Mark 16

Jesus-aam Maktellra

1Sabbath-aaq-llu pelluumarian, Mary Magdalene, Mary-llu James-aam aanii, Salome-llu, tepkegcilriamek kiputut, mingugyarturnaluku. 2Qungumun-llu tekitut nitilim erenrin ciuqliatni unuayaarmi, akerta pic'an. 3Qanruyutut-llu, “Kia teggalqumek qungum painganelngurmek akaguciiqakut?” 4Ciugcameng-llu tangrraat akagcimaluni, wani-wa angqapigtellria. 5Qungumun-llu itrameng, yun'erraq tangrraat tallirpian tungiini aqumgaluni, akurtulriamek qatellriamek aturalek. Tatamqapigtut-llu. 6Qanrutai-llu, “Tatamevkenaci; Jesus-aaq Nazareth-aarmiu kelistamun ussukcausngalleq yuararci. Maktellruuq, maantenrituq. Wani-wa enellran ellimallra. 7Tau͡gaam ayagluci qaneryarturci elitnaurainun, Peter-aamun-llu, ciuvcen̄i-gguq Galilee-amun ayagtuq; tuani tangerciqerci elpecen̄un qanellruciatun.” 8Tua-i an'ut qimagluteng qungumek, uuleggluteng alangaarluteng-llu; kitumun-llu qaillun qanenritut, alingameng.

Ak'allaq Gospel-aam Nangenra #16.9: Ilaitni kalikarni ak'allarni-llu mumigtani waten iquqlitellra Gospel-aam igausnganrituq (verses 9-20).

[ 9Jesus-aaq-llu makcami nitilim erenrin ciuqliatni unuayaarmi, alaiqerraartuq Mary Magdalene-amun, elliinek anevkallrukai anernerrluut malrunlegen. 10Taum qanruteksarturaa ilakellrinun, angniilata qialuteng-llu. 11Taukut-llu niicamegteggu unguvacia, elliinun-llu tangrruucia, ukveqenritaat.

12Tamatum-llu kinguani ilagket malruk nunarrarmun egilraullragni, alairvikak allamek ayuqucingqerrluni. 13Taukuk-llu ilamegnun qanruteksarturaak, tau͡gaam taukut-llu ukveqenritagket.

14Kinguakun taukut qulen ataucimek cipnelget alairvikai nervigmi aqumgallratni, cakneq-llu qalarutai ukvenriluciat ircaqruita-llu tegguciat pitekluku, ukveqenrilatki taukut ellminek tangellret makyucimi kinguani. 15Qanrutai-llu, “Ayagci nunanun tamaitnun, qaneryaraq-llu assilria qalarutkiciu piurcimalrianun tamalkuitnun. 16Ukverluni-llu anglluumalria anirtuumaarkauguq, tau͡gaam ukvenrilnguq pinarqelriarunimaarkauguq. 17Makut-llu nallunailkutet maligciiqait ukvelriit; wiinga atemkun anernerrluut anevkarciqait, alungutetgun nutaratgun qallaciiqut; 18ciissirpiit teguciqait, tuqunarqelriamek-llu meq'uneng catekngaitaat; naulluulriit-llu unatmeggnek pategciqait, taukut-llu assiriciqut.”

19Tua-i-llu Ataneq Jesus-aaq, ellaitnun qallacimariami, qilagmun mayuucimauq, aqumluni-llu Agayutem tallirpian tungiinun. 20Taukut-llu ayagtut tamiinun qallataqluteng; Atanrem-llu calillgutkai, qaneryaraq-llu pektayiircetaa nallunailkutetgun. Amen.]

Cali Ak'allaq Nangenra#16.9-20: Ilaitni kalikarni ak'allarni-llu mumigtani waten Gospel-aam nangenra ayuquq naninani ilausngaluni taktuamun iquklitellranun (verses 9-20).

[21 Arnat-llu ayagtut Peter-aamun ilainun-llu qanrulluki-llu canek qanrucimallermeggnek. 22 Mat'um kinguani, Jesus-aam tungaunani ayagcetellrua, elitnaurani tumekluki calaramek kanavamun, kencignarqellria nangengailnguq-llu qaneryarartaa nangyuilnguum anirtuumallerkam.]

Currently Selected:

Mark 16: YPK

Highlight

Copy