Luké 6

Ko e Fehu‘i he Sāpaté

(Māt 12.1-8; Ma‘ake 2.23-28)

1PEA ko eni, ko e Sāpate ‘e taha na‘a ne fononga atu, ‘o hala loto ngoue: pea toli ‘e he‘ene kau ako ‘a e ngaahi fo‘i uite, ‘o milimili ‘i honau nima mo kai.#Teu 23.25 2Pea pehē ‘e he ni‘ihi ‘o e kau Fālesi, Ko e hā ‘oku mou fai ai ‘a e me‘a ‘oku ‘ikai ngofua ‘i he Sāpate?

3Pea tali ‘e Sīsū ‘o ne pehē kiate kinautolu, ‘Io, ne ‘ikai te mou lau koā ‘a e me‘a ko ia na‘e fai ‘e Tēvita, ‘i he taimi na‘a ne hālofia ai mo kinautolu na‘e ‘iate ia?#1 Sām 21.1-6 4‘a ‘ene hū ki he Fale ‘o e ‘Otua, ‘o ne to‘o ‘a e mā fono ‘o ‘ilo, mo ne ‘ange kiate kinautolu na‘e ‘iate ia: ka ko e me‘a ia ‘oku ‘ikai ngofua hono kai, ngata pē ‘i he kau taula‘eiki?#Lev 24.9

5Pea ne toe pehē kiate kinautolu, Ko e Fanautama ‘a Tangata ko e ‘Eiki ia ‘o e Sāpate foki.

Ko e Fakamo‘ui ‘e Sīsū ha Tangata Nima Mate

(Māt 12.9-14; Ma‘ake 3.1-6)

6Pea faifai pea hū ia ki he falelotu ‘i ha Sāpate ‘e taha, ‘o ne faiako ai: pea na‘e ‘i ai ha tangata kuo mate hono nima to‘omata‘u. 7Pea ko e kau sikalaipe mo e kau Fālesi na‘a nau lamalama ha‘ane fai ha faito‘o ‘i he Sāpate, ka nau ma‘u ha me‘a ke faka‘ilo ‘aki. 8Ka ka ‘ilo pē ‘e ia ‘enau fakakaukau, ‘o ne pehē ki he tangata kuo nima mate, Tu‘u, ‘o hopo mai ki loto. Pea tu‘u ia ‘o hopo mai. 9Pea pehē ‘e Sīsū kiate kinautolu, ‘oku ai ‘eku fehu‘i ke fai atu, Ko e fē ‘oku ngofua ‘i he Sāpate? Ke fai ha lelei, pe ke fai ha kovi? ke fakahaofi mo‘ui, pe ke faka‘auha ia? 10Pea vakai foli ‘e ia ‘a kinautolu kotoa, ‘o ne pehē#6.10 pehē; ‘Oku pehē ‘i hono ngaahi hiki fuoloa ‘e ni‘ihi: pehē mo e tuputāmaki. ki he tangata, Mafao atu ho nima na. Pea ne fai: pea na‘e toe mo‘ui mai hono nima.

11Pea fakautuutu ai ‘enau sesele; ‘o nau fealēlea‘aki ai, pe ko e hā nai ha me‘a te nau fai kia Sīsū.

Ko e Fili ‘e Sīsū ‘Ene Kau ‘Apositolo ‘e Toko Hongofulu-mā-Ua

(Māt 10.1-4; Ma‘ake 3.13-19)

12Pea na‘e hoko ‘i he kuonga ko ia ‘a ‘ene ‘alu atu ki he mo‘unga ke lotu; pea ne ‘osiki ‘a e pō ‘i he lotu ki he ‘Otua. 13Pea ‘i he‘ene ‘aho hake, na‘a ne ui ange ‘ene kau ako; ‘o ne fili meiate kinautolu ha toko hongofulu mā toko ua, ‘o ne fakahingoa kinautolu ko e kau ‘Aposetolo: 14ko Saimone (‘a ia na‘a ne fakahingoa foki ko Pita mo ‘Anitelū ko hono tehina, mo Sēmisi mo Sione mo Filipe mo Pātolomiu 15mo Mātiu mo Tōmasi, ko Sēmisi ko e foha ‘o ‘Alefiusi, mo Saimone na‘e fa‘a lau ko e mamahi‘i fonua, 16mo Siutasi ko e foha ‘o Sēmisi, pea mo Siutasi ‘Isikāliote ‘a ia na‘e ne hoko ko e lavaki.

