ÉPESUS 4

Jah awah Tuhan ngan uleu' béé seleket usah Néh

1La'ah kenat péh jalan akeu' éh pu'un tong lamin tutup uban kereja' ké' ngan Tuhan, akeu' nyohoo' keh jian keh murip ngan barék keh pu'un jian ngan teneng pekua' ha' Tuhan ngan keh hun Néh tebai keh tavin Iah sahau rai. 2#Kol. 3:12-13 Jian keh diva' kenin ngan dawai kenin, ngan kebit kenin. Jian keh kebit kenin pika kelunan lem kekat pengelemoo' réh, 3Ngan mihau mu'un-mu'un dokoo' keh ngelayau pekua' kenin dalem Sahéé' neu' keh murip lem pengepawah Néh. 4Uban usah Kristus jah awah, uleu' béé péh seleket usah Néh inah, jah awah Sahéé', barei' jah awah pengelan lu', inah éh, uleu' ngelan omok tai pemung ngan Allah ngan paléu jian, pekua' tenebai Allah ngan keh. 5La'ah jah awah Tuhan, jah awah pengelan éh jalan lu' alaa' urip Néh, jah awah pengebatis, 6ngan jah awah Allah éh Tamen kekat kelunan, éh pengeja'au kekat lu' béé, éh kereja' pakai uleu' béé, ngan éh pu'un dalem kekat lu' béé.

7Siget-siget usah lu' pu'un pengena' néh ngan lu' dokoo' lu' omok maneu' kereja' néh kivu pekua' pengena' Kristus. 8#Msm. 68:19 Barei' ha' lem surat Allah pu'un bara' ka',

Tovoo' Iah mukat tai retek éh matek bau,

Iah mihin kekat kelunan éh senopéé' Néh,

ngan Iah mena' kuraa'-kuraa' pengena' ngan kelunan.

9Bang iteu' sin tong ha' Néh bara' Iah mukat kebau bu'un-bu'un Iah tuhun tai ra' mu'un avéé' tong jalan patai. 10La'ah Iah éh lepah tuhun, Iah ke' éh lepah mukat pelapah bau kepéh jin langit, dokoo' Iah pengeja'au kekat ineu'-ineu' tong tana' ngan tong langit péh. 11Pu'un Iah mena' kuraa' pengena' ngan kelunan ke' réh omok nolong sidang, Iah ngevéléé' jelua' réh ke' réh omok lawah Néh, jelua' kepéh ke' réh nabi, jelua' kepéh ke' réh perengah Rengah Jian tong Yésus, jelua' kepéh ke' réh gembala mihau sidang, ngan jelua' kepéh ke' réh guru nebaraa' tong sidang. 12Iah maneu' kenat dokoo' nolong kekat kelunan éh anah Allah maneu' kereja' Néh dokoo' sukup avéé' usah Kristus pu'un gahang, inah éh sidang nah. 13Inah jalan uleu' béé jah awah lem pengelan ngan jam tong Anak Allah, avéé' uleu' béé pu'un sukup kenin jam seruh, inah éh avéé' uleu' béé sukup kenin dalem kekat pengejian Kristus. 14Hun lu' pu'un kenat bé' lu' barei' anak éh bé' jam seruh, bé' lu' duah kenin keteu'-ketai barei' lipak, ngan bé' lu' palit neu' kekat kepu, inah éh ha' tebaraa' éh benara' kelunan éh ngelavo' irah éh jah ke' néh petawang réh neu' aken kenin néh éh kenyo. 15Bang jian keh bara' tong kekat éh teneng, neu' kenin keh penoo' ngan penika Tuhan jian uleu' pepit kepéh dokoo' lu' sukup mu'un dalem kekat ineu'-ineu' lem Kristus éh ulun lem sidang. 16#Kol. 2:19 Jin Iah kekat éh tong usah petok pemung, ngan pu'un gahang ngan reken neu' siget-siget bukun tulang néh, dokoo' hun siget-siget arong tong usah inah maneu' éh tekep neu' néh, ketem lo'ong usah inah pu'un éh pepit ja'au ngan tai gahang naneu' penika néh.

Urip maréng lem Kristus

17Dalem ngaran Tuhan inah éh sohoo' ké' ngan keh. Mai la'ah keh murip barei' kelunan éh bé' ngelan tong Tuhan, 18Kekat penyeruh ngan penganeu' réh barei' merem awah. Bé' irah nesen ineu'-ineu' tong urip uleu' éh nena' Allah ngan lu', uban kenin réh pu'un palui ngan mahéng. 19La'ah bé' réh jam menyaa', irah mihin usah réh maneu' kekat éh sa'at, ngan maneu' kuraa'-kuraa' adet éh bé' tekep, keloo' réh maneu' kenat.

20Bang bé' tekep keh maneu' kenat la'ah, uban keh lepah pekalai tong Kristus. 21Pu'un keh lepah menéng rengah Néh tong pengeteneng éh pu'un dalem Yésus, ngan pu'un keh lepah ngelan ha' tebaraa' nah. 22#Kol. 3:9 Uban néh kenat jian keh piso jin gaya' pengurip keh éh sahau, tovoo' kelunan bé' jak ngelan tong Tuhan, uban kekat gaya' pengurip keh inah ngelavo' keh awah. 23Tekep kenin ngan penyeruh keh pu'un maréng kepéh. 24#Kej. 1:26, Kol. 3:10 Jian keh murip barei' kelunan éh pu'un urip maréng éh pekua' urip Allah, ngan pepoléng keh pu'un urip maréng inah neu' kekat barék keh pu'un teneng ngan ni'ai.

25 # Sak. 8:16 Uban néh kenat mai la'ah keh pané kenyo, jian siget-siget usah pané mu'un ngan padéé' néh, uban uleu' béé pu'un pepadéé' dalem Kristus. 26#Msm. 4:5 Hun keh merek, mai kejeraa' kemerek keh inah mihin keh maneu' penyala', ngan mai keh merek pah avéé' dau tahup. 27Mai keh maneu' giwang ngan Sitan. 28Kelunan éh pu'un nekau lepah rai, mai éh nekau kepéh, bang jian éh kereja' dokoo' néh omok tagong usah néh ngan pu'un palaa' kepéh ke' Néh nolong kelunan éh kari mu'un. 29Mai keh sa'at ha' ané, bang jian keh pané tong kekat éh omok ngegahang ngan ngereken kenin kelunan, dokoo' keh omok nolong irah éh menéng ha' keh inah. 30Mai keh petusah Sahéé' Allah éh Sahéé' Ni'ai, uban Sahéé' inah, Iah éh telana' ka'ah anah Allah, uban pu'un jah dau vam, Tuhan juk ngelepu lu' jin usah lu' éh sa'at iteu' kepéh. 31Jian keh bet kekat ha' éh sa'at éh omok punyat kenin kelunan ke' néh merek. Mai keh paneu' ngan mai keh pané ngan luvaa'. Mai keh leko kelunan ngan ngesa'at ngaran réh. 32#Kol. 3:13 Bang jian keh dawai kenin, nolong petolong, pika pepika, pekua' Allah dalem Kristus pu'un pika ngan mega' penyala' lu'.

Currently Selected:

ÉPESUS 4: PNT

Highlight

Copy