KOHELETI 4
4
1PEA u foki ai ‘o vakai ‘a e ngaahi fakamālohi kehekehe ‘oku fai ‘i he lalo la‘ā: pea vakai, ko e lo‘imata ē ‘o si‘i fakamālohia, kae ‘ikai ha taha ke fakafiemālie kiate kinautolu; ‘io, ‘i he feitu‘u ‘a fakamālohi na‘e ai ha fefeka, kae ‘ikai ha taha ke fai ha fakafiemālie ki he fa‘ahinga ko ē. 2Pea u fakamālie‘ia ‘a e kau pekia kuo loa ‘enau pekia, ‘o lahi ‘i he kakai mo‘ui, ‘a e fa‘ahinga ‘oku lolotonga ni; 3ka ‘oku lelei hake ‘iate kinaua ‘osi pē ‘a e toko taha kuo te‘eki ke ‘i ai, ‘a ia kuo te‘eki ke ne mamata ki he ngāue kovi ‘oku fai ‘i he lalo la‘ā.
4Na‘a ku vakai foki ‘a e fakafitefita‘a kehekehe, mo e me‘a kotoa pē ‘oku fai ke mafai, tā ko e koto meheka pē ia ‘a e taha ki he taha. Ko e muna mo ia foki, mo e kai matangi. 5Ko e vale ‘oku ne fehulunaki nima, ‘o kai hono kakano ‘o‘ona. 6‘Oku lelei hake ha falukunga ‘e taha mo e fiemālie ‘i ha falukunga ‘e ua ō mo e fakaongosia mo e kai matangi.
7Pea u foki ai ‘o vakai ‘a e muna ‘i he lalo la‘ā. 8Ko e taha ē ‘oku nofo toko taha, ‘oku ‘ikai foki hano foha pe tokoua; ka ‘oku ‘ikai ha ngata‘anga ‘o ‘ene ngāue kehekehe; ‘oku ‘ikai fiu foki hono mata ‘i he sio koloa- “Pe ko ‘ete fakaongosia ma‘a hai nai, mo fakamasiva lelei ‘eku mo‘o ui? “Ko e muna mo ia foki, mo e fakaongosia kovi.
9‘Oku ngutuhua ange ke toko ua ‘i he‘ete toko taha; he ‘oku ‘i he‘ena ngāue ha totongi lelei. 10He kapau te na tō, ‘e lava ‘e he taha ke ‘ohake hono kaume‘a: ka ‘oiauē ‘a e toko taha ‘oku tō, ka ‘oku ‘ikai ha taha mo ia ke ‘ohake! 11Kae‘uma‘ā, ka fetākoto‘i ha toko ua, te na māfana: kae māfana fēfē ha toko tefua? 12Kae‘uma‘ā foki, kapau ‘e ‘ohofia toko taha ‘a Me‘a, ‘o lava, kuo ne matu‘u nai, ‘oka ne toko ua; pea ko e afo tu‘o tolu ‘e ‘ikai motu vave.
13‘Oku ngutuhua ange ha talavou ‘oku mā‘ulalo kae poto, ‘i ha tu‘i ‘oku motu‘a kae vale, ‘a ia ‘oku ‘ikai te ne kei ongo ki he fale‘i. 14He ‘oku ‘alu atu ‘a ē mei he fale pilīsone ke tu‘i, neongo na‘e fanau‘i ia ‘i hono pule‘anga ko e masiva. 15Na‘a ku sio ki he kakai mo‘ui kotoa, ‘a ia ‘oku nau ha‘ele ‘i he lalo la‘ā, ‘oku nau tu‘u mo e talavou, ‘a hono ua, ‘a ia nai te ne fetongi ‘a ē. 16Na‘e ‘ikai hano ngata‘anga ‘o e fu‘u kakai, ‘io, ‘a e kakai kotoa na‘a ne tāimu‘a ki ai: ka neongo ia ka ko e kakai ‘e hoko ‘amui ‘e ‘ikai te nau fiefia ‘iate ia. Seuke, ko e muna mo ia foki mo e kai matangi.
Currently Selected:
KOHELETI 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
