Mako 8
8
Yesu olyesha ŵanthu myanda inayi (4,000)
(Mt 15:32-39)
1Paliyopite nsita itali ŵanthu anyinji ewungana soti. Yesu peciwona kuti ŵanthu ŵala aliye cakulya eyita asambili ŵake noŵawuzya kuti, 2“Nukumvwa nawo citinthi ŵanthu cikomo aŵa nane masiku atatu osalya kalikonse, na kuti lomba paliye vakulya. 3Nikayingoŵawezya ku minzi kwawo na njala yawo angalefuke pa njila, pakuti ayakine afumila kutali.”
4Asambili ŵake emukosha kuti, “Ŵanthu anyinji teti, munthu angatweshe tyani kuŵasakilila vakulya kuno ku sanga?”
5Yesu eŵakonsha kuti, “Muli na mikate ingananji?”
Ŵeve elaŵila kuti, “Tili nayo isano na iŵili.”
6Pa nsita iyi Yesu eŵawuzya ŵanthu ŵala kuti ankhale pansi. Pa vuli pake etola mikate yala notembezya Mulungu, noyisuna–suna noyitwala kwa asambili ŵake kuti aŵayaŵile ŵanthu ŵala. Asambili ŵala ecita mweciŵawuzyila. 7Enze soti na tusaŵi tutontho. Yesu etembezya soti Mulungu cikomo ca tusaŵi tutontho twala, eŵawuzya soti asambili ŵake kuti aŵape ŵanthu ŵala. 8Ŵanthu ecilya nokuta. Nipo asambili ŵake etola vitundu visanu na viŵili va vakulya vosalapo. 9Ŵanthu enzepo okwanila myanda inayi. 10Pa vuli pake Yesu elayilana nawo ŵanthu ŵala, noloŵa mu wato pamo na asambili ŵake noluta ku malo ŵa Dalamanuta.
Afalisi opangwa kuwona ciziŵikilo cokanganisha
(Mt 16:1-4; Lk 11:16-29)
11Nsita iyakine Afalisi ewela notatika kusushana na Yesu, nomusenga kuti aŵawoneshe ciziŵikilo cokanganisha cofumila Kululu. Potetyo enzopangwa kumuyezya. 12Yesu engʼutila mu mtima kuti, “Kansi ni cinji ŵanthu ŵa luko ino cakupangwila kuwona ciziŵikilo cokanganisha? Nukuwuzyani vyendi kuti ŵanthu ŵa luko ino akaciwonelini ciziŵikilo cakupangwa.” 13Pecicita teti Yesu eŵasiya nakuyoloŵa mu wato notawukila ku silya iyakine.
Visambizyo va wenye va Afalisi na Helode
(Mt 16:5-12; Lk 12:1)
14Asambili ŵa Yesu eluŵa kutakula mkate, koma mu wato enze na mkate umo tyala. 15Nsita iyi Yesu eŵapa malango mocenjezya kulaŵila kuti, “Nkhalani celu na cofufumishila mkate ca Afalisi na ca Helode.”
16Asambili ŵala etatika kulaŵizyana ŵeka–ŵeka kuti, “Wotetyo cikomo cakuti tiliye mkate.”
17Yesu eziŵa venzolaŵila, eŵakonsha kuti, “Cikomo ni cinji mulaŵila kuti muliye mkate? Kansi mpaka lomba muwonalini keno kumvwisha? Mwa mitima yanu ni iyumu? 18Kansi menso muli nawo koma muloleshalini, na matu muli nawo koma mumvwishishalini? Kansi mukumbukalini? 19Penesuna–suna mikate isanu kwa ŵanthu myanda isanu, vosalila mwetola vitundu vingananji?”
Asambili ŵake eyasuka kuti, “Kumi na viŵili.”
20Yesu eŵakonsha kuti, “Nga penesunila mikate isanu na iŵili kwa ŵanthu okwanila myanda inayi, mwetola vitundu vingananji va vosalila?”
Ŵeve eyasuka kuti, “Visanu na viŵili.”
21Yesu elaŵila kuti, “Mpaka lomba mumvwishalini?”
Yesu opozya mphofu ku Betisaida
22Yesu na asambili ŵake efwika ku Betisaida, kwamene kwala ŵanthu eleta mphofu, esenga Yesu kuti amupozye pomukumya na kwanja. 23Yesu emukata pa kwanja, nofuma naye kunja kwa munzi. Ethunyila mata mu menso mwa mphofu, na kumuyika manja nomukonsha kuti, “Kansi uwona kanthu?”
24Munthu wala eŵinuka nolaŵila kuti, “Nuwona ŵanthu woyenda, koma owoneka ngani vimiti.”
25Yesu emuyika soti manja pa menso pake. Munthu wala epola notatika kulolesha vonse paweme. 26Yesu emuwuzya kuti alute kwawo, nomulamulila kuti, “Usaloŵe soti mu munzi umu.”
Petulo osimikizya kuti Yesu ni Mesiya wa Mulungu
(Mt 16:13-20; Lk 9:18-21)
27Yesu na asambili ŵake eluta ku minzi ya ku Kayisaliya–Filipi. Pa mseu Yesu eŵakonsha asambili ŵake kuti, “Kansi ŵanthu olaŵila kuti nine ŵani?”
28Ŵeve eyasuka kuti, “Ayakine olaŵila kuti nimwe Yohane Mbatizi, ayakine olaŵila kuti nimwe Eliya, ayakine soti olaŵila kuti nimwe yumo wa aneneli.”
29Yesu eŵakonsha kuti, “Nga mwewo mukuti nine ŵani?”
Petulo eyasuka kuti, “Nimwe Mesiya, Mpulumushi Wolayizyiwa wala.”
30Yesu eŵalamulila kuti ivi viŵe va cisinsi.
Yesu olaŵililatu va matamano na imfwa yake
(Mt 16:21-23; Lk 9:22-27)
31Yesu etatika kusambizya asambili ŵake kuti, “Mwana wa Munthu akanzuzike ngako. Akulu ŵa Ayuda, na Akulu ŵa Ansembe na Asambizyi ŵa Matetulo azemukane. Uyu azepayiwe, koma pakazopita masiku atatu azeawuke.” 32Ivi evilaŵila mosafisila. Tetyo, Petulo emutola noluta naye pa mbali, notatika kumucimula.
33Yesu ecewuka, nololesha asambili ŵake ŵala, nsita iyi ecimula Petulo kuti, “Fumapo apa wewo Satana! Malingililo ŵako ni ŵa Mulungulini, ni ŵa ŵanthu tyala.”
Kutakula mtanda nomukonkha Yesu
(Mt 16:24-28; Lk 9:23-27; Yh 12:25)
34Pa vuli pake, Yesu eyita winji wa ŵanthu pamo na asambili ŵake kuti awele pafupi na yeve, eŵawuzya kuti, “Aliyense opangwa kukonkha newo azikane yeka nipo atakule mtanda wake nonikonkha. 35Cikomo cakuti opangwa kupulumusha moyo wake azeawutaye, koma uyo otaya moyo wake cikomo ca Malizu Aweme, azeawupulumushe. 36Nga munthu ophindula vinji pakuŵa navo vonse va pa calo ca pansi, koma notaya moyo wake? 37Munthu angalipilenji cakuti anunulile moyo wake? 38Lomba munthu, keno ocita nsoni na newo koma soti na malizu ŵangu, pa menso pa ŵanthu ocita viyipa na osacetekeleka, Mwana wa Munthu akacite naye nsoni akayowela, ali mu ulemelelo wa Awusu wake na angelo atuŵa.”
Currently Selected:
Mako 8: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
