Psalm 118
118
Cirlakillerminek Quyaluni Piicaun
1Quyavikiciu Ataneq, assilriaruan,
kenkii-llu nangyuunani!
2Israel-aam yui qanqilit,
“Elliin kenkii nangyuituq.”
3Aaron-aam-llu yui qanqilit,
“Elliin kenkii nangyuituq.”
4Qigcikestai-llu Atanrem qanqilit,
“Elliin kenkii nangyuituq.”
5Nanikuallma nalliini qayagaullruaqa Ataneq;
elliin-llu kiulua angitellruanga.
6 Ataneq wiinga ilikngamku alingengaitua.
Yuum wiinga qaillun pisciigataanga.
7 Ataneq ilikluku ikayurtekngamku,
wiinga tangvagciqanka inglukestenka cirlakekaki Agayutem.
8Tusngavikellra Atanrem assinruuq,
cacetuqutengqellerkami yugmek.
9Tusngavikellra Atanrem assinruuq,
cacetuqutengqellerkami yuut ciuliqagtaitnek.
10Inglukestem̄a kassugusngallruatnga;
tau͡gaam piunrillruanka piniakun Atanrem!
11Avatairumallruatnga kassugullua;
wiinga tau͡gaam piunrillruanka piniakun Atanrem!
12Evegtarugartun quyurutellruatnga,
tau͡gaam ekuallalriatun canegtun ayuqellruut, egmian qamqerrluteng;
piunriamteng piniakun Atanrem.
13Curukarlua cirlaksarpiaryaaqaatnga,
tau͡gaam Atanrem ikayullruanga.
14 Atanrem piniliumiinga nanralaraqa;
elliin anirtullruanga.
15Niiciki angnirluteng qayagpagalriit cirlakillermeggnek Agayutem yui pelatekameggni:
“Atanrem pinimikun waten pivkaraakut!
16Wangkuta cirlakillruukut Ataneq pinilriaruan,
elliin ikayuakut angtatailngurkun pinimikun!”
17Wiinga-wa tuqungailngua, unguvalua tau͡gaam
qalarutkeciqanka Atanrem caliari.
18Anucimirqecetaallruyaaqaanga cakneq
tau͡gaam tuquvkallrunritaanga.
19Ikirucia ikirtuqainek Agayuvigpiim;
iterlua quyaviksarturciqaqa Ataneq!
20Ukut ikirtuqat iteryaraugut ullagluku Ataneq;
ellualriit tau͡gaam kiimeng uuggun iteryugngaut.
21Quyavikamken Ataneq kaigatka niicavgu,
cirlakivkarlua inglukestemnek.
22Teggalquq enelistet qessakellrat caunrilkelluku
tusngavigkaulliniuq arcaqalriaruluni.
23Man'a Atanrem caliaqaa;
irr'inaqluni wangkutni.
24Una erneq Atanrem piliaqellrua;
aturnaurput nunaniryugluta angnirluta-llu!
25 Ataneq, anirturkut wangkuta!
Ataneq, piyuumiuteput piksaguteski!
26Agayutem atawaqertelliu ataneq itellria Atanrem atrakun!
Wangkuta Atanrem Agayuvigpiin iluanek atawaqaasqamteggen.
27 Ataneq Agayutnguuq; assirluta piuralaraakut.
Napat avayaitnek tegumiarluci nerevkarin ayagnirciu,
uivluku-llu ekuavik.
28Wiinga elpet Agayutkamken, wiinga-llu quyavikamken;
angelriarucin yugnun qalarutkeciqaqa.
29Quyavikiciu Ataneq assilriaruan
kenkii-llu nangengaunani.
Currently Selected:
Psalm 118: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
