KO ‘AISEA 27
27
1‘I HE taimi ko ia ‘e ‘a‘ahi ‘e Sihova ‘aki ‘ene heletā, ‘a e heletā fefeka mo lahi mo mālohi, kia Levaiatani, ‘a e Ngata Hola, pea kia Levaiatani ‘a e Ngata Pikopiko: pea te ne tāmate‘i ‘a e Tanini#27.1 Levaiatani… Tanini; Ko e ngaahi manu fakailifia eni he ngaahi talatupu‘a ‘o ono‘aho, pea na‘e ngāue ‘aki ko e ngaahi faka‘ilonga ‘o e tukui pule‘anga na‘e fakafili ki ‘Isilelí. ‘oku nofo ‘i he tahi na.#Siope 41.1; Saame 74.14; 104.26
2‘I he taimi ko ia–
Si‘i ngoue vaine tu‘utai,#27.2 vaine tu‘utai; pe uaine sovinivini.
Mou tau‘a‘alo ki ai.
3Ko au Sihova hono tauhi,
‘Oku ou fakaviviku ia ‘o hokohoko miniti pō mo e ‘aho ‘oku ou tauhi ia,
Na‘a ai ha taha ‘e ‘a‘ahia.
4‘Oku ‘ikai kei ha ‘ita ‘iate au:
Ke u sio mai ki ha talatala pe ‘akau veli!
Ka u ‘oho fua ki ai mo e tau,
Te u tutu ke ‘osi.
5Pe ke ne puke ki he fakamo‘ui‘anga ‘a‘aku,
Ke ne fakalelei mo au;
Ke ne fakalelei mo au.
6Ko e taimi kaha‘u ko Sēkope te ne fai aka;
Ko ‘Isileli te ne moto mo mafa‘a;
Pea te nau fakafonu ‘a e funga ‘o māmani ‘i he fua.
7He na‘a ne taa‘i ‘a ‘Isileli ‘aki ‘a e tā ‘o e pule‘anga ne ne te‘ia ‘a ‘Isileli? pe na‘e tatau hono palangi mo e palangi ‘o e fa‘ahinga na‘e fuofua palangi ia? 8‘Oku ke fai fakatautau ho‘o fakamāu‘i ia, ho‘o tuku atu ia–ko ‘ene sivi pē ‘aki ha matangi hako ‘i ha ‘aho na‘e angi ai ‘a e matangi hahake.#27.8 ‘Oku ‘ikai ke mahino ‘a hono faka-Hepelū ‘o e vēsí ni. 9Ko ia, ‘e fakamolemole ‘a e kovi ‘a Sēkope ‘i he me‘a ni, neongo ko e kotoa ia ‘o e fua ‘o e ‘ave ‘enau hia; ‘a ‘ene ngaohi ‘a e ngaahi maka ‘o e ‘ōlita ko e koto maka lahe mafahifahi pē, ‘o ‘ikai toe tu‘u ‘a e ngaahi ‘āsela mo e ngaahi ‘īmisi ‘o e la‘ā.#27.9 mo e… la‘aá; ‘Oku fihi.
10He ko e kolo talitau‘anga ‘oku lala, ko e nofo‘anga kuo tukuange mo li‘aki, hangē ko e fonua maomaonganoa: ko e potu ‘oku kaikai ai ‘a e fanga kafi, ko e potu ‘oku nau kai tokoto ai ke ‘osi ‘a e ngaahi lito ‘oku tupu ai. 11Ka mōmoa hono ngaahi va‘a, ‘oku motu; ha‘u ‘eni fafine ‘o tafu maama ‘aki: he ‘oku ‘ikai ko e kakai ma‘u ‘atamai ia; ko hono ō ia ‘oku ‘ikai ke faka‘atu‘i ia ‘e he ‘Afio na‘e ngaohi ia, pea ‘oku ‘ikai ke ‘alo‘ofa ki ai ‘e ia na‘a ne fokotu‘u.
12Pea ‘e hoko ‘i he taimi ko ia, ‘e fai ‘e Sihova ha tuki to‘u kai, mei he fu‘u Vaitafe ‘o a‘u ki he halanga vai ‘o ‘Isipite, pea ko kimoutolu ‘a e ha‘a ‘Isileli ‘e tufi fakalāutelau.
13Pea ‘e hoko ‘i he taimi ko ia, ‘e ifi ha talupite lahi; pea ‘e ha‘u ‘a kinautolu na‘e puli ‘i he fonua ko ‘Āsilia, pea ko e kau fakahee‘i ‘oku ‘i he fonua ko ‘Isipite; pea te nau lotu kia Sihova ‘i Mo‘unga Tapu#27.13 Mo‘unga Tapu; Vakai ki he 2.3. ‘i Selusalema.
Currently Selected:
KO ‘AISEA 27: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