Ko e Faiako, mo e Malanga, mo e Fai Fakamo‘ui ‘a Sīsū

(Māt 4.23-25)

17Pea ‘alu hifo ia fakataha mo kinautolu, ‘o ne tu‘u ‘i ha potu na‘e toka lelei; pea na‘e ai mo e tokolahi ‘o ‘ene kau ako, mo ha fu‘u kakai ‘Isileli, mei Siutea kātoa, mo Selusalema, mo e hāngai-ki-tahi ‘o Taia mo Saitoni, kuo nau ha‘u ke fanongo kiate ia, pea ke faito‘o ‘a honau ngaahi alangamahaki: 18ko kinautolu foki na‘e fakafiu‘i ‘e he ngaahi fa‘ahikehe na‘e fakamo‘ui. 19Pea feinga ‘a e kakai kotoa ke ala kiate ia, he na‘e ‘alu atu meiate ia ha mālohi, ‘o fakamo‘ui kinautolu.

Ko e Ngaahi Monū mo e Ngaahi Faingata‘a

(Māt 5.1-12)

20Pea tāngaki ia ki he‘ene kau ako, ‘o ne pehē,

Monū‘ia ā ka ko kimoutolu ‘oku masiva:

He ‘oku ‘omoutolu ‘a e Pule‘anga ‘o e ‘Otua.

21Monū‘ia ā ka ko kimoutolu ‘oku fiekaia ni:

He ‘e fakamākona kimoutolu,

Monū‘ia ā ka ko kimoutolu ‘oku tangi ni: he te mou kata.

22Monū‘ia ā ka ko kimoutolu, ‘oka fehi‘anekina ‘e he kakai, pea ‘oka nau ka kapusi kimoutolu, mo manuki‘i, mo nau keu‘i homou hingoa ‘o hangē ko ha me‘a ‘oku pango, koe‘uhi pē ko e Fanautama ‘a Tangata.#1 Pit 4.14 23‘ē, mou fiefia ‘i he taimi ko ia, mo hākahaka; he vakai ‘oku lahi ho‘omou totongi ‘i he langi: he ko e me‘a pē ia na‘e fai ‘e he‘enau mātu‘a ki he kau palōfita.#2 Kal 36.16; Ngā 7.52

24Ka ‘oiauē ‘a kimoutolu koloa‘ia!

He ko hono ngata ‘ena ‘o ho‘omou fiemālie ‘oku mou ma‘u.

25‘Oiauē ‘a kimoutolu ‘oku mākona ni!

He te mou fiekaia.

‘Oiauē ‘a kimoutolu ‘oku kata ni!

He te mou mamahi mo tangi.

26‘Oiauē ‘a kimoutolu, ‘oka lau‘i lelei ‘e he kakai fuli pē!

He ko e me‘a pē ia na‘e fai ‘e he‘enau mātu‘a ki he kau palōfita loi.

Ko e ‘Ofa ki Hoto Filí

(Māt 5.38-48; 7.12a)

27Ka ‘oku ou tala kiate kimoutolu ‘oku fanongo na, Mou ‘ofa‘i homou ngaahi fili, fai lelei kiate kinautolu ‘oku fehi‘a kiate kimoutolu, 28tāpuaki‘i ‘a kinautolu ‘oku tutuku‘i kimoutolu, hūfia ‘a kinautolu ‘oku nau ngaohikovi‘i kimoutolu. 29Ka tuki‘i koe ‘e hā taha ‘i ho kou‘ahe, ‘ange ki ai ‘a e kou‘ahe ‘e taha; pea ko ia ‘oku ‘ave ho pulupulu, ‘oua na‘a ta‘ofi mei ai mo ho sote. 30‘Ilonga ha taha ‘e fai ha kole kiate koe, tali ia; pea ka ‘ave ‘e ha taha ha‘o me‘a, ‘oua na‘a ‘eke ia. 31Pea hangē ko ia ‘oku mou loto ke fai ‘e he kakai kiate kimoutolu, mou fai tatau mo ia foki kiate kinautolu.#Māt 7.12

32He kapau ‘oku mou ‘ofa‘i ‘a kinautolu pē ‘oku ‘ofa mai, ko e me‘a ia ‘e fakafeta‘ia? he na‘a mo e kakai angahala ‘oku nau ‘ofa‘i ‘a kinautolu ‘oku ‘ofa mai. 33Pea kapau ‘oku mou fai lelei kiate kinautolu pē ‘oku fai lelei mai, ko e me‘a ia ‘e fakafeta‘ia? He na‘a mo e kakai angahala ‘oku nau fai ‘a e me‘a ko ia. 34Pea kapau te mou tali ha nonō kiate kinautolu pē ‘oku mou ‘amanaki ke toe ma‘u mei ai, ko e me‘a ia ‘e fakafeta‘ia? Na‘a mo e kakai angahala ‘oku nau tali nonō ki he kakai angahala, koe‘uhi ke nau ma‘u mai hono tatau. 35Ka mou ‘ofa‘i homou ngaahi fili; pea fai lelei mo tali nonō, neongo ‘oku ‘ikai te mou ‘amanaki ‘e toe ma‘u mai ha me‘a; pea ‘e lahi ho‘omou totongi, pea te mou hoko ko e ngaahi foha ‘o e ‘eiki Taupotu; he ‘oku angalelei ia ki he ta‘ehounga mo e faikovi. 36‘ē, mou hoko ko e kau ‘ofangofua, ‘o hangē ‘oku ‘ofangofua ‘a ho‘omou Tamai.

