Hebrews 10

Ekuagarkat Ungungssit-llu Augat Anirtuutngunriluciat

1Wani-wa Alerquun, tekitarkat assilriit tarenraatnek tau͡gaam imangqerrami, piciulriamek pipiulriamek pivkenani, ullautellriit natlugneriucesciigatai allamiaqan cikiutngulallerteggun. 2Tuaten-qaa pinrilkan ekuaginermek taqsanritut? Agayulriit natlugneriucimarillrukata, assiilngurmek nalluyartut kinguani. 3Tau͡gaam ekuagiaqameng neq'angevkaumalartut assiilngurnek allamiaqan. 4Wani-wa kuluviit qusngit-llu augata assiilnguut au͡g'arngailatki.

5Taumek, Christ-aq nunamun tekicami qanellruuq, “Cikiutet ekuagarkat-llu piyuumiutekenritaten, tau͡gaam upyutellruarpenga tememek cikiutekarkamnek; 6cikiutet ekuagarkat assiilnguum-llu cimiutai nunanikenritaten. 7Taumek qanertua, ‘Tangerrluku, tekitua pisquten aturnaluku, Agayun’, igautekumacimtun kalikani.” 8Ava-i qanrami, “Piyunritaten nunanikevkenaki-llu cikiutet, elliitet-llu, cikiutet-llu ekuagarkat, assiilnguum-llu cimiutai” (makut tunumalalriit alerquutet aturluki). 9Kingunerrluku-llu, “Tangerrluku, tekitua pisquten aturnaluku.” Ciuqlia piunriraa elkarrnaluku kinguqlia. 10Tamaaggun akquyutekun kenciknarivkaumaukut Jesus Christ-am temiin tunumallrakun ataucirqumek taqluni.

11Tamarmeng agayulirtet unuaquaqan pulengtaarluteng kevgiulartut tun'iluteng cikiutnek assiilnguirisciigalngurnek. 12Tau͡gaam Christ-aq ataucirqumek cikiutekumariami assiilnguut cimiutekaatnun, Agayutem tallirpianun aqumuq. 13Utaqalgirluni inglukestem̄i it'gaminun tusngavikellerkaata engeliinun. 14Ataucirqumek cikiuteklermikun kenciknarivkaumalriit natlugneriutai nangyuilngurmek. 15Anernerem-llu Tanqilriim nallunairvikaakut, qanrraarluni: 16“Maa-inguuq akquyun ellaitnun piarkaqa, erenret taukut kinguatni, qanertuq Ataneq: alerquutemnek ircaqruit ellivikciqanka igaulluki-llu umyugaitnun.” 17Kingunerrluku-llu, “Assiilnguit alarutait-llu umyuaqenrirciqanka.” 18Makut au͡g'aricimakata, assiilnguum cimiutekaanek pinarqenrirtut.

Kencignarqelriamun Ityunarillerput

19Taumek ilamaa, nalirrugtevkenata itrarkaurcamta Kencignarqelriamun Jesus-aam augakun, 20nutarakun tumyarakun unguvalriakun ikiruyuteklermikun wangkutnun capkutaq kemni tumekluku. 21Piunrulriamek-llu agayulirtengqerramta Agayutem eniini. 22Ataki ullautelta ircaqumteggun ciqertaumaluta carriulluta assiilngurnek umyuanek, temput-llu eruumaluki merkun menuilngurkun. 23Neryuniurutemta nallunairutii pegtenrillaut nalirrugutevkenaku, akqestevvut piciungan. 24Umyuaqnaurput-llu atunem tengruliutellerkarput, atunem kenkiyaramun caliaqegtaarnun-llu. 25Quyurtellerkarput qaategutevkenaku, ilait pilauciicetun, tau͡gaam eguaquulluta atunem, Erenrem tekitarkam ukaqsigiinallra cuqluku.

26Wani-wa piciulria taringumariluku, pitsaqutmek assiilngiqumta assiilnguput cimiutekairuciiqut. 27Tau͡gaam ciunerkarluta irranarqelriamek qanercetaarutmek, kenermek-llu alingnarqelriamek, narurcilriit piunrirtekaatnek. 28Yuk Moses-aam Inerquutainek atulria tuqutelaraat, malruk wall'u pingayun yuut nallunairutaitgun. 29Qaillun-mi pitalriamek arcaqanranek anucimirqecetaarutmek pinarqeciqa yuk Agayutem Qetunraan caunrilkestii, qigcikenricestii-llu akqutem augan menuirutestekellmi, Anernerem-llu takumcutalriim cangacagcestii? 30Nallunritarput qanlleq waten, “Akinauryaraq wii pikaqa, wiinga akinaurciqua.” Waten-llu, “Atanrem qanercetaarciqai yun'i.” 31Civuuranarquq iqullerkaq Agayutem unguvalriim unatainun.

32Tau͡gaam neq'erciu ayuqucillerci ciuqvani taringumarillerpeci kinguakun, cakviullerci nangteqluci. 33Cat ilaitni yuut ciuqerratni caunrilkumalallerci nanikuavkaumalallerci-llu, cat-llu ilaitni aipaugaqluci tuaten nangcimalrianun. 34Takumcuk'lallruaci itengqalriit, teguimaaqavci-llu piutevcen̄ek cangalliuqsaitellruuci nallunrilavciu piutengqerrucirci assinranek nang'arkaunrilngurmek-llu. 35Taumek pegcaqunaciu cacetuquteklerci, tamana nunuliutmek angelriamek iqungqellria. 36Taumek pektayiilkici, Agayutem pisqutii aturniarci, piksagutniarci-llu akqutkumalria waten, 37“Ak'anuivkenani tekitarkaq tekiciiquq mulungaituq-llu: 38yuk-llu ellualria ukvemikun unguvaciquq, tau͡gaam kingupiaqan tarnema nunanikngaitaa.” 39Wangkuta tau͡gaam ilakenritaitkut kingupialriit piunriumaarkat-llu, tau͡gaam ukverumalriit tarnemegteggun-llu anirtuumalriit.

Currently Selected:

Hebrews 10: YPK

Highlight

Copy