Mark 14

Jesus-aam Napcetengnaqellra

1Erenrek malruk kinguagni Paaskaaq nallairarkaurtellruuq quulciiriyarailngurmek kelipartularviat. Agayulirten͞gunret-llu kalikanek-llu elisngalriit qaillukuartut qaillun piluteng elillrakun, tegungnaqnaluku tuqulluku-llu. 2Tau͡gaam qanertut, “Agayunerpagmi pivkenaku, yuut pek'ngarcuartut.”

Jesus-aam Minguumallra Bethany-mi

3Bethany-metellrani-llu Simon-aam mamyuilngurmek agtuumallrem eniini, nervigmi aqumgallrani, arnam ullagaa putiilekaalgirluni mingugmek tepkegcilriamek, akitulriamek imalegmek, putiilekaaq-llu tauna navgaa qamiqurranun-llu kuvluku. 4Tau͡gaam tuanelnguut ilaita cangayutekaat qanerluteng, “Ciin minguk man'a caanguarutngua? 5Minguk man'a tunkuni akinun yuinarmun qulnek cipluku, cikiutekautnguyartuq kusgurnarqelrianun.” Qaneksugutekaat-llu. 6Tau͡gaam Jesus-aaq qanertuq, “Uitaciu! Ciin cangayugcetaarceciu? Assilriamek pianga. 7Kusgurnarqelrianek ilangqerrlainartuci, piyugaqavci-llu, assilriamek piyunarqaci; tau͡gaam wii nayurtekerrlainarngaitarpecia. 8Pitacimitun piuq. Temka mingugluku tungmagcimallerkamnun. 9Ilumun, qanrutamci, nani nunam qaingani man'a qaneryaraq assilria qalarutkumakan, man'a-llu arnam pillra qanrutekciqaat ellii neq'akluku.”

10Judas Iscariot-aaq, taukut qulen malrugnek cipnelget iliit, agayulirten͞gunernun ayagtuq ellaitnun tunenaluku. 11Niicamegteggu-llu angnirtut, akqaat-llu akinek cikirarkauniluku. Tua-i-llu ingcurtuq nau͡gg'un tunllerkaanek ellaitnun.

Kituutem Nerellra

12Erenret-llu quulciiriyarailngurnek kelipartularviata ciuqliatni, qusngiyagaq Paaskaarcuutekaq tuqucimarian, elitnaurain aptaat, “Nani upcartuusqumasikut Paaskaami ner'arkarpenek?” 13Tua-i elitnaurami ilagket malruk ayagcetak qanrullukek-llu, “Nunarpagnun ayagtek, tua-i angun nall'arciiqertek mertarcuutmek tegumialria, tauna maligeskit'gu, 14natmun-llu itqan, tuani enem atanra qanruskit'gu, ‘Elitnaurista qanertuq, Nani enevni Paaskaarcuutmek nerciqsia elitnauranka ilakluki?’ 15Tua-i nerpagmek qullirmelngurmek nasviciiqaatek aqumllertuumaluni upingalriamek, tuani taquskitek pikamten̄ek.” 16Elitnaurak-llu ayagtuk, nunarpagnun-llu tekicamek tuaten ayuqluku nataqaak qanruciatun, Paaskaarcuun-llu taqluku.

17Atakuan-llu tekituq taukut qulen malrugnek cipnelget ilakluki. 18Aqumgaluteng-llu nerngameng, Jesus-aaq qanertuq, “Ilumun, qanrutamci, ilavci nerellgutma tunciqaanga.” 19Tua-i angniirtut, tungliqu'urluteng-llu aptaat, “Wiinga-qaa taunguunga?” 20Qanrutai-llu, “Ukut qulen malrugnek cipnelget ilakaat, qantamun akurtellgutka taunguuq. 21Yuum Qetunraa yuuyaaquq ellminek igausngalriit piciurrluki, tau͡gaam nakleng yuk tauna Yuum Qetunraan tunestii! Tauna yuk atawauyallruuq yuurtellrunrilkuni.”

