Macitilo 5

Ananiya na Safila

1Penze munthu soti, zina yake Ananiya, pamo na mkazi wake Safila, esitisha munda wawo. 2Mopangana na mkazi wake, epatulapo ndalama ziyakine za munda wala, nakuyotwala zosalila kwa nthumi.

3Koma Petulo emukonsha kuti, “Wewo Ananiya, ni cikomo canji wazomelezya mtima wako kukatiwa na Satana mpaka notalizya wenye Mzimu Mtuŵa popatula ndalama ziyakine za munda wako? 4Pewenze ukaliyowusitisha wenzelini wako kansi? Nipo pawiwusitisha, ni palalini ndalama zake zenze mu manja mwako? Nga wizomelezya tyani voteti mu mtima mwako?”

5Ananiya pecimvwa malizu aŵa, epona pansi, nakufwa pamene apo. Nipo ŵanthu ecimvwa ivi ecita wowa ukulu. 6Lomba alumbwana ewela nomuvunga mu nyula. Emutakula nakuyomuyika mu manda.

7Pepepita maola atatu, mkazi wake eloŵa, osaziŵa vacitika. 8Petulo emukonsha kuti, “Niwuzyeni, kansi positisha munda wanu, mtengo wake wenze ndalama izi?”

Mwanakazi wala elaŵila kuti, “Eee, mtengo wake wenze wamene uyu.”

9Tetyo, Petulo emukonsha kuti, “Ni cikomo canji mwipangana kuyesa Mzimu wa Asikulu? Nipo ŵanthu ayika alume ŵanu ni aŵa ali pa mulyango apa, akutakuleni namwe soti.”

10Pamene apo epona pansi ku mendo kwa Petulo, nakufwa. Alumbwana ŵala peciloŵa emufwana wafwa kale. Emutakula nakuyomuyika pafupi na mulume wake. 11Nipo mpingo wonse na ŵanthu wonse ecimvwa ivi, ekatiwa na wowa ukulu.

Nthumi zucita viziŵikilo na vokanganisha vinyinji

12Nthumi zenzocita viziŵikilo na vokanganisha vinyinji pakati pa ŵanthu. Wonse ocetekela Kristu enzowungana na mtima umo mu lukolo ya Solomoni. 13Mwa ŵanthu ayakine awo penzeve cukanga yumo etangʼa mtima kuti awowungana nawo, koma ŵanthu wonse enzoŵatembezya. 14Nipo ŵanthu wocetekela Asikulu enzopakila–pakila, mwakuti wenze cendi winji ukulu wa analume na anakazi. 15Tetyo, ŵanthu enzofumyila olwala ŵawo mu misewu ya mu mzinda, noŵalalika pa macila na pa mphasa, kuti Petulo popitilapo cimvwili–mvwili cake ceka ayakine mwa ŵeve ciŵafwike. 16Kwenzowungana soti ŵanthu anyinji ofumila ku minzi yozunguluka Yelusalemu. Enzotakula ŵanthu olwala, nipo soti ayakine enzonzunziwa na mizimu yoŵayifyisha. Wonse ŵala enzopozyewa.

Nthumi zutatika kusawushiwa

17Pamene apo Mkulu wa Ansembe wonse pamo na ayake ŵala, ŵa mu cipani ca Asaduki, wonse eyipilwa navo. Tetyo, elamula vocitapo kanthu. 18Ekata nthumi zala, nozivalila mu jele ya boma. 19Koma usiku mngelo wa Asikulu evula viseko va mu jele mwala noŵafumya. Eŵawuzya kuti, 20“Nkhoyani mu Ngʼanda ya Mulungu mukowuzya ŵanthu malizu wonse okumya va moyo wa lomba uyu.”

21Nthumi zala zecimvwa cendi ivi, zeciyoloŵa mu Ngʼanda ya Mulungu mmawa, notatika kusambizya.

Mkulu wa Ansembe wonse pecifwika pamo na ayake ŵala, eyitisha msonkhano wa Kaupo Kakulu ka Ayuda, nsaka yonse ya akulu–akulu ŵa Aisilayeli. Lomba etuma ŵanthu kuti alute ku jele kuyotola nthumi zala. 22Koma ŵala ŵanthu pecifwika ku jele kwala, aliyoŵafwanemo ewelako nakuzoŵawuzya. 23Elaŵila kuti, “Tafwana jele ili civalile cendi, nipo olonda ali peneme pa mulyango, koma petevula milyango, tiliyofwanemo munthu.” 24Mkulu wa asilikali wa ku Ngʼanda ya Mulungu na Akulu ŵa Ansembe pecimvwa malizu aŵa, esila nawo nzelu, osaziŵa ni votyani vacitika.

