Mark 15

Pilate-aamun Qanercetaarumallra

1Unuaquan-llu tamaa agayulirten͞gunret qaillukuartut ciulirneret kalikanek-llu elisngalriit ilakluki, qaillukuartet-llu tamalkuita, Jesus-aaq-llu qillerqaat, ayaulluku-llu Pilate-aamun tunluku. 2Pilate-aam-llu aptaa, “Elpet-qaa taunguuten Jews-aat Angayuqrat?” Kiugaa-llu, “Qanrucirpetun taunguunga.” 3Agayulirten͞gunret-llu picetaarutaat amllernek. 4Pilate-aam tua-i aptenqigtaa, “Kiukaituten-qaa watqapik? Atam amllernek picetaaruskiitgen.” 5Tau͡gaam Jesus-aam kiunriraa Pilate-aaq irr'ivkarluku.

6Tua-i Paaskaami itengqalriit iliit yuut piyullrat itengqanrircet'laraa. 7Itengqalriartangqertuq-llu Barabbas-aamek at'legmek, tauna itengqauq picirkiutmek inglukilriit ilakluki, tuqucillruluteng-llu inglulitellermegteggun. 8Yugugaat-llu mayurtut kaigavikluku-llu tuaten pisqelluku ellmeggnun pilauciatun. 9Pilate-aam tua-i kiugai, “Jews-aat-qaa Angayuqrat pegtesqumaarci?” 10Wani-wa nallunrilami agayulirten͞gunret ciknakluku tuavet tunellrucianek. 11Tau͡gaam agayulirten͞gunret yuut cumigcetaarait Barabbas-aaq tau͡gaam aguagutkesqelluku. 12Pilate-aam-llu ataam qanrutai, “Qaillun-mi waniwa wangnun pisqececiu una Jews-aat Angayuqratnek aterpagtellerci?” 13Tua-i ataam qayagaut, “Kelistamun ussukcausgu.” 14Pilate-aam tua-i qanrutai, “Ciin, camek assiilngurmek taquta?” Tau͡gaam arcarikanirluteng qayagaut, “Kelistamun ussukcausgu!” 15Tua-i Pilate-aam, yuut umyugaat narurcuumiilamiu, Barabbas-aaq itengqanrircetaa, Jesus-aaq-llu piqertuarcecimariamiu kelistamun ussukcautarkaurcetaa.

Piciliutekumallra Anguyagten̄ek

16Anguyagtet-llu qamavet ayautaat 'laavkaam iluqlianun, tua-i wani-wa nunam atanran 'laavkaaranun, anguyagten͞gullguteteng-llu tamalkuita taisqait. 17Qesurlimek-llu ulikutamek acetaat, nasqerrutekamek-llu cukilananek piirriluteng, nasqerruciraat taumek. 18Nayangarvik'laraat-llu qanerluteng, “Atawaqaa, Jews-aat Angayuqrat!” 19Cuplulegmek-llu qamiquakun kaugturaat, qecirluku-llu, ciisqumiggluteng-llu palurtut ciuqerranun. 20Piciliutekumariamegteggu-llu, qesurlimek ulikutairaat, aturainek-llu nakmiillainek at'elluku, anevkaraat-llu kelistamun ussukcaucarturnaluku. 21Tamaaggun-llu pektuq Simon Cyrene-armiu, nunautminek tailuni Alexander-aam, Rufus-aam-llu atiik, tauna unayaqaat kelistaa quukataasqelluku.

22Tekiutaat-llu ciunermeggnun Golgotha-mun, tamana mumiggluku waten ayuquq, “Ilquignertalek.” 23Wine-amek-llu cungarninarqelriamek avulegmek mercetengnaqaat, tau͡gaam menritaa.