Ko e Fakamāu‘i Hoto Kāinga

(Māt 7.1-5)

37Pea ‘oua ‘e fakaanga, pea ‘e ‘ikai anga‘ia kimoutolu: pea ‘oua ‘e fakahalaia, pea ‘e ‘ikai fakahalaia kimoutolu: mou fakamolemole, pea ‘e fakamolemole ‘a kimoutolu: 38‘ange pea ‘e toe ‘omi kiate kimoutolu–kuo fua fakalaka, kuo fa‘o tuki ki he puha fua, kuo lulu‘i, kuo fonu mokulu; ‘e pehē ‘a ‘enau toe ‘atu ki homou kona. He ko e fua ‘oku mou fua ‘aki, ko ia pē ‘e fua ‘aki ho‘omou totongi.

39Pea ne lea‘aki foki ha fakatātā kiate kinautolu, ‘o pehē, ‘e lava koā ‘e ha kui ke takihala ki ha kui, ‘ō? ‘ikai te na fakatou tō ki ha luo?#Māt 15.14 40Tala‘ehai ‘oku lahi ‘a e tama ako ‘i he faiako: ka ka ‘ilonga ha taha kuo haohaoa ‘ene ako te ne hangē ko e faiako.#Māt 10.24-25; Sioné 13.16; 15.20

41Pea ko e hā ‘oku ke tokanga ai ki he malamala‘i ‘akau ‘oku ‘i he mata ‘o ho kāinga, ka ko e fu‘u lalango na ‘oku ‘i ho mata ‘o‘ou ‘oku ‘ikai te ke ‘ilo ki ai? 42Te ke lava fēfē ke lea ki ho kāinga, Nga‘ata, tuku ke u to‘oa mai ‘a e malamala na ‘oku ‘i ho mata; ‘osi, ‘oku ‘ikai te ke tokanga‘i ‘e koe ‘a e fu‘u lalango ‘i ho mata ‘o‘ou? ‘a e ‘afungi! tomu‘a to‘o mai ‘a e lalango mei ho‘ou mata, pea te ke toki sio totonu ke to‘o ‘a e malamala mei he mata ‘o ho kāinga.

Ko e ‘Ilonga e ‘Akaú ‘i Hono Fuá

(Māt 7.17-20; 12.34,35)

43He ‘oku ‘ikai ha me‘a pehē, ke fua tamaki ‘e ha ‘akau ‘aonga, pe ke fua ‘aonga ‘e ha ‘akau tamaki. 44Ka ‘oku mahino ‘a e ‘akau takitaha mei hono fua ‘o‘ona. He ‘oku ‘ikai tufi fiki ‘i he vao talatala, pe toli kālepi ‘i he talatala‘āmoa.#Māt 12.33 45Ko e tangata lelei ‘oku fisi kitu‘a ai ‘a e lelei mei he koloa lelei kuo fa‘o ki hono loto; pea ko e tangata kovi ‘oku fisi kitu‘a ai ‘a e kovi mei he koloa kovi kuo fa‘o ‘i hono loto: he ko e talanoa ‘a e ngutu ‘oku mei he me‘a ‘i he loto ‘oku hulu atu.#Māt 12.34

Ko e Ongo Tufunga Langa Fale

(Māt 7.24-27)

46Pea ko e hā ‘oku mou lau ai kiate au, ‘ēī, ‘ēī; ka ‘oku ‘ikai te mou fai ‘a e ngaahi me‘a ‘oku ou tala? 47‘Ilonga ‘a ia ‘oku ha‘u kiate au, ‘o fanongo ki he‘eku ngaahi tala, ‘o fai ki ai, te u fakatātā atu hono tatau: 48‘oku ne tatau mo ha tangata langa fale; ‘a ia na‘a ne keli, ‘o toe foa ‘aki, ‘o ne ‘ai ‘a e tu‘unga ki he maka: pea ‘i he mahake ‘a e vaitafe, na‘a ne pā atu ki he fale ko ia; pea na‘e ‘ikai te ne mafai ke lulu ia: ko e me‘a ‘i he lelei hono langa. 49Ka ko ia ‘oku ne fanongo ‘o ‘ikai fai, ‘oku ne tatau mo e tangata na‘e langa fale ‘i he funga kelekele, ta‘ete ne keli ha tu‘unga; ‘a ia na‘e pā atu ki ai ‘a e vaitafe, pea holofa leva ia: pea na‘e hoko ‘a e maumau ‘o e fale ko ia ko e maumau lahi.

Currently Selected:

Luké 6: TMB

Highlight

Copy