25Koma munthu muyakine eŵawuzya kuti, “Ŵanthu ŵamwivalila mu jele mwala, ali mu Ngʼanda ya Mulungu osambizya ŵanthu.” 26Pamene apo mkulu wa asilikali wala, pamo na asilikali ŵala, eluta kuyotola nthumi zala, aliyozitole mwa nkhondo yayi, cikomo eyopa kuti ŵanthu angaŵateme myala.

27Pecifwika nazo, ezinkhazika pa menso pa Kaupo Kakulu kala, nipo Mkulu wa Ansembe wonse etatika kuŵakonsha makonsho. 28Elaŵila kuti, “Pala tekuleshani mwa mphamvu kuti kosasambizya mu zina ya Yesu, koma mwewo mwaŵilizya vosambizya vanu ivo mu Yelusalemu monse, nipo mupangwa kutitakulisha imfwa ya munthu uyu.”

29Koma Petulo na nthumi ziyakine zala zelaŵila kuti, “Tuwamila kumvwila Mulungu kupula kumvwila ŵanthu. 30Mulungu wa makolo ŵasu ewukisha Yesu kwa akufwa, wemwipaya nomupanyika pa mtanda#5:30 nomupanyika pa mtandaKeno kulaŵila kuti nomukhokhomela pa mtanda . 31Mulungu emucinzika nomuyika ku kwanja kwake kwendi kuti aŵe Citangulila na Mpulumushi. Ecita ivi kuti ape Aisilayeli shuko yoyaluka mtima kuti macimo ŵawo alekelelewe. 32Sewo nise mboni nipo soti Mzimu Mtuŵa wecitwala Mulungu kwa ŵanthu omumvwila.”

Gamaliyele ocenjezya Akulu ŵa Ayuda

33Ŵa ku Kaupo kala pecimvwa ivi, etinkha ngako nopangwa kuŵapaya. 34Koma yumo mwa ŵeve, Mfalisi zina yake Gamaliyele, Msambizyi wa Matetulo, weenzocinzika ŵanthu wonse, epanama. Elamula kuti ŵanthu ŵala afume panja. 35Tetyo, eŵawuzya kuti, “Mwewo Aisilayeli, ŵani celu pa vamupangwa kuŵacita ŵanthu aŵa. 36Pala nikalelini penze munthu zina yake Teudasi ewela kuyesa kulikuzya nipo ŵanthu ngani makumi kumi anayi emukonkha. Yeve wala epayiwa, nipo ŵanthu wonse enzomukonkha emwazyikana nosililatu. 37Pa vuli pake, pa nsita ya kalembela, kwiwela soti muyakine zina yake Yudasi, wa ku Galileya, ekoka ŵanthu anyinji kuti amukonkhe. Yeve soti epayiwa, nipo ŵanthu wonse ŵala emukonkha emwazyikana. 38Ni cikomo cake pa nkhani iyi nukuwuzyani kuti, muŵaleke ŵanthu aŵa, nipo muŵazomezye aŵekuya. Keno ŵeve vakulingilila nipo soti vakucita vufumila ku ŵanthu, vizevikange veka. 39Koma keno vufumila kwa Mulungu, mwewo mungaŵaleshelini yayi. Payakine mungafwaniwe kuti mulwishana na Mulungu.”

40Ŵa ku Kaupo ŵala ezomelezyana naye, noyita nthumi zala. Ezikwapula, nozilesha kuti zisalaŵile soti mu zina ya Yesu, nipo ezizomelezya kuti zilute.

41Nthumi zefuma kunja kwala zili na cimwemwe kuti Mulungu waŵaŵelengela wowamila kutafuliliwa cikomo ca zina ya Yesu. 42Tetyo, nsiku na nsiku enzosambizya mphela noŵilizya mu ngʼanda za ŵanthu, Malizu Aweme olaŵila kuti Yesu niye Mpulumushi Wolayizyiwa wala.

Currently Selected:

Macitilo 5: GMN

Highlight

Copy