KO ‘AISEA 24
24
‘E Tautea ‘e Sihova ‘a Māmani
1VAKAI, ‘oku fakange‘esi ‘a māmani ‘e Sihova, mo fakalala; pea ‘oku ne fakakovi‘i hono funga, mo veteki ‘a e nofo ai. 2Pea ‘e tatau ‘a e kakai mo e taula‘eiki; tatau ‘a e tamaio‘eiki mo hono ‘Eiki; tatau ‘a e kaunanga mo e ma‘itaki; tatau ‘a e fakatau atu mo e fakatau mai; tatau ‘a e tali nō mo e tangata ‘oku mo‘ua kiate ia; tatau ‘a e ‘eke toloi mo ia ‘oku ‘ange toloi ki ai. 3‘E mātu‘aki fakange‘esi ‘a māmani, pea ‘e mātu‘aki vete: he ko Sihova ia kuo fai ‘a e folofola ni.
4‘Oku mapelu, ‘oku mae ‘a e fonua; ‘oku faka‘au‘ausino, ‘oku mae ‘a e maama nofo‘anga; ‘oku faka‘au‘ausino ‘a ha‘a mā‘olunga ‘o e fonua. 5Pea kuo maumau ‘a e anga totonu ‘o māmani ‘i he ngāue ‘a e kakai ‘oku nofo ai; he kuo nau laka kehe mo e ngaahi lao, kuo nau liliu ‘a e tu‘utu‘uni, kuo nau maumau‘i ‘a e fuakava ta‘engata. 6Ko hono ō ia kuo keina ‘a māmani ‘e he mala, pea ko e nofo ai ‘oku lau ko e halaia: ko hono ō ia ‘oku velehia ‘a e kau nofo māmani, pea ‘oku toe toko si‘i ha kakai vaivai. 7‘Oku tangi ‘a e huhu‘a ‘o e kālepi, ‘oku faka‘a‘au ke mate ‘a e vaine, ‘oku māpuhoi kotoa ‘a e fa‘ahinga katakata; 8kuo tuku ‘a e longoa‘a fiefia ‘a e nafa fāngongo, kuo ngata ‘a e mavava ‘a e fa‘ahinga tome‘e, kuo tuku ‘a e longoa‘a fiefia ‘a e ha‘ape. 9‘Oku ‘ikai kei fai ‘a e inu uaine mo e hiva; ‘oku ifo tamala ‘a e kava mālohi kiate kinautolu ‘oku inu ia. 10Kuo holo ‘a Kolo Maveuveu; kuo songo ‘a e fale kotoa, ‘o ‘ikai lava ha taha ke hū. 11‘Oku fai ha tangi ‘i he tuku‘uta koe‘uhi ko e uaine; kuo tō ‘a e la‘ā ‘o e fiefia kotoa, kuo fakaeve ‘a e mavava ‘o e fonua. 12Ko e me‘a ‘o e kolo ‘oku toe ko e koto lusa, pea ko e matanikolo na‘e laiki ke lailai. 13Seuke, ko e me‘a ‘e hoko ‘i māmani ‘i he lotolotonga ‘o e ngaahi kakai, ‘e hangē ko e lulu ‘o e ‘ōlive, hangē ko e fakaeve ‘oka ‘osi ‘a e utu kālepi.
14Ko e fa‘ahinga ko ia te nau ‘ai atu honau le‘o ‘o mavava; ‘oku nau tuē mei tahi ‘i he fotu ‘a Sihova. 15Ko ia, mou fakalāngilangi‘i ‘a Sihova ‘i he ngaahi fonua ‘o hahake,#24.15 ‘o hahaké; ‘Oku hiki ‘e he ni‘ihi: ‘o Kēnaní. fakahīkihiki‘i ‘i he ngaahi motu ‘o e tahi ‘a e huafa ‘o Sihova ko e ‘Otua ‘o ‘Isileli.
16Mei he taupotu ‘o māmani ‘oku ongo mai ‘ani hiva, “Kolōlia ki he Fai totonu!” Ka na‘a ku pehē ‘e au, Hoto fakapō! hoto fakapō! ‘oiauē kita! Kuo kaiha‘a ‘a e kau kaiha‘a; ‘io, kuo fai ha fu‘u kaiha‘a ‘e he kau kaiha‘a.
17‘Oku tu‘unuku kiate koe, si‘i nofo māmani, ‘a e fakalilifu, mo e luo, mo e hele. 18Pea ‘e hoko ‘o pehē, ko ia ‘oku hola mei he pavake mai ‘o e fakalilifu, ‘e tō ia ki he luo; pea ko ia ‘oku lava hake mei he luo, ‘e ma‘u puke ‘e he hele. He kuo tangaki ‘a e ngaahi kātupa ‘i taukakapa, pea ‘oku ngaueue ‘a e ngaahi tu‘unga ‘o māmani. 19Foa ‘a māmani ‘o fu‘u mafoa, pā ‘a māmani ‘o mapakipaki, luelue ‘a māmani ‘o fu‘u ngalulu. 20Fu‘u tāsipesipa ‘a māmani ‘o hangē ko e tangata konā, ‘o fākalue hangē ha mohenga tautau; pea ‘e falala mamafa ki ai ‘ene angahala, pea te ne tō, ‘o ‘ikai toe tu‘u.
21Pea ‘i he taimi ko ia ‘e fai ha ‘a‘ahi ‘e Sihova ki he hōsitē ‘o taukakapa ‘i taukakapa, pea ki he ngaahi tu‘i ‘o e kelekele ‘i he funga kelekele. 22Pea ‘oku tāpuni kinautolu hangē ko e tāpuni ha pōpula ‘i he pilīsone; pea ‘oku songo ke masongo; pea hili ha taimi lahi pea fai ha ‘a‘ahi ki ai. 23Toki kula ‘a e māhina, pea tea ‘a e la‘ā; he kuo tu‘i ‘a Sihova Sāpaoti ‘i Mo‘unga Saione, pea ‘i Selusalema, pea fe‘ao mo ‘ene mātu‘a ha fu‘u lāngilangi.
Currently Selected:
KO ‘AISEA 24: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
