KO 1 TU‘I 14
14
Ko e Pekia ‘a Selopoamé
1‘I HE taimi ko ia na‘e puke ‘a ‘Āpaia ko e foha ‘o Selopoame. 2Pea lea ‘a Selopoame ki hono uaifi, ‘Eni, hanga mu‘a ‘o fakakehe koe ke ‘oua na‘a nau ‘ilo ko e uaifi koe ‘o Selopoame: pea ke ‘alu ki Sailo; he ‘oku ‘i ai ‘a ‘Āhaia ko e palōfita, ‘a ia na‘a ne tala kiate au te u tu‘i ki he kakai ni. 3Pea ‘alu mo koe ha hongofulu‘i fo‘i mā, mo e ngaahi keke pulepule,#14.3 pulepule; pe avaava-hangē ko e pisiketé. mo e saka honi, pea ke a‘u ki ai: te ne fakahā atu ‘e ia ‘a e me‘a ‘e hoko ki he tama.
4Pea fai pehē ‘a e finemotu‘a ‘o Selopoame, ‘o ne tu‘u ‘o ‘alu ki Sailo, ‘o ne a‘u ki he fale ‘o ‘Āhaia. Pea na‘e ‘ikai lava ‘e ‘Āhaia ke sio: he kuo ma‘u hono mata ko e me‘a ‘i he‘ene motu‘a. 5Pea folofola ‘a e ‘Eiki kia ‘Āhaia, Sī! ‘oku ha‘u ‘a e uaifi ‘o Selopoame ke huhū kiate koe ‘i he‘ene tama; he ‘oku mahaki‘ia; ‘e pehē mo pehē ho‘o tali ki ai: he ka ha‘u ia, te ne hangē ha fefine kehe.
6Pea ko ia, ‘i he ongo‘i leva ‘e ‘Āhaia ‘ene taulaka he‘ene hū mai ‘i he matapā, pea ne pehē, Hū mai, uaifi ‘o Selopoame; ko e hā ena kuo ke fie fakafefine kehe ai? he ko e fekau fefeka kuo u ma‘u kiate koe. 7‘Alu, tala kia Selopoame, Ko eni ‘a e folofola ‘a Sihova ko e ‘Otua ‘o ‘Isileli, Ko eni, ne u ‘ohake koe mei he lotolotonga ‘o e kakai, pea u tuku ke ke ‘eiki ki hoku kakai ‘Isileli, 8pea u hae ‘a e pule‘anga mei he fale ‘o Tēvita, ‘o ‘atu kiate koe: ka kuo ‘ikai te ke hangē ko ‘eku tamaio‘eiki ko Tēvita, ‘a ia na‘a ne tauhi ‘eku ngaahi tu‘utu‘uni, ‘o ne muimui kiate au ‘aki hono loto kotoa ke fai pē ‘a e me‘a ‘oku hā totonu kiate au. 9Kuo hulu ho‘o fai kovi ‘iate kinautolu na‘e to‘omu‘a ‘iate koe, kuo ke ‘alu ‘o ngaohi hao ‘otua kehe, mo ni fakatātā ukamea ke langa‘i ‘eku ‘ita; pea ko au kuo ke sī ki ho tu‘a: 10ko hono ‘ō ia, vakai, ko au eni ‘oku ou ‘omi ha mala ki he fale ‘o Selopoame, pea te u tu‘usi meia Selopoame na‘a mo e tamaiki tangata, ‘a ia ‘oku mo‘ua mo ia ‘oku tau‘atāina ‘i ‘Isileli; ‘io, te u tafi‘i atu ‘a e fale ‘o Selopoame, ‘o hangē ko e tafi kinoha‘a, kae‘oua ke ‘osi‘osingamālie.#1 Tu‘i 15.29 11Ko ha‘a Selopoame ‘oku mate ‘i he kolo ‘e keina ‘e he fanga kulī; pea ko ia ‘e mate ‘i he vao ‘e keina ‘e he manupuna ‘o e ‘atā: he ko e folofola ia ‘a e ‘Eiki.
12Pea ko koe, tu‘u, ‘o ‘alu ki ho fale: pea ‘i he tu‘u ho va‘e ki he kolo ‘e pekia ‘a e tamasi‘i. 13Pea ‘e fai hono tēngihia ‘e ‘Isileli kātoa, pea te nau tanu ia; he ko ia pē toko taha ‘i he ha‘a Selopoame ‘e a‘u ki he fa‘itoka: koe‘uhiā ko ia pē ‘i he fale ‘o Selopoame kuo ‘ilo ai ha‘ane lelei kia Sihova ko e ‘Otua ‘o ‘Isileli. 14Pea ‘e fokotu‘u ‘e Sihova hano tu‘i ki ‘Isileli, ‘a ia te ne tu‘usi ‘a e fale ‘o Selopoame ‘i he taimi ko ia–he ko e hā? kuo hoko foki.#14.14 ‘i he… foki. ‘Oku ‘ikai ke mahino ‘a e ‘uhinga ‘o e ngaahi kupu‘i leá ni ‘i he faka-Hepeluú. 15Pea ‘e taa‘i ‘e Sihova ‘a ‘Isileli, ‘o hangē ko e ue‘i holo ha kaho ‘oku tu‘u ‘i ha vai; pea te ne ta‘aki fu‘u ‘a ‘Isileli mei he kelekele lelei, ‘a ia na‘a ne foaki ki he‘enau ngaahi kui, pea te ne veteki atu kinautolu ‘i he kauvai ko ē ‘o e Vaitafe; koe‘uhi kuo nau ngaohi ‘enau ngaahi ‘Āsela, ‘o langa‘i ai ‘a e houhau ‘o e ‘Eiki. 16Pea te ne tukutuku atu ‘a ‘Isileli koe‘uhi ko e ngaahi angahala ‘a Selopoame, ‘a ia na‘a ne fai ‘e ia, mo ia na‘a ne fakatupu hono fai ‘e ‘Isileli.
