KO 1 TU‘I 15
15
Ko Tu‘i Siuta ko ‘Āpaiami
(2 Kal 13.1–14.1)
1PEA ‘i hono hongofulu mā valu ta‘u ‘o Kingi Selopoame foha ‘o Nīpati na‘e kamata pule ‘a ‘Āpaiami ki Siuta. 2Na‘e tolu ta‘u ‘ene hau ‘i Selusalema; pea ko e hingoa ‘o ‘ene fa‘ē ko Mā‘aka ko e ‘ōfefine ‘o ‘Apisalome. 3Pea fou ia ‘i he ngaahi angahala ne tomu‘a fai ‘e he‘ene tamai, pea na‘e ‘ikai haohaoa hono loto ‘i he fakafeangai kia Sihova ko hono ‘Otua, hangē ko e loto ‘o ‘ene kui ko Tēvita. 4Ka koe‘uhi telia ‘a Tēvita, ko ia na‘e tuku ai ‘e Sihova ko hono ‘Otua ha‘ane maama ‘i Selusalema, he fokotu‘u hono hako ki mui mo fokotu‘u ma‘u ‘a Selusalema:#1 Tu‘i 11.36 5koe‘uhi na‘e fai ‘e Tēvita ‘a e me‘a na‘e hā totonu kia Sihova, ‘o ‘ikai te ne afe ki he ngaahi me‘a kuo ne tu‘utu‘uni kiate ia lolotonga ‘ene mo‘ui, ngata pē ‘i he me‘a ‘a e Heti ko ‘Ūlaia.#2 Sām 11.1-27 6Pea na‘e tau ma‘u pē ‘a e vaha‘a ‘o Lehopoame mo Selopoame lolotonga ‘ene mo‘ui ‘a‘ana. 7Pea ko hono toe ‘o e ngāue ‘a ‘Āpaiami, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i Siuta? Pea na‘e tau ‘a e vaha‘a ‘o ‘Āpaiami mo Selopoame.
8Pea toka ‘a ‘Āpaiami mo ‘ene ngaahi kui, pea na‘a nau telio ia ‘i Kolo-‘o-Tēvita, pea na‘e fetongi ia ‘i he pule ‘e hono foha ko ‘Asa.
Ko e Tu‘i Siuta ko ‘Asa
(2 Kal 15.16–16.6)
9Pea ‘i hono uofulu ta‘u ‘o Selopoame ko e Tu‘i ‘Isileli na‘e kamata pule ‘a ‘Asa ki Siuta. 10Pea na‘e fāngofulu mā taha ta‘u ‘ene hau ‘i Selusalema; pea ko e hingoa ‘o ‘ene fa‘ē ko Mā‘aka ko e ‘ōfefine ‘o ‘Apisalome. 11Pea fai ‘e ‘Asa ‘a e me‘a na‘e hā totonu ki he finangalo ‘o Sihova, ‘o hangē ko ‘ene kui ko Tēvita. 12Pea ne ‘ave ‘a e kau fakasōtoma mei he fonua, ‘o ne hiki mo e ngaahi ‘aitoli ne ngaohi ‘e he‘ene ngaahi kui. 13‘Io, na‘a ne hifo foki ‘ene fa‘ē ko Mā‘aka mei he‘ene ma‘itaki koe‘uhi kuo ne ngaohi ha ‘īmisi fakalielia ma‘ane ‘āsela: pea tā ‘e ‘Asa ‘ene ‘īmisi, ‘o ne tutu ‘i he vai ko Kitiloni. 14Ka na‘e ‘ikai mole ‘a e ngaahi sia; ka neongo ia ka na‘e haohaoa ‘a e loto ‘o ‘Asa he‘ene fakafeangai kia Sihova lolotonga ‘ene mo‘ui. 15Pea ne fakahū ki he fale ‘o Sihova ‘a e ngaahi me‘a ne fakatāpui ‘e he‘ene tamai mo e ngaahi me‘a kuo ne fakatāpui ‘e ia, ‘a e siliva mo e koula mo e nāunau.
16Pea na‘e tau ‘a e vaha‘a ‘o ‘Asa mo Pā‘asa ko e Tu‘i ‘Isileli lolotonga ‘ena mo‘ui. 17Pea ‘alu hake ‘a Pā‘asa ko e Tu‘i ‘Isileli ke tau‘i ‘a Siuta, pea ne ngaohi ‘a Lama ke ta‘ofi ‘a e fehūfaki ‘a e kakai kia ‘Asa ko e Tu‘i Siuta. 18Pea to‘o ‘e ‘Asa hono kotoa ‘o e siliva mo e koula na‘e toe ‘i he fale koloa ‘o e fale ‘o Sihova, mo e ngaahi fale koloa ‘o e fale ‘o e tu‘i, ‘o ne tuku ia ki he nima ‘o ‘ene kau tamaio‘eiki: pea fekau kinautolu ‘e Kingi ‘Asa kia Peni-hetati, foha ‘o Tapilimoni, foha ‘o Hesioni, ko e Tu‘i Sīlia na‘e nofo ‘i Tāmasikusi, ke fakahā, 19‘oku ai ha talite ‘i hota vaha‘a mo e vaha‘a ‘o ‘eta tamai: vakai kuo u tuku atu ha me‘a‘ofa ko e siliva mo e koula; ha‘u ā, maumau‘i ho‘omo talite mo Pā‘asa ko e Tu‘i ‘Isileli, ka ne hiki meiate au.
