Ñwaè' Ruêm 8

1Banɛ bèe ce a Jisos Krǎis wèe a yu àbee a be kèr gwè mnsa' ka', 2njobè' ŋger Yʉ' ce yi vʉ̀ nè ryòŋ njo' Jisos Krǎis yi gèe mɛ̀ luŋ efa ŋger buu bbebep ba rkwe. 3Nyʉ̀ à gèe yuu ce mncir vi tʉr ŋger à rgèe ka', njobè' ŋwɛ̀ à mòo à rlɛ̀ mncir làr. E m tuu muu yì, e beeŋgèr à ŋwɛ̀ àmbò sèe ce sèe yu ŋgǎa ŋgèe buu bbebep, tɛ e bo gèe tɛ buu bbebep mî. A mbò e m so buu bbebep enjep sěe mntee à njɛ̌ɛ wa'a. 4Nyʉ̀ à m gèe wa'a tɛ sèe ce sèe ce gèe ŋgèe ba àmbò ŋwɛ̀ kòŋ ka', a ce gèe ba àmbò Yʉ' Nyʉ̀ yi ce kòŋ, bo gèe ba buu byɛɛnì ce vi ghɛɛte àmbò mncir vi ce làa. 5Bèe ce a ce gèe ba yuu ce yàp nyor kòŋ, a ku ce kwà'shi ba àmbò yàp nyor. Bèe ce a ce gèe ba buu ce Yʉ' Nyʉ̀ yi kòŋ, a ku ce kwà'shi ba àmbò buu Nyʉ̀. 6Ŋwɛ̀ à ka' lɛ ntee ba à yuu ce yì nyor kòŋ, banɛ e be kwe. Ŋwɛ̀ à ka' lɛ ntee ba à yuu ce Yʉ' Nyʉ̀ yi kòŋ, banɛ e be koni ryòŋ, cu nè rfʉtè-ŋwɛ̀. 7Ŋwɛ̀ à ka' lɛ ntee ba à yuu ce yì nyor kòŋ, banɛ ŋgàŋ be ba ŋwɛ̀ bbàa nè Nyʉ̀ njobè' e ce yu'ni nè mncir Nyʉ̀ ka'. Nè mini-ŋwɛ̀, e mòo à ryu'ni nè mncir anà làr. 8Àde' bèe ce a ce gèe ba buu ce ŋwɛ̀ kòŋ, a gee yuu ce nyor boŋ Nyʉ̀ ka'.

9À ka' ba yi àmbò wèe, Yʉ' Nyʉ̀ yi ka' ba njep wěe mntee ghup, banɛ wèe be kèr lɛ̀ ntee ba à buu ce ŋwɛ̀ e ke kòŋ à rgèe ka', wee be lɛ̀ ntee ba à buu Yʉ' Nyʉ̀. Ŋwɛ̀ à ka' tɛ tʉr Yʉ' Krǎis ka', banɛ ŋwɛ̀ anà yu yì ŋwɛ̀ ka'. 10Krǎis ka' ba njep wèe, ka' wêe mnyor vi kweŋger njobè' buu bbebep wa'a, wèe yu btèe à yʉ' njobè' e gèe wèe à ba byɛɛnì. 11Yʉ' ŋwɛ̀ ce e m fʉr Jisos Krǎis efa rkwe yi ka' ba njep wèe, banɛ ŋwɛ̀ ce e m fʉr Jisos Krǎis efa rkwe be gèe foŋ tɛ wêe mnyor ce àtà vi kweŋgèr na, vi kʉti btèe. E be gèe wa'a à ŋger yi yʉ' ce yi yu njep wèe nà.

