Mako 7

Myambo ya avyazi ŵa Ayuda

(Mt 15:1-9; Lk 11:37-41)

1Nsiku iyakine Afalisi ayakine pamo na Asambizyi ayakine ŵa Matetulo ofumila ku Yelusalemu, ewungana pamo kwa Yesu. 2Ŵeve ewona kuti asambili ŵake enzoyingokulya cosasamba ku manja. (Kulaŵila kuti aliyosamalile mwambo wosamba ku manja.) 3Apa, Afalisi na Ayuda wonse enzokulyalini akaliyosamba ku manja mu njila yozomelezyewa. Enzocita tetyo kuti asunge mwambo wa makolo ŵawo. 4Enze kuti akafuma ku msika, enzokulyalini mpaka kusamba ku manja. Enzosunga soti myambo iyakine inyinji ngani kusuka ceso, mbale, vopikilamo vamkuŵa [na mipando yonkhalapo pakulya].

5Lomba Afalisi na Asambizyi ŵala emukonsha Yesu kuti, “Cikomo ni cinji asambili ŵanu osungalini mwambo wa makolo, oyingokulya cakulya osasamba ku manja mosazomelezyewa?” 6Yesu eŵayasuka kuti, “Nimwe wolipazya cendi. Mneneli Yesaya enenela vyendi ngani Malembo olaŵila kuti,

‘Ŵanthu aŵa onicinzika na milomo yawo,

koma mitima yawo ili kutali na newo.

7 Onilambila mwa tyala,

pakuti vakusambizya ngani visambizyo ni matetulo ŵa ŵanthu tyala.’”

8Pa vuli pake Yesu elaŵila kuti, “Mwewo musiya Matetulo ŵa Mulungu, nosunga myambo ya ŵanthu.”

9Yesu epitilizya kulaŵila nawo kuti, “Muli nayo njila yanu yocenjela yosiyilamo Matetulo ŵa Mulungu kuti musunge myambo yanu. 10 Mose elamula kuti, ‘Cinzika auso na anyoko,’ soti, ‘Wotafulila awisi keno anyina, okopayiwa.’ 11Koma mwewo mulaŵila kuti, ‘keno Munthu owuzya awisi keno anyina kuti, “Pepani, ndalama yenenze kuti nikuyavyeni nayo yatwaliwa cawanzi kwa Mulungu#7:11 Cawanzi kwa Mulungu Pa Cigiliki malizu aŵa “Kolobani” otanthauza “vatwaliwa kwa Mulungu.”.” 12Lomba mumulolalini kuti ayavye awisi keno anyina.’ 13Pocita tetyo Malizu ŵa Mulungu muŵayezya kuŵa atyala–tyala, cikomo ca mwambo wanu wamusiyilana–siyilana. Koma lomba mucita soti vinyinji votetyo.”

Vinthu vuyifya munthu

(Mt 15:10-20)

14Pa vuli pake Yesu eyita soti ŵanthu kuti awele pafupi, eŵawuzya kuti, “Mvwani nipo mumvwishishe. 15Paliye cinthu cufumila kunja noloŵa mkati mwa munthu cingamuifye. Koma vufumila mkati mwa munthu niye vingamuyifye. 16[Ali na matu, amvwishishe!]”

17Yesu esiya winji wala wa ŵanthu nakuyoloŵa mu ngʼanda, asambili ŵake emukonsha va linganizyo iyi. 18Yesu eŵayasuka kuti, “Ciliconse cofumila kunja, nakuloŵa mu munthu cingamuifyelini. 19Cikomo culoŵalini mu mtima koma mu mala, pa vuli pake nofuma kunja kwa muŵili.” (Polaŵila tetyo emangulula kuti vakulya vonse ni viweme.)

20Elaŵila soti kuti, “Vufuma mkati mwa mtima niye vumuyifya. 21Cikomo vufuma mkati mwa mitima ya ŵanthu ni ivi: malingililo ayipa, kacenche, unjivi, kupaya, 22ucende, kulitemwa, kuyipa mitima, wenye, kukumbwila komvwisha nsoni, luyipilwa, mitafu, kuzikuzya na ucizende. 23Viyipa vonse ivi vufuma mkati mwa munthu, niye vumuyifya.”

Cicetekelo ca mwanakazi muyakine

(Mt 15:21-28)

24Yesu eyima kuluta ku citwa ciyakine ca ku Tilo. Enkhala ku ngʼanda iyakine, yeve aliyopangwe kuti ŵanthu aziŵe kuti aliko. Koma aliyofisike. 25Pa nsita yamene iyi, mwanakazi muyakine, mwana wake mwanakazi enzotamana na ciŵanda. Pecimvwa va yeve, ewela kwa Yesu nomufukamila. 26Mwanakazi uyu enzelini Muyuda, enze wa mtundu wa ŵanthu ŵa ku Silo–Fenisiya. Mwanakazi uyu esenga Yesu kuti afumye ciŵanda mu mwana wake.

27Koma Yesu emuyasuka kuti, “Yayi, ŵalekeni ŵana alye akute. Ni ciwemelini kutola cakulya ca ŵana kutayila imbwa.”

28Mwanakazi wala elaŵila kuti, “Ni cendi, Asikulu. Koma cukanga imbwa zunkhala mu nyansi mwa polyela kutolako mapona–pona ŵakutaya ŵana.”

29Nsita yamene yala Yesu emuwuzya kuti, “Cikomo ca malizu yamwalaŵila, nkhoyani ciŵanda cafuma mu mwana wanu.”

30Mwanakazi wala ewelela ku ngʼanda kwake nofwana kuti mwana wala ali lele pa macila, ciŵanda cala cafuma.

Yesu opozya munthu wosalaŵila na aliye matu

31Yesu efumako soti ku citwa cala ca ku Tilo, eyenda kutulikila citwa ca ku Sidoni, noluta ku Cimmana ca Galileya, kupitila ku mbali ya Minzi Kumi. 32Ŵanthu ayakine ewela kwa yeve na munthu wamene enzokumvwalini na kuti enze silaŵila. Ŵanthu ŵala esenga Yesu kuti apozye wala munthu poyika manja pa yeve.

33Yesu etola wala munthu pa mbali kumufumya pa winji wa ŵanthu. Eyika vikumo vake mu matu ŵa wala munthu notila mata pansi, nokata pa lulimi pa wala munthu. 34Elolesha Kululu nolaŵila malizu kuti, “Efata!” kulaŵila kuti “Vulika!” 35Nsita yamene iyo matu ŵa wala munthu ezulika, na cenzo mumanga lulimi cemangusuka, nipo etatika kulaŵila luweme.

36Yesu elamulila ayake ŵa wala munthu kuti, “Osati akawuzyeko munthu aliyense vacitika.” Koma cukanga kuti eŵalesha nogogomezya ivi, ŵeve eciyoŵilizya ceciwona. 37Ŵanthu eciŵa okanganishiwa ngako. Elaŵila kuti, “Uyu munthu vonse ocita luweme. Cukanga osamvwa opozya na kumvwa, na osalaŵila oŵalaŵilisha.”

Currently Selected:

Mako 7: GMN

Highlight

Copy