20Pea tokanga ‘a Peni-hētati kia Kingi ‘Asa, ‘o ne fekau atu ‘a e hou‘eiki ‘o ‘ene tau ke tau‘i ‘a e ngaahi kolo ‘o ‘Isileli, ‘o ne taa‘i ‘a ‘Ioni, mo Tani, mo ‘Ēpelipetema‘aka, mo Kineloti kātoa, fakataha mo e fonua kotoa ‘o Nafitalai. 21Pea ‘i he ‘iloange na‘e fanongo ‘e Pā‘asa ki ai, pea ne tuku ‘ene ngaohi ‘a Lama, ‘o ne nofo ki Tīlisa.
22Pea fai ha fanongonongo ‘e Kingi ‘Asa ki Siuta kātoa: na‘e ‘ikai ha taha ‘e ‘atā: pea nau fetuku ‘a e ngaahi maka ‘o Lama, mo e ‘akau na‘e fai ‘aki hono langa ‘e Pā‘asa; pea ngaohi ‘aki ia ‘e Kingi ‘Asa ‘a Kepa ‘i Penisimani, pea mo Mīsipa.
23Pea ko hono toe kotoa ‘o e ngāue ‘a ‘Asa, mo hono fu‘u ivi, mo e me‘a kehekehe na‘a ne fai, mo e ngaahi kolo na‘a ne langa, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i Siuta? Ka ‘i he‘ene motu‘a na‘a ne mahaki va‘e. 24Pea toka ‘a ‘Asa mo ‘ene ngaahi kui, pea na‘e telio ia mo ‘ene ngaahi kui ‘i he kolo ‘o ‘ene kui ko Tēvita: pea na‘e fetongi ia ‘i he pule ‘e hono foha ko Sihosafate.
25Pea ko Nātapi foha ‘o Selopoame na‘e hoko ‘o Tu‘i ‘Isileli ‘i he ua ta‘u ‘o ‘Asa ko e Tu‘i Siuta, pea ne pule ki ‘Isileli ‘o ua ta‘u. 26Pea ne fai ‘a e me‘a na‘e tau kovi ki he finangalo ‘o Sihova, ‘o ne fou ‘i he ‘alunga ‘o ‘ene tamai, ‘io, he‘ene angahala ‘a ia na‘a ne fakaangahala ‘aki ‘a ‘Isileli.
27Pea puleaki‘i ia ‘e Pā‘asa foha ‘o ‘Āhaia, na‘e kau ki he fale ‘o ‘Īsaka: pea na‘e taa‘i ia ‘e Pā‘asa ‘i Kipetoni ‘a ia na‘e ‘o e kau Filisitia: he na‘e fai hono ‘ākolo‘i ‘e Nātapi mo ‘Isileli kātoa. 28‘Io, na‘e tāmate‘i ia ‘e Pā‘asa ‘i he tolu ta‘u ‘o ‘Asa ko e Tu‘i Siuta, ‘o ne fetongi ia ‘i he tu‘i. 29Pea ‘i he ma‘u leva hono hau, pea ne taa‘i ‘a e fale kotoa ‘o Selopoame; na‘e ‘ikai te ne fakatoe kia Selopoame ha taha ‘oku kei mānava, ka ne faka‘osi pē; ‘o hangē ko e folofola ‘a e ‘Eiki, ‘a ia na‘a ne fakafai ‘i he‘ene sevāniti ko ‘Āhaia ko e tangata Sailo;#1 Tu‘i 14.10 30koe‘uhi ko e ngaahi angahala ‘a Selopoame na‘a ne fai ‘e ia mo ne fakaangahala ‘aki ‘a ‘Isileli foki: ‘a e pau‘u na‘a ne faka‘ita ‘aki ‘a Sihova ko e ‘Otua ‘o ‘Isileli.
31Pea ko hono toe ‘o e ngāue ‘a Nātapi, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli? 32Pea na‘e tau ‘a e vaha‘a ‘o ‘Asa mo Pā‘asa ko e Tu‘i ‘Isileli lolotonga ‘ena mo‘ui.
33‘I he tolu ta‘u ‘o ‘Asa ko e Tu‘i Siuta na‘e hoko ‘a Pā‘asa foha ‘o ‘Āhaia ko e Tu‘i ‘o ‘Isileli kātoa, pea ne hau ‘i Tīlisa ‘o ta‘u uofulu mā ua. 34Pea fai ‘e ia ‘a e me‘a na‘e tau kovi ki he finangalo ‘o Sihova, ‘o ne fou ‘i he ‘alunga ‘o Selopoame, ‘io, ‘i he‘ene angahala ‘a ia na‘a ne fakaangahala ‘aki ‘a ‘Isileli.
Currently Selected:
KO 1 TU‘I 15: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
