaanga;
pinirivkarnga akqellrucirpetun.
29Nayumiqakia iqlutmun ayagcetevkenii,
assiucin-llu aturluku alerquutevnek elicungcarnga.
30Niisngallerkaq wiinga cucukaqa;
nallunguanritanka picirkiuteten.
31 Ataneq, ayuqucirtuuteten maligtaqullruanka;
kasnguyullerkamnun tekicecaqunii.
32Tengrukluki aturciqanka alerquuteten,
tua-i-wa taringelalqa ilaciqngavgu.
Piicaun Taringelaryugluni
33 Ataneq, kangingevkarki wangnun alerquuteten,
atularnianka kesianek.
34Taringyugngavkarru alerquuten wangnun,
tamalkirrlua ircaqumkun aturniarqa.
35Niisngalriaruvkarlua alerquutevnek,
angniutekngamku wiinga atullrat.
36Piyuumiutekevkarru-llu wangnun picirkiutvet atullerkaat,
tukuurtellerkaqa arcaqakevkenaku.
37Ayarivkarpek'nii caugarkaunrilngurnek;
assilria piuvkarluku wangni, akqellrucirpetun.
38Akqutkellren wangnun kevgarpenun piciuvkaqiu,
niisngastevnun tuaten piciuvkalaucirpetun.
39Wangnun tuc'ecaqunaki caunrilkuurutait, uluryakngamki;
picirkiuteten elpet assilriaruut.
40Wiinga niisngalriaruyugtua picirkiutevnek;
ellualriarucirpeggun unguvamek nutaramek cikirnga.
Cacetuqutekluku Alerquutii Atanrem
41 Ataneq, kenken cakaniyuilnguq wangnun nasvaggu,
anirturlua-llu akqellrucirpetun.
42Kiutekangqerrniartua caunrilkestemnun,
wiinga cacetuqutekngamku qaneryaran.
43Piciucirpenek qalartellerkaqa pivingqerrlainarteskiu,
tua-i-wa cuqciyaran tusngavikngamku.
44Alerquuten niisngarrlainarciqaqa
akwarpak akwanun.
45Yuuciqua inglukestemnek umyuarniurutaunii,
tua-i-wa niisngangnaq'laamki ayuqucirtuuteten.
46Qalarutkelarciqanka-llu alerquuteten atanernun
kiaresngialutaitniartua.
47Ilukegcitkaqa alerquutvet atullrat,
tua-i-wa kenekngamki.
48Qigcikanka kenekluki-llu alerquuteten;
taumek wiinga umyuangcautekciqanka.
Nalirrugnaitellrat Alerquutain Atanrem
49Umyuaqiu akqutkellren wangnun pistevnun,
neryuniurutka taumun tusngiin.
50Nangteqellma-llu nalliini caceturcimalartua
akqutevgun unguvamek cikiumiivnga.
51Ucuryagtellriit yuut caunrilkuurturalaraatnga,
tau͡gken wiinga avteksaunii alerquutevnek.
52 Ataneq, umyuaqelaranka picirkiuteten ak'allaat,
caceturivkalaraatnga-llu.
53Tangvagluki yuut assiitellriit picirkiutevnek cakaarilriit
umyuaqa assiitelartuq.
54Carrarmi maani nunami unguvaqallemni
yuarucilartua apalluqluki alerquuteten.
55Unugmi-llu umyuaqelaramken, Ataneq,
alerquuteten-llu umyuamnetaqluteng.
56Angnillerkaqa tekitelaraqa
atullratgun picirkiutvet.
Piciuneq Alerquutainun Atanrem
57Elpet kiivet piyugamken, Ataneq;
akqamken niisngayugluki alerquuteten.
58Umyuamkun tamalkirrlua kaigavikamken
naklekesqellua akqellren aturluku!
59Umyuangcautekellruaqa ayuquciqa,
akqilua-llu maligtaqunaluki ayuqucirtuuteten.
60Atatakutevkenii patagmek
aturyuganka picirkiuteten.
61Yuut assiitellriit napcetengnaqsaaqaatnga
tau͡gaam wiinga cakaaqsaitaqa alerquuten.
62Unuum qukaani maktelartua nanrarnaluten
ellualriaruata picirkiuteten.
63Qigcikestevnek alerquutvet-llu aturtaitnek
yugnikek'ngangqertua.
64 Ataneq, nuna muirumauq nangyuilngurmek kenkevnek;
ayuqucirturnga wiinga alerquutevnek.
Arcaqalriaruciat Alerquutain Atanrem
65Akqellrucirpetun, Ataneq,
pistekngavnga assirlua aulukarpenga.
