KO 1 TU‘I 18

Ko ‘Ilaisiā mo e Kau Palōfita ‘a Peali

1PEA fuoloa atu, pea hoko ‘a e folofola ‘a e ‘Eiki kia ‘Ilaisiā ‘i hono tolu ta‘u, ‘o pehē, ‘Alu, ‘o hā atu kia ‘Ēhapi, ka u tuku ha ‘uha ki he funga kelekele. 2Pea ‘alu ‘a ‘Ilaisiā ke hā atu kia ‘Ēhapi. Ka kuo fakautuutu pē ‘a e honge ‘i Samēlia.

3Pea kuo ui ange ‘e ‘Ēhapi ‘a ‘Opetaia ‘a ia na‘e pule ki Loto‘ā. (Pea ko ‘Opetaia ko e toko taha na‘e ‘apasia ‘aupito kia Sihova: 4ko ia ‘i he ‘iloange na‘e tu‘usi ‘e Sisipeli ‘a e kau palōfita ‘a Sihova, na‘e ‘ave ‘e ‘Opetaia ha palōfita ‘e toko teau, ‘o fakahū ki ha ‘ana ‘o tautau toko nimangofulu, ‘o ne tauhi ‘aki ‘a e mā mo e vai.) 5Pea pehē ‘e ‘Ēhapi kia ‘Opetaia, ‘Alu#18.5 ‘Alu; Ko hono faka-Hepeluú ia, ka ‘oku pehē ‘i he hiki fuoloa ‘e taha: Tau ō. atu ‘i he fonua ki he ngaahi matavai mo e ngaahi vaitafe: hei‘ilo ‘e ma‘u ai ha musie kae hao ‘a e fanga hoosi mo e fanga miuli, ‘o ‘oua ‘e mole ‘a e monumanu kotoa pē. 6Ko ia, na‘a na vaeua ‘a e fonua ke ‘alu ai: na‘e ‘alu ‘a ‘Ēhapi ‘i ha hala ‘e taha fakaeia, pea ‘alu ‘a ‘Opetaia ha hala ‘e taha fakaeia.

7Pea ‘i he fai ‘e ‘Opetaia ‘ene fononga, ‘iloange na‘e fakafetaulaki mai ‘a ‘Ilaisiā: pea ne ‘ilo ia, ‘o ne tō fo‘ohifo, ‘o ne pehē, ‘E hoku ‘eiki ko ‘Ilaisiā, ko koe ena?

8Pea ne tali ki ai, Ko au: ‘alu ‘o fakahā ki ho ‘eiki, Ko ‘Ilaisiā eni.

9Pea ne pehē, Ko e hā ha kovi kuo u fai ‘oku ke fie tukuange ai ho‘o tamaio‘eiki ko au ki he nima ‘o ‘Ēhapi ke ne tāmate‘i au? 10Tangi ‘a e mo‘ui ‘a Sihova ko ho ‘Otua, ha‘ane toe ha kakai pe pule‘anga kuo ‘ikai fekau atu ki ai ‘e hoku ‘eiki ho kumi; pea ‘i he‘enau pehē, ‘Oku ‘ikai ‘i heni, na‘a ne fakafuakava‘i ‘a e pule‘anga ko ia mo e kakai ko ia, ‘oku ‘ikai te nau ‘ilo koe. 11Pea ko eni ‘oku ke pehē mai, ‘Alu, tala ki ho ‘eiki, Ko ‘Ilaisiā eni. 12Pea ka ‘iloange kuo ta māvae, pea ‘e ‘ave koe ‘e he Laumālie ‘o e ‘Eiki, hei‘ilo pe ki fē; pea ‘i he‘eku a‘u atu ‘o tala kia ‘Ēhapi, ‘o ‘ikai te ne ma‘u koe, pea te ne tāmate‘i au: ka ‘oku ‘apasia kia Sihova ‘a ho‘o tamaio‘eiki ko au talu ‘eku tamasi‘i. 13‘Ikai na‘e fakahā ki he Feitu‘u na ‘a e me‘a na‘a ku fai ‘i he fakapoongi ‘e Sisipeli ‘a e kau palōfita ‘a Sihova? ‘a ‘eku fufū ha toko teau ‘i he kau palōfita ‘a Sihova ‘o tautau toko nimangofulu ‘i ha ‘ana, ‘o u tauhi ‘aki ‘a e mā mo e vai? 14Pea ko eni ‘oku ke pehē mai, ‘Alu ‘o tala ki ho ‘eiki, Ko ‘Ilaisiā eni: pea te ne tāmate‘i au.

15Pea pehē ‘e ‘Ilaisiā, Tangi ‘a e mo‘ui ‘a Sihova Sāpaoti, ‘a ia ko hono ‘ao ‘oku ou tu‘u ai, ka te u hā kiate ia he ‘aho ni.

