Macitilo 6
6
Osalula atumiki ŵa mpingo asanu na aŵili
1Masiku ŵala asambili ŵala enzopakila–pakila. Koma Ayuda olaŵila Cigiliki enze na dandaulo pa Ayuda olaŵila Ciyuda kuti anyankufwilwa enzosamaliwalini luweme pevenzoyaŵanishiwa va lusungu va nsiku na nsiku. 2Tetyo, nthumi kumi na ziŵili zewunganisha winji wonse wa asambili, noŵawuzya kuti, “Ni ciwemelini kuti sewo tiwoleka kuŵilizya Malizu ŵa Mulungu nololeshesha pa cakulya. 3Ni cikomo cake enekwasu, pakati panu apa salulamponi analume asanu na aŵili, ŵa mbili iweme, wozuzyiwa na Mzimu Mtuŵa nipo soti na nzelu. Tiŵape nchito iyi. 4Koma sewo tizitwale ku nchito yolomba noŵilizya Malizu ŵa Mulungu.”
5Malizu aŵa ewamyila winji wonse wala. Motetyo, esalula Stefano, munthu wozuzyiwa na cicetekelo nipo soti na Mzimu Mtuŵa. Esalula soti Filipo, Pilokolo, Nikanole, Timoni, Palamanasi, na Nikolasi wa ku Antiyokeya, wamene kale eleka cikunja nokonkha Ciyuda, 6Eŵapanamika pa menso pa nthumi nipo nthumi zala zelomba noŵayika manja pa mitu.
7Malizu ŵa Mulungu enzoŵilikila kulikonse, nipo asambili enzopakila–pakila cendi mu Yelusalemu. Ansembe nawo anyinji ngako enzomvwila cicetekelo cala.
Ayuda okata Stefano
8Nipo Stefano, munthu wecipa cawanzi Mulungu nomuzuzya na mphamvu, ecita viziŵikilo va mphamvu na vokanganisha pakati pa ŵanthu. 9Koma kwiwela mkangano na ŵanthu ayakine ŵa ku Kilene na ŵa ku Alekisandiliya, ŵa ku kacisi wa Ayuda woyitiwa “Kacisi wa Opewa Ufulu.” Ŵamene awo pamo na ayakine ŵa ku Silisiya na ŵa ku Asiya etatika kusushana na Stefano. 10Koma ekangiwa kumucimfya, cikomo yeve enzolaŵila na nzelu zofumila kwa Mzimu Mtuŵa.
11Tetyo, ŵeve ewuzya ŵanthu ayakine kuti awolaŵila kuti, “Timumvwa otafulila Mose na Mulungu mwa msikila.”
12Tetyo, ewusha mitima ya ŵanthu, ya acitangulila ŵawo, nipo soti ya Asambizyi ŵa Matetulo. Ŵamene aŵa emuwukila Stefano, nomukata, kuya naye ku Kaupo Kakulu ka Ayuda. 13Epanamika mboni za wenye, zelaŵila kuti, “Munthu uyu oyingolaŵila malizu wotafulila Ngʼanda ya Mulungu nipo na Matetulo ŵa Mose. 14Ticimvwa yeve olaŵila kuti Yesu wa ku Nazaleti wala azeaceneke malo ŵano, nipo soti azeayalushe myambo yecitipa Mose.”
15Nipo wonse enze mu nsaka mwala elangisisha Stefano, nowona kuti cinso cake cenze ngani cinso ca mngelo.
Currently Selected:
Macitilo 6: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