66Cikirnga umyuartunermek elisngamek-llu,
alerquuteten cacetuqutekngamki.
67Anucimirqecetaarpailegpenga iqlutmun ayallruunga,
tau͡gaam watua qaneryaran niisngariaqa.
68Assirpaa elpeni, takumcutarpaa!
Elicungcarnga picirkiutevnek.
69Ellmeggnek pivakellriit yuut iqluurutkelaraatnga,
tau͡gaam umyuamkun tamalkirrlua niisngaanka ayuqucirtuuteten.
70Makut yuut taringumanritait alerquuteten,
wangni tau͡gken ilukegcinarqelriaruluteng.
71Anucimirqecetaarutka ikayuutnguuq wangnun,
nallunrircecaki alerquuteten.
72Alerquutet-llu wangnun cikiutekelten
wangni piyugnarqenruluteng akirugarni.
Elluaruciat Alerquutain Atanrem
73Elpet unatevgun elucilirlua piliaqellruarpenga;
taringumallerkamnek cikirnga elitnianka alerquuteten.
74Qigcikestevvet tangerqunegten͞ga angnirciqut,
cacetuqutekngamku akquten.
75 Ataneq, nallunritua elluarrluten cuqcilaucirpenek,
anucimirqecetaallruarpenga-llu piciucin pillerkiurarpenun aturluku.
76Akqellrucirpetun wiinga pistevni,
caceturivkaqia kenkevgun pektayiilngurkun.
77Takumcukia unguvaniartua,
wiinga-wa angniutekngamku atullra alerquutvet.
78Ucuryagtellriit iqluuruteklua picilirtenka kiaresngialkilit;
wiinga tau͡gaam umyuangcautekciqanka alerquuteten.
79Qigcikesteten taivkarki wangnun,
elitnaurluki nallunrirniarait alerquuteten.
80Ataki pitacirramtun atuqilaki alerquuteten,
cirlakumalriim kasnguyullra atunritniarqa.
Piicaun Aviutesqelluni
81 Ataneq, nerinipakaama elpenek anirturtekamnek cayuumiirutua;
neryuniurutkaqa qanellren.
82Iituumarma mernunglua utaqalgirlua akqutkellerpenek,
aptaqlua, “Qaku ikayuqatarcia?”
83Cakarniilngurtun caqukuallertun egingalriatun ayuqliriunga,
tau͡gken nalluyaguteksaunaki alerquuteten.
84Qaillun pitalriamek utaqalgiqatarcia?
Qaku-llu anucimirqecetaaqatarciki nangcilriit wangnek?
85Ucuryagtellriit, niisnganrilnguut alerquutevnek,
petmililuteng pitaqengnaqaatnga.
86Alerquuteten tamarmeng atuyunarqut;
yuut iqluuruteklua nangtaatnga; ikayurnga!
87Tuqutengnaqvakarlua tuqucarpiaraatnga,
tau͡gaam cakaaqsaitanka alerquuteten.
88Kenken pektayiilnguq aturluku tuquvkaryaqunii,
niisngaluki alerquuteten yuuniartua.
Ukvekellrat Alerquutain Atanrem
89 Ataneq, qaneryaran piugarkauguq iquilngurmek;
nangyuilnguungami qilagmi.
90Elpet-wa piciurrlainarciqellriaten yugnun;
nuna pektaararkaunrirluku uitallerkiullruan, tuaten-llu uitaluni.
91Cat tamarmeng man'a tekilluku uitaut pisqellerpetun,
tamarmeng kevgiulriaruameng elpenun.
92Angniutengqenrilkuma alerquutevnek,
nangtequtma ak'a tuqutellruyaraatnga.
93Wiinga cakaarngaitqapigtanka ayuqucirtuuteten;
tamakutgun unguvamek cikiumiivnga.
94Elpet pikngavnga anirturnga;
niisngangnaq'laranka alerquuteten.
95Yuut assiitellriit nayuraatnga tuqutnalua,
wiinga tau͡gaam umyuangcautekciqanka alerquuteten.
96Nallunrirtua cat tamarmeng engelengqerrameng piunrillerkaatnek;
alerquuteten tau͡gken iquklisngaunateng.
Kenkellrat Alerquutain Atanrem
97Wiinga alerquuteten kenkanka cakneq!
Ernerpak-llu umyuangcautekuralaranka.
98Alerquuteten wangnetauralaameng
umyuartunruvkalaraatnga inglukestemni.
99Taringumanrulartua-llu tamalkuitni elitnaurtemni,
umyuangcautekuralaamki ayuqucirtuuteten.
