Popular Bible Verses from KO 1 TU‘I 18

Share

‘E Sihova, ke ke tali au, ke ke tali au, kae ‘ilo ‘a e kakai ni ko koe pē, Sihova, ‘a e ‘Otua; pea ko koe kuo ke fakafoki mai honau loto.

Pea ‘i he faifai pea hoko ‘a e feitu‘ula‘ā ‘o e feilaulau-me‘akai, na‘e ‘unu atu ‘a e palōfita ko ‘Ilaisiā, ‘o ne pehē, ‘E Sihova, ko e ‘Otua ‘o ‘Epalahame, ‘o ‘Aisake, pea mo ‘Isileli, tuku ke hā he ‘aho ni ko e ‘Otua koe ‘i ‘Isileli, pea ko ho‘o sevāniti au, pea ko ho‘o folofola ia kuo u fai‘aki ‘a e ngaahi me‘a ko eni.

Pea ‘unu‘unu atu ‘a ‘Ilaisiā ki he fu‘u fakataha, ‘o ne pehē, Ko futu ho‘omou toumoua pehē? Kapau ko e ‘Otua ‘a Sihova, mou muimui kiate ia: pea kapau ko Peali, pe‘i muimui kiate ia. Ka na‘e ‘ikai tali kiate ia ‘e he kakai ha fo‘i lea ‘e taha.

Pea na‘e toki tō ‘a e afi ‘a Sihova, ‘o ne keina ‘a e feilaulau mo e fefie mo e maka mo e efu, pea ko e vai na‘e ‘i he luo na‘a ne ‘emo hake.

Pea ‘i he mamata ki ai ‘a e kakai na‘a nau tō fo‘ohifo, ‘o pehē. Ko Sihova pē ‘a e ‘Otua! Ko Sihova pē ‘a e ‘Otua!

Pea ‘i hono tu‘o fitu na‘a ne pehē, Tā ko e ki‘i loa, tatau mo e nima ‘o e tangata, ‘oku ‘alu hake mei he tahi. Pea pehē ‘e ia, ‘Alu, ‘o tala kia ‘Ēhapi, Teuteu, pea ‘alu hifo, na‘a ta‘ofi koe ‘e he ‘uha.

Pea na‘e ‘ia ‘Ilaisiā ‘a e nima ‘o Sihova, pea ne huke hono kofu, ‘o ne lele mu‘omu‘a ‘ia ‘Ēhapi ki he hū‘anga ‘o Sisilili.

Pea fakatau folofola ‘a ‘Ilaisiā kia ‘Ēhapi, Me‘a hake, ‘o fai ho‘o taumafa; he ‘oku ngahaha mai ha fu‘ufu‘unga ‘uha.

Pea ne pehē ki he‘ene tama, ‘Alu hake mu‘a, ‘o fakasio ki tahi. Pea ne pehē, ‘Oku ‘ikai ha momo‘i me‘a. Pea ne pehē, Toe ‘alu, ‘o tu‘o fitu.

Pea toki pehē ‘e ‘Ilaisiā ki he fu‘u kakai, Mou ‘unu‘unu mai kiate au; pea na‘e ‘unu‘unu kiate ia ‘a e kakai kotoa. Pea ne monomono ‘a e ‘ōlita ‘a Sihova kuo holoki.

Pea mou tautapa ki he huafa ‘o homou ‘otua, pea te u tautapa ‘e au ki he huafa ‘o Sihova: pea ko e ‘Otua ‘oku tali ‘aki ‘a e afi ko e ‘Otua pē ia. Pea tali ‘a e kakai kotoa, ‘o nau pehē, Mālie ‘a e lea.

‘Io, na‘e to‘o e ‘Ilaisiā ha maka ‘e hongofulu mā ua, ‘o tatau mo e lau ‘o e matakali ‘o ha‘a Sēkope, ‘a ia na‘e hoko ki ai ‘a e folofola ‘a Sihova, ‘o pehē, Ko ‘Isileli ho hingoa ‘amui.

Pea ‘i he‘ene ho‘atā leva, na‘e lea fakamāhuahu kiate kinautolu ‘e ‘Ilaisiā, ‘o pehē, Mou kalanga le‘o lahi: he ko e ‘otua foki, na‘a ‘oku ne mo‘u fakakaukau ki ha me‘a, pea na‘a kuo ne afe atu ke fakafiemālie, pea na‘a kuo ne fononga mama‘o; ‘io, hei‘ilo ‘oku ne toka kae fakataka.

Pea ne ngaohi ‘aki ‘a e ngaahi maka ha ‘ōlita ki he huafa ‘o Sihova, ‘o ne ngaohi takatakai ki ai ha luo ‘a ia ‘e hao ai ha ongo tangai uite.