KO ‘AISEA 25
25
Ko ha Himi Fakafeta‘i
1KO hoku ‘Otua koe, ‘e Sihova;
Te u fakahīkihiki‘i ‘a e ‘Afiona;
Te u fakamālō‘ia ho huafa;
He kuo ke fai me‘a fakaofo,
Ko e ngaahi fakakaukau fai mama‘o,
Ko e koto fakamākukanga,
Ko e fakamo‘oni folofola.
2He kuo ke ‘ai ke tuva maka pē ‘a e kolo;
‘A e talitau‘anga ke koto fale holo:
Ke ‘oua ‘e kei kolo ‘a e palasi ‘o e kau muli;
‘E ‘ikai toe langa ha taimi.
3Ko ia ‘e fakalāngilangi‘i koe ‘e ha kakai fefeka,
Ko e ngaahi kolo ‘o e ngaahi pule‘anga fakamālohi te nau manavahē ki he ‘Afiona.
4He ko e hūfanga koe ki he vaivai,
Ko e hūfanga ki he masiva ‘i he‘ene mamahi,
Ko e hūfanga mei he taufa,
Ko e fakamalumalu mei he pupuha.
Seuke, ko e ha‘aki mai ‘a e kau fakamālohi
Na‘e hangē ko e pā ‘a ha taufa ki he holisi.#25.4 pā ‘a ha taufa ki he holisi; Ko hono faka-Hepeluú ia, ka ‘oku ngali tonu hono hiki ‘o: ha taufa ‘i he fa‘ahi ta‘u momokó.
5Hangē ko ho‘o fakasi‘isi‘i ki he pupuha ‘i ha potu pakukā,
Pehē ho‘o fai ki he ongoonga‘a ‘a e kau muli na;
‘Oku fakasi‘isi‘i ‘a e pupuha ‘aki ‘a e malu ‘o ha ‘ao,
Ko e hiva tuē ‘a e kau fakamālohi na‘a ke fakasīlongo‘i.
6Pea ‘i he mo‘unga ko eni ‘e fai ‘e Sihova Sāpaoti ki he ngaahi kakai kotoa pē ha kātoanga me‘a lolo, ha kātoanga uaine kuo fisi, ‘ani me‘a lolo kuo lolo‘i ‘aki ‘a e ngako ‘o e hui, ‘ani uaine kuo fisi, ‘o sivi ke masivi. 7Pea ‘i he mo‘unga ko eni te ne folofua ‘a e mata ki ‘olunga ‘o e pūlou ‘oku pulonga ‘aki ‘a e ngaahi kakai, mo e ‘ufi‘ufi kuo fofola ‘i he ngaahi pule‘anga. Te ne folofua ‘a mate ‘o ta‘engata; 8pea ko ‘Ātonai Sihova te ne holoholo ‘a e lo‘imata mei he mata fua pē; pea te ne ‘ave ‘a e manukia‘anga ‘o hono kakai mei he funga ‘o māmani kātoa: he kuo folofola ki ai ‘a Sihova.#1 Kol 15.54; Fkhā 7.17; 21.4
9Pea ‘i he taimi ko ia ‘e lau ‘o pehē,
Vakai, ko hotau ‘Otua eni;
‘A ia na‘a tau tatali ki ai,
Te ne fakamo‘ui kitautolu.
Ko Sihova eni na‘a tau tatali ki ai;
Tau tome‘e ‘o fiefia,
‘I he fakamo‘ui ‘oku ne fai.
‘E Tautea ‘e he ‘Otuá ‘a Moape
10He nofo ‘a e nima ‘o Sihova ‘i he mo‘unga ni, pea ‘e malaki ‘a Moape ‘i he potu ‘oku ne ‘i ai, ‘o hangē ko e malaki ‘o e kau‘i koane ‘i he vai ‘o e kinoha‘a.#‘Ais 15.1–16.14; Sel 48.1-47; ‘Isi 25.8-11; ‘Ēmosi 2.1-3; Sef 2.8-11 11Pea ‘e mafao atu hono nima ‘i he vai ko ia, hangē ko e mafao nima ha taha ke kakau: ka ko e ‘Afio te ne lōmaki‘i ‘ene mofuta, neongo ‘e anga hono nima ki he ngaahi fāliunga. ‘Io, ko e ngaahi ‘ā mā‘olunga ‘o ho taua ‘oku ne ‘ohifo, ‘oku ne lolo ki lalo, ‘oku ne ‘ai ke lave ki he kelekele, ki he efu.
Currently Selected:
KO ‘AISEA 25: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
