ÉPESUS 6

Tong anak ngan tamen tinen

1 # Kol. 3:20 O kekat anak, jian keh kivu sohoo' tinen tamen keh dalem Tuhan, uban kenat éh jian. 2#Kel. 20:12, Ula. 5:16 Jian ke' ngerera' tong tinen tamen ko' inah éh sohoo' Allah éh bu'un-bu'un pemung ngan jajii' Néh éh bara' ka': 3dokoo' ko' omok jian ngan kebit urip tong tana' iteu'.

4 # Kol. 3:21 O kekat tamen tinen, mai keh pekerek anak keh, bang jian keh mihau irah ngan nebaraa' réh tong ha' tebaraa' Tuhan.

Tong kelunan ripen ngan pengeja'au néh

5 # Kol. 3:22-25 O kekat ripen, jian keh kivu sohoo' pengeja'au keh tong tana', ngan ngerera' tong réh. Jian keh kivu sohoo' réh ngan kenin keh mu'un, barei' keh pu'un kivu sohoo' Kristus. 6Jian keh ngelayau maneu' kenat, bé' makat hun néh ta'an réh awah dokoo' ngepayoo' kenin réh, bang ngan kekat kenin keh jian keh maneu' pengeloo' Tuhan barei' kelunan éh ripen Kristus. 7Jian keh maneu' kereja' keh ngan jian kenin, barei' keh pu'un maneu' éh ngan Tuhan, ngan bé' makat neu' sohoo' kelunan awah. 8Jian keh nesen, Tuhan mena' oléé' kereja' éh jian éh naneu' siget-siget usah, kenat péh tong kelunan ripen, kenat péh tong irah éh bé' ripen.

9 # Ula. 10:17, Kol. 3:25, 4:1 O kekat pengeja'au, barei' inah péh jian keh maneu' kenat ngan irah éh ripen keh, mai keh pané ngan ngedai réh. Jian keh nesen, ka'ah péh ngan irah éh ripen keh péh, ka'ah béé anah Allah éh pu'un tong seruga, ngan bé' Tuhan netah kenin tong kekat kelunan.

Tong lajam ngan pakai jin Allah

10Inah éh pengega' ha' ké', jian ka'ah gahang dalem Tuhan, neu' penyukat Néh éh ja'au mu'un. 11Jian keh pakai kekat lajam ngan pakai jin Allah, dokoo' keh omok nekedéng ngan pu'un terokon ngelawan kekat aken kenin Sitan. 12Uban bé' uleu' ngelawan kelunan, bang uleu' ngelawan kekat balei' sa'at ngan ungap éh pu'un tong sawang, ngan kekat kerenget balei', ngan kekat kesa'at éh mihin kelunan tong merem. 13Uban néh kenat jian keh pakai kekat lajam ngan pakai jin Allah, Hun dau éh sa'at nah pu'un, inah éh dau Sitan ngelawan keh mu'un, boh keh omok nekedéng petem nerokon nyakat éh, ngan la'o keh pesakat nah péh, pu'un keto keh nekedéng petem nerokon.

14 # Yes. 11:5, 59:17 Uban néh kenat jian keh petenup ngan ngejeret é'éng keh palaa' ha' tebaraa' éh teneng, éh bara' tong Allah ngan pakai kerayung daven, inah éh tigéh kenin, 15#Yes. 52:7 ngan pakai kasut keh, inah éh Rengah Jian éh mihin lu' tunuk ngan Tuhan. 16Jian keh ngelayau ngamit kelevit, inah éh pengelan keh tong Tuhan, inah éh jalan keh omok memata' luten jin belat éh tuai jin iah éh sa'at. 17#Yes. 59:17 Jian keh alaa' tupi daven tong ulun keh, inah éh kekat urip Tuhan. La'ah ha' tebaraa' Tuhan inah éh po'é éh nena' Sahéé' Ni'ai ngan keh. 18Pakai kekat inah béé ngan sebayang menyat Tuhan nolong keh. Ngelayau sebayang kivu pengeloo' Sahéé'. Jian keh mavaa' mu'un, mai keh putui pengelan bang jian keh ngelayau sebayang tong kekat kelunan éh anah Allah. 19Kenat péh jian keh sebayang tong akeu', menyat Tuhan mena' ha' tebaraa' Néh ngan ké' dokoo' ké' omok makang kenin bara' tong Rengah Jian éh bé' jak kejam kelunan sahau rai. 20Uban akeu' éh kevéléé' Tuhan dokoo' ké' lawah Néh tong Rengah Jian, bang hun iteu' akeu' pu'un tong lamin tutup. Bang jian keh sebayang dokoo' ké' omok bara' tong Rengah Jian inah ngan makang kenin, pekua' éh tekep ke' ké' bara' éh.

Tabi' ngan sebayang

21 # Peng. 20:4, 2 Tim. 4:12 #Kol. 4:7-8 La'ah Tikhikus éh padéé' lu' éh penika lu', éh tigéh dalem kereja' néh ngan Tuhan, iah omok bara' kekat rengah ké' ngan keh da', dokoo' keh omok jam kineu' pengokoo' ké' siteu'. 22Inah akeu' nyohoo' iah tai tavin keh, dokoo' néh omok bara' rengah mé' ngan keh ngan ngegahang kenin keh.

23La'ah jian Allah éh Tamen lu', ngan Tuhan Yésus Kristus, mena' pengepawah Néh ngan penika Néh ngan kekat padéé' mé' éh ngelan tong Tuhan. 24Jian penika Allah pu'un pemung ngan kekat kelunan éh pika Tuhan Yésus Kristus neu' penika Néh éh bé' omok béé.

Currently Selected:

ÉPESUS 6: PNT

Highlight

Copy