Luké 5

Ko e Fili ‘e Sīsū ‘Ene Fuofua Kau Akó

(Māt 4.18-22; Ma‘ake 1.16-20)

1PEA ko e ‘aho ‘e taha na‘e feta‘ota‘omi mai kiate ia ha fu‘u kakai, mo nau fakafanongo ki he folofola ‘a e ‘Otua, pea ‘oku tu‘u ‘a Sīsū ‘i he mata anovai ko Kenesaleti:#Māt 13.1-2; Ma‘ake 3.9-10; 4.1 2‘iloange na‘a ne vakai ha ongo ki‘i vaka ‘oku tau ‘i he mata ano, pea kuo ‘alu mei ai ‘a e kau toutai, ‘o fō honau ngaahi kupenga. 3Pea heka ia ki ha taha ‘o e ongo vaka, ‘a ia ko e vaka ‘o Saimone; pea ne kole kiate ia ke tukutuku si‘i atu mei ‘uta: pea ne nofo hifo ‘o fai ‘ene ako ki he kakai mei he vaka.

4Pea kuo ‘osi ‘ene lea, na‘a ne pehē kia Saimone, Tuku atu ki he moana, pea ‘a‘au homou ngaahi kupenga ki ha ika.

5Pea tali ‘e Saimone ‘o ne pehē ki ai, ‘ēī, ko e pō kātoa mo ‘emau ngangau, ‘o ‘ikai ma‘u ha mata‘i ika: ka ‘i ho‘o me‘a te u ‘a‘au pē ‘a e kupenga.#Sioné 21.3 6Pea ‘i he‘enau fai ia, na‘a nau ha‘o ha fu‘u tākanga ika, pea kamata mahae honau ngaahi kupenga.#Sioné 21.6 7Pea nau ta‘alo ki honau kaungā toutai ‘i he vaka ‘e taha ke ha‘u ‘o tokoni kinautolu, pea nau ha‘u, ‘o nau fakafonu ‘a e ongo vaka fakatou‘osi, ‘o na kamata ngoto. 8Pea ‘i he sio ki ai ‘a Saimone Pita, na‘a ne hinga atu ki he tui ‘o Sīsū, ‘o ne pehē, Me‘a atu, ‘Eiki, mei hoku vaka, he ko e tangata angahala au.

9He na‘a ne mo‘utāfu‘ua, pea pehē mo kinautolu na‘e ‘iate ia, ‘i he ola ‘o ‘enau ha‘o: 10pea pehē foki ‘a Sēmisi mo Sione ko e ongo foha ‘o Sēpeti, ‘a ia na‘e kaume‘a mo Saimone. Pea tali ‘e Sīsū kia Saimone, ‘oua ‘e manavahē; mei he taimi ni te ke pō tangata.

11Pea kuo nau ‘omi ‘a e ongo vaka ki ‘uta, na‘a nau li‘aki kotoa pē ‘o muimui kiate ia.

Ko e Fakamo‘ui ‘e Sīsu ha Tangata Kilia

(Māt 8.1-4; Ma‘ake 1.40-45)

12Pea ko e ‘aho ‘e taha na‘a ne ‘i ha kolo, pea ‘iloange, ko ha tangata kilia hoko; pea ‘i he‘ene sio kia Sīsū, na‘a ne fakatōmape‘e atu ‘o ne hū kiate ia, ‘o pehē, ‘Eiki, ka ne ke loto ke fai, te ke lava ke fakama‘a au.#5.12 fakama‘a au; Na‘e tui ‘a e kakai Siú ka kilia ha taha, pea ‘uli ia ‘i he sio fakalotu ki aí, ‘o ‘ikai leva ke taau ke ne kau ‘i ha ma‘unga kelesi.

13Pea mafao atu ‘e ia hono nima, ‘o ala ki he tangata, ‘o ne pehē, ‘oku ou loto pē: ke ke ma‘a koe. Pea matafi atu leva ‘a e kilia meiate ia. 14Pea ne na‘ina‘i ki he tangata ke ‘oua te ne lea ki ha taha; mo ne pehē, Ka ke hanga ‘alu pē ke fakahā koe ki he taula‘eiki, pea ‘ange ‘a e me‘a ‘o fakatatau ki he tu‘utu‘uni ‘a Mōsese mo‘ao fakama‘a, kōno fakamo‘oni kiate kinautolu.#Lev 14.1-32

15Ka na‘e ‘āsili mafola ai ‘a e talanoa kiate ia; pea fa‘a fakataha ‘a e ngaahi fu‘u kakai ke fanongo kiate ia, pea ke fakamo‘ui mei honau ngaahi alangamahaki. 16Ka ka taka vao pē ia ‘i he ngaahi toafa, ‘o ne toutou fai ‘ene lotu.

Ko e Fakamo‘ui ‘e Sīsū ha Tangata Mamate

(Māt 9.1-8; Ma‘ake 2.1-12)

17Pea ko e ‘aho ‘e taha ‘oku ne faiako, pea ‘oku ‘i he ha‘oha‘onga ha kau Fālesi mo ha kau Faiako-‘i-he-Lao, ‘a ia kuo nau omi mei he ngaahi feitu‘u kehekehe ‘o Kāleli mo Siutea mo Selusalema: pea ko e mālohi ‘o e ‘Eiki na‘e toka ki he faito‘o. 18Pea ‘iloange, ko e kau siana ‘oku nau lupe‘i mai ‘i ha mohenga ha tangata na‘e mamatea: ‘o nau feinga ke laoaki ia ki loto ke tuku ‘i he ‘ao ‘o Sīsū. 19Pea ‘i he ‘ikai te nau ‘ilo pe ko e hala fē te nau fakahū ai ia, koe‘uhi ko e tokolahi ‘o e kakai, na‘a nau ‘alu hake ki he tu‘a fale, ‘o nau tuku hifo ia mo e fala ‘i he ‘ato ki he loto fale ki he ‘ao ‘o Sīsū. 20Pea ‘i he‘ene vakai ‘enau tui, na‘a ne pehē, Tangata, kuo fakamolemole ho‘o ngaahi angahala.