12Bfʉr wâ, banɛ yuu mo' yi yu ce sèe be kù gèe, à ke' ba enɛ sèe yu'ni nè nyor, cu ba àmbò e ce kòŋ ka'. 13Wɛ̀ ka' cu ba àmbò ŋwɛ̀ e ke kòŋ, banɛ à be kwe. Wɛ̀ ka' yʉ buu ce ŋwɛ̀ e ke kòŋ à ŋger Yʉ' Nyʉ̀, banɛ à be cu. 14Bèe wɛɛwɛ ce Yʉ' Nyʉ̀ yi ce dùŋshi wowèe nduunjì, a yu boo Nyʉ̀. 15Yʉ' ce wèe à m koni nà yu ba yʉ' ce yi gèe wèe à ba bkwàa tɛ wèe bo ce wɛp buu ka', yu ba yʉ' ce yi gèe wèe à ba ba boo Nyʉ̀. Yʉ' anà yi gèe sèe à ce war nè Nyʉ̀ enɛ̂, “Abà, Yà Tâ.” 16Yʉ' anà ba visèe mntee a ce dùŋshi enɛ sèe yu boo Nyʉ̀. 17Sèe à ka' ba boo banɛ sèe yu bèe ce sèe be ye bti'. Sèe yu ŋgǎa ye bti' Nyʉ̀. Sèe Jisos Krǎis wèe be ye bti' anà àbee. Sèe ka' yɛ ŋgɛ' sèe Jisòs wèe banɛ sèe wowèe be kè sa' fòo.

18Mɛ̀ yɛ mɛnɛ àde' sèe be'nì ŋgɛ' ce sèe ce yɛ sè'ni na à fòo ce sèe be kè sa' na ka'. 19Buu wɛɛwɛ ce Nyʉ̀ à m gèe vi cu a ce kè' nfè' ce Nyʉ̀ be gèe tɛ boo vi a yɛɛti. 20Nyʉ̀ à m gèe buu ca à lo a kʉti à buu bcicì. À m kòŋ buu ca à rkʉti à buu bcicì ka', à m kòŋ Nyʉ̀ enɛ buu anà ba wa'a, a ce kè' enɛ, 21buu wɛɛwɛ ce e m gèe be luŋ efa rbʉ̀tè, tɛ vi bo koni rbòŋ efa fòo ce boo Nyʉ̀ a be koni. 22Sèe rìŋ seenɛ buu wɛɛwɛ ce Nyʉ̀ à m gèe vi ce warŋger, a ce yu' ryaŋ àmbò njeŋwɛ̀ ce e ce luuti muu wa'a, vʉ ba' ntìni na. 23Ku ba ba buu ce Nyʉ̀ à m gèe ce vi ce warŋger ka'. See sèe ce Nyʉ̀ à fa sèe yi yʉ' ce yu rfa entombì nà, sèe ce warŋger enjep ntee foŋ, a ce kè' nfè' ce Nyʉ̀ be koo sèe àmbò boo vi, gèe tɛ visèe mnyor vi lûŋ. 24Sèe ce Nyʉ̀ à gèe sèe à lûŋ, sèe ce kè' nfè' ce sèe be koni buu anà. Ŋwɛ̀ à ka' yɛ yuu ce e ba ce kè', e ker ce kè' yi ka'. Wà' àde' ŋwɛ̀ ker cu à rkè' yuu ce e yɛ wɛɛ a? 25Sèe à ka' ce kè' yuu ce sèe à be yɛ ka', banɛ sèe be kur ntee ce kè' yi.

26Yʉ' Nyʉ̀ foŋ yi ce jà' sèe ce sèe yu nè bsɛ̀-ŋwɛ̀, njobè' sèe rìŋ à rloo àmbò sèe à ba loo ka'. Yʉ' anà yi ke bu' mmbo nè Nyʉ̀ a sěe btù nè rwarŋgèr-ŋwɛ̀, à njì ce àde' ŋwɛ̀ laa ka'. 27Nyʉ̀ ce e ke fyɛ' visèe mntee wɛɛwɛ rìŋ yuu ce Yʉ' yi ce kwà'shi, njobè' yʉ' yi ce bu' mmbo àtu bèe Nyʉ̀ à buu ce Nyʉ̀ kòŋ.

