Hebrews 9

Akquyutem Nutaram Kenegyagutestii

1Taungung'e'rmi ciuqliq akquyun, ayuqucirtuutengqellruuq agayuyaramek agayuvigmek-llu nunamiutarmek. 2Tua-i Pelatekaq Atanrem Uitavia taqellruat; elaqliq imangqellruuq kenurrarvigmek stuulumek-llu, kelipanek-llu tangrresqutnek; tauna aterpagingauq Tanqilriamek Enemek. 3Capkutam tunglian tunuani enetangqertuq aterpagingaluni Tanqilriit Tanqinratnek, 4imangqerrluni aruviarvigmek suulutaamek, Akqutem-llu Yaassiiganek, avatmikun suulutaamek qallircimaluni. Ilua cali egacetangqertuq suulutaamek, manna-mek imarluni, Aaron-aam-llu ayaruanek naugaarillermek, akquyutem-llu alerquutainek. 5Qaingagni-llu cherubim-aagnek ucurnarqelriignek pitarluni naliumaluku takumcukutem aqumllertaa. Tamakut watua qanrutkesciigataput ayuquciqapiicetun.

6Makut taqumariata, agayulirtet kesianek it'lartut elaqlianun Pelatekam Atanrem Uitavian caliateng agayuyarat aturluki. 7Iluqlianun tau͡gaam agayulirten͞guneq it'lartuq allrakumi ataucirqumek, augmek-llu tegumiaritevkenani, tamana cikiutekluku ellminek pitekluni, yuut-llu picurlautait pitekluki. 8Mat'ukun Anernerem Tanqilriim nallunairaa iluqlirmun Agayuvigmun ikirucimaksaitellerput elaqlian napallran taktaciatun. 9Mat'um nalliini atuqengamten̄un tangrrutnguluni. Tamana aturluku cikiutet ekuagarkat-llu tunumalriit natlugneriucesciigataat umyuaqegtaarii cikiutekestiita. 10Makunek tau͡gaam caliangqertut: neqkanek, mermek-llu, ayuqenrilngurnek-llu eruryaranek, temem picirkiutai, nutaram atullerkaan engeliinun.

11Tau͡gaam Christ alairami atu'urkanun assilrianun Agayulirten͞gunruarkauluni, angenrulriakun qaqimalriakun Pelatekakun Atanrem Uitaviakun, unatetgun taqumanrilngurkun. 12Tanqilriamun enemun itellruuq ataucirqumek pinqiggviinani, qusngit augitgun kuluvayagaat-llu augitgun pivkenani, elliin tau͡gaam nakmiin aumikun, nangyuilngurmek anirtuumallerkarput unakluku. 13Wani-wa yuut menuurcimalriit qusngit kuluviit-llu augitgun kuluvayagaat-llu araitgun ciqertautem assiilnguiruskaki kemgem menuirutlerkaanun. 14Qaillun pitalriamek augan Christ-am, ellminek Agayutmun tunellrem Anernerkun nangyuilngurkun pinerrlugutaunani, menuirciqau umyuaqegtaarci assiilngurnek caliarpecen̄ek Agayutem unguvalriim kevgiullerkaanun?

15Taumek ellii akunlairturten͞guuq nutaramun akquyutmun, kelgumalriit pingesqelluki akqumalriamek paitarkameggnek nangyuilngurmek, tuqulriartangqerran aviucugngaluki assiilnguitnek akquyutem ciuqliim qulliliumakai. 16Paitarkam kalikartaa piciurtarkaukan paitarkiutestiin tuqumarillra nallunairumanarquq. 17Wani-wa paitarkam kalikartaa tuqulriartangqerqan tau͡gaam aturarkaurtelartuq, paitarkiutestiin unguvallrani aturciiganani. 18Taumek-llu ciuqliq akqun augunrilngurkun piciurcimanrituq. 19Nauwa Moses-aam Alerquutet tamalkuita qanrutkumariamiki yugnun, kuluvayagaat qusngit-llu augatnek tegutellruuq mermek avuluku, qusngim melqurranek aturluni urungalngurmek-llu kalikat ciqertarai yuut-llu. 20Qanerluni, “Maa-inguuq akqutem auga Agayutem alerquutekellra elpecen̄un.” 21Tuaten-llu cali ciqertalaraa Pelatekaq Atanrem Uitavia assigtat-llu tamaita agayuvigmi atulallrit. 22Ilumun, Alerquutet aciatni cat tamaklagmeng augkun menuirucimaut, aunraucetaunaku-llu au͡g'aricetaituq assiilngurmek.

23Tuaten tamakut pakemkumiutaat tarenraqengraitki menuircimanarqellruut makutgun piciryaratgun, tau͡gaam pakemkumiutaat, makut assinritnek cikiutnek pinarqut. 24Wani-wa Christ-aq itellruan, unatetgun piliaqumalriamun agayuvigmun pivkenani, pipiulriim tarenraanun, tau͡gaam qilagmun engellilluni, maa-i Agayutem ciuqerrani uitaluni kaigalluta. 25Tuaten-llu pulenglluni ellminek cikiuteknavkenani agayulirten͞gunertun allrakuaqan it'lalriatun kenciknarqelriamun aukenrilkem̄inek tegumiarluni. 26Tuatnaarkaukuni pulengtaq nangteqellruyartuq nunam piurteqarraallranek. Tau͡gaam maa-i alairumallruuq ataucirqumek taqluni ernerkiurumalriit nangellratni, assiilnguq au͡g'arnaluku ellminek cikiuteklermikun. 27Elkaringaciatun-llu yugnun tuquarkauluteng ataucirqumek, kinguani-llu qanercetaarumaarkauluteng. 28Tuaten-llu Christ-aq, ataucirqumek cikiutekumaluni, amlleret assiilnguit ayaulluki, tekitenqigciiquq-llu, assiilnguq caliaqenqiggnavkenaku, tau͡gaam anirturarkauluki nerinikesten̄i.

Currently Selected:

Hebrews 9: YPK

Highlight

Copy