21Pea kamata fifili ‘a e kau sikalaipe mo e kau Fālesi, ‘o pehē, Ko hai ‘a e siana ni ‘oku lea fie‘otua? Ko hai ha taha ‘oku ne mafai ke fakamolemole angahala, ka ko e ‘Otua pē toko taha?

22Ka ka ‘ilo pē ‘e Sīsū ‘enau fakakaukau, ‘o ne toe lea ‘o pehē kiate kinautolu, Ko e hā ia ‘oku mou fifili ki ai ‘i homou loto? 23Ko e fē ‘oku faingofua; ‘a e pehē, Kuo fakamolemole ho‘o ngaahi angahala: pe ko e pehē, Tu‘u ‘o ‘eve‘eva? 24Ka koe‘uhi ke mou ‘ilo, ko e Fanautama ‘a Tangata ‘oku ne mafai ‘i māmani ke fakamolemole angahala, (pea hanga ia ‘o lea ki he tangata mamatea) ‘oku ou tala kiate koe, Tu‘u, pea to‘o ho fala, pea ‘alu ki ho ‘api.

25Pea tu‘u hake leva ia ‘i honau ‘ao, ‘o ne to‘o ‘a e me‘a na‘a ne tokoto ai, ‘o ne ‘alu atu ki hono ‘api, mo ne fakamālō‘ia ‘a e ‘Otua. 26Pea lelea honau loto kotoa pē, ‘o nau fakamālō‘ia ‘a e ‘Otua, pea nau mate ilifia, mo nau pehē, Kuo tau mata me‘a fakato‘ufeiva he ‘aho ni.

Ko e Fili ‘e Sīsū ‘a Līvai

(Māt 9.9-13; Ma‘ake 2.13-17)

27Pea hili ia na‘a ne ‘alu atu, ‘o ne kilofi ha pōpilikane na‘e hingoa ko Līvai, ‘oku nofo ‘i he fale tute; ‘o ne pehē kiate ia, muimui kiate au. 28Pea ne tuku kotoa pē, ‘o ne tu‘u ‘o muimui kiate ia.

29Pea fai ‘e Līvai ha fu‘u kātoanga kia Sīsū ‘i hono fale; pea ko e fu‘u tokolahi ‘o e kau pōpilikane mo e kakai kehe na‘e ‘i he kātoanga mo kinautolu. 30Pea lāutu‘u ‘a e kau Fālesi mo e kau sikalaipe ‘onautolu ki he‘ene kau ako, he‘enau pehē, Ko e hā ‘oku mou kai mo inu fakataha ai mo e kau pōpilikane mo e kau angahala?#Luk 15.1-2

31Pea tali ‘e Sīsū ‘o ne pehē kiate kinautolu, Ko e tangata faito‘o ‘oku ‘ikai ma‘a e mo‘ui lelei, ka ma‘a e mahaki. 32Na‘e‘ikai te u ha‘u ke ui ‘a e mā‘oni‘oni ki he fakatomala, ka ko e angahala.

Ko e Fehu‘i ‘a e Kakaíhe ‘Aukaí

(Māt 9.14-17; Ma‘ake 2.18-22)

33Pea nau pehē kiate ia, Ko e hā ‘oku fa‘a ‘aukai ai ‘a e kau ako ‘a Sione, mo nau tauhi ‘a e ngaahi feingalotu; pehē foki ‘a e kau ako ‘a e kau Fālesi: ka ka kai pē, mo inu pē, ‘a kinautolu ‘oku ‘iate koe?

34Pea tali ‘e Sīsū kiate kinautolu, He te mou lava hono fakaloto‘i ‘o e kakai ‘o e fale ta‘ane ke fai ha ‘aukai, ‘i he kei ‘iate kinautolu ‘a e tangata ta‘ane? 35Kae tokaange ha taimi ‘e hiki meiate kinautolu ‘a e tangata ta‘ane, pea te nau toki ‘aukai ‘i he taimi ko ia.

36Pea ne lea‘aki foki ha fakatātā kiate kinautolu, ‘o pehē: ‘oku ‘ikai ha taha te ne hae‘i mei ha kofu fo‘ou ha konga ke ‘oposi ‘aki ha kofu motu‘a: he ka pehē, ko e fo‘ou kuo mahae, pea ko e motu‘a ‘oku ‘ikai tu‘o tatau mo ia ‘a e konga mei he kofu fo‘ou. 37Pea ‘oku ‘ikai ha taha te ne ‘utu ha uaine fo‘ou ki he ngaahi hina leta ‘oku motu‘a; he ka pehē, ‘e hae ‘a e ngaahi hina ‘e he uaine fo‘ou, pea mahua ai ‘a e uaine ia, pea maumau mo e ngaahi hina. 38Ka ko hono taau ke ‘utu ha uaine fo‘ou ki ha ngaahi hina fo‘ou. 39Pea ‘oku ‘ikai ha taha kuo ne inu ‘a e uaine motu‘a pea manako ki he fo‘ou; he ‘oku ne pehē, Ko e uaine motu‘a pē ‘oku sai.

Currently Selected:

Luké 5: TMB

Highlight

Copy