28Sèe rìŋ seenɛ Nyʉ̀ à gèe buu wɛɛwɛ ce vi koni à kʉtì ba rbòŋ nè bèe ce a kòŋ ye, ce yu bèe ce e kɛ' àmbò e m kòŋ à rgèe efa rkɛ̀'. 29Bèe ce Nyʉ̀ à m rìŋ wɛɛ enɛ a be ba yì bèe nà, e m làa enɛ e be gèe tɛ wowèe a feese muu yì, tɛ muu yì anà bo ba muu nlee nè bfʉr magòr. 30Bèe ce Nyʉ̀ à m làa enɛ wowèe a be feese muu yì nà, e m kɛ' wowèe. Bèe ce Nyʉ̀ à m kɛ' anà, e m gèe wowèe a ba byɛɛnì. Bèe ce e m gèe wowèe a ba byɛɛnì nà, e m kù'si wowèe foŋ.

31Àde' sèe ka' ker laa seekɛ àmbò sèe rìŋ buu ca na? Nyʉ̀ à ka' ba à mbèp yìsèe, ŋwɛ̀ ce àde' e ker gee yuu mo' nè sèe ba nda? 32Nyʉ̀ à m kani efa rfa muu yì ka'. E m fa muu yì a sěe btù. E ka' fa muu yì, banɛ e be fa sèe buu wɛɛwɛ foŋ à cicì. 33Ŋwɛ̀ ce àde' e laa enɛ bèe ce Nyʉ̀ à ce a yu ŋgǎa ŋgèe buu bbebep yu nda? Nyʉ̀ a ŋwɛ̀ ce e gèe sèe à ba byɛɛnì. 34Ŋwɛ̀ ce e be làa enɛ sèe à gwè nsa' yu nda? Ŋwɛ̀ mò' yu ka', njobè' Jisos Krǎis ce e m kwe, a ker lo a fʉʉ efa rkwe foŋ, cu sè'ni na à rkoo mǎ' Nyʉ̀, a ce loo a sèe btù. 35Ŋwɛ̀ ce àde' e gapnì sèe efa rkòŋnì ce Krǎis kòŋ sèe nà, yu nda? Yuu mo' yi yu ka', kɛ̀ sèe yu à ŋgɛ' ɛ̀, kɛ̀ buu à tap nè sèe se ɛ̀, kɛ̀ bèe a ce fa sèe ŋgɛ' ɛ̀, kɛ̀ njè ce yaŋ sèe ɛ̀, kɛ̀ sèe à buu bcɛ̀' ɛ̀, kɛ̀ yu rkwe ɛ̀, kɛ̀ bèe a ce yʉ sèe ɛ̀, àde' sèe Jisòs wèe gapnì ka'. 36Yi ku ba àmbò a saŋ mbe Ŋwǎ' Nyʉ̀. A saŋ mbo enɛ̂,

“À ka' ba njobè' wèe,

bèe a tà' yʉshi wèr à mnòŋ wɛɛwɛ,

a ce lòr wèr àmbò njèe ce a ce dù àgho à rsɛɛ wa'a.”

37À ka' ba àmbò buu ce vi koni wèr na, wèr à so vi wɛɛwɛ a misî, njo' ŋwɛ̀ ce e m kòŋ wèr. 38M rìŋ nè mini-ŋwɛ̀ enɛ yuu mo' yi yu ce àde' yi gapnì sèe efa rkòŋnì ce Nyʉ̀ kòŋ sèe na ka'. Kɛ̀ yu rkwe ɛ̀, kɛ̀ yu rlùŋ ɛ̀, kɛ̀ yu bcìndap Nyʉ̀, kɛ̀ yu mnyʉ̌mkà' ɛ̀, kɛ̀ yu buu ce vi yu àgho sè'ni na ɛ̀, kɛ̀ yu buu ce vi bii ka' ba ɛ̀, kɛ̀ njɛ̀ɛ ŋger kɛ ɛ̀, 39kɛ̀ yu ba vì embe bùu ɛ̀, kɛ̀ yu ba vì enjep mʉ̀ nshe ɛ̀, kɛ̀ yu ba yuu mo' efa buu ce Nyʉ̀ à m gèe ɛ̀, yuu mo' yi yu ce àde' yi gapnì sèe efa rkòŋnì ce Nyʉ̀ kòŋ sèe njo' Jisos Krǎis ce e yu Tata nè sèe nà ka'.

Currently Selected:

Ñwaè' Ruêm 8: LNT

Highlight

Copy