KO 1 TU‘I 16
16
1PEA hoko ‘a e folofola ‘a Sihova kia Sehu foha ‘o Hānani, ‘o kau kovi kia Pā‘asa, he‘ene pehē, 2Ko e me‘a ‘i he‘eku hākeaki‘i koe mei he efu, pea u tuku koe ke ‘eiki ki hoku kakai ‘Isileli: ka kuo ke fou ‘i he ‘alunga ‘o Selopoame, pea kuo ke fakaangahala‘i hoku kakai ‘Isileli, ke nau fakatupu ‘eku ‘ita ‘aki ‘enau angahala; 3vakai, ko au ‘oku ou teu tafi‘i atu ‘a Pā‘asa mo hono fale, pea te u ‘ai ho fale ke hangē ko e fale ‘o Selopoame foha ‘o Nīpati. 4Ko ha‘a Pā‘asa ‘oku pekia ‘i he kolo ‘e keina ‘e he fanga kulī, pea ko ia ‘oku mate ‘i he vao ‘e keina ‘e he manupuna ‘o e ‘atā.
5Pea ko hono toe ‘o e ngāue ‘a Pā‘asa, mo e me‘a na‘a ne fai, mo hono fu‘u ivi, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli? 6Pea toka ‘a Pā‘asa mo ‘ene ngaahi kui, pea na‘e telio ia ‘i Tīlisa, pea na‘e fetongi ia ‘i he pule ‘e hono foha ko ‘Ela.
7(Kae‘uma‘ā foki na‘e fakafai ‘ia Sehu foha ‘o Hānani ko e palōfita ha folofola ‘a e ‘Eiki, ‘o kau kia Pā‘asa mo hono fale, pea koe‘uhi ko e kovi kehekehe na‘a ne fai ‘i he ‘ao ‘o Sihova ke fakatupu ‘ene houhau ‘aki ‘a e ngāue ‘a hono nima, he‘ene hoko hangē ko e fale ‘o Selopoame, pea koe‘uhi ko ‘ene taa‘i ia foki.)
Ko e Tu‘i ‘Isileli ko ‘Ela
8‘I he uofulu mā ono ta‘u ‘o ‘Asa ko e Tu‘i Siuta, na‘e hoko ‘o Tu‘i ‘Isileli ‘a ‘Ela ko e foha ‘o Pā‘asa, ‘o ne hau ‘i Tīlisa ko e ua ta‘u. 9Pea puleaki‘i ia ‘e he‘ene tamaio‘eiki ko Similai, ko e kapiteni ‘o e vaeua ‘o ‘ene tau sāliote: pea kuo ‘i Tīlisa ia, ‘o fai ‘ene inu kava ke konā ‘i he fale ‘o ‘Ālesa, ‘a ia na‘e pule ki he loto‘ā ‘i Tīlisa: 10pea hū ‘a Similai, ‘o taa‘i ia, mo tāmate‘i, ‘i he uofulu mā fitu ta‘u ‘o ‘Asa ko e Tu‘i Siuta, ‘o ne fetongi ia ‘i he pule.
11Pea ‘i he‘ene ma‘u ‘a e pule, ‘io, ‘i he‘ene nofo leva ki he taloni, na‘a ne taa‘i ‘a e fale kotoa ‘o Pā‘asa: na‘e ‘ikai te ne fakatoe kiate ia ha momo‘i tamasi‘i, pe ko hano koeli, pe ka hano fe‘iloaki. 12‘Io, na‘e faka‘auha ‘e Similai ‘a e fale kotoa ‘o Pā‘asa, hangē ko e folofola ‘a Sihova kia Pā‘asa, ‘a ia na‘a ne fakafai ‘i he palōfita ko Sehu, 13ko e me‘a ‘i he angahala ‘a Pā‘asa, mo e ngaahi angahala ‘a hono foha ko ‘Ela, ‘a ia na‘a na fai ‘e kinaua, pea na fakaangahala ‘aki ‘a ‘Isileli foki, ‘o langa‘i ‘a e houhau ‘o Sihova ko e ‘Otua ‘o ‘Isileli ‘aki ‘enau muna. 14Pea ko hono toe ‘o e ngāue ‘a ‘Ela, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?
Ko e Tu‘i ‘Isileli ko Similai
15‘I he uofulu mā fitu ta‘u ‘o ‘Asa ko e Tu‘i Siuta, na‘e hau ‘a Similai ‘i Tīlisa, ‘o ‘aho fitu. Pea ‘oku ‘apitanga ‘a e kakai hono tau‘i ‘o Kipetoni, ‘a ia na‘e ‘o e kau Filisitia. 16Pea fanongo ‘a e kakai na‘e ‘apitanga ai, ‘o pehē, Tokua kuo fai ‘e Similai ha puleaki, pea kuo ne taa‘i foki ‘a e tu‘i: ko ia na‘e hanga ai leva ‘e ‘Isileli kātoa, ‘o nau fakanofo ‘i he ‘apitanga ke Tu‘i ‘Isileli ‘a ‘Omilai ko e ‘eikitau. 17Pea ‘alu hake ‘a ‘Omilai mo ‘Isileli kātoa mei Kipetoni, ‘o nau ‘ākolo‘i ‘a Tīlisa. 18Pea ‘i he faifai pea vakai ‘e Similai kuo kapa ‘a e kolo, na‘a ne hū ki he taua ‘o e fale ‘o e tu‘i, ‘o fakamomofi ‘a e fale ‘o e tu‘i ‘oku ne ‘i ai, pea ne pekia; 19koe‘uhi ko e ngaahi angahala kuo ne fai, he‘ene feia ‘a e me‘a na‘e tau kovi ki he finangalo ‘o Sihova, ‘a ‘ene fou ‘i he ‘alunga ‘o Selopoame, mo ‘ene angahala ‘a ia na‘a ne fai ke fakaangahala ‘aki ‘a ‘Isileli. 20Pea ko hono toe ‘o e me‘a ‘a Similai, mo e puleaki na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli?
