KO 1 TU‘I 13
13
1PEA tā na‘e ha‘u ha tangata ‘o e ‘Otua mei Siuta ‘i he fekau ‘a Sihova ki Pēteli: ‘oku lolotonga tu‘u ‘a Selopoame ‘i he ‘ōlita ke tutu ‘inisēnisi. 2Pea ne talatuki‘i ‘a e ‘ōlita, ‘i he funga ‘o e folofola ‘a Sihova, ‘o pehē, ‘E ‘ōlita, ‘ōlita; ko eni ‘a e folofola ‘a Sihova: Tala atu, ‘e ‘alo‘i ha taha ‘i he fale ‘o Tēvita ko Siosaia hono hingoa, ‘a ia te ne feia ‘i ho funga ‘a e kau taula ‘o e ngaahi sia, ‘a ia ‘oku tutu ‘inisēnisi ‘iate koe, pea te nau fakamomofi ‘i ho funga na ‘a e ngaahi hui ‘o e kakai.#2 Tu‘i 23.15-16 3Pea ne tuku leva ha faka‘ilonga he‘ene pehē, Ko eni ‘a e faka‘ilonga kuo tala ‘e Sihova: Vakai, ‘e mahae ‘a e ‘ōlita na, pea malingi mai ‘a e efuefu ‘oku ‘i ai.
4Pea ‘i he fanongo leva ‘e he tu‘i ki he lea ‘a e tangata ‘o ‘Elohimi, ‘ene talatuki‘i ‘a e ‘ōlita ‘i Pēteli, pea mafao atu ‘e Selopoame hono nima mei he ‘ōlita, ‘o ne pehē, puke ia. Pea mate ‘a e nima na‘e mafao atu ki ai, ‘o ‘ikai te ne lava ke peluki mai. 5Na‘e mahae foki ‘a e ‘ōlita, pea malingi mai ‘a e efuefu na‘e ‘i ai, hangē ko e faka‘ilonga na‘e tuku mai ‘e he tangata ‘o ‘Elohimi ‘i he funga ‘o e folofola ‘a Sihova. 6Pea tali ‘a e tu‘i, ‘o ne folofola ki he tangata ‘o ‘Elohimi, Fakamokomoko mu‘a ki he finangalo ‘o Sihova ko ho ‘Otua, pea hufekina au ke mo‘ui mai hoku nima. Pea fai ‘e he tangata ‘o ‘Elohimi ke fakamokomoko ‘a e finangalo ‘o Sihova; pea na‘e mo‘ui mai ‘a e nima ‘o e tu‘i ‘o hangē ko e ‘anenai.
7Pea folofola ‘a e tu‘i ki he tangata ‘o ‘Elohimi, Ta ō ki ‘api ke ke ma‘u ha tokoni, ka u ‘atu ha me‘a‘ofa.
8Pea fakatau folofola ‘a e tangata ‘o ‘Elohimi ki he tu‘i, Ka ne ke fie ‘omi ‘a e vaeua ‘o ho fale, ‘e ‘ikai te u hū ki ho ‘api, pea ‘e ‘ikai te u kai me‘akai pe inu vai ‘i he potu ni: 9he na‘e pehē hoku tu‘utu‘uni ‘i he folofola mai ‘a e ‘Eiki, ‘Oua te ke kai me‘akai, pea ‘oua te ke inu ha vai, pea ‘oua te ke foki ‘i he hala na‘a ke ‘alu atu ai. 10Ko ia na‘a ne ‘alu ‘i ha hala kehe, ‘o ‘ikai te ne foki ‘i he hala kuo ne ha‘u ai ki Pēteli.
Ko e Palōfita Motu‘a ‘o Pēteli
11Pea na‘e ai ha palōfita motu‘a na‘e nofo ‘i Pēteli; pea ha‘u hono foha#13.11 hono foha; Ko hono faka-Hepeluú ia, ka ‘oku pehē he ngaahi hiki ‘e ni‘ihi: hono ngaahi foha. ‘o ‘a‘au kiate ia ‘a e ngāue kotoa kuo toki fai ‘e he tangata ‘o ‘Elohimi ‘i Pēteli: ko e ngaahi lea foki na‘a ne fai ki he tu‘i na‘a nau ‘a‘au ki he‘enau tamai. 12Pea pehē ‘e he‘enau tamai kiate kinautolu, Ko e fē ‘a e hala na‘a ne ‘alu ai? Pea kuo vakai#13.12 kuo vakai; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: kuo nau fakahā ange. ‘e he‘ene fānau ‘a e hala na‘e fou ai ‘a e tangata ‘o ‘Elohimi ‘a ia na‘e ha‘u mei Siuta. 13Pea ne pehē ki he‘ene fānau, Teuteu ‘a e ‘asi ma‘aku. Pea nau teuteu ‘a e ‘asi ma‘ana: pea ne heka ai. 14Pea ne tulimui atu ki he tangata ‘o ‘Elohimi, ‘o ne ma‘u ia ‘oku ne nofo ‘i he lolo ‘oke: pea ne lea ange ki ai, Ko koe ‘a e tangata ‘a ‘Elohimi na‘e ha‘u mei Siuta?
Pea ne tali, Ko au.
15Pea ne pehē ange, Ta ō ki ‘api, ‘o kai me‘akai.
16Pea ne tali, ‘E ‘ikai te u fa‘a foki mo koe pe hū ki ho ‘api: pea ‘e ‘ikai te u kai me‘akai pe inu mo koe he ‘aho ni ‘i he potu ni: 17he na‘e tala mai ‘i he folofola ‘a Sihova, ‘Oua te ke kai me‘akai ai pe inu vai, ‘oua te ke foki ‘o fou ‘i he hala na‘a ke ‘alu atu ai.
