Macitilo 4

Petulo na Yohane ku nsaka ya Akulu ŵa Ayuda

1Petulo na Yohane akalulaŵila na ŵanthu ŵala, kwiwela ansembe pamo na mkulu wa asilikali ŵa ku Ngʼanda ya Mulungu, na ayakine ŵa mu cipani ca Asaduki. 2Ŵeve enzewokalipa cikomo cakuti nthumi zala ziŵili zenzosambizya ŵanthu noŵilizya kuti, “Pakuti Yesu ewuka kwa akufwa, niye kuti akufwa azeawuke soti.” 3Lomba ekata Petulo na Yohane, pakuti kwenze kwefipa kale, eŵayika mu jele kufwikila mmawa. 4Koma anyinji mwa ŵanthu ecimvwa malizu ŵala ŵa nthumi, ecetekela. Ciŵelengelo ca wocetekela ŵala cikwanila myanda isano (5,000).

5Mmawa mwake acitangulila ŵa Ayuda, akulu ŵawo na Asambizyi ŵa Matetulo ewungana ku Yelusalemu. 6Kwenze soti Anasi, Mkulu wa Ansembe, pamo na Kayafa, Yohane, Alekisandelo na ayakine wonse ŵa ku banja kwa Mkulu wa Ansembe. 7Tetyo, epanamika Petulo na Yohane pakati pawo noŵakonsha kuti, “Kansi vala vemwenzocita, mwivicita na mphamvu yanji, keno mwivicita mu zina ya ŵani?”

8Petulo, pecizuzyiwa na Mzimu Mtuŵa eŵayasuka kuti, “Mwewo acitangulila na akulu–akulu muli apa, 9kansi mutikonsha lelo va nchito iweme icitika pa munthu wopunduka ŵala, nopozyewa kwake? 10Muziŵiletu lomba mwewo monse, na Aisilayeli wonse, kuti munthu uyu ali peneme wa moyo pa menso panu cikomo ca mphamvu ya zina ya Yesu Kristu wa ku Nazaleti. Wala wemwipanyika pa mtanda, koma Mulungu emuwukisha kwa akufwa. 11 Yesu wala Malizu ŵa Mulungu olaŵila kuti,

‘Mwala wemwikana mwewo amisili womanga ngʼanda,

wayaluka mwala wa pa ngondya,

wopangwika ngako.’

12Nipo paliye muyakine aliyense angapulumushe ŵanthu, pakuti pa calo conse ca pansi paliye zina iyakine Mulungu yecipa ŵanthu kuti tipulumuke nayo.”

13Ŵa mu nsaka ŵala ekanganishiwa powona kutangʼa mtima kwa Petulo na Yohane, nipo soti poziŵa kuti enze ŵanthu wamba, osasambilila ngako. Apo eziŵa kuti enze ayake ŵa Yesu. 14Lomba powona soti munthu wopozyewa wala ali peneme pafupi na Petulo na Yohane esoŵa poŵasushila. 15Tetyo, peciŵalamulila kuti afume mu nsaka ya milandu yala, ŵa mu nsaka mwala etatika kulaŵizyana.

16Elaŵila kuti, “Kansi tiŵacite cinji aŵa ŵanthu? Pakuti ŵanthu wonse onkhala mu Yelusalemu muno oziŵa kuti aŵa ecita cendi ciziŵikilo cokanganisha, nipo sewo ivi tingakanelini. 17Koma kuyopa kuti mbili iyi ingaŵilikile paliponse, tiyeni tiŵacenjezye moŵayofya kuti polaŵila na munthu aliyense osati akatomole soti zina ya Yesu.”

18Pecicita tetyo eŵayita, noŵalamula kuti asatomole soti keno kusambizya va zina ya Yesu. 19Koma Petulo na Yohane eŵayasuka kuti, “Pingulani mweka, kansi pa menso pa Mulungu ni ciweme kumvwila mwewo kupula kumvwila Mulungu? 20Sewo niye kuti tingalekelini kulaŵila vetiwona novimvwa.”

21Ŵa mu nsaka mwala, eŵacenjezya soti moyofya kupula kale, noŵamangulula. Aliyofwane njila yoŵalangila, pakuti ŵanthu wonse enzotembezya Mulungu cikomo ca vecitika vala. 22Nipo munthu wopozyewa mokanganisha enze ŵa vyaka vopitilila makumi anayi (40).

Ocetekela olombela pamo

23Petulo na Yohane pecimangululiwa, eluta kwa ayawo noŵawuzya vonse veciŵawuzya Akulu ŵa Ansembe na Akulu ŵa Ayuda. 24Ŵeve pecimvwa ivi, wonse etatika kulomba na mtima umo.

Elaŵila kuti, “Asikulu, ni mwewo mwilenga calo ca Kululu, calo ca pansi, cimmana, na vonse vilimo. 25Mwa Mzimu Mtuŵa mwilaŵilisha kolo yasu Davide, mtumiki wanu, pecilaŵila kuti,

‘Ni cikomo canji ŵanthu ŵa kunja ekalipa,

ŵanthu ŵa mitundu iyakine elingililanji viliye nchito?

26 Mafumu ŵa calo ca pansi ewamya,

akulu ŵa boma ewungana pamo

kukangana na Kristu wake wala.’

27“Ni vyendi, Helode na Ponsiyo Pilato ewungana mu mzinda muno pamo na ŵanthu ŵa kunja, nipo soti na ŵanthu ŵa Isilayeli kuti akangane na Yesu, Mtumiki wanu mtuŵa wamwizoza. 28Motetyo, ŵeve ecita cendi vonse vala vemwikonzekelatu kale Mwewo mwa mphamvu zanu na nzelu zanu kuti vicitike. 29Niye kuti lomba Asikulu, wonani vakutiyofya navo ivi, nipo mutiyavye sewo atumiki wanu, kuti tilaŵile malizu ŵanu motangʼa mtima cendi. 30Tambululani kwanja kwanu kuti apole, nipo pacitike viziŵikilo na vokanganisha mu zina ya Mtumiki wanu mtuŵa.”

31Pecisilizya kulomba, ngʼanda yecisonkhanilamo yala itatika kusungʼuzyika. Wonse ezuzyiwa na Mzimu Mtuŵa, notatika kulaŵila Malizu ŵa Mulungu motangʼa mtima.

Ocetekela oyaŵana vinthu vawo

32Winji wonse wa wocetekela wenze na mtima umo, na malingililo ŵamo. Penzeve munthu elaŵila kuti, “Va nili navo ni vangu–vangu,” koma aliyense enzotwala vake vonse kuti viŵe va wonse. 33Nthumi zenzocita umboni na mphamvu ikulu kuti Asikulu Yesu ewuka cendi kwa akufwa, nipo wonse Mulungu enzoŵawamila mtima ngako. 34Penzeve munthu wosoŵa kanthu pakati pawo, cikomo wonse enze na minda, keno ngʼanda, enzovisitisha nakuza na ndalama zawo kuzozitwala kwa nthumi. 35Nipo ndalama zala enzoyaŵila munthu aliyense kulingana na kusoŵa kwake.

36Penze munthu zina yake Yosefe, wa banja ya Levi, wa mtundu wa ku Kipilo, nthumi zemuyita Banabasi (niye kuti, “Wokosesha mtima”). 37Naye soti esitisha munda wake, nakuza na ndalama zake kuzozitwala kwa nthumi.

Currently Selected:

Macitilo 4: GMN

Highlight

Copy