Macitilo 1

1Ateyofilo, mu buku yangu yotatika yala nikulembelani vonse venzocita Yesu nosambizya kufumila potatika, 2kufwikila nsiku yecitolewa kuya Kululu. Mwa mphamvu ya Mzimu Mtuŵa, enzowuzya nthumi zecisalula zala vatizizecite. 3Yeve pecipayiwa, eliwonesha wa moyo kwa ŵala mwa njila zinyinji zosimikizya. Eŵawonekela nolaŵila nawo va Ufumu wa Mulungu masiku makumi anayi. 4Peenze nawo pamo, Yesu eŵawuzya kuti, “Musafumemo mu Yelusalemu, koma mulindile cawanzi cecilayizya Atata, ngani mwanikuwuzyilani. 5Pala Yohane enzobatiza na manzi, koma pakaliyopita masiku anyinji, mwewo muzemubatiziwe na Mzimu Mtuŵa.”

Yesu okwela kuya Kululu

6Tetyo, atumiki ŵala peciwungana, ekonsha Yesu kuti, “Asikulu, kansi ino niye nsita yatimunkhazikishe soti ufumu wa Isilayeli?”

7Yeve eyasuka kuti, “Ni nchito yanulini kuti muziŵe nsita keno nyengo pativizevicitike vecinkhazikisha Atata mwa ulamulilo wawo. 8Koma muzemupokele mphamvu, akazowela pa mwewo Mzimu Mtuŵa, nipo muzaŵe mboni zangu ku Yelusalemu, ku Yudeya na ku Samaliya konse, mpaka ku malekezyelo ŵa calo ca pansi.”

9Pecilaŵila ivi, Yesu etolewa kuya Kululu, ŵeve ololesha. Nipo mkumbi wimupokelela nomufisa, ŵeve osamuwona soti.

10Atumiki ŵala pezenzololesha Kululu kwenzokuya yeve, movundumukizya ŵanthu aŵili enzovwale vituŵa epanama pa mbali pawo. 11Ŵala ŵanthu eŵakonsha kuti, “Mwewo ŵanthu ŵa ku Galileya, ni cinji mwayingopanama kulolesha kululu? Yesu watolewa kufuma pakati panu kuya Kululu, akawele soti ngani mwamwamuwonela akuya Kululu.”

Osalula woloŵa mu malo mwa Yudasi

12Nthumi zala zewelela ku Yelusalemu kufuma ku Lupili ya Olivi. Msenga wake kufumila ku Yelusalemu ukwanila pafupi–fupi kilomita imo. 13Peziloŵa mu mzinda mwala, zikwela ku cipinda ca palulu kwezenzonkhala. Penze Petulo, Yohane, Yakobe na Andeleya; Filipo na Thomasi; Batulumeyo na Mateyo; Yakobe (mwana wa Alifeyo), na Simoni (wa mu cipani ca Zelote), nipo soti Yudasi (mwana wa Yakobe), 14wonse aŵa enzokoselela kulomba na mtima umo, pamo na anakazi ayakine, na Maliya anyina ŵa Yesu, nipo soti na enekwawo ŵa Yesu.

15Nsiku iyakine, pepepita masiku atontho, Petulo epanama pakati pa enekwawo. Ŵanthu ŵala wonse pamo enze ngani makumi kumi na makumi aŵili (120). Petulo eŵawuzya kuti, 16“Mwenekwasu, kwenzowamila kuti vicitike cendi vecilaŵililatu Malembo va Yudasi. Pala kupitila mwa Davide, Mzimu Mtuŵa elaŵila va yeve, etangulila ŵanthu kuyokata Yesu. 17Yudasi wala enze yumo wa umba yasu, nipo epokela udindo wakuti awotumikila pamo na sewo.”

18(Esita munda na ndalama zecitola pocita cosalungama cala. Kwamene uko epona pansi na mutu, nokezuka pakati, mala ŵake wonse nokhutuka. 19Ŵanthu wonse onkhala mu Yelusalemu ecimvwa ivi, tetyo mu kulaŵila kwawo munda wala ewuteya zina yakuti “Akeledama,” niye kuti, “Munda wa Milopa.”)

20Petulo epitilizya kulaŵila, “Pala mu buku ya Masalimo muli malizu olaŵila kuti,

‘ Ngʼanda yake iyaluke matongwe,

pasaŵe munthu wolalamo.’

Muli malizu ayakine soti olaŵila kuti,

‘ Muyakine apokele nchito yake.’

21Motetyo, ni ciweme tisalule mwanalume yumo waŵa okatizyana nase nsita zonse Asikulu Yesu penze pakati pasu, 22kutatikila pecibatiziwa na Yohane mpaka nsiku yecitolewa kufuma pakati pasu kuya Kululu. Yumo mwa ŵanthu aŵa aŵe mboni pamo na sewo, yakuti, Yesu ewuka kwa akufwa.”

23Pamene apo etomola mazina aŵili; Yosefe enzoyitiwa Balasaba (zina yake iyakine ni Yusto), na Matiyasi. 24Nipo elomba kuti, “Asikulu, mwewo muziŵa mitima ya ŵanthu wonse, tiwonesheni ni ŵani mwa aŵa aŵili wamwasalula 25kuti apokele nchito iyi ya unthumi, mu malo mwa Yudasi wala eleka nipo eluta ku malo omuwamila.” 26Tetyo, eŵacitila mayele ŵala ŵanthu aŵili. Mayele ŵala eponela Matiyasi, nipo yeve eyangizyiwa pa umba yala ya nthumi kumi na yumo.

Currently Selected:

Macitilo 1: GMN

Highlight

Copy