Ko e Tu‘i ‘Isileli ko ‘Omilai
21Na‘e toki vaeua ‘a e kakai ‘Isileli; na‘e muimui ‘a hono vaeua kia Tipinai foha ‘o Kīnati, ke fakanofo ia, ka ko e vaeua na‘e muimui kia ‘Omilai. 22Ka na‘e mālohi ‘a e kakai na‘e ‘ia ‘Omilai ‘i he kakai na‘e ‘ia Tipinai foha ‘o Kīnati: ko ia na‘e pekia ‘a Tipinai kae pule ‘a ‘Omilai. 23‘I he tolungofulu mā taha ta‘u ‘o ‘Asa ko e Tu‘i Siuta na‘e ma‘u ‘e ‘Omilai ‘a e pule ki ‘Isileli, pea na‘e hongofulu mā ua ta‘u ‘ene hau: na‘e ono ta‘u ‘ene pule ‘i Tīlisa. 24Pea na‘a ne fakatau ‘a e mo‘unga ko Samēlia meia Sāmeli ‘aki ‘a e taleniti siliva ‘e ua, pea ne langa kolo ‘i he mo‘unga, pea ne fakahingoa ‘a e kolo na‘a ne ngaohi kia Sāmeli ko e ‘eiki ‘o e mo‘unga–ko Samēlia.
25Pea fai ‘e ‘Omilai ‘a e me‘a na‘e tau kovi ki he finangalo ‘o Sihova, ‘io, na‘e hulu ‘ene fai kovi ‘iate kinautolu na‘e mu‘omu‘a ‘iate ia. 26He na‘a ne fou ‘i he ‘alunga ‘o Selopoame foha ‘o Nīpati, mo ‘ene ngaahi angahala ‘a ia na‘a ne fakaangahala ‘aki ‘a ‘Isileli, ke langa‘i ‘a e houhau ‘o Sihova ko e ‘Otua ‘o ‘Isileli ‘aki ‘enau ngaahi muna. 27Pea ko hono toe ‘o e ngaahi me‘a ‘a ‘Omilai na‘a ne fai, mo hono fu‘u ivi na‘e hā, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli? 28Pea toka ‘a ‘Omilai mo ‘ene ngaahi kui, pea na‘e telio ia ‘i Samēlia, pea na‘e fetongi ia ‘i he pule ‘e hono foha ko ‘Ēhapi.
Ko e Tu‘i ‘Isileli ko ‘Ēhapi
29Pea na‘e hoko ‘o Tu‘i ‘Isileli ‘a ‘Ēhapi foha ‘o ‘Omilai ‘i he tolungofulu mā valu ta‘u ‘o ‘Asa ko e Tu‘i Siuta: pea na‘e pule ki ‘Isileli ‘i Samēlia ‘a ‘Ēhapi foha ‘o ‘Omilai ko e ta‘u ‘e uofulu mā ua. 30Pea na‘e fai ‘e ‘Ēhapi foha ‘o ‘Omilai ‘a e me‘a na‘e tau kovi ki he finangalo ‘o Sihova, ‘o hulu ‘iate kinautolu kotoa pē na‘e holomu‘a ‘iate ia. 31Pea tā na‘e ngali ma‘ama‘a ‘apē kiate ia ke fou ‘i he ngaahi angahala ‘a Selopoame foha ‘o Nīpati, he na‘a ne hanga ‘o mali mo Sisipeli ‘ōfefine ‘o ‘Eti-peali ko e Tu‘i Saitoni, ‘o ne ‘alu ‘o tauhi kia Peali, mo lotu ki ai. 32Pea ne fokotu‘u ha ‘ōlita kia Peali ‘i he fale ‘o Peali kuo ne langa ‘i Samēlia. 33Pea ngaohi ‘e ‘Ēhapi ‘a e ‘āsela; pea na‘e fakautuutu ‘ene ngāue ke langa‘i ‘a e houhau ‘o Sihova ko e ‘Otua ‘o ‘Isileli, ‘o hulu atu ‘i he ngaahi Tu‘i ‘Isileli kotoa pē na‘e holomu‘a ‘iate ia. 34‘I hono taimi ‘o‘ona na‘e langa kolo ‘a Sielikō ‘e Hieli ko e tangata Pēteli: na‘e fai hono tanu pou ‘aki hono ‘uluaki foha ko ‘Apilami, ‘o ne fokotu‘u ‘aki hono ngaahi matanikolo hono foha ki mui ko Sēkupi; ‘o hangē ko e folofola ‘a Sihova na‘a ne fakafai ‘ia Siosiua foha ‘o Nuni.#Sios 6.26
Currently Selected:
KO 1 TU‘I 16: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
