KOHELETI 5
5
‘Oua ‘e Lea Puna
1LAMA ho va‘e ‘i ho‘o ‘alu ki he fale ‘a ‘Elohimi: he ko e ‘unu‘unu ke fanongo pē, ‘oku lelei hake ‘i ha ‘atu feilaulau ‘a ha kau vale. Seuke, ko ‘enau ta‘e‘ilo ‘oku nau fai kovi ai.#5.1 ko ‘enau… ai; pe ‘Oku ‘ikai te nau ‘ilo ‘oku nau fai kovi. 2‘Oua na‘a ‘oho ho ngutu, pea ‘oua na‘a vave ho loto ke laku lea ki tu‘a ‘i he ‘ao ‘o ‘Elohimi; he ‘oku ‘i langi ‘a ‘Elohimi, kae ‘i māmani pē koe: ko ia, ‘ai ke si‘i ho‘o lea. 3He ‘oku tupu ‘a e fa‘a misi ‘i he lahi ‘o e me‘a ‘oku mo‘ua ai ‘a e loto; pehē ‘oku tupu mei ha fu‘ufu‘unga lau ha lea vale. 4Kapau kuo ke fai ha tukumo‘ui ki he ‘Otua, ‘oua te ke fakatuai ke fai: he ‘oku ‘ikai ha hōifua ‘i he kau sesele: ko e tukumo‘ui kuo ke tala, fai.#Saame 66.13-14 5‘Oku ngutuhua ange ha‘o ta‘efai ha tukumo‘ui, ‘i ha‘o fai kae ‘ikai fakaai. 6‘Oua na‘a tuku ho ngutu ke fakaangahala‘i ho sino; pea ‘oua te ke lea ‘i he ‘ao ‘o e ‘āngelo, ‘o pehē, Ko ‘eku fai vale: koe‘uma‘ā ke houhau ‘a ‘Elohimi ‘i ho le‘o na, ‘o ne hae‘i ‘a e ngāue ‘a ho nima? 7He ‘oku ō mo e fa‘a misi ha koto muna; pea pehē ka lahi ha lau: ka ke ‘apasia koe kia ‘Elohimi.
Ko e Nofo ko ení ko e Fakaongosia noa
8Kapau ‘oku ke sio ‘i ha vahefonua ki he fakamālohia ‘o e masiva, mo e maumau‘i ‘o e konisitūtone mo e totonu, ‘oua te ke tumu ‘i he me‘a ko ia: seuke, ‘oku lama ‘a e mā‘olunga ‘e ha taha ‘oku mā‘olunga hake; pea ‘oku ai mo ha ni‘ihi ‘oku toe mā‘olunga hake.
9Ka ko e fonua ‘oku hulu ‘i he me‘a kotoa pē ‘a ‘eni; ko e fonua ‘oku tu‘u ai ‘a e fatongia ki he tu‘i ‘i he ‘api.#5.9 ‘Oku fihi. ‘Oku hiki ‘e he ni‘ihi: ko e fonua ‘oku nofo ai ‘a e tu‘i ki he ngoue‘anga; pea ‘e he ni‘ihi: Na‘a mo e tu‘i, ‘okú ne fakafalala ki he ututa‘ú.
10Ko ia ‘oku manako siliva, ‘oku ‘ikai te ne mākona ‘i he siliva; pea ko ia ‘oku manako ki he fu‘ufu‘unga me‘a, ‘oku ‘ikai hano fua: ko e muna mo ia foki. 11Ka tupu ke lahi ‘ete me‘a, ‘oku tokolahi ‘a e fa‘ahinga ke kai ia: pea ‘oku ‘amo atu ‘i he hā ‘a e tangata ‘oku ‘a‘ana? ngata pē ‘i he sio ki ai ‘aki hono mata. 12‘Oku melie ‘a e mohe ‘a e tangata ngāue, pe ‘oku si‘i ‘ene kai pe ‘oku lahi: ka ko e topono fau ‘a e koloa‘ia ‘a ia ‘oku ‘ikai te ne mamohe ai.
13‘Oku ai ha kovi ta‘ehano faito‘o kuo u mamata ki ai ‘i he lalo la‘ā, ko e koloa kuo tauhi ma‘ana ‘oku ‘a‘ana, kae iku ko hono kovi‘anga pē.#5.13 ma‘ana… pē; pe ki ha ‘aho te ne fie faka‘aonga‘i ai. 14Pea mole ‘a e koloa ko ia ‘i ha fakakaukau kovi, pea ‘oku ne ma‘u ha foha, pea ‘oku ‘ikai ma‘u ‘e ia ha momo‘i me‘a. 15Hangē ko ‘ene hū mai mei he fatu ‘o ‘ene fa‘ē, pehē te ne foki telefua, ‘o ‘alu hangē ko ‘ene ha‘u, ‘o ‘ikai te ne ma‘u ha momo‘i me‘a ‘i he‘ene ngāue, ‘a ia te ne lava ke to‘o ‘o ‘alu mo ia.#Siope 1.21; Saame 49.17; 1 Tīm 6.7 16‘Āua ko e kovi ta‘ehano faito‘o eni: ko e tatau mātē ‘a ‘ene ha‘u pea mo ‘ene ‘alu: pea ko e hā ‘a e fua kiate ia ‘o ‘ene fakaongosia ma‘a e matangi? 17Kae‘uma‘ā ‘i hono ‘aho kotoa pē, ‘oku ne kai ‘i he po‘uli pē,#5.17 ‘i hono… pē; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ko hono ‘aho kotoa pē ko e po‘uli pē, etc. pea ‘oku lahi ‘ene fakahoha‘a: pea ‘oiau ‘ene mamahi mo ‘ene ‘ite‘ita!
18Siini ko e anga ‘o ‘eku sio ‘aku: ko eni pē ‘a e lelei, ko eni pē ‘a e faka‘ofo‘ofa: ke te kai mo inu, mo ‘ilo lelei ‘i he ngāue kehekehe ‘oku te fakafitefita‘a ai he lalo la‘ā, kae‘oua ke kakato ‘a e ngaahi ‘aho ‘o ‘ete mo‘ui, ‘a ia kuo tuku mai ‘e ‘Elohimi: he ko e ‘inasi ia ‘o e tangata. 19Ko eni foki; ‘ilonga ha tangata kuo foaki kiate ia ‘e ‘Elohimi ‘a e koloa mo e me‘a hulu, pea ‘oku ne fakamafai ke ne kai mei ai, pea ke tali hono ‘inasi, pea ke ma‘u fiefia ‘i he‘ene ngāue: tala atu, ko e me‘a foaki ‘a e ‘Otua ia. 20He ‘oku ‘ikai te ne ongosia manatu ai ki he ngaahi ‘aho ‘o ‘ene mo‘ui; he kuo fakaai ‘e ‘Elohimi ‘aki ‘a e fiefia ‘i hono loto.
Currently Selected:
KOHELETI 5: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
