Mako 4

Linganizyo ya womwazya mbuto

(Mt 13:1-9; Lk 8:4-8)

1Yesu etatika soti kusambizya ku mbali kwa Cimmana ca Galileya. Winji wa ŵanthu wiwungana kwa yeve, tetyo yeve eloŵa mu wato, nonkhala pansi. Umba yonse ipanama pa silya mu mbali mwa cimmana. 2Eŵasambizya vinyinji kupitila mu malinganizyo, enzoŵawuzya kuti, 3“Mvwani! Munthu muyakine eluta kuyomwazya mbuto. 4Pecimwazya mbuto mu munda mwake, ziyakine ziponela mu mseu, nipo tunyoni twiwela nakulya. 5Ziyakine ziponela pa myala penzeve lito inyinji. Tetyo, mbuto zala zimela mmangu cikomo ca lito itontho 6koma peyiwela zuŵa tumumela twala twicipya cikomo cakuti mizyu iliyoloŵe pansi ngako nipo twiyuma. 7Ziyakine ziponela pa minga, yamene ikula noceneka tumbuto twala, na kuti tuliyotwale vitwalo. 8Koma ziyakine ziponela pa lito iweme, nomela, nokula, notwala vitwalo: ziyakine zenze na vitwalo makumi atatu (30), ziyakine makumi asanu na imo (60), na ziyakine zenze na makumi kumi (100).”

9Yesu elaŵila soti kuti, “Ali na matu, amvwishishe!”

Cilingo ca malinganizyo

(Mt 13:10-17; Lk 8:9-10)

10Yesu penze pa yeka, asambili ŵala kumi na aŵili pamo na ŵanthu ayakine ŵenzonkhala nawo emukonsha va malinganizyo yala. 11Yesu eŵayasuka kuti, “Mwewo mwepewa cisinsi ca Ufumu wa Mulungu, koma ayakine ali kunja akumvwa vonse mu malinganizyo tyala, 12 kuti tetyo,

‘Kulolesha angaloleshe cendi,

koma osaona kanthu;

na kuti kumvwa angamvwe,

koma osamvwisha kanthu.

Kuti akatetyo, angayaluke mitima,

nipo Mulungu angaŵalekelele.’”

Yesu olaŵila tanthauzo ya linganizyo ya womwazya mbuto

(Mt 13:18-23; Lk 8:11-15)

13Pa vuli pake Yesu eŵakonsha kuti, “Kansi mukumvwalini tanthauzo ya iyi linganizyo? Niye kuti mungamvwe tyani tanthauzo ya linganizyo iliyonse? 14Womwazya mbuto wala ni womwazya Malizu ŵa Mulungu. 15Ŵanthu ayakine ali ngani mbuto zoponela mu mseu; mwangamvwile Malizu ŵa Mulungu, Satana akuza na kuzoŵafumya. 16Ayakine ali ngani mbuto zoponela pa myala penzeve lito, mwangamvwile Malizu, oŵapokelela na cimwemwe. 17Koma ozikalini mizyu soti onkhalishalini mu mitima yawo. Tetyo, matamano na manzunzo akaza cikomo ca Malizu, ŵanthu ŵala otaya cicetekelo. 18Ŵanthu ayakine ali ngani mbuto zoponela pa minga. Aŵa ni ŵala akumvwa Malizu, 19koma otangwanishiwa na va pa calo, kutemwa cuma na viyakine vukumbwilika noluŵisha Malizu ŵala, tetyo osatwala vitwalo. 20Koma ŵanthu ayakine ali ngani mbuto zoponela pa conde ciweme. Akumvwa Malizu, noŵapokelela, notwala vitwalo: ayakine makumi atatu, ayakine makumi asanu na imo, na ayakine makumi kumi.”

Nyale yovwinikiliwa na nongo

(Lk 8:16-18)

21Lomba Yesu eŵakonsha kuti, “Kansi munthu angatole nyale noyivwinikila na nongo keno kuyifisa? Kansi oyiyikalini poyika nyale? 22Pala cinthu ciliconse cofisika cizeciwululike, nipo va cisinsi vizeviziŵike nowonekela patuŵa. 23Ali na matu, amvwishishe!”

24Eŵawuzya soti kuti, “Yikani nzelu ku vamukumvwa! Muyeso wamuseŵenzesha kupingula ayanu Mulungu akawuseŵenzeshe kupingula mwewo, koma mwewo cikaŵe nyanye. 25Wala ali na vinthu akamupelepo viyakine, koma wala aliye kalikonse akamupoke na katontho ka ali nako.”

Linganizyo ya mbuto zumela nokula

26Yesu epitilizya kuti, “Ufumu wa Mulungu uli teti. Munthu emwazya mbuto mu munda mwake. 27Enzolala usiku, kuwuka mzuŵa, na kuti nsita yonse iyo mbuto zala zenzomela nokula, koma yeve enzoziŵalini mwazenzocitikila. 28Lito yumelesha nokulisha mbuto mpaka kutwala. Yutatika kumela, nofumya ngalangala na kuzotwala vitwalo. 29Pamene apo vitwalo vikapya, wala munthu otola jeko yoseŵela, pakuti nsita yowezya yafwika.”

Linganizyo ya kambuto katontho

(Mt 13:31-32,34; Lk 13:18-19)

30Yesu ekonsha kuti, “Kansi Ufumu wa Mulungu tingawulinganizye na cinji? Ngani linganizyo yotyani yatingaseŵenzeshe kuti tiwutanthauzile? 31Uli ngani kambuto katontho. Munthu otola kambuto katontho ngako mu calo, nokakomola pa lito. 32Pakapita nsita, kokula nonkhala mmela ukulu ngako pa vumela vonse. Kokuŵa na misambo ikulu cakuti tunyoni tuwela nopangamo tuvumbo mu cimfule cake.”

33Yesu enzolaŵila na ŵanthu Malizu ŵa Mulungu poseŵenzesha malinganizyo anyinji ngani aŵa; enzoŵawuzya vinyinji vakuti amvwishishe. 34Enzolaŵilalini nawo kosaseŵenzesha malinganizyo, koma akaŵa yeka na asambili ŵake, enzowatanthauzila vonse.

Yesu olesha cinkhuka

(Mt 8:23-27; Lk 8:22-25)

35Mcingulo mwa nsiku yamene yala Yesu ewuzya asambili ŵake kuti, “Tiyeni titawukile ku silya iyakine ya cimmana.” 36Tetyo, eyisiya umba yala; asambili eloŵa mu wato mweenze nkhezi Yesu noluta naye. Penze mawato ayakine enzoŵakonkha. 37Movundumukizya cinkhuka coyofya cetatika, na kuti matambazi etatika kuloŵa mu wato, nipo mwetatika kuzula manzi. 38Yesu enze ku vuli kwa wato, enze lele na mutu wake wenze pa cosamilapo.

Asambili ŵake emuwusha, elaŵila kuti, “Asambizyi, kansi musamalalini kuti tumbila?”

39Yesu ewuka nocimula cinkhuka nowuzya matambazi kuti, “Leka! Nkhala celele!” Cinkhuka cala cileka, nipo matambazi eciŵa celele.

40Lomba Yesu ewuzya asambili ŵake kuti, “Ni cinji mucita wowa? Kansi na lomba muliye cicetekelo?”

41Koma enze ecita wowa nokanganishiwa tetyo ekonshana kuti, “Kansi uyu munthu ni ŵani? Wakuti cukanga cinkhuka na matambazi vumumvwila!”

Currently Selected:

Mako 4: GMN

Highlight

Copy