Hebrews 12

Ukvemta Ayagniutestii Qaqitestii-llu

1Taumek nallunairterugarnek kassugusngiimta, ataki wangkuta piyunailutet tamalkuita pegglaput, assiilnguq-llu atuqeryulallerput, qacuiqsaunata-llu tumkarput aturlaut aqvautellriatun. 2Tangvaurluku Jesus-aaq ukvemta ayagniutestii qaqitestii-llu. Elliin angniq atu'urkani pitekluku kelistaq atullrua kasngunarqelria catkevkenaku, aqumluni-llu Agayutem aqumlleran tallirpilirneranun.

3Umyuaqekiciu ellii assiilngiumalrianun ilalkumallra uumikutekun waten pitalriakun, mernungenritnaurtuci alingyugpek'naci-llu. 4Assiilnguq ingluklerpeciuggun aunrallerkarci tekilluku inglukiksaituci. 5Nalluyagutarci-qaa eguaquun qetunraulriacetun aterpaggluci waten?

“Qetunramaa, Atanrem ellangcautii ellmikuukevkenaku, ilaciqertevkenak-llu anucimirqecetaarumakuvet elliikun: 6wani-wa Atanrem ellangcalaraa kenkekni, anucimirqecetaalaraa-llu ciuniullni.” 7Ellangcallerkarci pitekluku ilalkumalartuci. Agayutem qetunramitun pitarrluci piaci; kina qetunraulria atiin ellangcaqsaitau? 8Ellangcaumanrilkuvci, tamarmeng atuqiitnek, mikelnguuciquci atailnguuluci, irniaruvkenaci-llu. 9Cali-llu, atangqellruukut ellangcartekamten̄ek, takaqellruaput-llu. Taumek-qaa niisnganrungaitukut anernemta atiitnun, unguvaluta-llu? 10Tua-i ellaita ellangcallruitkut carrarmi piyugtacimegcetun, elliin tau͡gaam ellangcalaraakut elluarrluta pillerkamten̄ek, ellmitun elluarisqelluta. 11Pitmini ellangcaumalleq tamarmi aknirnarquq angnirnarqevkenani; kinguakun tau͡gaam naugilartuq elluaryaram atsainek uitanqegcinarqelrianek, tuaten pimalriit atu'urkaitnek.

12Taumek unateci aqevlalriit nalugciki, ciisquci-llu pinialnguut pinircarluki. 13Manigcarciki-llu tumyarat it'garpecen̄un, tussitellria aviqitenritnaurtuq, tau͡gaam canrircecimaluni. 14Yugni tamaitni nepaitellra yuaqiciu, kenciknarillerkarci-llu; tuaten pinrilnguut Ataneq tangerrngailatgu. 15Murilkici ilavci Agayutem takumcukutii cakaanritnauraa; eq'ukutem-llu acilqu͡rra naunritnaurtuq uitacurlagceciluni-llu, amlleret-llu tamaaggun menuurtenritnaurtut. 16Ilasi-llu akusrarutekilriarunritnaurtuq, Agayutmek-llu qigcikinrilnguuluni Esau-tun, amaqliulriim atu'urkaanek paitarkaminek navrucilriatun neqkarrarmun. 17Nallunritarci kinguakun, atawaqaasqutkaminek piyuumillermini niicimanritellruuq, umyualinqigtesciigalami, pingnaq'ngermiu aluviliuraqluni.

18Ullautenrilavci ingrimun agtuumaarkamun, ekualriamun-llu, tan'germun-llu, angniitnarqelriamun-llu, anuqerpagmun-llu, 19cupu'uryaram-llu nepiinun, erinamun-llu; erinam tamatum niicugnisten̄i kaigavkarai qanrutenqigtesqevkenateng. 20Artuamegteggu inerquutekellra waten, “Ungungssiunge'rmi ingrim agturtii teggalqunek miluquumaarkauguq.” 21Tangvallra alingnaqngan Moses qanellruuq, “Uulegtua alingama.” 22Tau͡gaam elpeci Zion-aam ingrianun ullautuci Agayutem unguvalriim eniinun, Jerusalem-aamun pakemkumiutarmun, an'gilarugarnun-llu nunaniryugluteng quyungqalrianun. 23Agayutmun-llu yuurtellriit qilagmi igausngalriit quyurrviatnun, cuqcistem̄un-llu tamarmeng Agayutiitnun, ellualriit-llu natlugneriucimalriit anerneritnun, 24Jesus-aamun-llu, akquyutem nutaram akunlairtiinun, augmun-llu ciqrusngalriamun qalartellriamun Abel-aam pian tukninranek.

25Murilkici qalarutesceci qacutenritnaurarci. Wani-wa taukut qimagciigalkatgu niitenritlerteng aarcirturtesseng nunami, qaillun-mi wangkuta qimagniarceta caunrilkekumteggu aarcirturilria pakmaken. 26Tuani nuna pekcetellrua eriniin: Tau͡gaam maa-i akqillruuq, “Ataucirqumek cali angalaciiqaqa, nuna kiingan pivkenaku tau͡gaam qilak-llu.”

27Qanrami, “ataucirqumek” nallunairaa angalacimallrem au͡g'allerkaa piliaqumallertun, angalacimasciigalnguq piusqelluku. 28Taumek quyakilta angayuqauvigmek ciuniullemten̄ek pekcecimasciigalngurmek, taumek-llu Agayutmun tunelta agayuyaramek ciuniuyunarqelriamek, qigcigyugluta civuuraluta-llu. 29Wani-wa Agayutvut kenertun piunririlriatun ayuqngan.

Currently Selected:

Hebrews 12: YPK

Highlight

Copy