Ussukcaucimallra

24Kelistamun-llu ussukcautaat, aturai-llu ellmeggnun avenqegtait, nall'arcetaarutekluki-llu, kia imum naliata pikarkauluki. 25Sass'aq-llu qulngunrita'arnun ellirluku, kelistamun ussukcautaat. 26Quliini-llu igausngauq picetaaruyutii waten: “JEWS-AAT ATANRAT.” 27Elliinun ilakevkarlukek tuqutarayulik malruk kelistamun ussukcautagket, aipaa tallirpilirneranun aipaa-llu iqsulirneranun. 28[Tua-i piciurtut kalikat waten qaneryaralget, “Ilausngallruuq picurlalrianun.”] 29Tamaaggun-llu kitulriit qacungakaat, ungaulugvikluku-llu, qanerluteng, “Qumlinaqvaa! Agayuvigmek itumciyulriami naucugluku-llu ernerni pingayuni, 30elpenek anirtua, kelistamek-llu atrarluten!” 31Tuaten-llu cali agayulirten͞gunret qallatellgutekluteng piciliutekaat kalikanek elisngalriit ilakluki qanerluteng, “Allat anirtullruyaaqai, ellminek anirturciigatuq. 32Una Christ-aq, Israel-aanun Atanrulria, watua kelistamek atrarli, tangerrniarput ukverniartukut-llu.” Ussukcausngallgutegken-llu aripacitekaak.

33Erenrem-llu qukallrani, nuna tamarmi tan'geriuq sass'at pingayuat tekilluku. 34Sass'at-llu pingayuatnun ellinrani Jesus-aaq qastuluni qayagpagtuq qanerluni, “Eloi, Eloi, lama sabachthani?” tamana mumiggluku waten ayuquq, “Agayutmaa, Agayutmaa, ciin unicia?” 35Tuani-llu nangengqalriit ilaita niicamegteggu qanertut, “Atam, Elijah qayagaa.” 36Iliita-llu aqvaqurluni urungalnguq quunarqelriamek meciraa, cuplurpalegmun-llu kapulluku mercetaa, qanerluni, “Utaqaqerci! Tangerrnaurput Elijah-m atraucarturyuaraa.” 37Jesus-aaq-llu qastuluni qayagpagtuq, anernerirluni-llu.

38Agayuviim-llu capii allegtuq, pikaken ayagluni kanavet. 39Anguyagtet-llu atanrata tuani ciuqerrani nangengqalriim, tangrramiu anerneriucia, qanertuq, “Ilumun una angun Agayutem Qetunraqlinia!”

40Arnat-llu tuantut yaaqvanek tangvalriit; taukut ilakait Mary Magdalene, Mary-llu James-aam mikellrulriim Joses-aam-llu aaniik, Salome-llu. 41Taukut maligtellrukiit Galilee-amtellrani, kevgiurluku-llu; arnat-llu allat amlleret Jerusalem-aamun mayullgutai tuantut.

Tungmagcimallra

42Atakuan-llu, erneq tauna Upcaraungan, wani-wa Sabbath-aam ciungani, 43Joseph-aaq Arimathea-rmiu tekituq, qaillukuartet iliit takarnarqelria; elliin-llu cali Agayutem angayuqauvia utaqakii; tua-i kalivyugpek'nani Pilate-aamun itertuq, Jesus-aam-llu temiinek kaigavikluku. 44Pilate-aam irr'ikaa tuqumaricia, anguyagtet-llu atanrat taisqaa apluku-llu ak'a tuqullrucianek. 45Tua-i anguyagtet atanrat apterraarluku tuqumaricianek, Joseph-aamun temii tunaa. 46'Lumarrarmek-llu kiputuq, atrarrluku-llu, 'lumarrarmun-llu imgulluku, qungumun ellia qiurmun nayuumalriamun, teggalquq-llu akaggluku qungum painganun. 47Mary Magdalene-am, Mary-m-llu Joses-aam aaniin tangvagaak ellimacian nunii.

Currently Selected:

Mark 15: YPK

Highlight

Copy