Mako 5

Yesu opozya munthu wokatiwa na viŵanda

(Mt 8:28-34; Lk 8:26-39)

1Yesu na asambili ŵake efwika ku silya iyakine ya Cimmana ca Galileya, ku citwa ca ku Geleseni. 2Yesu pecingofuma mu wato ekumana na munthu efumila ku manda. Munthu uyu enzokatiwe na viŵanda 3na kuti enzonkhala ku vipilala. Paliye munthu soti enzotwesha kumumanga unyolo. 4Nsita zinyinji mendo ŵake na manja enzokuŵa omanga, koma nsita zonse enzotenda nofwaya unyolo wa ku mendo kwake. Enze na mphamvu ngako cakuti kwenzeve munthu enzomutwesha. 5Enzoyenda pa ndili na mu malupili usiku na mzuŵa, kuŵilikizya noliceka na myala.

6Peciwona Yesu patali ciŵanda cala, cemuwutukila, nofukama pafupi na yeve, 7noŵilikizya kuti, “Yesu Mwana wa Mulungu wa Kululu! Mupangwanji kwa newo? Mu zina ya Mulungu, nukusengani osanitamanisha!” 8Celaŵila teti cikomo cakuti Yesu enzolaŵila kuti, “Ciŵandawe fuma mwa munthu uyu!”

9Tetyo, Yesu ecikonsha kuti, “Zina yako niwe ŵani?”

Ciŵanda cala ceyasuka kuti, “Nine ‘Ciwumba#5:9 Ciwumba Pa Cigiliki malizu aŵa olaŵila kuti “Legion” otanthauza kuti winji wa asilikali myanda isano na umo (6,000).’ cikomo cakuti tilimo anyinji.” 10Na kuti cepapatila Yesu kuti, asacifumye ku malo ŵala.

11Pafupi na ŵeve penze nkhumba zinyinji, zenzokulya ku mbali kwa lupili. 12Tetyo, viŵanda vala vipapatila soti Yesu kuti, “Titumeni mu nkhumba, kuti tiloŵemo.” 13Yesu ecilola, kuti viŵanda vala vifume mwa munthu nakuyoloŵa mu nkhumba. Nkhumba zonse zenzepo pafupi–fupi myanda iŵili (2,000) zewutuka kuseluka lupili nakuyoloŵa mu cimmana nakufwa.

14Ŵanthu enzoŵetela nkhumba zala ewutuka noŵilizya mbili yala mu minzi na mu minda monse. Ŵanthu eluta kuyowona cecitika. 15Na kuti pecifwika kwa Yesu, ewona munthu enzonkhala na ciwumba ca viŵanda, enze nkhezi pamene apo, wovwalikiwa na kuti enze luweme; nipo wonse ecita wowa. 16Ŵala ŵanthu ewona ewuzyako ayawo vecitika ku munthu wa viŵanda na ku nkhumba. 17Tetyo, ewuzya Yesu kuti afumeko ku citwa ca kwawo.

18Penzoloŵa mu wato Yesu, munthu enze na viŵanda wala emusenga kuti, “Nizomezyeni nilute namwe!” 19Koma Yesu aliyomuzomelezye. Emuwuzya kuti, “Nkhoya ku ngʼanda ku banja yako ukaŵawuzye vinyinji vakucitila Asikulu na lusungu yakucitila.” 20Munthu wala eluta cendi ku Minzi Kumi, kulaŵila cecimucitila Yesu. Na kuti wonse emvwako ekanganishiwa.

Yesu opozya mwanakazi muyakine na mwana wa Yailo

(Mt 9:18-26; Lk 8:40-56)

21Yesu ewelela soti ku silya iyakine ya cimmana. Kwala umba ya ŵanthu ewungana soti kwa yeve. 22Munthu muyakine zina yake Yailo, yumo wa akulu ŵa mpingo ŵa kwala, ewela, nipo peciwona Yesu, elipoza pafupi na mendo ŵake 23nompapatila kuti, “Mwana wangu mwanakazi mtontho ni wolwala ngako. Tiyeni mukayike manja ŵanu pa yeve kuti aŵe luweme na kuti aŵe na moyo!” 24Yesu etatika kuya naye wala munthu.

Ŵanthu anyinji enzokuya naye na kuti enze omuzunguluka ku vitwa vonse. 25Penze mwanakazi enzotamana na ulwele wa mlopa kwa vyaka kumi na viŵili, 26cukanga kuti enzoyavyiwa na ngʼanga zinyinji. Eseŵenzesha ndalama zake zonse, koma mu malo mopola enzolwalilako nsita zonse. 27Enze ecimvwa za Yesu, tetyo ecizoloŵa pa winji wala ku vuli kwake, 28mu mtima mwake enzolaŵila kuti, “Nikakata tyala covwala cake niŵe luweme.” 29Ekata covwala cake, nipo ulwele wala wileka pamene apo; enzokumvwa mu mtima mwake kuti wapulumushiwa ku matamano ŵake.

30Pamene apo Yesu eziŵa kuti mphamvu yafumamo mwa yeve, tetyo ecewukila umba yala nokonsha kuti, “Ni ŵani wakata covwala cangu?”

31Asambili ŵake eyasuka kuti, “Muwonalini ŵanthu mwakuzungulukilani? Mukonshelanji wakukatani?”

32Koma Yesu epitilizya kulolesha–lolesha kuti awone ecita tetyo. 33Mwanakazi wala azindikila vemucitikila, tetyo ewela, wotutumila na wowa nofukama pafupi na Yesu, nomuwuzya vyendi. 34Yesu emuwuzya kuti, “Mwana wangu, cicetekelo cako cakupozya. Nkhoya mu mtendele. Ulwele wako wasililatu.”

35Akalulaŵila tetyo Yesu, kwiwela ŵanthu ofumila ku ngʼanda kwa Yailo nomuwuzya kuti, “Mwana wako wamwalila. Osapitilizya kuŵatamanisha Asambizyi.”

36Yesu aliyoyikeko nzelu ku venzolaŵila, emuwuzya Yailo kuti, “Osacita wowa, nkhala tyala na cicetekelo.”

37Tetyo, aliyozomezye aliyense kuya naye koma tyala Petulo, Yakobe na mkwawo Yohane. 38Pecifwika ku ngʼanda ya Yailo, Yesu ewona mpilingu–pilingu nakulila koŵilikizya. 39Eloŵa mu ngʼanda noŵakonsha kuti, “Ngani uyu mpilingu–pilingu ni cinji? Mulilanji? Uyu mwana aliyowufwe, wayingoyona!”

40Koma pamene apo ŵala ŵanthu etatika kumcita msikila nomuseka, tetyo Yesu eŵafumya wonse notola awisi na anyina ŵa wala mwana pamo na asambili ŵake ŵala atatu nakuya nawo ku cipinda kweenzelele wala mwana. 41Emukata kwanja wala mwana nomuwuzya kuti, “Talita, koum,” kulaŵila kuti, “Mwanawe, nukuwuzya, uka!” 42Ewuka pamene apo notatika kuyenda–yenda. Enze na vyaka kumi na viŵili. Pevicitika ivi, ŵanthu ekanganishiwa ngako. 43Koma Yesu elamula kuti asawuzye aliyense, nipo elaŵila kuti, “Mpeni vakulya alye.”

Currently Selected:

Mako 5: GMN

Highlight

Copy