KO 1 TU‘I 17
17
Ko ‘Ilaisiā mo e La‘ala‘ā
1PEA ko ‘Ilaisiā ko e tangata Tisipī, ko e toko taha ‘i he kakai na‘e nofo hili mai ki Kiliati, na‘a ne fakatau folofola kia ‘Ēhapi, ‘o pehē, Tangi ‘a e mo‘ui ‘a Sihova ko e ‘Otua ‘o ‘Isileli, ‘a ia ko hono ‘ao ‘oku ou tu‘u ai, ha‘ane ‘ai ha hahau pe ‘uha ‘i he ngaahi ta‘u ka hoko ni, ka ‘i he‘eku toki lea.#Sēm 5.17
2Pea hoko kiate ia ‘a e folofola ‘a e ‘Eiki, ‘o pehē, 3Hiki mei heni, ‘o hanga ki hahake, ‘o ke toi ‘i he ki‘i vaitafe ko Kīliti, ‘a ia ‘i mata?? Soatani. 4Pea ko e me‘a ki hao inu te ke fai mei he vaitafe; pea kuo u tu‘utu‘uni ke ‘omi ha‘o me‘akai ‘e he fanga lēveni.
5Pea ne ‘alu ‘o fai ‘o hangē ko e folofola ‘a e ‘Eiki, ‘io, na‘a ne ‘alu ‘o nofo ‘i he ki‘i vai ko Kīliti, ‘a ia ‘oku ‘i mata Soatani. 6Pea ‘omi ai pē ‘e he fanga lēveni kiate ia ha mā mo e kanomate pongipongi, mo ha mā mo e kanomate efiafi: pea ne ma‘u hono inu mei he vaitafe. 7Pea fuoloa, fuoloa, pea mātu‘u ‘a e vaitafe, he na‘e ‘ikai ‘uha ‘a e fonua.
8Pea ‘iloange na‘e hoko ‘a e folofola ‘a e ‘Eiki kiate ia, ‘o pehē, 9Tu‘u, ‘o ‘alu ki Salepita, ‘a ia ‘oku kau ki Saitoni, pea ke nofo ai: vakai, kuo u tu‘utu‘uni ai ha fefine uitou ke tauhi koe.#Luk 4.25-26 10Pea ne tu‘u, ‘o ‘alu ki Salepita, pea ‘i he‘ene a‘u ki he matanikolo, tā ko e fefine uitou ena ‘oku fai ‘ene okooko. Pea ne ui ki ai, ‘o ne pehē, Fakamolemole mu‘a, ka ke ‘omi ha me‘i vai ‘i ha ipu ke u inu. 11Pea ‘i he‘ene kamata laka atu ke ‘omi na‘a ne ui ange, ‘o pehē, ‘Omai ā foki si‘aku konga mā, ‘inē?
12Pea tali ‘a e fefine, Tangi ‘a e mo‘ui ‘a Sihova ko ho ‘Otua ha‘ane ‘iate au ha momo‘i keke, ngata pē ‘i ha falukunga mahoa‘a ‘i he puha, mo e me‘i lolo ‘i he hina: pea ko ‘eku okooko ē ha ongo va‘a fefie ke u ‘alu ki ‘api, ‘o ngaohi ma‘aku mo ‘eku tama, ko ‘ema kai faka‘osi ia pea ma mate.
13Pea pehē ‘e ‘Ilaisiā ki he fefine, ‘Oua te ke lotosi‘i: ‘alu ki ‘api, ‘o fai hangē ko ho‘o lau, ka ke ngaohi mei ai mu‘a ma‘aku ha ki‘i keke, ‘o ‘omi ki tu‘a kiate au, pea ke toki ngaohi ha me‘a ma‘au mo ho‘o tama. 14He ko eni ‘a e folofola ‘a Sihova ko e ‘Otua ‘o ‘Isileli, Ko e puha mahoa‘a ‘e ‘ikai mamoli, pea ko e hina lolo ‘e ‘ikai matuku, kae‘oua ke hoko ‘a e ‘aho ‘e tuku mai ai ‘e Sihova ha ‘uha ki he funga kelekele.
15Pea ‘alu ‘a e fefine, ‘o fai ‘o hangē ko e lea ‘a ‘Ilaisiā: pea nau kai ‘a ia mo e fefine mo hono fale, ‘o ‘aho lahi. 16Na‘e ‘ikai mamoli ‘a e puha mahoa‘a, pea na‘e ‘ikai matuku ‘a e hina lolo, ‘o hangē ko e folofola ‘a Sihova na‘a ne fakafai ‘ia ‘Ilaisiā.
17Pea hili ‘a e ngaahi me‘a ko ia pea puke ‘a e tama ‘a e fefine na‘e ‘o‘ona ‘a e fale; pea fakautuutu ‘ene mahaki ‘o lahi ‘aupito, pea faifai pea ‘ikai te ne kei mānava. 18Pea lea ‘a e fefine kia ‘Ilaisiā, ‘E tangata ‘o ‘Elohimi, ko ho hā au? tā na‘a ke ha‘u ki heni ke fakamanatu mai ‘eku hia, mo tāmate‘i ‘eku tama!
19Pea pehē ‘e ia ki he fefine, Tuku mai ho‘o tama. Pea ne to‘o ia mei he fatafata ‘o e fefine, ‘o ne ‘ohake ki he loki ‘i ‘olunga na‘a ne nofo ai, ‘o ne fakatokoto ki hono mohenga ‘o‘ona. 20Pea ne tautapa kia Sihova, ‘o ne pehē, ‘E Sihova ko hoku ‘Otua, kuo ke ‘omi foki ha mala ki he fefine ni ‘oku ou ‘āunofo ki ai he tāmate‘i ‘ene tama? 21Pea ne hanga ‘o falō atu hono sino ‘i he funga ‘o e tamasi‘i, ‘o tu‘o tolu, ‘o ne tautapa kia Sihova, ‘o pehē, ‘E Sihova ko hoku ‘Otua, tuku mu‘a ke foki ‘a e laumālie ‘o e tamasi‘i ni kiate ia.#2 Tu‘i 4.34-35 22Pea fakaongo ‘a Sihova ki he le‘o ‘o ‘Ilaisiā; pea na‘e foki ‘a e laumālie ‘o e tamasi‘i kiate ia, ‘o ne mo‘ui.
23Pea to‘o ‘e ‘Ilaisiā ‘a e tamasi‘i, ‘o ne ‘o hifo mei he loki ‘i ‘olunga ki lalo, ‘o ‘ange ki he‘ene fa‘ē: pea pehē ‘e ‘Ilaisiā; Vakai, ‘oku mo‘ui ho‘o tama.
24Pea pehē ‘a e fefine kia ‘Ilaisiā, Kuo mahino eni kiate au ko e tangata ‘o e ‘Otua koe, pea ko e folofola ‘a Sihova ‘oku ke ‘a‘au ko e mo‘oni ia.
Currently Selected:
KO 1 TU‘I 17: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
