Hebrews 11

Ukverem Caliara

1Wani-wa ukveq neryuniuqengamta nalirrugneriutekaa tangrrumanrilnguut-llu nallunairutkaat. 2Tamaaggun ciuliaput imumi Agayutmek atawakumallruut. 3Ukvemteggun taringarput nunam piurucia Agayutem qanellrakun, tangrrumalriit-llu piliaqumaut tangrrumanrilngurnek.

4Ukvemikun Abel Agayutmun ekuagillruuq cikiutmek akurtuyunarqenranek Cain-am piani, tamaaggun-llu elluakumaluni. Agayutem-llu nallunairvikaa ciuniurillermikun cikiutainek; tuqullruyaaquq tau͡gaam ukvellermikun qalarutaakut cali maa-i. 5Ukvemikun Enoch pakmavircecimallruuq tuqumek-llu nalluluni; kia-llu nalaqenritaa, Agayutem teguaku. Tegumavailegmi-llu qanrutkumauq Agayutmun ilukegcitekniluku. 6Tau͡gaam ukverunani yuum ilukegcivkarciigataa. Agayutmun ullauculria ukveqnarqaa Agayutngucia nunuliqenglaucia-llu yuartem̄inek. 7Noah-llu aarcirtuumallermini tut'arkat pitekluki alairpailgata, ukvemikun niitellruuq, nauciluni angyarpagmek enelgutmi anirtuutekaatnek. Tuatnallermikun pinarqelriarurtai nunam yui, paitaqsagulluku-llu elluaryaraq ukverkun unakumaarkaq.

8Abraham-aaq-llu ukvemikun niisngallruuq kelgumallermini nunamun paitarkaminun ayaasqumaluni; ayallruuq-llu, natmun ayaucirkani nallungermiu. 9Ukvemikun-llu pektaullruuq nunami akqutmini nunakumanrilngurtun pelatekaumaaqluteng, Isaac-llu, Jacob-aaq-llu paitarkangqellguteklukek akqutminek. 10Neryuniurutekngamiu nunakaq asvailngurmun tusnganliumalria, Agayutem nautellra piliara-llu. 11Ukvemikun-llu Sarah piyunarqucingellruuq qingallerkaminek, arnassagaurteng'e'rmi, piciukngamiu akqesten̄i. 12Taumek yugmek ataucimek tuquniaralriamek, kinguveqellriit yuurtut qiliim agyaitun amllertaluteng qau͡gyatun-llu imarpiim cen̄iinelngurtun.

13Tamarmeng ukut ukverluteng tuqullruut, akquyutseng akurturpailemegteggu. Tau͡gaam envanek tangrruallruat quyakluku-llu, nalluvkenaku allanrucirteng pektaucirteng-llu nunam qaingani. 14Tua-i waten qalartellriit yuut nallunailaraat nunakangengnaqucirteng. 15Nunallerteng unitellerteng umyuaqekunegteggu uterrviksaraat. 16Tau͡gken maa-i, nunamek assinranek piyugtut wani-wa pakemkumiutarmek. Taumek Agayutem kasngukenritaa Agayutiitnek aprumallerkani, tua-i nunakaatnek upyutellruamiki.

17Ukverkun-llu Abraham, yuvriumallermini, Isaac tunyaaqaa, elliin-llu akqutmek akurtullrem kiingan qetunrani tunyuumaa, 18qanrutkumalria waten, “Isaac tumekluku kinguverkaten aterpagcimaciqut.” 19Umyuarteqngami Agayun makceciyugngacianek yugnek tuqumallrungraata; tuaten-llu ilumun tuqumayaaqellranek uterrnguarcetaa. 20Ukvemikun-llu Isaac-aam qetunraagni Jacob Esau-llu ciunguluku pingevkarak atawaqaasqutnek, atata atu'urkakegnek. 21Ukvemikun Jacob-aaq, tuquqataami Joseph-aam qetunrak atawaqaasqak ayarumi kangranun puteggluni piicagluni. 22Ukvemikun Joseph-aaq, cali tuquvailegmi Israel-aat angicimallerkaat qanrutkellrua, alerquagiluni-llu tememi tungmagtellerkaanek.

23Ukverkun Moses-aaq yuurcan, angayuqaagken iirumallruak iraluni pingayuni elkegni kenegnaqngan; nunam-llu atanran alerquutii catkevkenaku. 24Ukverkun Moses-aaq, taqmigcami Pharaoh-m panian qetunraanek aprumallerkani qessayagutaa. 25Agayutem yuin nangcimallguteklerkaat cucukenruluku anglaniyarani assiilngurni pellugarkani. 26Nunuliumallerkani taringamiu Christ-aq pitekluku, piciliutekumallerkaq tukuutetun pitartaa cucunarqenruluku Egypt-aam tukuutaini. 27Ukverkun Egypt-aamek ayagtuq, atanrem eq'errutii alikevkenaku, pektayiilami tangrrumanrilngurmek Atanerminek tangvalriatun. 28Ukverkun Kituun (Paaskaaq) aturaa, auk-llu ciqrutekluku agtuusqumavkenaki yung'eqarraarutaita piunrirtiitnun.

29Ukverkun yuut qerallruut imarpigkun Red Sea aprumalriakun tutmallerteng kinrumaluku; tau͡gaam Egypt-aam yui tuaten pingnaqsaaqellratni mer'em naligai piunrirluki. 30Ukverkun Jericho-m casgui teggalqut iqucimaut uivaarumariatki ernerni malrunlegni. 31Ukverkun Rahab akissuq, piunriumallrunrituq niicunrilnguut ilakluki, tua-i elluarrlukek ciuniuramikek nunamek paqtellriik.

32Camek cali qanerciqsia? Piviiruciiqngama qanrutkenritanka Gideon, Barak, Samson, Jephthah, David-wa, Samuel-aaq-llu prophet-aat-llu. 33Taukut ukvemegteggun atanruviirillrulriit, elluarivkarilriit, akqutnek ciuniurilriit, yugtutulit qanritnek umgilriit; 34kenermek nipcilriit, nuussirpagnek qimalriit, cirlaucirmeggnek pinirimalriit, anguyaucarami artuqairutellriit, nunalgutkumanrilnguut-llu anguyagtait qimagtelluki. 35Arnat yut'eng yuunriumarilriit ataam ciuniularait unguircecimaluki. Ilait nangcimallruut angicimallerkarteng arcaqakevkenaku, unguinqiggnaluteng unguvamun assinrulriamun. 36Allat-llu piciliutekumallruut, piqertuarumaluteng-llu, kalivniumaluteng, itengqaaqluteng-llu. 37Teggalqunek miluquumaaqluteng, kegglarluki-llu kepumaaqluteng, nuussirpagkun-llu tuqucimaluteng. Tarritelallruut aturangqerrluteng qusngit amiitnek qusngirngalnguut-llu, caunateng, nanikualuteng, nangcimaluteng, 38tamakut nuna man'a tunriukuteknarqaat, qimagauluteng nunami naugiyuilngurmi ingrini-llu, petmigni-llu nunam-llu qerranqurrini.

39Ukut-llu tamarmeng nallunairumange'rmeng ukvemegteggun akqutkumalleq pikliutellrunritaat. 40Assinranek Agayutem upyutellruakut wangkuta ciunguluki, ilakevkenata qaqimarisqevkenaki.

Currently Selected:

Hebrews 11: YPK

Highlight

Copy