KO ‘AISEA 26
26
‘E Tuku ‘e he ‘Otuá ‘a Hono Kakaí ke Ikuna
1‘I he taimi ko ia ‘e fai ‘a e hiva ko eni ‘i he fonua ko Siuta.
Ko e kolo hūfanga ‘oku ta ma‘u ē,
Kuo ne ‘ai ‘a e fakamo‘ui mōno ‘ā mo puke.
2Fakaava ‘a e ngaahi matapā,
Kae hū ‘a e pule‘anga faitotonu na,
‘A e pule‘anga ‘oku tauhi ‘ene fai tōnunga.
3Ko e loto ‘oku puke ma‘u te ke ngaohi ke nonga ka ko ha nonga,
Koe‘uhi ko ‘ene falala ki he ‘Afiona.
4Falala kia Sihova ‘o ta‘engata,
He ko IAA SIHOVA ko e Makatu‘u Laukuonga.
5He kuo ne ‘ohifo ‘a e nofo ‘i he taukakapa,
‘A e kolo fu‘u mā‘olunga:
Kuo ne lolo hifo ia, kuo ne lolo hifo ia ki he kelekele;
Kuo ne ‘ai ke lave ki he efu.
6Kuo mala ‘a e va‘e ki ai;
Ko e va‘e ‘o e vaivai,
Ko e taulaka ‘a e kau tu‘utāmaki.
7Ko e hala ‘o e faitotonu ko e koto tonusika:
‘Oku ke fakatokalelei ‘a e ‘alunga ‘o e faitotonu ‘aki ‘a e fuavai.
8‘E Sihova kuo mau tatali atu
‘I he hala foki ‘o ho‘o fai fakamaau;
Ko e holi ‘o e loto ‘oku fie fanongo ki ho huafa
‘Oku fie fanongo ki he fakamanatu ‘o ho‘o ngaahi me‘a.
9Ko hoku loto na‘e feinga kiate koe ‘i he pō;
‘Io, ne u kumi hakili kiate koe ‘aki ‘a e laumālie ‘o hoku loto:
He ka hoko mai ‘a ho‘o ngaahi fakamaau ki he fonua,
‘E ako faitotonu ‘a e nofo maama.
10Ka fai ha ‘ofa ki he pau‘u,
Molekemama‘o ha‘ane ako ke faitotonu;
Ka ne nofo ‘i ha fonua mā‘oni‘oni te ne fai kovi,
Pea ko e fotu ‘a Sihova ‘e ‘ikai ‘aupito te ne ‘ilo‘i.
11‘E Sihova, kuo mā‘olunga ho nima, ka na‘e ‘ikai te nau sio ki ai;#Hep 10.27 ka te nau sio ki ho‘o mamahi‘i ha kakai he fakamaa‘i ‘a kinautolu na; ‘ā, ko e afi kuo tuku ki ho ngaahi fili, te ne keina kinautolu. 12‘E Sihova, te ke fokotu‘u ha melino ma‘u ma‘amautolu: seuke, ko ‘emau ngāue kotoa foki ko ho‘o fai ia ma‘amautolu.#26.12 ko ‘emau… ma‘amautolu; pe ko ‘emau ngāué kotoa koe‘uhi ko ho‘omou ngaahi me‘a ‘oku faí; pe ‘okú ke fai kiate kimautolu ‘a e ngaahi me‘a ‘oku hoa mo ‘emau ngāué. 13‘E Sihova ko homau ‘Otua, kuo fakaehaua kimautolu ‘e ha hou‘eiki kehe, ‘o ‘ikai ko koe pē; ka ne ta‘e‘oua ‘a e ‘Afiona ‘oku mau lava ai ke fakahīkihiki‘i ho huafa. 14Tala‘ehai ‘oku mo‘ui ‘a e kau pekia: tala‘ehai ‘oku toetu‘u ‘a e kau ‘ata: ‘āua, kuo ke ‘a‘ahi kiate kinautolu, ‘o faka‘auha; pea na‘a mo e manatu ki ai kuo ke fakangata. 15Kuo ke fakalahi ‘a e pule‘anga, ‘e Sihova, kuo ke fakalahi ‘a e pule‘anga; kuo ke fakalāngilangi‘i koe ‘e koe: kuo ke toloaki atu ‘a e ngaahi kau‘ā ‘o e fonua. 16‘E Sihova, ‘i he hoko ‘a e faingata‘a na‘a nau ‘a‘ahi ki he ‘Afiona; na‘a nau lilingi atu ‘a e lotu fanafana ‘i he falala ho‘o kinisi kiate kinautolu.#26.16 ‘Oku ‘ikai ke mahino ‘a e faka-Hepelū ‘o e vēsí ni. 17Hangē ha fefine feitama ‘oku ofi ke fā‘ele ‘oku ne mākauua holo, ‘o ‘ioho ‘i he‘ene mamahi; na‘e pehē kimautolu ‘i he ‘ao ‘o e ‘Afiona. 18Na‘a mau feitama, na‘a mau makau, na‘e hangē na‘a mau fā‘ele, ka ko e matangi pē; tala‘ehai na‘a mau fai ke mo‘ui ‘a e fonua; pea tala‘ehai kuo tō mai ha kau maama.#26.18 ‘Oku fihi e vēsí ni. ‘Oku hiki ‘e he ni‘ihi: tō ‘a e nofo maama. 19‘E toe mo‘ui ho‘o kau pekia: ‘e toetu‘u hoku ngaahi ‘anga‘anga,#Tān 12.2 ‘Ā, ‘o mavava, ‘a e tōfā ‘i he efu: he ko ho‘o hahau ko e hahau ‘oku tō ki he mohuku kai, pea ‘e laku mai ‘e he fonua ‘a e kau ‘ata.
20Ha‘u ange, si‘oku kakai, hū ki ho ngaahi loki, ‘o tāpuni ‘a e matapā kiate koe: toi ko e fo‘i kemo pē, kae‘oua ke laka atu ‘a e tautea. 21He vakai, ‘oku hā‘ele atu ‘a Sihova mei hono nofo‘anga ke ‘eke ‘a e kovi ‘a e nofo māmani: pea ‘oku tatala ‘e māmani ‘a e toto kuo ne ‘ufi‘ufi, ‘o ‘ikai te ne toe ‘ufi‘ufi ‘a e fakapoongi ‘oku ‘i ai.
Currently Selected:
KO ‘AISEA 26: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