22Nerrlermeggni-llu Jesus-aam kelipaq tegua, atawaqaasqiluni-llu, itumtaa, taukunun-llu tunluku, qanerluni, “Tegulluci nerici, wani-wa temka.” 23Saskaq-llu tegua, quyarraarluni-llu taumek cikirai; tamarmeng-llu tuaken mertut. 24Qanrutai-llu, “Wani-wa auka akquyutem nutaram auga, amllelriit pitekluki kuvumalria. 25Ilumun, qanrutamci, mat'um kinguani merngaitua wine-am mecuanek imna erneq engelkarrluku nutaraulria mer'arkaukumku Agayutem angayuqauviani.”

26Yuarutmek-llu atuumariameng, an'ut Olive-aam ingrianun. 27Tua-i Jesus-aam qanrutai, “Tamarpeci qimagciquci, igausngiin, ‘Qusngiliurta kaugturciqaqa, qusngit-llu sekavciiqut.’ 28Tau͡gaam makcimarikuma, ciuvcen̄i Galilee-amun ayagciqua.” 29Tau͡gaam Peter-aam qanrutaa, “Tamarmeng qimangraata wiinga qimagngaitua.” 30Jesus-aam tua-i qanrutaa, “Ilumun, qanrutamken, ernerpak mat'umi unugmi, angucaluq yaqulek malrurqugnek qalriavailgan, mecirautekciqerpenga pingayurqunek.” 31Nutaan aguaggluni qanenqigtuq, “Tuqullgutkarkaungramken, mecirautekngaitamken.” Tuaten-llu cali tamarmeng qanertut.

Gethsemane-mi

32Tua-i Gethsemane-mek at'legmun tekitut, elitnaurani-llu qanrutai, “Wavet aqumici, piicallemni.” 33Peter-llu, James-aaq-llu, John-aaq-llu malikai. Tua-i-llu uivagciqapigtuq nanikuaqapiggluni-llu. 34Tua-i qanrutai, “Wii tarneqa angniitqapigtuq, tuqumun tuaten; maantaurci, pegg'arluci-llu.” 35Unitkanirluki-llu nunamun palurtuq, piicagluni-llu tauna sass'aq ellminek pellugtesqelluku piyunarqekan. 36Qanerluni, “Aata, Atamaa, cat tamarmeng piyugngaut elpeni, una saskaq wangnek au͡g'arru; tau͡gaam wii pisquciqa pivkenani, elpet pisqucin piuli.” 37Ulliimiki tekitai qavarluteng; Peter-llu qanrutaa, “Simon, qavartuten-qaa? Pegg'arciigatuten-qaa sass'ami ataucimi? 38Tupaumaci piicagluci-llu, naspaatmun pinritnaurtuci, anerneq ilumun cumigcaaquq, tau͡gaam kemek piniatuq.” 39Cali ataam piicagyarturtuq, qaneryarani qaneryaraqenqiggluki. 40Utercami-llu ataam tekitai qavarluteng, iingit uqamaunateng, nalluluku-llu qaillun elliinun kiucirkarteng. 41Pingayiriluni-llu tekitai, qanrulluki-llu, “Qavartu'rtuci-qaa, mernuinercirluci-llu? Tua-i pinariuq. Atam Yuum Qetunraa assiilngiumalriit unataitnun tunqataraat. 42Makluci ayiilta, tangerrluku, ukaqsigtuq tunestekaqa.”

Jesus-aam Tegumallra

43Qallasnginanrani-llu Judas-aaq tekituq, taukut qulen malrugnek cipnelget iliit, yugugaat malikluki nuussirpalget kaugtuutalget-llu, ayagcecimalriit agayulirten͞gunernek, kalikanek-llu elisngalrianek, ciulirnernek-llu. 44Tua-i tunestekaan nallunailkutarkitellruamiki, qanertuq, “Melugararkaqa taunguciquq, tauna tegukiciu, ayaulluku-llu murilkelluku.” 45Tekicami-llu egmianun ullagaa, tuqlurluku, “Ayuqucirturtaa!” Melugarluku-llu. 46Taukut-llu yaggvikluku teguat. 47Tau͡gaam tuani nangengqalriit iliita nuussirpani amua, agayulirten͞gunrem-llu pistii piqerturaa ciutairrluku. 48Jesus-aam-llu pii, “Taiguci-qaa tuarpiaq tuqutarayulimun nuussirpalgirluci kaugtuutalgirluci-llu tegungnaqlua? 49Ernerni tamalkuitni nayularyaaqamci Agayuvigpagmi elicungcarilua, tegungnaqeksaitarpecia. Tau͡gaam kalikat piciurtarkaugut.” 50Tua-i tamarmeng ilain unitaat, qimagluteng-llu.

