Mako 3

Yesu opozya munthu wolemala kwanja

(Mt 12:9-14; Lk 6:6-11)

1Nsita iyakine eloŵa soti mu kacisi wa Ayuda, mwecifwana munthu wolemala kwanja. 2Ŵanthu ayakine enzemo enzopangwa cikomo comuyopezyela kucita viyipa; tetyo enzomulolesha kuti awone keno apozye wala munthu pa nsiku ya Sabata. 3Yesu ewuzya wala munthu wolemala kwanja kuti, “Wela pano pakati.”

4Lomba Yesu ekonsha ŵanthu kuti, “Nizomezyewa pa Sabata kucita ciweme keno ciyipa, kupulumusha moyo keno kupaya?” Koma ŵanthu ŵala eciŵa celele.

5Yesu eŵalolesha na ukali ŵala ŵanthu, noŵacitila citinthi, cikomo enze ayumu mitima. Tetyo ewuzya wala munthu kuti, “Tambulula kwanja yako.” Eyitambulula kwanja yake nipo yenkhala soti luweme. 6Tetyo, Afalisi efuma mu kacisi nokuyopanga kaupo na ŵa mu cipani ca Helode, kuti amvwane njila yopayilamo Yesu.

Winji wa ŵanthu ukonkha Yesu

7Yesu na asambili ŵake eluta ku Cimmana ca Galileya, na winji wa ŵanthu ŵa ku Galileya enzoŵakonkha. 8Ewela cikomo cakuti enzokumvwa venzocita, anyinji ewela kufumila ku Yudeya, ku Yelusalemu, ku Idumeya na ku minzi ya ku citwa ca ku Yolodani na kuzunguluka ku Tilo na Sidoni. 9Cikomo ca winji wa ŵanthu, Yesu ewuzya asambili ŵake kuti amuwamyile wato kuti ankhalemo, kuyopa ŵanthu kuti angamufyanthe. 10Cikomo copozya ŵanthu anyinji, wonse enze olwala enzokankhana kuti afwane njila yakuti amukateko. 11Viŵanda venze kuti vikamuona, venze kuŵa pansi pafupi na yeve noŵilikizya kuti, “Mwewo nimwe Mwana wa Mulungu.” 12Koma yeve evicenjezya kuti visamuwulule.

Yesu osalula nthumi kumi na ziŵili

(Mt 10:1-4; Lk 6:12-16)

13Yesu ekwela ku mbali ya lupili noyita ŵanthu ŵenzopangwa pa winji wa ŵanthu ŵeenze nawo. Ŵeve enzokuya kwa yeve. 14Esalula ŵanthu kumi na aŵilli noŵayika kuŵa nthumi kuti ziwonkhala naye na kuti awozituma kuyoŵilizya 15nozipa ulamulilo wofumya viŵanda. 16Aŵa niye ŵanthu kumi na aŵili ŵecisalula: Simoni (wecipa zina yakuti Petulo); 17Yakobe mwana wa Zebedayo na mkwawo Yohane (aŵa eŵapa zina yakuti ŵa Bowanege, kulaŵila kuti “woyofya ngani kaleza”); 18Andeleya, Filipo, Batulumeyo, Mateyo, Thomasi Yakobe mwana wa Alifeyo, Thadeyo, Simoni wa mu cipani ca Zelote 19na Yudasi Isikaliyoti enzekuyomutwala kwa alwani ŵake.

Yesu na Belezebule

(Mt 12:22-32; Lk 11:14-23; 12:10)

20Yesu ewelela ku ngʼanda. Winji wa ŵanthu wewungana soti pa ngʼanda, cakuti Yesu na asambili ŵake enzeve nsita ya kulya. 21Enekwawo pecimvwa ici, ewela kuti amutole, pakuti ŵanthu ayakine enzolaŵila kuti, “Wasiluka.”

22Asambizyi ayakine ŵa Matetulo efuma ku Yelusalemu enzolaŵila kuti, “Wakatiwa na Belezebule! Ofumya viŵanda na mphamvu ya mkulu wa viŵanda.”

23Tetyo, Yesu eŵayita nolaŵila nawo mu malinganizyo, enze kuti, “Kansi Satana angazifumye yeka? 24Keno ufumu watatika kutatikana weka–weka, ungakoselini, 25nipo keno ŵanthu ŵa mu banja imo atatika kuwukilana, banja yala ingakoselini. 26Nipo keno Asatana awukilana nosushana ŵeka–ŵeka, angapanamelini; niye kuti asila. 27Paliye angaloŵe mu ngʼanda mwa munthu wotangʼa noyiŵa vinthu vake, koma keno amumangilila wala munthu. Niye pangamuyiŵile mu ngʼanda mwake. 28Nukuwuzyani vyendi kuti munthu angalekelelewe macimo ŵake wonse na viyipa vonse vangalaŵile, 29koma aliyense otafulila Mzimu Mtuŵa akalekelelewelini, cikomo cakuti wacita ucimo wosasila.”

30Yesu elaŵila ivi cikomo cakuti ŵanthu enze kuti, “Wakatiwa na viŵanda.”

Anyina na enekwawo ŵa Yesu

(Mt 12:46-50; Lk 8:19-21)

31Nipo anyina na enekwawo ŵa Yesu ewela, nopanama panja, notuma munthu kuti akamuyite. 32Ŵanthu anyinji enkhala pansi nomuzunguluka nomuwuzya kuti, “Lolani, anyina ŵanu na enekwanu ali panja, opangwa kukuwonani.”

33Yesu aŵayasuka kuti, “Amama ni ŵani? Enekwasu ni ŵani?”

34Elolesha ŵanthu enzomuzunguluke nolaŵila kuti, “Lolani! Aŵa niye amama na enekwasu! 35Aliyense ocita vakupangwa Mulungu niye munekwasu, mlongosi, na amama.”

Currently Selected:

Mako 3: GMN

Highlight

Copy