ÉPESUS 5

Murip tong rema

1La'ah uban ka'ah anak Allah éh penika Néh, jian kekat urip keh pu'un jian barei' Iah péh. 2Dalem kekat urip keh jian keh maneu' éh ngan pepika, pekua' Kristus pika uleu' ngan mena' urip Néh ngeliwah lu'. Iah mena' usah Néh penatai réh, ke' Néh ngeliwah lu', inah jalan éh ngepayoo' kenin Allah, barei' ka'an éh penatai irah sioo' sahau, ke' réh mena' éh ngan Tuhan rai.

3Bang uban ka'ah kelunan éh anah Allah, bé' tekep keh tosok tong nuyang ngan barék éh segit, ngan kelih tong livah, magat juk alaa' mekum, mateng ngaran néh péh bé' tekep, makin péh tai maneu' éh, adang néh bé' omok. 4Kenat péh bé' tekep keh tosok tong ha' éh segit éh mihin kelunan seruh ngan magat tong kekat éh sa'at éh bé' tekep. Bang inah éh tekep, jian keh bara' jian kenin ngan Allah. 5Jian keh jam, bé' pu'un kelunan séé'-séé' péh éh petuyang, ngan éh maneu' barék éh bé' tekep, ngan kelunan éh magat juk alaa' mekum, éh omok tai lem nihau Kristus ngan Allah, uban kelunan éh kelih tong livah juk alaa' mekum, irah inah pekua' barei' kelunan éh pakai butun uban réh ngajung éh kemagat réh inah.

6Mai keh kejeraa' séé'-séé' péh pané ngelavo' keh, uban inah omok pesavéé' kemerek Allah neu' réh bé' tigéh kivu sohoo' Néh. 7Mai keh ngebakéh réh. 8Uban sahau rai ka'ah pu'un tong merem, bang hun iteu' kepéh neu' pengelan keh tong Tuhan, pu'un keh tong rema, jian keh murip barei' kelunan éh pu'un tong rema. 9Uban kelunan éh pu'un tong rema, pinaa' buaa' néh, inah éh kekat éh jian ngan teneng ngan tigéh. 10Jian keh tutui maneu' kekat éh ngepayoo' kenin Tuhan. 11Mai keh ngebakéh kelunan éh maneu' kekat éh bé' tekep éh pu'un tong merem awah. Bang jian keh pepoléng kekat kesa'at réh tong rema. 12Menyaa' lu' tosok tong kekat penganeu' réh éh selem-selem nah. 13Uban hun lu' pepoléng kekat penganeu' réh inah tong rema, boh lu' nesen éh sa'at mu'un. 14Uban ineu'-ineu' éh ta'an lu' tong rema adang néh poléng mu'un. Inah néh benara' ka',

To'ot, o ka'au' éh pegen,

ngan betéé' jin pematai

Kristus juk ngada tong ke'

15Uban néh kenat seruh keh jian-jian tong kekat pengurip ngan barék keh, mai keh murip barei' kelunan éh bé' jam seruh, bang jian keh barei' kelunan éh jam seruh. 16#Kol. 4:5 Jian keh pakai bi'en éh keto ngan keh, maneu' kereja' Tuhan uban tovoo' jaka' iteu' pinaa' kelunan too ke' keto lem kesa'at réh. 17Mai keh barei' gaya' kelunan éh bé' jam seruh, bang jian keh pitah éh pengeloo' Tuhan ngan keh.

18Mai keh mesep baa' éh maneu' keh mavuk, uban jin penganeu' keh kenat, omok éh nasa' urip keh, bang jian keh penoo' neu' Sahéé' Ni'ai. 19Jian keh petebaraa' ha' jin lem Surat Masmur éh omok mihin keh mejing Tuhan, ngan nyanyi dalem Sahéé', jian keh nyanyi mejing Tuhan lem kenin keh. 20#Kol. 3:16-17 Dalem kekat ineu'-ineu' péh jian keh ngelayau bara' jian kenin ngan Allah éh Tamen lu', dalem ngaran Tuhan Yésus Kristus.

Tong lakei' ngan redo

21Jian keh pata ngerera', uban keh medai tong Kristus.

22 # Kol. 3:18, 1 Ptr. 3:1 O kekat redo éh pu'un lakei', jian keh ngerera' tong lakei' keh barei' tong Tuhan. 23Uban irah lakei' pu'un penyukat bau irah redo, pekua' Kristus pu'un penyukat bau sidang, la'ah Kristus Iah éh pepurip sidang éh usah Néh. 24Kenat péh tekep kekat redo éh pu'un lakei' ngerera' tong lakei' néh dalem kekat ineu'-ineu' péh, pekua' barei' sidang ngerera' tong Kristus.

25 # Kol. 3:19, 1 Ptr. 3:7 O kekat lakei' éh pu'un redo, jian keh pika redo keh pekua' Kristus lepah pika sidang ngan mena' usah Néh ngeliwah sidang. 26Iah maneu' kenat ke' Néh mena' sidang Néh ngan Allah, ke' Néh omok ngeni'ai éh neu' ha' tebaraa' Néh ngan neu' baa' 27ke' Néh omok mena' sidang nah ngan Allah dalem kekat pengaren Néh ngan pengeni'ai Néh, ngan bé' pu'un ineu'-ineu' éh kurang ngan sa'at. 28Adang éh tekep kekat lakei' éh pu'un redo pika redo néh pekua' iah pika usah néh tengéé'. La'ah kelunan éh pika redo néh, iah péh pika usah néh. 29Uban bé' pu'un séé'-séé' éh omok leko tong usah néh tengéé', adang iah petubo ngan mihau usah néh pekua' barei' éh naneu' Kristus tong sidang Néh. 30Uban uleu' béé usah Néh. 31#Kej. 2:24 Barei' ha' lem surat Allah, ka' éh, Kenat péh lakei' pokoo' tinen tamen néh ke' néh tai pemung ngan redo néh, inah rawah jah awah kenin, ha' Néh. 32Pu'un jah sin éh jah lem ha' Néh kenat, jian mu'un éh, inah Tuhan bara' tong Kristus tong sidang Néh. 33Bang pu'un éh bara' éh kepéh ngan uleu', adang éh tekep siget lakei' éh pu'un redo, pika redo néh pekua' iah pika usah néh tengéé' ngan tekep siget redo ngerera' tong lakei' néh.

Currently Selected:

ÉPESUS 5: PNT

Highlight

Copy