KO 1 TU‘I 12
12
Ko e Angatu‘u ‘a e ngaahi Matakali he Tokelaú
(2 Kal 10.1-19)
1PEA hā‘ele ‘a Lehopoame ki Sikemi; he kuo ha‘u ki Sikemi ‘a ‘Isileli kātoa ke fakanofo ia. 2Pea ‘i he fanongo ki ai ‘e Selopoame foha ‘o Nīpati (he na‘a ne kei ‘i ‘Isipite,#12.2 na‘á ne… ‘Isipite; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: na‘á ne foki mai mei ‘Isipite. (pea vakai kia 2 Kal 10.2). ‘a ia na‘a ne hola ki ai mei he ‘ao ‘o Kingi Solomone, ‘o ne nofo ai, ka nau fekau ki ai ke ne ha‘u): 3pea ōmai ‘a Selopoame mo e fakataha kotoa ‘o ‘Isileli, ‘o nau alea mo Lehopoame, ‘o pehē, 4Na‘e fakafaingata‘a ‘e ho‘o ‘eiki homau ‘ioke, kae ‘ofa ke fakama‘ama‘a ‘e he ‘afiona ‘a e fatongia ‘a ho‘o ‘eiki, mo e ‘ioke mamafa na‘a ne ‘ai kiate kimautolu, pea te mau tauhi kiate koe.
5Pea ne folofola kiate kinautolu, Mou tutuku mu‘a ‘o ‘aho tolu, ‘o toki foki mai kiate au. Ko ia na‘e tutuku ‘a e kakai.
6Pea huhū ‘a Kingi Lehopoame ki he kau mātu‘a na‘e fakafe‘ao ki he‘ene ‘eiki ko Solomone, he taimi na‘a ne mo‘ui ai, ‘o pehē, Ko e hā ha‘amou ‘uta ki ha tali te u fai ki he kakai ni?
7Pea nau fakatau folofola kiate ia, ‘o pehē, Kapau te ke sevāniti ki he kakai ni he ‘aho ni, ‘o fai ki honau loto, ‘o tali ‘enau me‘a, ‘o ke fai kiate kinautolu ha ngaahi lea lelei, pea te nau hoko ko ho‘o ngaahi sevāniti ‘o ta‘engata.
8Ka na‘a ne fakatale‘i ‘a e tokoni ‘a e kau mātu‘a, ‘a ia na‘a nau fale‘i ia, ka ne huhū ki he kau talavou na‘e fe‘ao mo ia, ‘a kinautolu kuo nau tupu fakataha. 9Pea ne folofola kiate kinautolu, Ko e hā ‘a e ‘uta ‘amoutolu ki ha tali te tau fai ki he kakai ni, ‘a ia kuo nau lea mai, ‘o pehē, Fakama‘ama‘a ki he ‘ioke, ‘a ia ne ‘ai ‘e ho‘o ‘eiki kiate kimautolu.
10Pea fakatau folofola kiate ia ‘e he kau talavou na‘e to‘ume‘a mo ia, ‘o pehē, Ko eni ho‘o folofola ‘e fai ki he kakai na, ‘a ia kuo nau pehē atu, Ko ho‘o ‘eiki na‘a ne ‘ai homau ‘ioke ke mamafa, ka ke fakama‘ama‘a pē ‘e he ‘afiona–ko eni ho‘o folofola ke fai kiate kinautolu, ‘Oku fuolahi ange hoku tuhu si‘i ‘i he kongaloto ‘o ‘eku tamai. 11Pea ko eni, na‘e hilifaki kiate kimoutolu ‘e he‘eku ‘eiki ha ‘ioke mamafa, ka ko au te u fakalahi ki ai: na‘e haha uipi kimoutolu ‘e he‘eku tamai, ka ko au te u fai‘aki ‘a e ngaahi sikapio.
12Pea ha‘u ‘a Selopoame mo e kakai kotoa kia Lehopoame ‘i hono ‘aho tolu, hangē ko e folofola ‘a e tu‘i, he‘ene pehē, Mou foki mai ‘i hono ‘aho tolu. 13Pea tali fefeka ‘a e tu‘i ki he kakai, ‘o ne fakatale‘i ‘a e tokoni kuo fai ‘e he kau mātu‘a; 14ka ne lea kiate kinautolu ‘o hangē ko hono fale‘i ‘e he kau talavou, ‘o pehē, Na‘e ‘ai ‘e he‘eku tamai homou ‘ioke ke mamafa, ka ko au te u fakalahi ki ai: na‘e haha uipi kimoutolu ‘e he‘eku tamai, ka ko au te u haha kimoutolu ‘aki ‘a e ngaahi sikapio. 15Ko ia na‘e ‘ikai fakaongo ‘a e tu‘i ki he kakai: he na‘e meia Sihova hono le‘ei pehē, koe‘uhi ke ne fakaai ‘ene folofola na‘a ne fakafai ‘ia ‘Āhaia, ko e motu‘a Sailo kia Selopoame foha ‘o Nīpati.
16Pea ‘i he vakai ‘e ‘Isileli kuo ‘ikai fakaongo ‘e he tu‘i kiate kinautolu, na‘a nau tali ‘a e lea ‘a e tu‘i, ‘o pehē, Ko e hā hotau kaunga kia Tēvita? pea ‘oku ‘ikai hatau tofi‘a ‘i he foha ‘o Sese: takitaha ‘alu ki hono tēniti ‘a e tangata ‘Isileli; vakai ‘eni, ‘e Tēvita, ki ho fale ‘o‘ou.#2 Sām 20.1 Pea ‘alu ‘a ‘Isileli ki honau tēniti.