100Umyuartunrulartua-llu tegganerni,
niisngiimki alerquuteten.
101Ayuqucirrliqsarat tamalkuita avitelaranka,
niisngayuamku qaneryaran.
102Nallunguaqsaitanka ayuqucirtuuteten,
elpet tau͡gaam elitnauristekngamken.
103Neqnirqellriatun ayuqut naspaallrat ayuqucirtuutvet—
paatakaami-llu neqnirqenruluteng.
104Alerquutvet taringumavkalaraatnga,
taumek eq'ukekeka tamalkuan ayuqucirrliqsaraq.
Atanrem Alerquutai Tanqiugut
105Qaneryararpet kenurratun ciuliqagtaatnga,
tanqigiluku tumkaqa tamalkuan.
106Wiinga akqutka aturciqaqa,
ayuqucirtuuten ellualria aturyugluku.
107 Ataneq, ilumun nangteqeqapigtua;
elpet tau͡gaam unguvavkaqia akqellrucirpetun.
108 Ataneq, ciuniurki nanrautenka elpenun,
elitnaurlua-llu alerquutevnek.
109Upingarrlainartua unguvaka qunukarkauvkenaku;
wiinga nalluyaguteksaitanka alerquuteten.
110Assiitellriit yuut pitaqengnaqlua negalilaryaaqut,
tau͡gaam wiinga picirkiuteten unitaaqsaitanka.
111Alerquuteten paitaqluki piku'urciqanka kesianek;
wiinga cakneq angniutekanka.
112Wiinga cucuklillruunga niisnganaluki alerquuteten
tuqunatkamnun.
Aarnarqelriartaituq Alerquutaini Atanrem
113Eq'ukanka yuut malrugnek umyualget tungevnun,
tau͡gaam wiinga kenkanka alerquuteten.
114Elpet wiinga iirvikamken capkutaqluten-llu;
neryuniurutengqertua akqutkellerpenek.
115Ayagci wangnek, assiilngurnek calilriani,
kevgiuqengama Agayutem alerquutai aturnianka.
116Piniliumanga akqellrucirpetun, unguvaniartua;
neryuniullemni qacuvallagcecaqunii!
117Nayumiqanga, cam pinritniaraanga,
murilkuralarnianka alerquuteten.
118Elpet ciuniuyuitaten alerquutvet niisnganritestait;
piciunrilnguut picirkiurait catngungaitut.
119Elpeni assiitellriit yuut ciqitarkatun ayuqut,
taumek kenkekenka alerquuteten.
120Wiinga uulegtua alinglua elpenek;
uluryayuglua cuqciyararpenek.
Niisngallerkaq Alerquutainek Atanrem
121Elluarrlua piciulua-llu pingnaqurallruunga;
pegcaqunii nangtestemnun!
122Akqia ikayurarkaulua pistevni;
ucuryagtellrianun yugnun nangcecaqunii.
123Utaqalnguunga elpenun anirtullerkamnek,
akqutkellerpenek nerinillua aviuciiqnilua.
124Kenken pektayiilnguq aturluku aulukia,
elitnaurlua-llu alerquutevnek.
125Wiinga pistekarpenga; taringumallerkamnek cikirnga,
nallunritnaunka elitnauruteten.
126 Ataneq, uitayunairutaaten,
narurciata yuut alerquutevnek.
127Suulutaami assinkacagarmi
kenkenruanka alerquuteten.
128Taumek maligtaqulaqenka tamalkuita ayuqucirtuuteten;
eq'ukanka piciunrilnguut piciryarat.
Niisngayuumillrat Alerquutain Atanrem
129Elpet ayuqucirtuuteten assinqestaitut;
wiinga niisngaanka umyuamkun tamalkirrlua.
130Qaneryaraten yugnun maniaqavki ellaitnun tanqiulartut,
yuut elisnganrilnge'rmeng umyuarturiaqluteng.
131Aitarma anerteksaaralriatun ayuqua,
piyugyaaqem ugaani alerquuteten.
132Tuiggviklua takumcukia wiinga,
kenkesteten tuaten pilaucirpetun.
133Akqellren aturluku iquvkaryaqunii;
assiilnguq atanruvkaryaqunaku wangni.
134Anirtuqia nangtestemnek,
alerquuteten aturnianka.
135Nayurlua atawaqertessnga
elitnaurlua-llu alerquutevnek.
136Wiinga aluviliurtua cakneq,
yuut-wa narurciata alerquutevnek.
Elluaruciat Alerquutain Atanrem
137Ellualriaruavet, Ataneq,
cuqcilartuten ellualriakun.
138Alerquuteten cikiutekelten ellualriaruut piciulriaruluteng-llu.
