Macitilo 2

Kuwela kwa Mzimu Mtuŵa

1Nsiku ya cisangalalo ca Pentekosti peyifwika, ŵala wonse enze pamo mu ngʼanda imo. 2Movundumukizya kwimvwika kufumila kululu mlilimo ngani mphepo ikulu, nozuzya ngʼanda yonse yenzonkhalamo. 3Nipo ewona ngani tumalulimi twa mulilo twiyaŵikana nonkhala pa ŵeve, aliyense kake. 4Wonse ŵala ezuzyiwa na Mzimu Mtuŵa, nipo etatika kulaŵila vilaŵilo va cilwendo, ngani Mzimu mwenzoŵalaŵilishila ŵala.

5Tetyo, mu Yelusalemu mwala mwenze Ayuda ayakine, ŵanthu otemwa Mulungu, ofumila ku vyalo vonse va pansi. 6Mlilimo wala pewimvwika, ŵanthu anyinji ewungana. Wonse ekanganishiwa, cikomo aliyense mwa ŵeve enzoŵamvwa olaŵila cilaŵilo cake. 7Ekanganishiwa, nosiliwa nzelu nipo elaŵila kuti, “Kansi wonse aŵa olaŵila ni Agalileyalini? 8Nga, ni cikomo canji aliyense mwa sewo tuŵamvwa olaŵila mu cilaŵilo ca kwawo? 9Ayakine mwa sewo na Apaliti na Amedi na Ayelami, ayakine ni wonkhala ku Mesopotamiya, ku Yudeya na ku Kapadokiya, ku Ponto na ku Asiya, 10ku Filijiya na ku Mpamfiliya, ku Ejipito, na ku madela ŵa Libiya kufupi na ku Kilene, ayakine ni alwendo ofumila ku Roma, 11niye kuti Ayuda na ayakine okonkha va Ciyuda. Ayakine soti ni Akilete na Alabu, koma tonse tuŵamvwa aŵa ŵanthu olaŵila mu vilaŵilo vasu va nchito ikulu ya Mulungu.” 12Wonse ekanganishiwa nosiliwa nzelu, nipo etatika kukonshana kuti, “Kansi ici ni cinji?”

13Koma ayakine enzoyingoseka nolaŵila kuti, “Akolwa vinyu wa lomba.”

Petulo osambizya ŵanthu

14Koma Petulo epanama pamo na nthumi zala kumi na yumo, nipo elaŵila moŵilikizya kuti, “Mwewo Ayuda, na mwewo monse munkhala mu Yelusalemu muno, mvwani nipo mumvwishishe luweme malizu ŵangu. 15Aŵa ŵanthu aliyokolwe yayi, ngani mwamulingililila mwewo, pakuti nsita ikali 9 koloko mmawa. 16Koma ivi niye vecilaŵila Mneneli Yoweli va ku nthangu kuti, 17 ‘Mulungu olaŵila kuti,

Pa masiku osilizya nizeniyike Mzimu wangu mwa ŵanthu wonse.

Ŵana ŵanu analume na anakazi azoŵilizya va Mulungu;

alumbwana ŵanu azowona vinthu menso na menso,

nipo akulukazi azolota maloto.

18Ni vyendi, pa masiku awo nizeniyike Mzimu wangu,

cukanga mwa ŵazya ŵangu analume na anakazi,

nipo azoŵilizya va Mulungu.

19Nizenicite vokanganisha ku mkumbi wa Kululu,

nipo pano pansi viziŵikilo ivi:

milopa, mulilo na cusi catolo–tolo.

20Zuŵa ikayaluke ngani mfinzi

nipo mwezi ngani milopa,

ikaliyofwika nsiku ikulu na ya ulemelelo ya Asikulu Mulungu.’”

21Pamene apo aliyense watiazeacinzike zina ya Asikulu molicefya, azeapulumuke.

22“Mwewo Aisilayeli, mvwani malizu aŵa. Yesu wa ku Nazaleti enze munthu wecituma Mulungu kwa mwewo. Mulungu emusimikizyilani ivi na va mphamvu, vokanganisha na viziŵikilo venzocita kupitila mwa yeve pakati panu, ngani muziŵa. 23Tetyo, Yesu uyo etwaliwa mweciwamyilatu Mulungu, na mwakuziŵila yeve vinthu. Koma mwewo mwimupaya pomutwala ku ŵanthu woyifya kuti amupanyike pa mtanda. 24Koma Mulungu emumangulula ku voŵaŵa va imfwa, nomuwukisha kwa akufwa, cikomo cenzelini cowamila kuti acimfyiwe na imfwa. 25 Pala Davide polaŵila va yeve elaŵila kuti,

‘Nuwona Asikulu Mulungu pa menso pangu nsita zonse;

pakuti akuŵa ku kwanja kwangu kwendi

kuti ningasungʼuzyike.

