‘Efesō 3
3
Ko e Ngāue ‘a Paula ki he Kakai Mulí
1PEA koe‘uhi ko e me‘a ko ia, ko au Paula, ko e nofo pilīsone ‘a Kalaisi Sīsū koe‘uhi ko kimoutolu Senitaile– 2[He ‘oku te pehē na‘a mou fanongo ki he‘eku ma‘u lakanga, ko e sētuata ‘o e kelesi ‘a e ‘Otua, ‘a ia na‘e tuku kiate au ma‘amoutolu: 3‘io, ‘a e faka‘ilo kiate au mei he Ta‘ehāmai ‘a e misiteli, ‘o hangē ko ia na‘a ku ki‘i lea ki ai ‘anenai; 4pea ‘i ho‘omou lau ia te mou ‘ilo mei ai ‘a e lahi ‘o ‘eku poto ‘i he misiteli faka-Kalaisi.#Kol 1.26-27 5‘A ia na‘e ‘ikai faka‘ilo ‘i he ngaahi kuonga kehe ki he hako ‘o e tangata, ‘o hangē ko hono fakahā ‘i onopooni ‘e he Laumālie ki he kau ‘Aposetolo tapu ‘a ‘Ene ‘Afio, mo ‘ene kau palōfita; 6‘a ia ko e pehē, ‘Oku kaungā ‘ea mo kimautolu ‘a e Senitaile, mo kaungā sino, mo kaungā kau ‘i he Tala‘ofa, ‘o tu‘unga ‘ia Kalaisi Sīsū, pea founga ‘i he Kōsipeli:
7‘a e Kōsipeli ko ia ‘a ia na‘a ku hoko ko hono faifekau, pea ko e mātu‘aki foaki pē mo ia, ko e kelesi mei he ‘Otua, ‘a ia na‘e tuku mai ‘i he ngāue ‘a ‘ene Māfimafi. 8‘Io, ko au ia ne tuku ki ai ‘a e kelesi ni, ‘a au ko e si‘i ‘i he si‘i ange fau ‘i he kau lotu kotoa pē, ke ‘a‘aku ‘a e malanga‘aki ki he Senitaile ‘a e koloa ‘a Kalaisi ‘oku ta‘efa‘a hakulea: 9kae‘uma‘ā ke te tūhulu kinautolu ki he ‘alunga ‘o e misiteli ko ia, ‘a ia ne fufū mei mu‘a ‘i mu‘a ‘i he finangalo ‘o e ‘Otua, (‘a ‘ene ‘Afio ne ne ngaohi ‘a e me‘a kotoa pē); 10koe‘uhi ke e‘a ai ‘i onopooni mei he siasi ki he fa‘ahinga pule mo ma‘u tu‘unga ‘i he ngaahi feitu‘u ‘o langi, ‘a e poto faifio ‘a e ‘Otua. 11‘A ia ko e tu‘utu‘uni talu mei mu‘a, pea fai ‘ia Kalaisi Sīsū ko hotau ‘Eiki; 12‘a ia ‘oku tu‘unga ai ‘etau ta‘emālū‘ia ni, mo ‘ene apaapangofua ke tau hoko atu, he‘etau fai falala, ko e tupu ‘i he‘etau tui ki He‘ene ‘Afio. 13Ko ia ‘oku ou kole atu, ke ‘oua te mou fo‘i ‘i he ngaahi mamahi kuo hoko kiate au, koe‘uhi ko ‘eku taukave kimoutolu: he ko e me‘a pehē ‘oku hā ai homau mahu‘inga.]
Ko e ‘Ofa ‘a Kalisi ‘iate Kitautolú
14‘Io, koe‘uhiā ko e me‘a ko ia, ko ia ‘oku ou peluki hoku tui ki he Tamai, 15‘a ia ‘oku tauhingoa ki ai ‘a e ngaahi fāmili kotoa pē ‘i langi mo māmani, 16ko ‘eku kole ke foaki kiate kimautolu, ‘o taau mo e mohu me‘a ‘o ‘Ene ‘Afio, ke ne tuku ke fou mai ha ivi ‘i hono Laumālie ki homou tangata-‘i-loto ke mou mālohi ai; 17kae fale ‘a Kalaisi ‘i homou loto, ko e me‘a ‘i ho‘omou tui; 18pea ‘i ho‘omou aka leva ‘i he ‘ofa, mo pulusi ki he tu‘unga ko ia, ke mou faifai pea mou lava ‘aupito ke lave‘i, hangē ko e kau mā‘oni‘oni kotoa pē, hono māukupu, mo hono lōloa, mo hono mā‘olunga, mo hono loloto– 19‘io, ke ‘ilo ‘a e ‘ofa ‘a Kalaisi, ‘a ia ‘oku hulu atu ‘i he ngata‘anga ‘o e ‘ilo; kae fakafonu kimoutolu ke a‘usia hono kātokatoa kotoa ‘o e ‘Otua.
20Pea ko ‘Ene ‘Afio, ‘a ia ‘oku ne lava ke fai ma‘atautolu ‘o hulu atu noa pē ‘i he ngaahi me‘a ‘oku tau fa‘a kolea pe fakakaukau ki ai, koe‘uhi ko e ivi ‘oku ngāue ‘i hotau loto, 21‘io, ke ‘o ‘Ene ‘Afio ‘a e kolōlia ‘i he Siasi, pea ‘ia Kalaisi Sīsū, kae ‘osi ‘a e ngaahi to‘utangata ‘o e ngaahi kuonga ‘o ‘ītāniti! ‘Ēmeni.
Currently Selected:
‘Efesō 3: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