17Pea tu‘u ‘a e uaifi ‘o Selopoame, ‘o ne ‘alu, ‘o ne a‘u ki Tīlisa: ko e tu‘u leva hono va‘e ki he hū‘anga ‘o e fale pea pekia ‘a e tama. 18Pea nau tanu ia, pea tēngihia ia ‘e ‘Isileli kātoa, hangē ko e folofola ‘a e ‘Eiki, ‘a ia na‘a ne fakafai ‘i he‘ene tamaio‘eiki ko ‘Āhaia ko e palōfita.
19Pea ko hono toe ‘o e ngaahi me‘a ‘a Selopoame, ‘a ‘ene tau, mo ‘ene pule, vakai kuo tohi ia ‘i he Puka ‘o e Kalonikali ‘o e ngaahi Tu‘i ‘Isileli. 20Pea ko e fuoloa ‘o e pule ‘a Selopoame ko e ta‘u ‘e uofulu mā ua: pea ne toka mo ‘ene ngaahi kui, pea na‘e fetongi ia ‘i he pule ‘e hono foha ko Nātapi.
Ko e Tu‘i Siuta ko Lehopoame
(2 Kal 11.5–12.15)
21Pea na‘e Tu‘i Siuta ‘a Lehopoame ko e foha ‘o Solomone. Na‘e fāngofulu mā taha ta‘u ‘a Lehopoame ‘i he‘ene kamata pule, pea na‘e hongofulu mā fitu ta‘u ‘ene hau ‘i Selusalema, ‘a e kolo ne fili ‘e Sihova mei he ngaahi matakali ‘Isileli ke ‘ai ki ai hono huafa: pea ko e hingoa ‘o ‘ene fa‘ē ko Nā‘ama ko e fefine ‘Āmoni.
22Pea fai ‘e Siuta ‘a e me‘a na‘e tau kovi ki he finangalo ‘o Sihova, pea na‘a nau fakafua‘a‘i ia ‘aki ‘a e ngaahi angahala na‘a nau fai, ‘o hulu atu ‘i he me‘a na‘e fai ‘e he‘enau ngaahi kui. 23He na‘a nau ngaohi ‘e kinautolu na foki hanau ngaahi ‘esi, mo e pou tapu, mo e ngaahi ‘āsela, ‘i he ngaahi funga mo‘unga mā‘olunga mo e ngaahi lolo ‘akau mata;#2 Tu‘i 17.9-10 24pea na‘e ‘i he fonua foki ‘a e fakasōtoma: na‘a nau fai tatau mātē mo e ngaahi me‘a fakalielia ‘o e ngaahi kakai kuo kapusi ‘e Sihova mei he ‘ao ‘o ha‘a ‘Isileli.#Teu 23.17
25Pea ‘i he faifai pea hoko hono nima ta‘u ‘o e pule ‘a Kingi Lehopoame na‘e ‘alu hake ki Selusalema ‘a Sīsake ko e Tu‘i ‘Isipite: 26pea na‘a ne ‘ave ‘a e koloa ‘o e fale ‘o Sihova, mo e koloa ‘o e fale ‘o e tu‘i; ‘io, na‘a ne ‘ave hono kotoa: pea ne ‘ave ‘a e ngaahi pā koula na‘e ngaohi ‘e Solomone.#1 Tu‘i 10.16-17; 2 Kal 9.15-16 27Pea na‘e ngaohi ‘e Kingi Lehopoame ha ngaahi pā palasa monau fetongi, ‘o ne tuku ke tauhi ‘e he hou‘eiki ‘o e ka‘ate na‘e le‘o ‘i he matapā ‘o e fale ‘o e tu‘i. 28Pea ko ia, ka hā‘ele ‘a e tu‘i ki he fale ‘o Sihova na‘e to‘o ia ‘e he ka‘ate, ‘o nau foki mai mo kinautolu ki he tā ‘o e fale ka‘ate.
29Pea ko hono toe ‘o e ngāue ‘a Lehopoame, mo e ngaahi me‘a na‘a ne fai, ‘ikai kuo tohi ia ‘i he Puka ‘o e Kalonikali ‘o e ngaahi Tu‘i Siuta. 30Pea na‘e tau ma‘u pē ‘a e vaha‘a ‘o Lehopoame mo Selopoame. 31Pea toka ‘a Lehopoame mo ‘ene ngaahi kui, pea na‘e telio ia mo ‘ene ngaahi kui ‘i Kolo-‘o-Tēvita: pea ko e hingoa ‘o ‘ene fa‘ē ko Nā‘ama ko e fefine ‘Āmoni. Pea na‘e fetongi ia ‘i he pule ‘e hono foha ko ‘Āpaiami.
Currently Selected:
KO 1 TU‘I 14: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
