KO 1 TU‘I 19

Ko ‘Ilaisiā mo e

1PEA fakahā ‘e ‘Ēhapi kia Sisipeli ‘a e me‘a kotoa kuo fai ‘e ‘Ilaisiā, kae‘uma‘ā e me‘a tēpū ‘ene faka‘auha ‘a e kau palōfita ‘aki ‘a e heletā. 2Pea ‘alu ‘a e fekau ‘a Sisipeli kia ‘Ilaisiā ke fakahā, ‘Ilo ‘e au ‘o lahi hake, ‘o kapau ‘e ‘ikai te u ngaohi ho‘o mo‘ui ke tatau mo ha taha ‘o kinautolu na fe‘unga mo e feitu‘ula‘ā ni ‘apongipongi. 3Pea ‘i he‘ene sio kuo pehē,#19.3Pea… pehē; ‘Oku hiki ‘e he ni‘ihi: Peá ne manavahē. na‘a ne tu‘u ‘o fononga telia ‘ene mo‘ui, ‘o ne a‘u ki Peasipa, ‘a ia ‘oku kau ki Siuta, ‘o ne tuku ‘ene talavou ‘i he potu ko ia.

4Ka ka ‘alu ia ki he toafa, ko e vā‘ihala ‘o e ‘aho ‘e taha, ‘o ne a‘u ki ha fu‘u siunipa na‘e tu‘u taha, ‘o ne nofo ‘i hono malumalu, ‘o ne kole ke ne mate mai; ‘o ne pehē, Kuo lahi; pea ke to‘o ni, ‘Eiki, ‘eku mo‘ui; he ‘oku ‘ikai te u lelei hake ‘i he‘eku ngaahi kui.#Sioná 4.3

5Pea ne tokoto ‘o mohe ‘i he lolo siunipa ko ia; pea ‘iloange na‘e ala kiate ia ha ‘āngelo, ‘o ne pehē, Tu‘u, ‘o kai. 6Pea ne fakasio, pea tā na‘e tu‘u mei hono ‘ulu ha keke tunu, mo ha hina vai. Pea ne kai mo inu, ‘o ne toe tokoto. 7Pea toe ha‘u ‘a e ‘āngelo ‘a Sihova ‘o ala kiate ia, ‘o ne pehē, Tu‘u, ‘o kai; he ‘oku lahi ‘a e fononga ‘i ho‘o mafai. 8Pea ne tu‘u, ‘o kai mo inu; pea ne ‘alu ‘aki ‘a e mālohi ‘o e kai ko ia, ‘o ‘aho fāngofulu mo pō fāngofulu, ‘o a‘u ki he Mo‘unga ‘o ‘Elohimi, ‘a Hōlepi. 9Pea ‘i he‘ene a‘u ki he ‘ana, na‘a ne afe ki ai ke mohe; pea ‘iloange na‘e hoko kiate ia ‘a e folofola ‘a e ‘Eiki na‘e pehē ange, Ko e hā ‘au ‘oku ke ‘i heni ai, ‘Ilaisiā?

10Pea ne tali, Ne u mātu‘aki fua‘a koe‘uhi ko Sihova ko e ‘Otua Sāpaoti; he kuo li‘aki ho‘o kovinānite ‘e ha‘a ‘Isileli, ko ho ngaahi ‘ōlita kuo nau holoki, pea ko ho‘o kau palōfita kuo nau tāmate‘i ‘aki ‘a e heletā: pea ko au pē ‘oku ou toe toko taha; pea ‘oku nau kumi foki ki he‘eku mo‘ui ke to‘o.#Lom 11.3

11Pea ne folofola mai, Hū ki tu‘a, ‘o tu‘u ‘i he mo‘unga ‘i he ‘ao ‘o Sihova. Pea ‘iloange na‘e hā‘ele ange ‘a Sihova, pea ko e matangi lahi mo mālohi na‘a ne have‘i ‘a e mo‘unga, mo fahi ‘a e ngaahi makatu‘u, ‘i he ‘ao ‘o Sihova; ka na‘e ‘ikai ‘i he matangi ‘a Sihova: pea hili ‘a e matangi na‘e mofuike; ka na‘e ‘ikai ‘i he mofuike ‘a Sihova: 12pea hili ‘a e mofuike ko e afi; ka na‘e ‘ikai ‘i he afi ‘a Sihova: pea hili ‘a e afi ko e le‘o na‘e ngananganaiki mai.