139Eq'urtelqa ilumni ekualriatun ayuquq,
inglukestem̄a caukenrilatki alerquuteten.
140Akqutkellren wangnun piciuqapigtuq!
Wiinga-llu kenkeqapiggluku!
141Wiinga cakegtaunritua caunrilkumalua-llu,
tau͡gaam ayuqucirtuuteten cakaaqsaitanka.
142Elpet ellualriaruuten akwarpak,
alerquuten-llu piciulriaruluni.
143Wiinga picurlagalartua nanikuagaqlua-llu,
tau͡gaam alerquutvet angnirivkalaraatnga.
144Alerquuteten elpet ellualriaruut akwarpak;
wiinga taringumallerkamnek cikirnga, unguvanaurtua.
Piicaun Aviutesqelluni
145Umyuamkun tamalkirrlua qayagauramken;
Ataneq, kiunga niisnganianka alerquuteten!
146Wiinga qayagauramken;
anirturnga, alerquuteten aturnianka.
147Erpailgan maklua qayagaularamken ikayuusqellua;
neryuniurutengqertua akqutevnek.
148Unugpak tupaumalua
umyuangcautek'laranka ayuqucirtuuteten.
149Kenken nangyuilnguq aturluku niisnga, Ataneq;
takumcukuten aturluku unguvavkarnga!
150Yuut caunrilkilriit alerquutevnek mallgaatnga,
umyuarrliqullua nangtestekama.
151Tau͡gaam, elpet Ataneq, canimnetuten,
alerquuteten-llu cakanirngaunateng.
152Akaurtuq nallunrilqa ayuqucirtuutevnek;
taqellruavki akwarpak piugarkauvkarluki.
Kaigan Ikayuusqelluni
153Tangrru nangteqelqa, anirturlua-llu,
cakaaqsailamki alerquuteten.
154Pinarqutaitellerkamkun ikayurnga aviullua-llu;
anirturnga akqellrucirpetun.
155Assiitellrianek calilriit anirtuumangaitut,
niisnganrilamegteki alerquuteten.
156 Ataneq, naklekilaucin angelriaruuq;
anirturnga ellualriarucin maniluku wangnun.
157Inglukestelirtua nangtestelirlua-llu,
tau͡gaam pinriteksaunii aturanka alerquuteten.
158Umyualngulartua tangrraqamki piciunrilngurnek calilriit,
alerquuteten atunrilatki.
159 Ataneq, tangrru kenkiciqa ayuqucirtuutevnek.
Anirturnga kenken cimiyuilan!
160Qaneryaraten tamarmeng piciulriaruut,
cuqciyaran-llu ellualria piugarkauluni akwarpak.
Ciumurutellra Atanrem Alerquutiin
161Camek pitkaitelange'rma nangtelaraatnga atanerruat,
tau͡gaam wii qigcikaqa alerquuten.
162Angnirtua akqutkelten pitekluki—
tukuutekamek nalkutellriatun.
163Eq'ukanka umyualngukluki-llu iqluurutet,
tau͡gaam kenkaqa alerquuten.
164Ernerpak malrunlerqunek quyavik'laramken
cuqciyaraten ellualriaruata.
165Alerquutvet kenkestai uitanqegcitengqertut angelriamek,
cam-llu picurlagtessngaunaki.
166 Ataneq, anirturillerkan wangnek neryuniurutkaqa,
alerquuteten-llu aturluki.
167Niisngaanka ayuqucirtuuteten;
kenkanka umyuamkun tamalkirrlua.
168Niisngaanka picirkiuteten ayuqucirtuuteten-llu;
calqa tamalkuan tangvagan.
Piicaun Ikayuusqelluni
169Ikayuusqellua qayagaurutka ciuniurru, Ataneq!
Taringumallerkamnek cikirnga akqellrucirpetun.
170Kaigatka ciuniurru;
anirturnga akqellrucirpetun!
171Nanrarrlainarciqamken,
alerquutevnek elitnaulaavnga.
172Yuarutkeciqaqa alerquuten,
picirkiuteten tamarmeng pitalqeggata.
173Ikayurillerkan wangnek upingaterrlainarru,
maligtaquamki alerquuteten.
174 Ataneq, anirtuutevnek piyuumirtua!
Alerquuteten-llu angniutekanka.
175Unguvavkarnga nanrarniamken;
ataki ayuqucirtuuteten ikayuqkilaki.
176Qusngitun tamalriatun nanllikiartua;
tailuten yuarnga wii pistevni,
tua-i-wa cakaaqsailamki alerquuteten.
Currently Selected:
Psalm 119: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
