KO ‘AISEA 23
23
1KO E kavenga ‘a Taia mei he Ta‘ehāmai.
Mou tangi ‘oiauē, ‘a e ngaahi vaka Tāsisi:
He kuo faka‘auha ia,
‘Oku ‘ikai ha fale,
‘Oku ‘ikai ha hū ki taulanga:
Mei he fonua ‘o Kītimi na‘e fakahā ‘a e me‘a kiate kinautolu.
2Fakalongo, ‘a e nofo he matāfonua.
Na‘e fakafonu koe ‘e he kau mesianiti ‘o Saitoni
‘Enau folau atu ‘i he tahi:
3Pea na‘e fetuku ‘a e tō ta‘u ‘a Sīhoa ‘i he ngaahi vaha folau;
Ko e ta‘u ‘o Naila ko ‘ene tānaki ia,
Pea ne hoko ko e fakatau ki he ngaahi pule‘anga.
4Ke ke mā pē koe, Saitoni:
He kuo lea mai ‘a e tahi, ‘a e kolotau ‘o e tahi:
“Kuo ‘ikai te u langā, pea kuo ‘ikai te u fā‘ele,
Pea kuo ‘ikai te u tauhi talavou, pe fakaili kau finemui.”
5‘I he a‘u ‘a e ongoongo ki ‘Isipite, ‘oku nau ‘āmio ‘i he talanoa ki Taia!
Mou hiki ki Tāsisi:
6Tangi ‘oiauē, ‘a e nofo he matāfonua!
7Ko eni koā homou iku‘anga, ‘a e kolo fa‘a sō,
‘A ia ko hono tupu‘anga ‘oku mei ono‘aho,
‘A ia na‘e lele ‘aki ‘e hono va‘e ki he ngaahi potu mama‘o ke nofo ai?
8Ko hai na‘e fakakaukau ‘a e me‘a ni ke hoko ki Taia,
‘A e kolo tufa kalauni,
‘A ia ko hono kau mesianiti ko e ha‘a pilinisi tofu pē,
Ko ‘ene kau fakatau ko e hou‘eiki ‘o māmani?
9Ko Sihova Sāpaoti na‘a ne tu‘utu‘uni ia,
Ke fakalielia‘i ‘a e lāngilangi ‘o e teunga fua pē,
Ke fakame‘avale‘i kotoa pē ‘a e hou‘eiki ‘o māmani.
10Ta‘ahine Tāsisi, mahua atu ‘i ho fonua ‘o hangē ko Naila:
‘Oku ‘ikai kei ha no‘o.#23.10 ‘Oku ‘ikai ke mahino ‘a hono faka-Hepeluú.
11Kuo ne mafao atu hono nima ki he tahi,
Ke fakangaueue ‘a e ngaahi pule‘anga:
Kuo fai tu‘utu‘uni ‘e Sihova ki Finisia,
Ke maumau hono ngaahi kolotau.
12Pea ne folofola mai,
‘E ‘ikai te ke toe tome‘e,
Si‘i tohotoho‘i, ta‘ahine Saitoni na‘e tāupo‘ou:
Ko Kītimi ē, tu‘u ‘o hiki ki ai;
Na‘a mo ia ‘e ‘ikai te ke ma‘u ai ha‘o nonga.
13Vakai, ko e fonua ‘o e kau Kalitia–
‘a e kakai ni na‘e ‘ikai:
Na‘e tu‘utu‘uni ‘e ‘Āsilia
Ko e feitu‘u ki he manu ‘o e lala–#23.13 ‘Oku fihi ‘aupito ‘a e faka-Hepelū ‘o e vēsí ni.
Kuo nau fokotu‘u ‘enau taua tau,
Kuo nau fakatelefua hono ngaahi palasi,
Kuo ne ngaohi ia ko e koto maka holo.
14Mou tangi ‘oiauē, ‘a e ngaahi vaka Tāsisi:
He kuo ‘auha homou kolotau!
15Pea ‘e hoko ‘i he taimi ko ia, ‘e ngalo ‘a Taia ‘o fitungofulu ta‘u, ‘o hangē ko e ta‘u ‘o ha tu‘i pē taha: ‘i he ‘osi ‘a e fitungofulu‘i ta‘u, ‘e hoko ki Taia ‘o hangē ko e ta‘anga ‘a e pa‘umutu.
16“To‘o ‘a e ha‘ape,
Foli ‘a e kolo,
Si‘i pa‘umutu kuo ngalo:
Tā ke mālie,
Hiva ke lahi,
Koe‘uhi ke manatua koe.”
17‘Io, ‘i he ‘osi ‘a e fitungofulu‘i ta‘u, ‘e ‘a‘ahi ‘a Sihova ki Taia, pea ‘e toe foki ia ki he‘ene tali tō‘onga pō, pea te ne fe‘auaki mo e ngaahi pule‘anga kotoa ‘o māmani ‘oku ‘i he funga kelekele. 18Ka ko ‘ene fakatupu, mo e tō‘onga pō ‘oku ne ma‘u, ‘e tapu kia Sihova: ‘e ‘ikai tauhi, pea ‘e ‘ikai tānaki; ka ko e koloa ma‘u ‘i he‘ene fakatau ‘e ma‘a e kakai ‘oku fakafeangai kia Sihova, ke nau kai ke mākona, pea ke nau ‘ai kofu masani.
Currently Selected:
KO ‘AISEA 23: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