13Pea ‘i he fanongo leva ‘e ‘Ilaisiā ki ai, pea ne pūlou ‘aki hono pulupulu, ‘o ne hū ki tu‘a, ‘o ne tu‘u ‘i he ngutu ‘ana. Pea ‘iloange na‘e ongo mai ha le‘o na‘e pehē, Ko e hā ‘au ‘oku ke ‘i heni ai, ‘Ilaisiā?

14Pea ne tali, Ne u mātu‘aki fua‘a koe‘uhi ko Sihova ko e ‘Otua Sāpaoti; he kuo li‘aki ho‘o kovinānite ‘e ha‘a ‘Isileli, ko ho ngaahi ‘ōlita kuo nau holoki, pea ko ho‘o kau palōfita kuo nau tāmate‘i ‘aki ‘a e heletā; pea ko au pē ‘oku ou toe toko taha; pea ‘oku nau kumi ki he‘eku mo ui foki ke to‘o.

15Pea folofola ange ‘a e ‘Eiki kiate ia, ‘Alu, ‘o foki ho fononga, ‘o fai ki he Toafa ‘o Tāmasikusi: pea ‘i ho‘o a‘u ki ai, pea ke fakanofo ‘a Hesaeli ke Tu‘i Sīlia:#2 Tu‘i 8.7-13 16pea ko Sehu foha ‘o Nīmisi te ke fakanofo ke Tu‘i ‘Isileli, pea ko ‘Ilaisa foha ‘o Sāfati mei ‘Ēpeli-mēhola te ke fakanofo ke fetongi koe ‘i he palōfita.#2 Tu‘i 9.1-6 17Pea tala atu, ko ia ‘e hao mei he heletā ‘a Hesaeli ‘e tāmate‘i ‘e Sehu; pea ko ia ‘oku hao mei he heletā ‘a Sehu ‘e tāmate‘i ‘e ‘Ilaisa, 18ka te u#19.18 ‘Oku hiki ‘e he ni‘ihi: Kuo u. fakatoe ‘i ‘Isileli ha toko fitu afe; ko e ngaahi tui kotoa kuo ‘ikai peluki kia Peali, pea ko e ngaahi loungutu kotoa ‘oku ‘ikai ‘uma kiate ia.#Lom 11.4

Ko e Ui ‘o ‘Ilaisa

19Pea ne fononga mei ai, ‘o ne ma‘u ‘a ‘Ilaisa foha ‘o Sāfati ‘oku fai ‘ene palau ‘aki ha taulua‘i pulu ‘e hongofulu mā ua, ‘oku nau fakaholo atu, kae ‘i mui ia mo hono hongofulu mā ua; pea laka ange ‘a ‘Ilaisiā, ‘o ne lī ange ki ai hono pulupulu. 20Pea ne li‘aki ‘a e fanga manu, ‘o ne tulimui kia ‘Ilaisiā, ‘o ne pehē, Ka u ‘uma mu‘a ki he‘eku tamai mo ‘eku fa‘ē, ka u toki muimui atu. Pea ne tali ki ai, Seuke, foki atu pē, he ko e hā fua kuo u fai kiate koe?#19.20 Seuke… koe?; pe Foki atu ā. Ko hai ‘okú ne ta‘ofi koe?. pe Foki atu ā, ka ke toe foki mai, he ko e me‘a kuó u fai kiate koé ‘oku mahu‘inga.

21Pea ne foki meiate ia, ‘o ne to‘o ‘a e taulua‘i pulu, ‘o tāmate‘i ia, ‘o ne fefie ‘aki ‘a e nāunau ‘o e pulu ‘i he ngaohi hono kakano, ‘o ne ‘ange ki he kakai pea nau kai. Pea ne toki tu‘u, ‘o muimui kia ‘Ilaisiā, ‘o tauhi ia.

Currently Selected:

KO 1 TU‘I 19: TMB

Highlight

Copy