Mako 6

Yesu okaniwa ku Nazaleti

(Mt 13:53-58; Lk 4:16-30)

1Yesu efumako kwala, nowelela ku Nazaleti ku munzi kwawo. Asambili ŵake emukonkha. 2Peyifwika nsiku ya Sabata etatika kusambizya mu kacisi wa Ayuda. Ŵanthu anyinji enzemo; nipo pecimumvwa ekanganishiwa.

Enzokonshana kuti, “Kansi evitola kuni vonse ivi? Ni nzelu zotyani izi zecipewa? Ocita tyani vokanganisha? 3Kansi uyu ni misililini, mwana wa Maliya, mkwawo wa Yakobe, Yosefe, Yudasi na Simoni? Kansi alongosi ŵake onkhalalini kuno?” Tetyo, eyipilwa naye nipo emukana.

4Yesu eŵayasuka kuti, “Mneneli opewa mcinzi kulikonse kwangalute koma okaniwa na ŵa ku munzi kwawo na enekwawo na ŵa mu banja yake.” 5Aliyocite vinthu vinyinji vokanganisha kwala, koma eyika tyala manja ŵake pa ŵanthu atontho olwala nipo eŵapozya. 6Ekanganishiwa ngako powona kusoŵa cicetekelo kwa ŵala ŵanthu.

Yesu otuma asambili ŵake ŵala kumi na aŵili

(Mt 10:5-15; Lk 9:1-6)

Pa vuli pake Yesu eluta na kuyosambizya ŵanthu ŵa ku minzi yozunguluka kwawo. 7Eyita asambili ŵake ŵala kumi na aŵili wonse pamo noŵatuma aŵili–aŵili. Eŵapa ulamulilo pa viŵanda 8nowalamulila kuti, “Osatola kalikonse pa ulwendo uyu koma tyala ndodo, osatola mkate keno cola ca pa ulwendo, keno ndalama mu matumba mwanu. 9Vwalani nkhwaŵilo, koma osatakula mkhanjo uyakine.”

10Eŵawuzya soti kuti, “Paliponse patimukaloŵe mu ngʼanda, mukaŵe kwamene uko mpaka kufumako uko. 11Koma kulikonse kwatiakakupokelenilini luweme keno kusakumvwilani, mukofumako nokunkhumula lukungu ya ku mendo kwanu. Iyo ikaŵe cenjezyo kwa ŵeve!”

12Tetyo, asambili eluta na kuyoŵilizya kuti ŵanthu aleke viyipa vawo. 13Efumya viŵanda vinyinji, notila mafuta ŵanthu anyinji olwala nipo enzopola.

Imfwa ya Yohane Mbatizi

(Mt 14:1-12; Lk 9:7-9)

14Mfumu Helode ecimvwa va Yesu, cikomo cakuti mbili yake imvwika paliponse. Ŵanthu ayakine enzolaŵila kuti, “Yohane Mbatizi ewuka kwa akufwa, niye cikomo cake ali na mphamvu zocita vokanganisha.”

15Ayakine soti enze kuti, “Ni Eliya,” na ayakine soti enzolaŵila kuti, “Ni mneneli, ngani ŵala aneneli ŵa masiku ŵa macezo.”

16Helode pecimvwa kuti ni Yohane Mbatizi elaŵila kuti, “Yohane Mbatizi, wenitenda mutu, wawuka soti kwa akufwa!”

17Yeve Helode niye etuma akaphaso ŵake kuti akakate Yohane, nomumangilila nomuyika mu jele. Helode ecita teti cikomo ca Helodiyasi, wenzolungule, cukanga kuti enze mwanakazi wa mkwawo Filipo. 18Yohane Mbatizi enzomuwuzya Helode kuti, “Ni ciwemelini kulungula mwanakazi wa mkwanu.” 19Tetyo, Helodiya eyipilwa na Yohane nopangwa kumupaya, koma enzotweshalini cikomo ca Helode. 20Helode enzoyopa Yohane cikomo cakuti enzoziŵa kuti enze munthu muweme na kuti enze wolungama na mtuŵa, tetyo enzomusunga luweme. Enzotemwa kumumvwila cukanga kuti enzokanganishiwa malingililo nsita zonse akamumvwa.

21Lomba mpata wewoneka kwa Helodiya wopailamo Yohane. Penze pa nsiku yokumbuka kuvyalika kwa Helode, yeve epanga malyelelo ku akulu ŵa boma, akulu ŵa asilikali na nzika zotangulila za ku Galileya. 22Mwana mwanakazi wa Helodiya ecizovina, nipo emumvwisha luweme Helode na woyitiwa ku malyelelo ŵala.

Tetyo, amfumu emukonsha wala msimbi kuti, “Upangwa kuti nikupe cinji? Nikupe ciliconse cautiusenge.” 23Emuwuzya tetyo wala msimbi na vilumbilo, “Nulumbila kuti nikupe ciliconse cautiusenge, cukanga kuyaŵa calo cangu pakati.”

24Tetyo, wala msimbi eciyokonsha anyina kuti, “Nisenge cinji?”

Anyina emuyasuka kuti, “Usenge mutu wa Yohane Mbatizi.”

25Msimbi wala ewutuka kuya soti kwa Helode nomuwuzya kuti, “Nupangwa kuti munipe mutu wa Yohane Mbatizi pa mbale lomba teti.”