16Pea ‘alu ‘a ‘Opetaia ke fakafetaulaki kia ‘Ēhapi, ‘o ne fakahā ki ai: pea ‘alu ‘a ‘Ēhapi ‘o fakafetaulaki kia ‘Ilaisiā. 17Pea ‘i he sio leva ‘e ‘Ēhapi kia ‘Ilaisiā, na‘a ne pehē atu, Ko koe ena, ‘a e fakatupu mamahi ‘i ‘Isileli?

18Pea ne tali, Kuo ‘ikai te u fakamamahi ‘a ‘Isileli; ka ko koe pē, mo e fale ‘o ho‘o ‘eiki, ‘i ho‘omou li‘aki ‘a e ngaahi tu‘utu‘uni ‘a Sihova, kae‘uma‘ā ‘oku ke muimui ki he kau Peali. 19Pea ko eni ke ke fekau atu ke fakataha mai ‘a ‘Isileli kātoa kiate au ki Mo‘unga Kāmeli, mo e toko fāngeau-mā-nimangofulu‘i palōfita ‘a Peali, mo e toko fāngeau‘i palōfita ‘a e ‘Āsela, ‘a ia ‘oku keinanga ‘i he tēpile ‘a Sisipeli.

20Pea ‘alu ‘a e fekau ‘a ‘Ēhapi ki ha‘a ‘Isileli kātoa, ‘o ne fakataha mai ‘a e kau palōfita ki Mo‘unga Kāmeli. 21Pea ‘unu‘unu atu ‘a ‘Ilaisiā ki he fu‘u fakataha, ‘o ne pehē, Ko futu ho‘omou toumoua pehē? Kapau ko e ‘Otua ‘a Sihova, mou muimui kiate ia: pea kapau ko Peali, pe‘i muimui kiate ia. Ka na‘e ‘ikai tali kiate ia ‘e he kakai ha fo‘i lea ‘e taha. 22Pea lea ‘a ‘Ilaisiā ki he kakai, Ko au pē toko taha ‘oku kei toe ‘i he kau palōfita ‘a Sihova, ka ko e kau palōfita ‘a Peali ‘oku toko fāngeau mā nimangofulu. 23Ko ia, ke ‘anautolu ke tokonaki mai ha pulu ‘e ua: pea ke nau fili ha taha ma‘anautolu, ‘o tafa, ‘o hili ki he fefie, kae ‘oua ‘e ‘ai ha afi ki ai: pea ko au te u ngaohi ‘a e pulu ‘e taha, ‘o tuku ki he funga fefie, kae ‘ikai te u ‘ai ha afi ki ai. 24Pea mou tautapa ki he huafa ‘o homou ‘otua, pea te u tautapa ‘e au ki he huafa ‘o Sihova: pea ko e ‘Otua ‘oku tali ‘aki ‘a e afi ko e ‘Otua pē ia.

Pea tali ‘a e kakai kotoa, ‘o nau pehē, Mālie ‘a e lea.

25Pea lea ‘a ‘Ilaisiā ki he kau palōfita ‘o Peali, Mou fili ha‘amou pulu, ‘o ngaohi mu‘a; he ‘oku mou tokolahi; pea mou tautapa ki he huafa ‘o homou ‘otua, kae ‘oua ‘e ‘ai ha afi.

26Pea nau to‘o ‘a e pulu na‘e ‘omi, ‘o nau ngaohi, pea nau tautapa ki he huafa ‘o Peali mei he pongipongi ‘o a‘u ki he ho‘atā, ‘o pehē, ‘E Peali, tali mai. Ka na‘e ‘ikai ha le‘o, pea na‘e ‘ikai ha taha ‘e tali mai. Pea na‘a nau me‘e ketu takai ki he ‘ōlita kuo ngaohi.

27Pea ‘i he‘ene ho‘atā leva, na‘e lea fakamāhuahu kiate kinautolu ‘e ‘Ilaisiā, ‘o pehē, Mou kalanga le‘o lahi: he ko e ‘otua foki, na‘a ‘oku ne mo‘u fakakaukau ki ha me‘a, pea na‘a kuo ne afe atu ke fakafiemālie, pea na‘a kuo ne fononga mama‘o; ‘io, hei‘ilo ‘oku ne toka kae fakataka. 28Pea nau kalanga le‘o lahi, pea nau fefoafoa‘i ‘aki ‘a e heletā mo e tao, he ko honau anga ia, kae‘oua ke fetafei ‘a e toto ‘i honau sino. 29Pea ‘i he faifai pea pale ‘a e la‘ā, pea nau fa‘ahikehe‘ia, ‘o fai ‘enau valelau, ‘o a‘u atu ki he feitu‘ula‘ā ‘o e ‘oatu ‘o e feilaulau-me‘akai: ka na‘e ‘ikai ha le‘o, pea na‘e ‘ikai ha taha ‘e tali, pea na‘e ‘ikai ha taha ‘e tokanga mai.