18Pea ne tali ki ai, Ko e palōfita foki mo au hangē ko koe; pea na‘e lea kiate au ha ‘āngelo ‘i he funga ‘o e folofola ‘a Sihova, ‘o pehē, Fakafoki ia mo koe ki ho fale, ke ne kai me‘akai mo inu vai: ko ‘ene loi ki ai.
19Ko ia na‘a ne foki mo ia, ‘o ne kai me‘akai ‘i hono fale mo inu vai. 20Pea ‘iloange, lolotonga na‘a na nofo ‘i he tēpile, na‘e hoko ‘a e folofola ‘a Sihova ki he palōfita kuo fakafoki ia: 21pea ne kalanga ki he tangata ‘o ‘Elohimi ne ha‘u mei Siuta, ‘o pehē, Ko eni ‘a e folofola ‘a Sihova, Ko e me‘a ‘i ho‘o talangata‘a ki he folofola tonu ‘a e ‘Eiki, ‘o ‘ikai te ke tauhi ‘a e tu‘utu‘uni na‘e kouna atu ‘e Sihova ko ho ‘Otua, 22ka kuo ke foki, pea kuo ke kai me‘akai mo inu vai ‘i he potu na‘e fakahā ai kiate koe, ‘E ‘ikai te ke kai me‘akai ai pe inu vai; ko ia, ‘e ‘ikai hoko ho ‘anga‘anga ki he fa‘itoka ‘o ho‘o ngaahi kui.
23Pea kuo ‘osi ‘ene kai me‘akai, pea kuo ‘osi ‘ene inu, pea ne teu ma‘ana ‘a e ‘asi–ko e pehē ma‘a e palōfita kuo ne fakafoki. 24Pea kuo ne ‘alu, pea ma‘u ia ‘e ha laione ‘i he hala, ‘o tāmate‘i ia: pea tekefili hono ‘anga‘anga ‘i he hala, pea mo‘utu‘ua ‘a e ‘asi ‘i hono tafa‘aki: ko e laione foki na‘e tu‘u ‘i he tafa‘aki ‘o e ‘anga‘anga. 25Pea faifai pea laka ange ha tu‘unga me‘a, ‘o nau vakai ‘a e ‘anga‘anga ‘oku tekefili ‘i he hala, mo e laione ‘oku tu‘u ‘i hono tafa‘aki; pea nau omi ‘o talanoa ki ai ki he kolo na‘e nofo ai ‘a e palōfita motu‘a.
26Pea ‘i he fanongo ki ai ‘a e palōfita kuo fakafoki ia mei hono fononga, na‘a ne pehē leva, Ko e tangata ‘o ‘Elohimi ia ‘a ia na‘a ne talangata‘a ki he folofola tonu ‘a Sihova: ko ia kuo tukuange ai ia ‘e Sihova ki he Saione, pea kuo ne hae ia mo tāmate‘i, hangē ko e folofola ‘a e ‘Eiki na‘a ne fai kiate ia. 27Pea ne lea ki he‘ene fānau, ‘o pehē, Teuteu mai ‘a e ‘asi. Pea nau teuteu ia. 28Pea na‘a ne ‘alu, ‘o ‘ilo hono ‘anga‘anga ‘oku tekefili ‘i he hala, mo e ‘asi mo e laione ‘oku tu‘u ‘i he tafa‘aki ‘o e ‘anga‘anga: kuo ‘ikai keina ‘e he laione ‘a e ‘anga‘anga, pea kuo ‘ikai te ne hae ‘a e ‘asi. 29Pea hiki ‘e he palōfita ‘a e ‘anga‘anga ‘o e tangata ‘o ‘Elohimi, ‘o ne hilifaki ki he ‘asi, ‘o ne fakafoki ia: pea ne ha‘u ki he kolo ‘o e palōfita motu‘a ke tēngihia mo tanu ia. 30Pea ne fai ‘a e ‘anga‘anga ‘i hono faitoka ‘o‘ona; pea nau tēngihia ia ‘i hono funga, ‘o pehē, ‘Oiauē ‘alā! 31Pea kuo hili ‘ene fai ia, na‘a ne fekau ki he‘ene fānau, ‘o pehē, Kau ka pekia au, pea mou tanu au ‘i he fa‘itoka ‘oku fai ai ‘a e tangata ‘o ‘Elohimi; fakatoka hoku ngaahi hui ‘i he tafa‘aki ‘o hono ngaahi hui ‘o‘ona. 32He kuo pau ke hoko ‘a e lea na‘a ne kalanga ‘aki ‘i he funga ‘o e folofola ‘a Sihova, ‘o kau ki he ‘ōlita ‘oku ‘i Pēteli, mo e ngaahi fale sia ‘oku ‘i he ngaahi kolo ‘o Samēlia.
Ko e Tefito‘i Faiangahala ‘a Selopoamé
33Neongo e me‘a ko ia, ka na‘e ‘ikai foki ‘a Selopoame mei hono hala kovi; ka ne fai atu ai pē ‘ene fokotu‘u noa ‘a e kakai ke taula‘eiki ‘i he ngaahi sia: ‘ilonga ia na‘e manako ai na‘a ne fakanofo ia ke ai ha ngaahi taula‘eiki ‘i he ngaahi sia. 34Pea na‘e tupu ‘i he me‘a ko ia ‘a e hoko ‘a e fale ‘o Selopoame ko e me‘a angahala, ‘o iku ki hono tu‘usi mo faka‘auha mei he funga ‘o e kelekele.
Currently Selected:
KO 1 TU‘I 13: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