26Ni cikomo cake mtima wangu wisangalala,

nipo nilaŵila motemwa.

Muŵili wangu uzeunkhale soti mu cicetekelo.

Ni cendi, cukanga muŵili wangu wamene uzeupumule mu manda,

27nucetekela kuti muzenisiyelini ku malo ŵa ŵanthu akufwa,

keno kulekelela Atuŵa ŵanu kuti awole.

28Mwiniziŵisha njila ya kuya ku moyo,

nipo muzemunizuzye na cisangalalo pa menso panu.’”

29“Mwenekwasu, ningalaŵile namwe mosimikizya va kolo yasu Davide. Yeve emwalila, noyikiwa mu manda, nipo manda ŵake alipo mpaka lomba. 30Pala yeve enze mneneli, nipo eviziŵa Mulungu vemulayizya molapila vakuti yumo mwa azikulu ŵake niye ŵatiazeloŵe ufumu wake. 31Niye kuti Davide wala ewonelatu vamene ivi, vakuti Kristu azeawuke kwa akufwa, nipo pamene apo elaŵila malizu ŵala olaŵila kuti,

‘Yeve aliyosiyiwe ku malo ŵa ŵanthu akufwa,

nipo muŵili wake uliyowole.’”

32“Yesu wala, Mulungu emuwukisha cendi kwa akufwa, nipo tonse nise mboni za ivi. 33Yeve ecinzikiwa kuŵa ku kwanja kwendi kwa Mulungu, nopokela Mzimu Mtuŵa, wecilayizya Atata. Nipo vamuwona na kumvwa niye cawanzi cake cawatitumizyila.” 34“Pala Davide aliyokwele kuya Kululu, koma yeve yeka elaŵila kuti,

‘Leza ewuzya Asikulu ŵangu kuti,

“Nkhala ku kwanja kwangu kwendi;

35 mpaka nikayalushe alwani ŵako

kuti aŵe ngani cokandapo mendo ŵako.”’”

36“Tetyo, ŵazomelezyeni Aisilayeli wonse aziŵe cendi kuti Yesu wala mwewo wamwipanyika pa mtanda wala, Mulungu emuyalusha kuti aŵe Asikulu na Mpulumushi.”

37Ŵanthu pecimvwa ivi, viŵalasa ku mtima, nipo ekonsha Petulo na nthumi ziyakine zala kuti, “Enekwasu, nga lomba sewo ticite vinji?”

38Petulo eŵawuzya kuti, “Yalukani mtima, nipo aliyense wa mwewo abatiziwe mu zina ya Yesu Kristu. Mukacita tetyo macimo ŵanu alekelelewe, nipo muzemupokele cilambu ca Mzimu Mtuŵa. 39Pala Mulungu vecilayizya, elayizyila mwewo, ŵana ŵanu, nipo ŵanthu wonse onkhala kutali, wonse ŵamene Asikulu Mulungu wasu ŵatiazeyite.”

40Petulo elaŵila soti malizu ayakine anyinji, noŵacenjezya kuti, “Fumankoni ku malingililo ovyongoloka ŵa luko iyipa ino.” 41Pamene apo, ŵanthu ecimvwa malizu ŵake ŵala, ebatiziwa, nipo nsiku iyo ŵanthu ngani myanda itatu (3,000) eyangizyiwa pa winji wawo.

Unkhalo wa Akristu wotatika

42Ŵanthu ŵala, enzowungana molitwala kuti amvwe vezenzosambizya nthumi. Enzomvwana, nipo enzokulya cakulya nolombela pamo. 43Ŵanthu wonse enzoyopa Mulungu powona vokanganisha na viziŵikilo vinyinji vezenzocita nthumi. 44Ocetekela wonse enze okatizyana, nipo enzoyaŵana vinthu vawo. 45Enzositisha vonse venze navo, nipo ndalama zake enzoyaŵila wonse, malinga ni kusoŵa kwa aliyense. 46Nsiku na nsiku enzoungana na mtima umo mu Ngʼanda ya Mulungu, nipo enzolyela pamo ku ngʼanda zawo. Enzokulya cakulya cawo cala motemwa nipo na mtima wa mtendele. 47Enzotembezya Mulungu, nipo ŵanthu wonse enzoŵawamila mtima. Nipo nsiku na nsiku Asikulu enzoŵayangizyila ayakine opokela cipulumusho.

Currently Selected:

Macitilo 2: GMN

Highlight

Copy