‘Efesō 2
2
Mei he Maté ki he Mo‘uí
1PEA ko kimoutolu, na‘a mou mate ‘i ho‘omou ngaahi talangata‘a mo e angahala;#Kol 2.13 2‘a ia na‘a mou fou ai ‘i mu‘a ‘i he ‘alunga ‘o e nofo faka-e-maama-ko eni, ‘i he ‘alunga ‘o e ‘eiki ‘o e pule‘anga ‘o e ‘atā, ko e ‘eiki ‘o e fa‘ahinga laumālie ‘oku lolotonga ngāue ni ‘i he hako ‘o talangata‘a; 3‘a ia na‘a ta kau ai ‘a kitaua foki ‘i mu‘a, pea na‘a ta mo‘ui‘aki kotoa pē ‘a e fai ki he ngaahi holi ‘o hotau kakano, he‘eta feia ‘a e ngaahi tu‘utu‘uni ‘a hota kakano mo ‘eta ngaahi fakakaukau, pea na‘a ta nofo ai pē ko e fānau ‘o e houhau ‘i he ‘ulungāanga, ‘o hangē foki ko e kakai kotoa pē.
4Ka ko e ‘Otua, ‘a ia ‘oku ne mohu ‘alo‘ofa, ko e me‘a ‘i he ‘ofa lahi ‘a ia na‘a ne ‘ofeina ‘aki ‘a kitautolu, 5neongo kuo tau mate ‘i he ngaahi talangata‘a, na‘a ne kaungā fakamo‘ui hake kitautolu mo Kalaisi, (ko e kelesi pē kuo mou mo‘ui mei ai), 6pea ne kaungā fokotu‘u kitautolu mo ia, mo ne kaungā fakanofo mo ia ‘i he ngaahi feitu‘u ‘o langi ‘ia Kalaisi Sīsū: 7koe‘uhi ke ne fakahā atu ‘i he ngaahi kuonga ka hoko mai hono lahi ‘i he lahi ange fau ‘o ‘ene kelesi ‘aki ‘ene anga‘ofa kiate kitautolu ‘ia Kalaisi Sīsū. 8He ko e kelesi pē kuo mou mo‘ui mei ai, ko e me‘a ‘i ho‘omou tui; ‘io, na‘e ‘ikai meiate kimoutolu ia, ka ko e foaki mei he ‘Otua: 9na‘e ‘ikai tupu mei ha ngaahi ngāue, koe‘uhi ke ‘oua na‘a ai ha taha ‘e fa‘a pōlepole. 10He ko ‘ene ngaohi ‘a kitautolu, kuo fakatupu ‘ia Kalaisi Sīsū ke fai ‘a e ngaahi ngāue lelei, ‘a ia na‘e toka teuteu ‘e he ‘Otua ke tau fou ai.
Ko e Taha ‘ia Kalaisí
11Ko ia, mou manatu ki he taimi mu‘a, ‘a kimoutolu ‘oku Senitaile homou kakano, mou lau ko e Ta‘ekamu ‘e he fa‘ahinga ‘oku lau ko e Kamu (‘a e kamu ‘i he kakano pea fai ‘e he nima)– 12‘io, manatu, ko e taimi ko ia na‘e ‘ikai hamou kaunga ‘ia Kalaisi, ka mou nofo ko e kau fakahee‘i mei he pule‘anga ‘o ‘Isileli, ko e muli ta‘ekau ‘i he ngaahi fuakava ki he Tala‘ofa, ko e kau ta‘e-ha-‘amanaki-lelei, mo e kau taka he ‘univeesi ta‘ema‘u ‘a e ‘Otua. 13Ka ‘i onopooni, ‘ia Kalaisi Sīsū, ko kimoutolu na‘e mama‘o mu‘a, ne fakaofi ‘aki ‘a e ta‘ata‘a ‘o Kalaisi.#2.13 ta‘ata‘a ‘o Kalaisi; pe pekia fakafeilaulau ‘a e Kalaisí. 14He ko hotau melino‘anga ia, ‘a ia na‘a ne ngaohi ‘a e ua ke taha; ‘io, na‘a ne holoki ‘aki hono kakano ‘a e ‘āvahevahe, 15‘a ia ko e fe‘ite‘itani, mo ne fakaka‘anga ‘a e lao fekau ‘a ia ko e koto tu‘utu‘uni pē, koe‘uhi ke ne ngaohi ‘a e ua ko ia ko ha tangata fo‘ou pē taha ‘iate ia, pea fakalelei ai;#Kol 2.14 16pea ‘i he‘eta sino taha ke ne toe fakalelei mo e ‘Otua ‘a kitaua ‘osi pē, ko e me‘a ‘i he Kolosi, he‘ene tāmate‘i ‘a e fe‘ite‘itani ‘i he me‘a ko ia.#Kol 1.20 17Pea ne ha‘u ‘o tala melino kiate kimoutolu na‘e mama‘o, mo tala melino ki he kakai na‘e ofi:#‘Ais 57.19 18he vakai, ko e me‘a ‘iate ia ‘oku ta fakatou apaapangofua ke hoko atu ki he Tamai, he‘eta Laumālie taha.
19Pea ko ia, ‘oku ‘ikai te mou kei ko e kau muli mo e ‘āunofo, ka ‘oku mou kolo taha mo e fa‘ahinga tapu, pea ‘oku mou ‘i he Fāmili ‘o e ‘Otua. 20He kuo langa kimoutolu ki he makatu‘unga ko e kau ‘aposetolo mo e kau palōfita,#2.20 makatu‘unga… palōfita; pe makatu‘ungá, ‘a ia ko e ko e kau ‘aposetoló mo e kau palōfitá. ko Sīsū Kalaisi ia ko hono maka taufatungamotu‘a; 21‘a ia ‘oku fai ai pē ‘i He‘ene ‘Afio ‘a e hokohoko lelei ‘o e fale kotoa, pea ‘oku faka‘a‘au hake ai pē ia ke hoko ko ha temipale tapu, tu‘u ‘i he ‘Eiki; 22‘a ‘Ene ‘Afio ‘oku fakahoko ai ‘a kimoutolu foki ki he fale, mo‘o ‘afio‘anga ‘o e ‘Otua ‘i he Laumālie.
Currently Selected:
‘Efesō 2: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