30Pea toki pehē ‘e ‘Ilaisiā ki he fu‘u kakai, Mou ‘unu‘unu mai kiate au; pea na‘e ‘unu‘unu kiate ia ‘a e kakai kotoa. Pea ne monomono ‘a e ‘ōlita ‘a Sihova kuo holoki. 31‘Io, na‘e to‘o e ‘Ilaisiā ha maka ‘e hongofulu mā ua, ‘o tatau mo e lau ‘o e matakali ‘o ha‘a Sēkope, ‘a ia na‘e hoko ki ai ‘a e folofola ‘a Sihova, ‘o pehē, Ko ‘Isileli ho hingoa ‘amui.#Sēn 32.28; 35.10 32Pea ne ngaohi ‘aki ‘a e ngaahi maka ha ‘ōlita ki he huafa ‘o Sihova, ‘o ne ngaohi takatakai ki ai ha luo ‘a ia ‘e hao ai ha ongo tangai uite. 33Pea ne fakatoka ‘a e fefie, ‘o ne tafa ‘a e pulu, ‘o ne hilifaki ki he fefie. 34Pea ne pehē, Fakafonu vai ha puha ‘e fā, ‘o lingi ki he feilaulau mo e fefie. Pea ne pehē, Toe fai; pea na‘a nau toe fai. Pea ne pehē, Fai hono tu‘o tolu; pea nau fai hono tu‘o tolu. 35Pea tafe takai ‘a e vai ki he ‘ōlita, pea ne fakafonu foki ‘a e luo ‘i he vai.

36Pea ‘i he faifai pea hoko ‘a e feitu‘ula‘ā ‘o e feilaulau-me‘akai, na‘e ‘unu atu ‘a e palōfita ko ‘Ilaisiā, ‘o ne pehē, ‘E Sihova, ko e ‘Otua ‘o ‘Epalahame, ‘o ‘Aisake, pea mo ‘Isileli, tuku ke hā he ‘aho ni ko e ‘Otua koe ‘i ‘Isileli, pea ko ho‘o sevāniti au, pea ko ho‘o folofola ia kuo u fai‘aki ‘a e ngaahi me‘a ko eni. 37‘E Sihova, ke ke tali au, ke ke tali au, kae ‘ilo ‘a e kakai ni ko koe pē, Sihova, ‘a e ‘Otua; pea ko koe kuo ke fakafoki mai honau loto.#18.37 pea ko koe… lotó; pe ko koe pē na‘á ke ofe‘i honau lotó meiate koe.

38Pea na‘e toki tō ‘a e afi ‘a Sihova, ‘o ne keina ‘a e feilaulau mo e fefie mo e maka mo e efu, pea ko e vai na‘e ‘i he luo na‘a ne ‘emo hake. 39Pea ‘i he mamata ki ai ‘a e kakai na‘a nau tō fo‘ohifo, ‘o pehē. Ko Sihova pē ‘a e ‘Otua! Ko Sihova pē ‘a e ‘Otua!

40Pea pehē ‘e ‘Ilaisiā kiate kinautolu, puke ‘a e kau palōfita ‘a Peali: ‘oua ‘e tuku ha taha ke hao. Pea na‘a nau puke kinautolu, pea na‘e ‘ohifo kinautolu ‘e ‘Ilaisiā ki he vaitafe ko Kīsoni, pea ne tāmate‘i kinautolu ‘i ai.

Ko e ‘Osi ‘a e La‘ala‘aá

41Pea fakatau folofola ‘a ‘Ilaisiā kia ‘Ēhapi, Me‘a hake, ‘o fai ho‘o taumafa; he ‘oku ngahaha mai ha fu‘ufu‘unga ‘uha. 42Pea ‘alu hake ‘a ‘Ēhapi ke fai ‘ene taumafa. Ka ka ‘alu ‘a ‘Ilaisiā ki funga Kāmeli, ‘o ne punou ‘o a‘u ki he kelekele, ‘o ne ‘ai hono mata ki hono vaha‘a tui.#Sēm 5.18 43Pea ne pehē ki he‘ene tama, ‘Alu hake mu‘a, ‘o fakasio ki tahi. Pea ne pehē, ‘Oku ‘ikai ha momo‘i me‘a. Pea ne pehē, Toe ‘alu, ‘o tu‘o fitu.

44Pea ‘i hono tu‘o fitu na‘a ne pehē, Tā ko e ki‘i loa, tatau mo e nima ‘o e tangata, ‘oku ‘alu hake mei he tahi.

Pea pehē ‘e ia, ‘Alu, ‘o tala kia ‘Ēhapi, Teuteu, pea ‘alu hifo, na‘a ta‘ofi koe ‘e he ‘uha.

45Pea ko e kemo kuo loki ‘a e langi ‘aki ‘a e loa mo e matangi, pea na‘e ‘uha lahi. Pea heka sāliote ‘a ‘Ēhapi, ‘o ‘alu ki Sisilili. 46Pea na‘e ‘ia ‘Ilaisiā ‘a e nima ‘o Sihova, pea ne huke hono kofu, ‘o ne lele mu‘omu‘a ‘ia ‘Ēhapi ki he hū‘anga ‘o Sisilili.

Currently Selected:

KO 1 TU‘I 18: TMB

Highlight

Copy