26Ici cipanga mfumu kucita citinthi, koma cikomo ca vilumbilo vecipanga pa menso pa woyitiwa aliyopangwe kumukanila. 27Tetyo, elamulila akaphaso ŵake kuti akatole mutu wa Yohane Mbatizi. Akaphaso eluta ku jele, na kuyotenda mutu wa Yohane Mbatizi, 28nowuleta pa mbale nomupa wala msimbi, wala msimbi ewutwala kwa anyina. 29Asambili ŵa Yohane pecimvwa ivi ecizotola citanda cala, na kuyociyika ku manda.

Yesu olyesha ŵanthu opula myanda isanu (5,000)

(Mt 14:13-21; Lk 9:10-17; Yh 6:1-14)

30Nthumi zala zewelela kwa Yesu nomuwuzya vonse vezicita nosambizya. 31Kwenze ŵanthu anyinji enzokuza noluta cakuti Yesu na asambili ŵake enzeve nsita ya kulya. Tetyo, Yesu eŵawuzya asambili ŵake kuti, “Tiyeni ku malo kwa seka kusapita–pita ŵanthu kuti mukapumuleko.”

32Tetyo, eloŵa mu wato nakuya ku malo kwa ŵeka kusapita–pita ŵanthu. 33Ŵanthu anyinji eŵawona penzopita noŵaziŵa. Tetyo, efuma mu minzi nowutuka kupita mu mbali mwa cimmana noluta kwenzokuya Yesu na asambili ŵake. 34Pecifuma mu wato Yesu ewona winji wa ŵanthu nipo eŵacitila lusungu, pakuti enze ngani mbelele ziliye ciŵeta. Tetyo, etatika kuŵasambizya vinthu vinyinji.

35Pekwenzofipa, asambili ŵake ewela kwa yeve nomuwuzya kuti, “Lolani kwafipa kale ngako, na kuti kuno ni ku sanga. 36Ŵawuzyeni ŵanthu aŵekuya, ŵawuzyeni alute ku minda ili pafupi na mu minzi ili pafupi kuti akasiteko vakulya kuti alye.”

37Koma Yesu eŵayasuka kuti, “Ŵamene mwewo ŵapeni vakulya.”

Asambili ekonsha Yesu kuti, “Kansi mupangwa kuti tiseŵenzeshe ndalama zinyinji zokwanila myanda iŵili za siliva (2,000)#6:37 ndalama… za siliva Pa Cigiliki malizu aŵa olaŵila kuti “Denalius” otanthauza malipilo ŵa nsiku imo ku munthu wa ganyu. kuti tisite vakulya va aŵa ŵanthu?”

38Tetyo, Yesu eŵakonsha kuti, “Muli na mikate ingananji? Kawoneni.”

Peciyowona, emuwuzya kuti, “Tili nayo isano na masaŵi aŵili.”

39Lomba Yesu ewuzya asambili ŵake kuti ayike ŵanthu mu maumba na kuti aŵe pansi pa mauzu. 40Tetyo, ŵanthu ŵala eciŵa pansi, mu maumba ŵa ŵanthu ayakine makumi kumi na ayakine soti makumi asanu. 41Lomba Yesu etola mikate isanu na masaŵi aŵili, nololesha Kululu, notembezya Mulungu. Esuna–suna mikate yala nakupa asambili ŵake kuti ayaŵile ŵanthu, etola soti masaŵi aŵili ŵala noyaŵila ŵanthu. 42Aliyense ecilya nipo ekuta. 43Asambili etola vitundu kumi na viŵili va vakulya vesalako na va masaŵi. 44Analume ŵeka–ŵeka ŵecilyesha enze myanda isano.

Yesu oyenda pa manzi

(Mt 14:22-33; Yh 6:15-21)

45Mcingulo mwamene umo Yesu elamulila asambili ŵake kuti aloŵe mu wato, atangule alute ku silya iyakine ya cimmana, ku Betisaida, pamene apo yeve enzowuzya ŵanthu kuti aŵekuya kwawo. 46Pecilayilana nawo ŵala ŵanthu, Yesu eluta ku lupili kuyolomba.

47Pekwefwika mcingulo wato wenze pakati pa cimmana, koma Yesu enze pa silya. 48Ewona asambili ŵake otamana kupalasa wato cikomo cakuti enzokuya kwenzofumila mphepo. Mmamawa ku matemwakuca Yesu ewela kwa ŵeve oyenda pa manzi. Enzoŵapitilila, 49koma pecimuwona oyenda pa manzi eyezya kuti ni cimuwuka, tetyo eŵilikizya. 50Wonse ecimvwa wowa pecimuwona.

Pamene apo Yesu eŵawuzya kuti, “Tangʼani mitima, osacita wowa, ni newo!” 51Tetyo, eloŵa mu wato pamo na asambili nipo cimphepo cesila. Asambili enze okanganishiwa ngako, 52cikomo cakuti aliyomvwishishe volyesha ŵanthu myanda isano; nzelu zawo zenze zosinkha.

Yesu opozya wolwala ku Genesaleti

(Mt 14:34-36)

53Pecitawuka, efwika ku malo oyitiwa kuti Genesaleti, kwecimangilila wato. 54Pecisiya wato wala, ŵanthu emuziŵa Yesu pamene apo. 55Tetyo, ewutukila kulikonse kwecimvwa kuti niye kwa ali, noleta ŵanthu wolwala ali lele pa macila ŵawo. 56Kulikonse kwenzopita Yesu ku minzi na ku minda, ŵanthu enzoleta wolwala ku misika. Emusenga Yesu kuti aŵazomelezye wolwala akate msono wa covwala cake, na kuti wonse enzokata msono wala enzopola.

Currently Selected:

Mako 6: GMN

Highlight

Copy