51Yun'erraq-llu tuantuq elliinun maligutleq, 'lumarrarmek ulikutalek aturailami; tauna teguat, 52tau͡gaam taum ulikutani peggluku qimagtuq matarmi.

Agayulirten͞gunermun Qanercetaarumallra

53Jesus-aaq-llu agayulirten͞gunermun ayautaat, tuavet-llu quyurtut agayulirten͞gunret tamarmeng, ciulirneret-llu, kalikanek-llu elisngalriit. 54Peter-aam-llu yaaqvaariluku maligtaa, agayulirten͞gunrem-llu 'laavkaaran elaqlianun piluni, tuavet aqumluni pistet akuliitnun matneqluni kenermun. 55Agayulirten͞gunret-llu qaillukuarten͞gullgutkelriit-llu tamarmeng nallunairutkarcurtut Jesus-aamun tuqucetnaluku, tau͡gaam nataqutenritut. 56Amllelriit picetaarucaaqaat iqluluteng, tau͡gaam picetaarutait ayuqenritut. 57Ilait-llu nangertut picetaarutekluku iqluluteng, qanerluteng, 58“Niitellruarput waten qanertelluku, ‘Una Agayuvik unatetgun piliaqumalria piunrirciqaqa, erenret-llu pingayuatni alla nauciiqaqa, unatetgun piliaqumanrilnguq.’” 59Cali tua-i picetaarutait ayuqenritut. 60Agayulirten͞guneq tua-i nangertuq qukaatnun-llu piluni, Jesus-aaq aptaa, “Kiukaituten-qaa watqapik? Camek ukut piniatgen?” 61Tau͡gaam nepaituq camek-llu kiuvkenani. Tua-i agayulirten͞gunrem aptenqigtaa, “Elpet-qaa taunguuten Christ-aq, Nanraumalriim Qetunraa?” 62Jesus-aaq-llu qanertuq, “Taunguunga. Tangrrarkaugarci-llu Yuum Qetunraa Artuqailnguum tallirpian tungiini aqumgaluni, qiliim-llu amirluikun agiirrluni.” 63Tua-i agayulirten͞gunrem aturani allgurai qanerluni, “Cali-qaa nallunairistem̄ek allamek pinarqukut? 64Niitarci Agayutmek qacungakicia. Qaillun umyuarteqseci?” Tamarmeng-llu tuqutnaqniat. 65Tua-i ilaita qeciraat, kegginaa-llu patuluku, tenglugaat-llu qanrulluku-llu, “Ap'ringnaqi!” tarikestet-llu qacarqauraat.

Peter-aamun Mecirautekumallra

66Peter-llu qakmantelluku enem elaqliani agayulirten͞gunrem pistain arnat iliit taiguq, 67Peter-llu matneqellrani tangrramiu tangvagaa qanerluni-llu, “Elpet-llu Jesus-aam taum Nazareth-aarmium ilakaaten.” 68Tau͡gaam meci'irtuq, qanerluni, “Nalluaqa qanellren taringenritaqa-llu.” Tua-i-llu elaturramun anluni, yaqulget-llu angucalurtaat qalriaguq. 69Pistem-llu arnam tangenqigcamiu tuani, nangengqalriit qanrutai, “Una taukut ilakaat.” 70Tau͡gaam ataam meci'irtuq. Atatakuan-llu tuani nangengqalriit Peter cali qanrutaat, “Ilumun taukut ilakaatgen, Galilee-armiunguavet.” 71Tau͡gaam ellii acivaqanirtuq ukvernarcariluni-llu, “Yuk tauna qanruteklertek nalluaqa.” 72Yaqulget-llu angucalurtaat aipiriluni qalriaguq. Nutaan Peter-aam imna qaneryaraq neq'eraa, Jesus-aam qanellra, “Yaqulget angucalurtaat malrurqugnek qalriavailgan, mecirautekciqerpenga pingayurqunek.” Neq'alliimiu-llu qiaguq.

Currently Selected:

Mark 14: YPK

Highlight

Copy