Macitilo 3

Petulo opozya munthu wopunduka mendo

1Pa nsiku iyakine, Petulo na Yohane enzokuya ku Ngʼanda ya Mulungu pa 3 koloko mcingulo#3:1 3 koloko mcingulo keno 15:00 hrs nsita ya malombelo. 2Ŵanthu ayakine etakula munthu wopunduka mendo kavyalikilo. Masiku wonse enzomuyika pa mulyango wa Ngʼanda ya Mulungu poyitiwa “Mulyango Uweme,” kuti yeve akosenga ku ŵanthu oloŵa mu Ngʼanda mwala.

3Yeve peciwona Petulo na Yohane oloŵa mu Ngʼanda ya Mulungu, eŵasenga kuti amupeko kanthu. 4Ŵeve emulolesha, nipo Petulo emuwuzya kuti, “Tiloleshe.” 5Yeve eŵalolesha cendi nolingilila kuti apokele kanthu kufumila kwa ŵeve.

6Koma Petulo emuwuzya kuti, “Ndalama tiliye, koma nikupe canili naco: mu zina ya Yesu Kristu wa ku Nazaleti, yenda!” 7Pecicita tetyo, emukata kwanja ya kwendi, nomuyimya. Pamene apo mendo ŵake na nkhokola zake zitangʼa. 8Elumpha, nopanama, notatika kuyenda, nipo eloŵa nawo mu Ngʼanda ya Mulungu woyenda nolumpha notembezya Mulungu. 9Nipo ŵanthu wonse pecimuwona oyenda, notembezya Mulungu, 10emuziŵa kuti ni wala enzonkhala pa Mulyango Uweme wa Ngʼanda ya Mulungu. Nipo ekanganishiwa na vimucitikila.

Malizu ŵa Petulo mu Ngʼanda ya Mulungu

11Munthu wala pecikangamila Petulo na Yohane, ŵanthu wonse ekanganishiwa, noŵawutukila ku lukolo yoyitiwa lukolo ya Solomoni.

12Petulo peciwona ivi, elaŵila nawo ŵanthu ŵala kuti, “Mwewo Aisilayeli, ni cikomo canji mukanganishiwa na ivi? Ni cikomo canji mutilolesha ngani kuti tamupozya uyu munthu na mphamvu zasu–zasu? Kansi muyesa kuti ni cikomo cakuti nise wolomba Mulungu kopula? 13Yayi, koma Mulungu wa makolo ŵasu, Abulahamu, Isaki na Yakobo, etwala ulemelelo kwa Yesu Mtumiki wake, mwewo mwimutwala kwa alwani ŵake na kumkana pa menso pa Pilato, cukanga Pilato wala enzeelingilila kuti amumangulule. 14Yesu enze mtuŵa mtima na wolungama, koma mwewo mwimukana, nipo mu malo mwake mwisenga kuti akumangululileni cinyankapondo. 15Mwipaya wakupa moyo, koma Mulungu emuwusha kwa akufwa. Sewo nise mboni za ivi. 16Uyu munthu, wamuwona nipo mumuziŵa, wacetekela zina ya Yesu. Cicetekelo ca ali naco mwa Yesu, niye catangʼisha mendo ŵake, ca mupozya ngako, ngani mwewo monse mwamwamuwonela.

17“Nipo lomba mwenekwasu, nuziŵa kuti mwewo na akulu–akulu ŵanu mwicita ivi mosaziŵa. 18Koma Mulungu elaŵililatu mwa aneneli wonse kuti Kristu #3:18 Kristu Keno kuti Wozozewa wake azamvwe voŵaŵa, nipo vicitika motetyo. 19Tetyo, yalukani mtima nowelela kwa Mulungu, kuti akufafanizileni macimo ŵanu. Mukazotetyo, Asikulu azekupeni nsita yopumula, 20nipo azemtumizyileni Yesu wala wecisalulilatu kuti aŵe Mpulumushi wanu. 21Yeve enzowamila kuŵa Kululu mpaka nsita yowamya vonse kwa lomba, ngani Mulungu mwecinenela kutatikila macezo mwa aneneli ŵake atuŵa mtima. 22 Pala Mose elaŵila kuti, ‘Asikulu Mulungu azeasalule yumo pakati pa enekwanu, kuti aŵe Mneneli wanu ngani newo. Muzemumvwile vonse vatiazeakuwuzyeni yeve. 23Aliyense watiakaleke kumvwila Mneneli wala, azeamufumyiletu mwa Aisilayeli nomuceneka.’

24“Nipo aneneli wonse elaŵila, kutatikila Samuyeli, mpaka wonse ŵatiakawele pa vuli pake, enzoŵilizya va masiku ŵano. 25 Mulungu vecilayizya kupitila mwa aneneli ni vokumya mwewo ŵana ŵawo. Mwamene umo soti cipangano cecicita na makolo ŵanu cukumya mwewo mwe ŵana ŵake. Pala ewuzya Abulahamu kuti, ‘Mwa cizukulu cako ciyakine cizecishukishe mitundu yonse ya ŵanthu ŵa pa calo ca pansi.’ 26Tetyo, Mulungu pecisalula mtumiki wake, etatikila kumtuma kwa mwewo, kuti akushukisheni poyavya aliyense mwa mwewo kuleka njila zake ziyipa.”

Currently Selected:

Macitilo 3: GMN

Highlight

Copy