17Ka ko e me‘a ki he kau ‘Isileli na‘e nofo ‘i he ngaahi kolo Siuta na‘e pule pē ‘e Lehopoame kiate kinautolu.
18Pea fekau atu ‘e Kingi Lehopoame ‘a ‘Atolami, ‘a ia na‘e angi ‘i he fatongia; ka ka tolomaka‘i ia ‘e ‘Isileli kātoa, ‘o ne pekia. Pea nima mo e va‘e ‘a Kingi Lehopoame ke heka ki he‘ene sāliote ke hola ki Selusalema. 19Ko ia na‘e tu‘u ‘a ‘Isileli ki he fale ‘o Tēvita, pea talu ai pē.
20Ko ia ‘i he faifai pea fanongo ‘e ‘Isileli kātoa kuo foki ‘a Selopoame, na‘e ‘alu ‘enau fekau ki ai ke ne ha‘u ki he fakataha, pea nau fakanofo ia ke tu‘i ki ‘Isileli kātoa; na‘e ‘ikai ha ni‘ihi na‘e muimui ki he fale ‘o Tēvita, ngata pē ‘i he matakali ‘o Siuta.
Ko e Kikite ‘a Sēmaia
(2 Kal 11.1-4)
21Pea ha‘u ‘a Lehopoame ki Selusalema, ‘o ne fakatahataha ‘a e fale kotoa ‘o Siuta, mo e matakali ‘o Penisimani, ko e toko taha kilu mā valu mano na‘e fili ko ‘enau poto ‘i he tau, ke fai tau mo e fale ‘o ‘Isileli, ke fakafoki ‘a e pule‘anga kia Lehopoame foha ‘o Solomone. 22Ka ka hoko ‘a e folofola ‘a ‘Elohimi kia Sēmaia ko e tangata ‘o ‘Elohimi, 23‘o pehē, Lea kia Lehopoame foha ‘o Solomone, ko e Tu‘i Siuta, pea ki he fale kotoa ‘o Siuta mo Penisimani, pea ki hono toe ‘o e kakai, ‘o pehē, 24Ko eni ‘a e folofola ‘a Sihova, ‘Oua te mou ‘alu hake, pea ‘oua te mou fai tau mo homou kāinga ko ha‘a ‘Isileli: foki takitaha ki hono fale; he ‘oku meiate au ‘a e me‘a ni. Pea nau fakaongo ki he folofola ‘a Sihova, ‘o nau foki ‘o ‘alu, ‘o hangē ko e tala ‘a e ‘Eiki.
25Pea ngaohi ‘e Selopoame ‘a Sikemi ‘i he fonua mo‘unga ‘o ‘Ifalemi, ‘o ne nofo ai; ‘o ne ‘alu atu mei ai ‘o ngaohi ‘a Penueli. 26Pea pehē ‘e Selopoame ‘i hono loto, Tā ‘e foki ‘a e pule‘anga ki he fale ‘o Tēvita: 27kapau ‘e ‘alu hake ‘a e kakai ni ke fai feilaulau ‘i he fale ‘o Sihova ‘i Selusalema, pea ‘e foki ‘a e loto ‘o e kakai ni ki honau ‘eiki, ‘io, kia Lehopoame ko e Tu‘i Siuta; pea te nau tāmate‘i au, ‘o foki kia Lehopoame ko e Tu‘i Siuta.
28Ko ia na‘a nau alea, pea ngaohi ‘e he tu‘i ha ongo kafi koula; ‘o ne pehē ki he kakai, Koe‘uma‘ā fau ho‘omou ‘alu ki Selusalema; ko homou ‘Otua ē, ‘e ‘Isileli, ‘a ia ne na ‘ohake kimoutolu mei ‘Isipite.#‘Eki 32.4 29Pea ne fokotu‘u ‘a e taha ‘i Pēteli, pea ko e taha na‘a ne tuku ‘i Tani. 30Pea na‘e hoko ‘a e me‘a ko ia ko e me‘a fakahala: pea na‘e ‘alu ‘a e kakai ke hū ki he taha, ‘io, ‘o a‘u ki Tani.#12.30 Tani; Ko hono faka-Hepeluú ia, ka ‘oku pehē he hiki fuoloa ‘e taha: ki Pēteli mo Tani. 31Pea ne ngaohi fale ‘i he ngaahi sia, ‘o ne fokotu‘u taula‘eiki mei he kakai kotoa pē ‘o a‘u ki he kimui, ‘a kinautolu na‘e ‘ikai kau ki ha‘a Līvai.
32Pea fokotu‘u ‘e Selopoame ha kātoanga ‘i hono valu ‘o e māhina, ‘i hono ‘aho hongofulu mā nima, ‘o hangē ko e kātoanga ‘i Siuta, ‘o ne ‘alu hake ki he ‘ōlita;#Lev 23.33-34 #12.32 ‘o… ‘ōlita; pe ‘o ne fai feilaulau. na‘e pehē ‘ene fai ‘i Pēteli, ke feilaulau ki he ongo kafi kuo ne ngaohi: pea ne tuku ke fai ngāue ‘i Pēteli ‘a e kau taula‘eiki ‘o e ngaahi sia kuo ne ngaohi. 33Pea ne ‘alu hake ki he ‘ōlita kuo ne ngaohi ‘i Pēteli ‘i hono ‘aho hongofulu mā nima ‘i hono māhina valu, ‘a e māhina kuo ne fakakaukau ‘i hono loto ‘o‘ona: pea ne tu‘utu‘uni pea kātoanga ki ha‘a ‘Isileli, pea ne ‘alu hake ki he ‘ōlita ke tutu ‘inisēnisi.
Currently Selected:
KO 1 TU‘I 12: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
