Ñwaè' Ruêm 7

1Bfʉr wâ, m ce làa nè wèe ce wèe wɛɛwɛ rìŋ mncir. Wèe rìŋ enɛ mncir vi tʉr ŋger mbendù ŋwɛ̀ ba à nfè' ce ŋgàŋ bii ntèe. 2Sèe lor à rdùŋshì, njeŋwɛ̀ à ka' du bgùu, banɛ e be kù cu ba a nduu yì, ce nduu yì anà a ka' ku bii ntèe, àmbò ncir yi làa. Nduu yì à ka' kwe banɛ e lùŋ efa ncir anà. 3E ka' ker du bgùu a mbaŋrùŋwɛ̀ mò' ce nduu yì ku bii ntèe, banɛ e koo nduu ŋwɛ̀ mò'. Nduu yi anà à ka' kwe banɛ e lùŋ efa ncir. E ka' du bgùu a mbaŋrùŋwɛ̀ mò' à nfè' anà, banɛ e koo nduu ŋwɛ̀ mò' ka'.

4Bfʉr wâ, yi ku ba nè wèe wa' foŋ. À ka' ba àmbò ŋger ce mncir vi tʉr mbe wěe ndù, yi yu sè'ni enɛ wèe à kwe, njobè' wèe Jisos Krǎis wèe yu à ŋwɛ̀ mò'sir. Yi yu sè'ni na enɛ wèe cu njeptii nduu mò' jɛɛ, ce e yu Krǎis ce Nyʉ̀ à m fʉr efa rkwe tɛ sèe bo gèe buu bbòŋboŋ nè Nyʉ̀. 5À m ba à nfè' ce sèe à m ce gèe buu ce e ke kòŋ ba ŋwɛ̀ à rgèe nà, mncir vi m ce nàashi visèe mntee, sèe à ce gèe buu bbebep, buu bbebep anà à lʉsì ba nè rkwe. 6À ka' ba sè'ni na, sèe à luŋ efa mncir. Sèe à kweŋger, yuu ce yi m kur sèe nà, yi ker tʉr ŋger mbe sěe ndù ka'. Sèe ce fà' nè Nyʉ̀ sè'ni na, a ce lɛ̀ mncir vǐ brʉ̀ʉ ce a saŋ nà ka'. Sèe ce fà' nè Nyʉ̀ ba à njǐ nfi, ce Yʉ' yi ce dùŋshi sèe.

7Sèe be ka' làa seekɛ sè'ni à? Wà' sèe be làa seenɛ mncir yu yuu bebep a? Àde' yi ba wa' ka' koo mʉcàr. Yuu ce yi m gèe m ka' riŋ yuu bebep, à m ba mncir. Ncir yi m ka' tɛ bà làa enɛ̂, “Fa gani ka'” ka', mɛ̀ m ba rìŋ enɛ ŋwɛ̀ e ke gani yuu, banɛ ŋgàŋ à gèe yuu bebep ka'. 8À ka' ba njobè' ncir anà, yuu bebep yi konì fɛŋ a gee mɛ̀ ce gani buu njɛ̀ɛ jɛɛ jɛ̀ɛ jɛɛ. Mncir vi ka' tɛ ba àgho ka', buu bbebep yɛɛtì ka'. 9Nfè' mò' à m ba ce mɛ̀ m rìŋ mncir ka', a ku ba ntèe. Mncir vi ka' vʉ̀, yuu bebep yi ba tèe, 10mɛ̀ kwe. Mɛ̀ yɛ mɛnɛ mncir ce a m fa tɛ bèe a bo koni ryòŋ nà, vi gèe mɛ̀ kwe kwe. 11À ka' ba njobè' mncir anà, yuu bebep yi konì fɛŋ a bo' mɛ̀, a yʉ mɛ̀. 12Banɛ buu ca ce dùŋshi enɛ mncir vi yu brara, buu wɛɛwɛ ce Nyʉ̀ à làa vi ba brara a ba byɛɛnì, a bôŋ. 13Wà' yi yu enɛ yuu ce yi m ba bòŋboŋ yi m vʉ̀ ba nè rkwe nè mɛ̀ a? Àde' yi ba wa' ka' koo mʉcàr. Yu ba buu bbebep ce vi m lòr mncir ce vi m ba bbòŋboŋ, a vʉ ba nè rkwe nè mɛ̀. Cena yi m ba wa'a, tɛ bèe a bo rìŋ yuu bbebep. À ka' ba njobè' yuu ce Nyʉ̀ à làa, yuu bebep yi bep ghup nè mini-ŋwɛ̀.

14Sèe rìŋ seenɛ mncir yu ba yuu ce à yʉ', mɛ̀ ba ya ba ŋwɛ̀ ce a fyèni àmbò ŋkwàa wa'a nè buu bbebep. 15M rìŋ mbùu ce m ce gèe buu ce m ce gèe na ka', m ce gèe ba buu ce ya ntee yi ce kòŋ à rgèe ka'. M ce gèe ba buu ce mɛ̀ bàa. 16M ka' ce gèe buu ce ya ntee yi kòŋ à rgèe ka', banɛ cena yi ce dùŋshi enɛ mɛ̀ byemi mɛnɛ mncir vi yu bbòŋboŋ. 17Banɛ buu anà ce gèe ba mɛ̀ ka', ce gèe ba buu bbebep ce vi yu njep mɛ̌ ntee. 18M rìŋ mɛnɛ yuu bòŋboŋ mo' yi yu njep mɛ̌ ntee ka', m ce làa ba buu ce m ce kòŋ àmbò ŋwɛ̀. Ntee à rgèe yuu bòŋboŋ yi yu njep rbʉ̀, mmbo à rgèe yuu anà mi ba ka'. 19M ce gèe yuu bòŋboŋ ce m ce kòŋ à rgèe na ka', a ce gèe ba yuu bebep ce m ce kòŋ à rgèe ka' nà. 20Àmbò m ce gèe ba buu ce m ce kòŋ à rgèe ka' na, ce gèe ba mɛ̀ ka', ce gèe ba buu bbebep ce vi yu njep mɛ̌ ntee.

21Banɛ mɛ̀ yɛ mɛnɛ yi yu sè'ni àmbò ncir wa'a enɛ m ka' ce kòŋ à rgèe yuu bòŋboŋ, ku vʉ ba yǐ bebep njep mɛ̌ ntee. 22M ce yu' rbòŋ nè mncir Nyʉ̀ enjep mɛ̌ mbùu ntee. 23Ka' yi yu wa'a, mɛ̀ yɛ mɛnɛ ncir mo' jɛɛ yi yu njep mɛ̌ blɛɛ, a ce mà' bìr a ncir enjep mɛ̌ ntee, a gee mɛ̀ ba ŋkwàa nè ncir yuu bebep ce yi yu njep mɛ̌ blɛɛ nà. 24Mɛ̀ bʉ ghup. Ŋwɛ̀ ce e be jà' mɛ̀ efa nyor ce e be gèe tɛ m kwe na yu nda? 25Sèe yoŋshi Nyʉ̀ njo' yuu ce yìsèe Tata Jisos Krǎis à m gèe. Banɛ yi yu enɛ m yu ŋkwàa nè mncir Nyʉ̀ enjep mɛ̌ ntee, yà nyor à ba ŋkwàa nè ncir yuu bebep.

Currently Selected:

Ñwaè' Ruêm 7: LNT

Highlight

Copy